Nettmuqul tudert-nneγ, neqqar-as wissen ma abrid neḍfer d win akken i yessefk an-neṭṭef. Nettmuqul agdud-nneγ, ileḥḥu akka bwanka. Deg-neγ, llan wid i yebγan ad idiren akken bγan, war ma yenna-yasen yiwen ayγer akka ? Llan wiyaḍ, tteqliliḥen, acku xas bγan ad idiren akken bγan, rran ddehn-nsen ar itafaren-nsen.
Idles-nneγ, yal wa d acu yebγa ad ikess deg-s, d acu i yebγa ad yeğ, ad yidir deg-s. Yal wa d sebba i yesaa ...
Ar tagara, d acu ara a neğğ, d acu ar a nḍeqqer ?
Tameddurt, tettmeckukul γef wemdan. Mi yiγil ifhem timsal-is, yettaf tella nnig-es. Tameddurt, mačči d tamellalt kan, neγ d taberkant kan. Yal wa anwa ini i s-yegga...
Sif ay allaγ ad trebḥeḍ
Ma yella wacu i d-yeqqimen
Aγerbal ar a tesqedceḍ
D iswi-k a k-t-id-iseknen
Γur-ek kan anda tettecḍeḍ
Yak krad iγ-d-iṣuḥen
Amezwaru lebγi-ines
Ad iqerraa ibruryen
Di leqdic-is yettwalas
Ad iglu s ikwerrayen
Mi dduklen d aγrum n iγes
Tettban-ed tudert yemmeckuklen
Win γur-es ur s-gin azal
Itafaren-is fessusen
Areqqaq deg-s yettaaddi
Yedda-tt γef wayen i yzuren
Wiss ma igerrez wayagi
Mi yedda ulemmas d iwernen
Wis krad gan-as can
Nnan d netta i ten-yifen
Yegwra-yas-d kan ad yefren
Ad d-yefk seksu ar a meḥṣen
Imcercer kksen-as amkan
Win n usaaddi ttun i yebren
Nḥar acu ar a nezwi
Ssawqen-aγ wid iγ-yifen
Ḍallent-agh ur nettwali
Anwa aγarbal i ywulmen
Remdet ṣṣaba n tmuγli
A wid i ylemden fetlen
Farida At Harun ( 11-2006 )
Aγrum iγes ( anda nniḍen qqaren : tamtunt, aγrum n uḍajin )