D tukksiwin n serr i d iswi-nsen imi i d-gren ad sekren tiγremt n Lezzayer d tamaneγt n idles aεṛab teγzi n useggas 2007. D ayen neẓra dakken Lezzayer d tamaneγt n idles aεṛab 50  iseggasen aya tura, seg wass mi i s-yenna Benbella : « nekni d aεṛaben, » kraḍ iberdan imi tefra tegrawla mgal tahrest tafṛansiwt. Maca, d rreggmat, d tiyita, d neqqma, d aksan, mgal idles amaziγ, mgal idles azwaw, mgal imaziγen, mgal izwawen, i d-iswi nsen imi i d-gren ad gen amenzu n yennayer d ass amenzu n useggas n idles aεṛab deg tmurt n Kusila.

Gar ikabaren d tdukkliwin, anagar Amussu n Timanit i d-isseknen urfan-is mgal tukksa-ya n serr. Deg ulγu n Umussu n Timanit i d-yeffγen 15/12/2006, yedda-d: ...imaγnasen iqbayliyen nnan-d dakken idles aεṛab ur iggujl ara seg wallalen deg tmurt n Lezzayer neγ deg tmura taεṛabin i wakken a s-nbudd aseggas s teγzi-s deg tmurt umaziγ i ttnadin ad smenṭgen diγ ad cemmten.  Afran n wass amezwaru n tecmett-a deg umenzu n yennayer, iswi-is d anğaε akk d usmeεṛeq neγ d ureyyeε n tmuγliwin n imaziγen. D idles n imezwura nneγ ittwaṛekkḍen, ittwaεefsen, seg tmunent n tmurt ar ass-a i yezwaren i werfad n wazal-is akken ad izux mmi-s n tmurt s uẓar-is i d-ittwakeflen. Annect-ayi yesskan-ed dakken s umussu n timanit newwi abrid yessawaḍen ma nebγa a s-nerr azal-is i idles azwaw akk d yidles amaziγ s umata.

Ar ass-a werεad kksen asirem dakken zemren ad snegren idles nneγ. Yessefk ur nttağğa ara iman nneγ ad aγ-yawi yiḍes. D ayen-nni i d-ggunin nutni. Ẓran dakken s iγerbazen, d leğwameε, d temεemṛin, abrid d agessar, ṛebbi nsen yefka afus. Ssedhayen-aγ tikkelt tikkelt s sin imeslayen γef tmaziγt tutlayt taγelnawt acku terra-ten tmara, maca iswi nsen ur ibeddl ara. Lemmer dγa ibeddel, tili nufa yella kra igan i idles amaziγ umi ttwakksen wallalen. Ayen ittwaxdamen ass-a itekk-ed sγur tarwa-s akken kan am zik. Mači kan d allalen ur s-fkin ara maca skarayen-as uguren akka am win yurzen ar isekkilen n tira. Akken i s-tenna tteryel: ma γas tawwurt teldi, ssekk-itt-id seg tzulixt.

Winna