Yella yiwen westeqsi yezgan segmi tebda Yemma-s n ddunnit : Ma taẓuri γur-s yeswi, ma γur-s yizen i yemdanen neγ akken qqaren, ma taẓuri i tẓuri, ma tella kan i yiman-is? Ğamal Benεuf yerra-d awal i westeqsi-yagi, imi tasekla ula d nettat d taẓuri. Ungal-ines γur-s yiwen wazal aseklan meqqren, imi yesseqdec deg-s taqbaylit ifernen, yessaf-itt, yessekcem deg-s awalen imaynuten, yerna γas akken, yezmer wemdan a t-iγer s tefses ; maca annecta mačči d ayen yezwaren. Ungal-a yesskanay daγen tamusni umaru deg wayen yeεnan akk tilufa tigraγlanin, ama d tasekla, d idles, d amezruy neγ d tasertit, ayagi yakk yurzen γer temsalt n yili neγ n tamust Imaziγen. Ugar γef waya, Ğamal Benεuf am wakken d agezzan imi yemla-d, yessawel-d γef temḥeqranit tameqqrant n yemdanen sγur yemsulta d tedbelt di tmurt, imi ayen yeḍran d wayen iḍerrun ussan-a γur-neγ, d aselkem n wannecta. Tasekla dagi d asulef daγen i umaru ad yessken tiktiwin-ines γef ddunit. Maca tudert war tayri - neγ takesna - ur telli, γef waya iḥulfan-agi mmugen d tinelli n wungal. Taggara d asirem, d tiγri i tayri ger sin yemdanen, maca ahat i talsa yakk.
Ğamal Benεuf yura yagi isefra zeddigen yerna ttazzalen am waman, maca ungal-agi d amezwaru-ines. D amezwaru maca d tasmurest ara yeqqimmen di tsekla tamaziγt.

Kamal u Zerrad
Yulyu 2001/2951




Ğamal Benεuf, ilul ass n 07/05/1960 deg Iγil-εli (Bgayet), yettidir deg Wehran iγer d-yusa d bab n sḍis iseggasen.

Ğamal Benεuf, d ameγnas n Tmaziγt n tugdut akk d tlelliyin uzayez, d amaslaḍ amesnulfu n terbaεt Imnayen n Numidya di 1990, n tiddukla asirem 1989, yelmed tamaziγt γer Kamal u Zerrad, yeḍfer akk timsirin i yefka si 1989 ar 1991.

Ğamal Benεuf d amedyaz, yura ddeqs n tinawin d imagraden deg tselliwin d yeγmisen i d-iteffγen di taγult n Tmaziγt.