Ungal amezwaru* s teqbaylit yura-t Racid Σalic, isemma-yas Asfel , tazwart sγur dda Lmulud at Maɛmer at yerḥem Ṛebbi. Yeffeγ tikkelt tamezwarut γer tizrigin Federop deg 1981 di temdint n Lyon di Fransa . Deg-s 139 isebtar .Isbn 2-85792-010-5 .Yura daγen ungal nniḍen s wazal-is isemma-yas Faffa deg 1986.

Mačči d tattut i nettu neγ d astehzi i nestehza deg umeγnas d uselmad-a amqran n tmaziγt maca ur d-γlin ara idlisen-ines deg ifasen-nneγ taswiɛt-a akken a d-nawi ameslay fell-asen akken iwata.
Am akken ur nettu ara wiyaḍ am Saɛid Saɛdi yuran ungal Askuti deg 1983 d waṭas nniḍen i inejren abrid i wid yettarun ass-a.

Racid Σalic am akken id nenna d aselmad n tmaziγt , yessexdamen "tapidagojit"  igerrzen .Hatan yiwen udris wezzilen γef tseftit s nnecraḥa :

Akli : Nekk ad seftiγ amyag ečč deg yizri, nekk, nekni, nekenti, kečč, kem, kunwi, kunemti, netta , nettat, nutni, nutenti. Ma d kečč a Yusef sefti-d amyag sew deg yizri.

Yusef : Nek fudeγ, kečč teswiḍ, netta yeswa, nettat teswa, nekni neffud, imi fudeγ, nekkenti neffud, kenwi teswim….

Akli : Amek akka? D acutt taseftit-a ? la teserwateḍ .

Yusef: Nniγ ak ay Akli , nek fudeγ , kečč teswiḍ…

Akli : A yageswaḥ , a yajelwaḥ, fkiγ-ak d amyag sew , kečč tuǧewḍ-iyi-d fad?!

Yusef: Aggad Ṛebbi, amek ara bedreγ tisit nek fudeγ?!

Racid Σalic



*ma yella nekkes Lwali n udrar n Belɛid at Σli

Sγur A.R 23-09-2005