Aseqqamu amatu n tidukla tagraγlant n tussna n imtiwgen (International Astronmy Union ) yekkes Bluten seg wegraw n imtiwgen . 2500 imusnawen yemlalen di Praha di tmurt n Ccik frant-tt s tmara, deg wayyur n γuct yezrin, akken ad yettwakkes seg wemkan d-yeṭṭef segmi t-id yuffa umussnayyur amarikan Clyde W.Tombaugh deg 1930.
Imussnayyuren ugin tikti n imḍebren n I.A.U yebγan ad bḍun imtiwgen γef sin : imeqranen d imejtaḥ .
Akken ad tettekki tafekka deg wegraw n imtiwgen yessefk tura ad tilli :
tafekka igenwan timḍewwert tettezzi i iṭij, tesεa tazmert neγ tadusi as ttezzin itran yellan tama-ines .
Ceres d UB313 diγen s tbadut-agi tamaynut tettwakkessasen ihi tegnit ad qqlen d imtiwgen ula d nutni.
Di tazwara I.A.U tebγa ad tessimγur anagraw aniṭij ar 12 imtiwgen, tam (8) yellan yakan rnu-yasen kraḍ (4) imejtaḥ, d Charon d-yeqqlen d agensaw (ayyur) n Bluten.
Kra imnuda qqaren dakken Charon, Bluten d Triton (ayyur ameqqran akk n Nebtun) d iẓra n ubagus n Kuisper. Weqqmen s weẓru d wegris ayen i rennun i tikti-agi.
Ayagi ad yerr Bluten yellan mectuḥet γef wayyur-nneγ, d itri ameqqran akk d win yettfeǧǧiǧen ugar deg ubagus n Kuiper.
S isali-agi agraw n imtiwgen d wa :
Markur, Wanes, Akal, Meγres, Yebter, Wasturn, Wranes d Nebtun.
Wissen tura ma d-teqqim akka neγ ad affen wid yebγan ad yeqqim Bluten d amtiweg, abrid amek ara terren ar twacult-ines tamezwarut .
Amor REKIS
02 furar 2007
amawal :
amtiweg :tafekka igenwan timḍewwert tettezzi i iṭij, tesεa tazmert neγ tadusi ad ttezzin-as itran yellan tama-ines .
amedya: Meγres, Wranes d Nebtun d imtiwgen n unagraw aniṭij.