Tuffγa
Ihi acu-t wass nni n tazwara n unebdu? Ass-nni akken mi s-nniγ ad inigeγ ar leǧnas. Ass nni deg refdeγ tabalizt; leεqel ur yeddawar ur yelli kra. Tabalizt tazegzawt walaγ yuli-tt uγebbar, tenhaf deg webrid n Taddart-Tizi-Mizumblanc. Ulac aṭas n lγaci d lewhayem; nekk γileγ Mizunblanc ad tt-afeγ tettfeggiḍ d iminigen. Ur fhimeγ akk ara amek lsiγ; tikwal ttwaliγ iman-iw s teksiwt n tmurt daγen smektaγ-d belli heggaγ-d akustim d tebluzt taxuxit, isebbaḍen iberkanen γelqen xas akken d anebdu..Inig ar leǧnas macci d aqesser a yelli. Zun akken,...atan ttwaliγ iman-iw amzun deg usaru.
Ruheγ ad zegreγ ar s amkan unerkub yugi ubulis nni, yessekfel di lqec-iw, ikkes iyi lekwaγeḍ-iw si gar ifassen, bdiγ la ttmeslayeγ ṣṣwab d lmeεqul ulac ; ziγ leḥdaqa nni i aγ-slemden ur tufi ara amkan-is dagi. aten-in usan-d wiyiḍ acu kan macci d ibulisen n Lezzayer d wid n Faffa, niγ γileγ fkan iyi-d ttrih ad d-aseγ ar tmurt s Lbiza n tuγalin....tagi acekki-tt. Amek ? Msefhamen felli?
Bγiγ ad suγeγ bγiγ wi ara d-yeslen amek ttiṛṛikeγ, wid yellan dinna rran iman-nnsen ur i d-walan ara , wa yettmeslay taεrabt wa d taqbaylit wa taεrabt s teqbaylit, tugti d tafransist..n Lezzayer. Qimeγ tḥeyyreγ akken di rreḥba ucukket d nnhati. Yusa-d yiwen akken yuẓẓaf-d imir: "lkaγeḍ agi inem txuṣ-it yiwet n tfagurt (tamber) n tuγalin macci dagi ara tt-id-taγeḍ , macci dagi ara tt-id-taγeḍ, lqanun a madmuzil lqanun!
Ur zriγ akud anda yedda, ttuγ akk tella ssaεa deg ufus-iw. Walaγ ibda yiḍ, iγelli-d, imdanen la ttanqasen, la txellu !
Ciṭ kan akka deggreγ tit-iw ar berra n ladwan walaγ baba aεziz yettwehhi-yi-d akin, amzun ibγa ad id-isken kra, tella tewwurt n ljaj ......yettmeslay iyi-d ur s sliγ bunt...yesskanay-d yiwen webrid zemreγ ad ffγeγ segs ...meεna, acu d-yewwin baba dinna niγ ur d-yeddi ara idi ! mi d-fγeγ axxam ur s-nniγ ma ad d-uγaleγ neγ ur d-ttuγaleγ? ur zriγ anda d-yedda, d gma ageswah id-yeddan yid-i.....ur neswi ara ula d lqahwa.
Ferheγ tufrar! Ad neslek. Ziγenni a yelli wa yettidir wa yettaanni wa ittgani.
Ruheγ s tγawla ad ffγeγ seg uṭiṭuc nni amcum yi-d-yemla baba,nniγ-as meqqar ad s-iniγ qim di lehna... ulac-it ...iddem-it wadu neγ wwint-tt tewkilin...dγa sliγ i usiwel s yisem-iw. Winna d-yessawlen iban d aqbayli, ssakin daγen ata yiwen yeqqar "Memnuε Madmuzil memnuε! Lqanun a Madmuzil!
Usan-d.
Wwin iyi...
Ppin- iyi.
Cwi kan d zun akken, zun akken d slalent tirga yewwin achal d ilemzi, acu kan TIKWAL tirga mxalfa.
Asuffeγ di lxater n wid s ibeddlen udem i M Leqwas"
Nacira Abrous, Aix en Provence 2 dujamber 2011