Inna-yas :

 Ur iban d acu γaγ, d nekk ay d kemm neγ d kemm i d nekk? Ur zriγ amek d-nessawed tameddit, ur cfiγ melmi nemlal wala melmi ur nettemlil. Akka i d-tus

Terra-yas :

Ayen d-i yuγen tufa-t tasa-k, ayen  k-iceγben  ḥulfaγ-as, ayen k-yesnuγnan yesnuγna-yi.

Akud iga iḍrefan deg tuγ tmes, awal iγza tiregwa deg yecercer imeṭṭi, irucc annar deg teṛsa taḍsa rreḥba, tafekka tessufeɣ a3bar, nekk uγhaleγ d kecc.

Yal tagnitt s wacu d-tegla : anecreḥ, fad, cna, tissit, asmuḥyet, asbuγer, anadi γef lexyal, aman izeggaɣen, izra izegzawen, aḥsab n yetran, amerreḥ di M Leqwas, tira s yizelbac, aseḥmu ar tafat n tziri amma qqurrfen iḍudan.

Mi kkreγ ad nnejliγ akken ad k-ttuγ ad greγ tiṭ ar deffir, qqareγ-as d tikkelt taneggarut.......ad d-uγaleγ am tin yettgallan tḥennet, tessetha s tisselbi-s.

Macci d kecc i  yi-nγan s ttxil, d nekk i tesskew taḍsa-k.

Lehmala-k icuban tadukli, zeddiget am waman, d kecc id-yennan. Ma d nekk,  ufiγ-tt.

Nnan-as :

Aqlaγ nettnadi abrid ara naγ, win yessuffuγen xas ula zaylellu n usirem. Nettawi nettarra,  neggar azeṭṭa. Teḍra yid-neγ am tinna n wuccen Agawa asmi d-yeffeγ seg teẓgi, yufa-d iman-is deg Tizi n At εica,  ad yerr ar Lezzayer neγ ad yuγal s Igawawen? Igra yaγ-d kan.......... usefru.