Si ger  tullizin id yefγen deg wammud-a , nefren-awen yiwet sγur Yazid Bulma . Tullizin n Yazid (War isem, Ammer… d Tiγimit d lbaṭel),  d Smaεil Σebdenbi (Lunğa, Kker a mmi ) cubant isefra am akken ara twalim deg tullizit n wass-a d tin id newwi ass yezrin.D tidett d tameqqunt n tjeğğigin i win iten yeqqaren( γas akken ur nefhim ara acuγer awal: tijeggigin yers deg wezwel s usekkil “z” ) . 

Tikwal dγa, Smaεil yessedad ula d isefra am di tullizt “Lunğa”, am akken yettuγal ar tayri-ines tamezwarut : tamedyazt.

Γas ad ters tmeqqunt n tjeğğigin, taγuri tekfa, taqsiṭ ad tidir deg wallaγ n imdanen , yal wa amek yettwali tettkemmil tullizt.

Amor Rekis

                        Tiγimit d lbaṭel

Yiwen wass tidett tleḥḥu d webrid-is, ata lbaṭel iluḥeq-itt.

-Ass-a ad-neqqim a tidett, ad d-nini tiquranin, aεyiγ, anida ddiγ deffir-I, anda tewwḍed-d, ma subbeγ tuliḍ, ma uliγ tsubbeḍ. Ass-a ad tt-nefru; ini-d mačči d lebγi-m a tidett ?

-Qrib ad ttenger ddunit. Ayagi d-yefγen seg yimi-k yessefraḥ ad yili imeṭṭi, anda telḥiḍ negreγ, anda truḥeḍ d axeṣ̣ṣ̣ar, yal wa amek ara isuγ, wa ččan-t, wa ufan-t, wa nγan-t, wa neṭṭlen-t d amuddur, wa yettru wa yettuγu. Yal wa d acu t-yuγen, ansi bγiγ ad –d flaliγ a k-afeγ a lbaṭel deg webrid-iw, cerweγ-tt merriγet akken ad rreγ tikerkas d ṭṭlam deg idis, akken ad d-tḍil tafat-iw . Ur teshileḍ ara, d axṣ̣im meqqren .

-Ad neqqim ad nefter, ass-a d tameγra, ur nettemfraq ara alamma…dγa ad nekcem γer dagi kan ad nefter.

Tidett tebγa ad tesefhem lbaṭel belli ad as-anfen ar ass nniḍen imi ulac γur-s idrimen, maca lbaṭel yeṭṭef deg wawal-is, imi s γur-s ara fetren, d netta ara tt-yefrun “akken yeqqar”.

Tidett d lbaṭel qqimen ad ččen, awal yettawi-d awal, seg umeslay γer wayeḍ, ur ssusmen ara armi yekfa wayen d-yersen. Lbaṭel yekker iruḥ ad ixelles s axeddam-nni, yenna-yas kra imeslayen I uxeddam-nni dγa isuγ:

-Amek akka ulac ṣ̣ṣ̣erf ?

Ata yuzzel-d umεellem . udem-is d azeggaγ si leḥya:

- Ṣṣert-aγ, d acu yellan akka ?

Axeddam s lxuf I ihedder, yessehfhem amεellem belli ur yelli I s d-yefka, yerna tidett attan dihin I teqqim. Amεellem iqelleb γer tidett akken a tt-yesteqsi, maεna lbaṭel yezwar-d γer awal:

-Ha! ha! Tidett ma tenna-d tidett ilaq a t-xelleṣ̣ amur-is .

Yazid Bulma