Amsebrid

-- Ay amsebrid i d-yuɣalen,  acuɣer i tkerseḍ anyir, acuɣer i tmedleḍ allen, tezziḍ udem-ik ɣer deffir ?!

Ur tufiḍ ar ass-a, ayen akken i tettnadiḍ, neɣ tḥemmleḍ lmeḥna, tḥemmleḍ ad tettcaliḍ ?!

Ẓriɣ-k ilindi lweqt-a, di tegrest mi qessiḥ usemmiḍ, tessutureḍ lehna, deg ijifer-is ad teddariḍ, deg uɛebbuḍ ur tecliɛeḍ ara, ur iban ma telluẓeḍ neɣ terwiḍ !

Deg wallen-ik yiwet lbaḍna, teddukul yid-k anda ma telliḍ, ur iban deg-s kra, meqqret ay amsebrid teḥṣiḍ, ay amsebrid qqim da, ahat tikkelt-a teɛyiḍ ?!

Ugadeɣ ad taker lmut, tarwiḥt-ik ger iberdan, uqbel ad temlil tafsut, tin ideg cebḥen wussan, ugadeɣ asemmud a k-ifut, ad tendemmeḍ ɣef wayen i k-yeǧǧan, ay amsebrid i idlen tagut, mel-iyi-d d acu i k-yecqan !

Ini-yi-d d acu i teẓriḍ, di yal taddart i tkecmeḍ, ansa akken i d-tekkiḍ, acuɣer din ur teqqimeḍ, din anda akken iḍelli i tensiḍ, acuɣer mi d-yuli wass trewleḍ !?

Ay amsebrid lli-d imi-k, ini-yi-d kra imeslayen, anef ad sleɣ i ṣṣut-ik, ad gzuɣ d acu i k-yuɣen, mel-iyi-d tadyant-ik, ammer deg-s udem yessefraḥen !

…Amsebrid izemm allen-is, amzun yeṭṭes d netta yuki, tuli nndama udem-is, ɣef wacu yendem ur yeẓri ! Leḥzen yekres anyir-is, deg yimi-s rẓagit nnhati!

Amsebrid i yelsan ijerbuben, yeɛkef weɛrur-is yeɛya, ẓẓayet ttɛebga i s-ssbubben, ɣas ma ur yeddim kra, d ussan i t-irekben ttnernin ur nqisen ara! Tifexsa lsant iḍarren, seg wudem terwel taḍsa!

Amsebrid ur yessawal, tutlayt-is d nnhati, yes-sent i iẓeṭṭ awal, ulamma izemm yimi, deg wul-is frant temsal!!

-- Ay amsebrid wi k-ilan, ansi d-yekka uẓar-ik?!, seg-neɣ neɣ seg-sen kan, neɣ d wayeḍ laṣel-ik?!! Ay amsebrid i yeɛyan, efk lehna i yixef-ik!

…Amsebrid d-yusan si lebɛid, d awḥid ur yesɛi lwali, yernu ass-nni d lɛid, tumert tezga ɣef medden irkelli, netta yensa i usemmiḍ, yernu ur s-d-iṣaḥ imensi, fell-as yettiɣzif yiḍ, tafejrit ur d-teflali, ul-is yettijjiq yettɛeyyiḍ, meɛna ḥedd ur s-d-yesli!!!

-- Ay amsebrid ayen akka? Efk-as lehna i terwiḥt, bru-yasent merra i tlufa, ammer a k-d-tḍes teswiɛt! Ay amsebrid anef i timerẓuga, af-as-d i wul-ik talwit!

…Amsebrid mačči n da, yugi ad yefk laman, yeffer deg wul-is lbaḍna, yugi a d-yini d acu i t-yecqan, tasusmi-s tcerreg asigna, tezger akin i igenwan, ɣas yessusem maɛna…nekk ẓriɣ tasusmi-s d anzaten!!

-- Ay amsebrid a k-id-steqsiɣ, ttxilek ur yi-teffer ara, sel kan i wayen ara k-d-iniɣ sɣur-k ttrajuɣ turda, mel-iyi ma yella gziɣ, neɣ tigzi-w a ziɣ d tuccḍa!

Ay amsebrid nekk nniɣ, kečč tettnadiḍ awezɣi, ayen akken ula d nekk ttnadiɣ, asmi akken i ssneɣ tayri! Teǧǧa-k targit ttwaliɣ, tedda d wussan n temẓi, kečč teṭṭafareḍ-tt a ziɣ, tugiḍ ad tamneḍ dayenni!

Ay amsebrid ssneɣ-k, ɣas kečč ur yi-tessineḍ ara, ɣas ur d-tenniḍ fehmeɣ-k, tezdi gar-aneɣ lmeḥna, ini-yi-d ma yella ḍelmeɣ-k, neɣ d ṣṣwab wayen d-qqereɣ akka?!

…Amsebrid ur d-yenni, ur yessin ad yemmeslay, ur yessin ad yelli imi, ur yuɣ tannumi deg wawal yesseftay, amsebrid iḥemmel tasusmi, d nettat iɣef yessefray!

Amsebrid yessusem, ur d-yenni ma d tidet neɣ d tuccḍa, ayen i isell d wayen yeẓra yeggugem, ur t-id-yettader ara, amsebrid amek ara yexdem, atan yuli wass tura?! Yezdi lqedd-is yeddem, ɣef tuyat-is lmeḥna, yektal abrid ɣas yessawen, ur yeẓri ula anda!!!  

                                                                                                                          Tanaṣlit.

Tanmirt taεlayant i weltma (neγ gma) Tanaslit ,ad ak_yeεfu yillu

Anwa iyyu-agi a d as-yeεfun?
Dacu texdem εni?

Azul a yiwen,
A keččini, ar am ackik, im' i γ-id-tesenṭṭaqeḍ, tenniḍ-ed: D acu, i texdem? anwa iyyu agi ar s-yaεfun...!
... aaah..,ammer, akk Imaziγen ssnen ad arun ad eγren Tamaziγt am Tnaṣlit, tilli tura, yeṣṣaḥ-itt-id wexxam,
am nettat am tiyaḍ ur tettilli yara d amsebrid yeddan ḥafi di tegrest, tedduri, tessader aqerru, εerqen-as lehdur ger medden; Ma di ṛṛebbiten! Yal yiwen amek isen-iqqar:Wa iyyu, Illu; ṛṛebbi, Allah, Jihuva,Dieu, God, ar tigra;Maca, zik akken i d-qqaren γef Imaziγen:
Yal taγawsa, fkan-as Ayuc, am useklu, adrar, ifri, tiliwa n waman, iṭij, akal, deg wasmi, i sen-yessuli, Ugellid Tacfint tiγremt imi yeqqar Marakec, zeεma, mara ayucen uγalen d yiwen: Yakuc

Σni, terfiḍ fell-i? mi k-in-nniγ, am acki-k,
nekk ar γur-i, awal agi yelha, am win ara yinin:Kečč am lexrif, am tamemt, neγ, d argaz lεalli, awal-is, smuzguten-as medden, tteddun yid-s ar wegraw,
(Win i d-issegrawen agdud);
Anaγ a gma, tasusmi diri-tt? aql-iyi, am win yettrajun Ayiwen. Suref-iyi, ma yella deg wawal nniḍen, daγen, i ccḍeγ.

A Muhabdiki,

ssneγ ameslay-agi, gziγ daγenanamek-is, tanemmirt!
Ihi kkes ugur γef wul, di tmurt n yeqbayliyen i d-kkreγ, ṛwiγ aḥnunef di tejmeεt.

Azul,
A Muhabdiki!
"win yettagaden yiwen,
ur yettagad yiwen;
ma teddiḍ d igawawen, γer zdat ad ak-d-ssemγin imeẓẓuγen, γer deffir ad ak-d-ssemγin acciwen" I yenna Ccix Muḥend (kra ur t-ḥemmlen ara dagi!)
Nniγ-ak! A Yiwen-agi d amcum i yugaren imcumen!
Awlawal

Ihi, tfra tfuk, a gma a Yiwen, ul-iw yuγal ar wanda nniḍen, wissen ma mazal tajmaεt nni n zik? anda, llant tiktiwin imezwura-nneγ, amdya:Tidak n wAksil yemuten deg uwines wis sa, γef iṣuḍaf d wansayen n Tmurt. (Neγ tura yeγli wezger aḥlima) waqila, tura uffan-d abrid Iεuqbiyen! i wakken, ad beddlen akk ayen i d-yeqqimen,
azul ay Awlawal: mačči d Igawawen i ttuggadeγ, ad wigi nniḍen, m'ara nehzel kan ad d-γlin fell-aγ am igerfiwen; i laεnaya-ak: a Ccix Muḥend Welḥusin, S awawal idekkem, yiwen uεuqbi di Mezγena, winna akken i s-yeqqaren, lğameε n Sidi Abdereḥman, d leḥram ad tzurem neγ ad tẓalem deg-s. Acku ddaw-as, εeddan ijaεbuben n waman iwesxen; Ccix Muḥend, Yenna: netta aεebbuḍ-is yeččur d ijaεbuben iwesxen, yernu ihedder-aγ-id γef ayen yelhan neγ diri-t

Tidett tqereḥ lekḍeb ijereh...amesebriḍ yextaṛ tasusmi, im-i yal yiwen amek yettmeslay u yeqer d nek(ni) kan i yesεan azref, γer γurneγ id tegra tidett...amesebriḍ adyili εarqenttas ggar n kunwi d nutni...lemmer ttarun wid ur neγṛi, tili gedac n ttemsal ar adesefrurin...

Tanemmirt a Tanaṣlit.

telha tanmirt

Tanemmirt i tnaṣlit γaf tinin-is di tullist. Tanemmirt, acku grabent-ed annect-a n tiktiwin d yiwenniten s γur-neγ.
Aḥuddu aḥunnu fell-aneγ
Mexluf