Am tmeqqunt n tzeǧǧigin d ammud n tullisin sγur Yazid Bulma d Smaɛil ΣEBDENBI, id yesezreg useqammu unnig n timmuzgha aseggas-a (2006). s uɛemmed n tesγunt ABC Amazigh d weγmis Tamurt i-ten isufγen tikkelt tamezwarut iseggasen izrin.

Ad nezwir assa s tullist "kker a mmi" n umeddakel nneγ Smaɛil .Deg ussan i d iteddun awen d nernu tayeḍ sγur mass Yazid Bulma .
A.R



Kker a mmi



Γas akken mazal tebrek n yiḍ tuγ akk tizenqatin yeẓlen ta γef ta, bḍant tamdint-nni d tiγemmar, maca yuli wass, tamdint-nni, ǧǧan-tt-id imnekcamen yefγen tehtuta yakk. Taẓeyt imezdaγ-is-terfed ayen umi ur tezmir- taẓeyt daγen n iseggasen, fkan-as udem ikemcen n temγart yeṛwan lḥif .

D tidett, di tegrest, yezga yiḍ d aγezfan. Itran nennum nettwal-iten di tebrek n yal iḍ uγen igenni am tfelwit d-yurew unaẓur, deg igenni n wakud-agi, itran fren deffir n weqbar n usigna aberkan yeččuren d aman .

Beṛṛa, deg ukud am wa, nnda yekkat s ixsan. Tagrest aseggas-a teqseḥ, asemmiḍ-is iteqqes. Aḥlil, aḥlil a win ur nesɛi cwiṭ n wexxam ideg yezmer ad yeẓẓel iḍarren-is. Am akken qqaren zik-nni : -win yesɛan taxjiṭ yaweḍ-itt, ma ulac yeγz-itt. Awid kan anda a yeffer wemdan iman-is γas ad yili d aẓekka. Taguni beṛṛa tewɛer… γas naddam ijebbed deg-k am tnifift, mi truḥ ad k-teγḍer tnafa, ad k-id-yesduqqes ucelyaḍ-nni, am usennan a yentu deg weglim-ik. Akka kečč d usemmiḍ d amennuγ alamma yuli wass. Ur yelli wefran wis sin i s-qqaren wid yennumen d umenṭer.

Deg uraǧu n tafrara, melmi ad d-iḍil yiṭij s tafat-is yeḥman, itekkes usergel i yimi, ssin akin, itetti yiles n wemdan am umeslub ara yettmeslay. Si lqaɛ n wanu n yiman a d-yali wawal d asefru, yal asefru d tamacahutt iɛeddan γef uqerru-yagi yefγen iberdan. Akk tiktiwin ttefruruxent…Tucmitin tikwal, tiḥuskiyin si tama nniḍen, am yiḍ d wass a ttemsetbaɛent, akken a tezzint deg uqecrur-ik yeqquren alamma yuli wass .

Ur ẓriγ ma d yir targit i yurgaγ neγ dreγ iḍ ger wuḍan n weγref-iw yessumten lhem-is, netta yeṛwan araǧu. Nekk tura, di teswiɛt am ta ttfaraseγ tuqqna n tiṭ ma rniγ-tt deg wusu d usummet-is yeḥman. Maca yewweḍ-d wakud akken a d-kreγ, ad sfezwiγ γef iman-iw. D tiγri n yemma, selleγ-as amzun akken tekka-d akin seg ugemmaḍ neγ tuli-d seg wanu, teqqar-iyi-d s leḥder kan : -kker a mmi, yuli wass.

Teγli-d tduli, tufa-yi-d yemma nnḍeγ γef yiman-iw am inisi ma yekmec iman-is γer daxel, qqleγ d ddabex. Ay huh! Kerfeγ akk, ufiγ-d iman-iw d asemmaḍ am win yemmuten. ẓẓleγ din am tqejmurt yeqquren, igzem-iyi usemmiḍ. Dehmeγ-d afus-iw γer deffir, sferfdeγ, jebdeγ-d taduli γef iman-iw, uγaleγ s iḍes. Ccah, ufiγ talwit. Ggummaγ a d-kreγ, lemmer mačči d yemma i d-yuγalen, tikkelt-agi, thuc-iyi akk, tilli tanekra ulac.

Uǧweγ-d cwiṭ n tissas, jemmɛaγ ijufar-iw, kkreγ-d, maca nekk, mazal-iyi ṭṭseγ. Ad ruḥeγ kan ad ssirdeγ udem-iw , allen ččurent d tirtaw.

Ḍegreγ tiṭ-iw γer beṛṛa, ass yuli tafat ulac, azniq yestewḥac. Muqleγ di tebrek n yiḍ, walaγ deg-s iman-iw am ugudu bu gennur. Acu lliγ ttwaliγ? –ad uγaleγ d agellid γef tegduda n bururu s teγratin n tulawin.

Ayen I iceγben allaγ-iw, d aɛbbuḍ-iw d wayen i yejguglen γer-s . Lemmer tettmečča tmess, ad ssbelɛeγ akk iṭij, takurt-nni ireqqen.

Si zik, segmi d-ilul wemḍal fell-i, werǧin riγ tikli n yiḍ . Maca, ur yuksan yiwen i t-yuγen, swiγ lqahwa, lsiγ abalṭu, refdeγ aggrab-iw qellaγ …



Smaɛil ΣEBDENBI



Tezreg-d di ABC amaziγ uṭṭun 39

DI TAZWARA AZUL FELL AWEN.TIN GHERS,SSARAMEGH ADEG N INTERNET AGI NWEN AD YIGHZIF LEA^MER IS.SURFET IYI MA YELLA,TASWIA^T AGI, D ISEKKILEN AGI I SQEDCEGH ACKU MAZAL SNEGH AKKEN ILAQ TIMUCUHA YAGI.MACA AD UGHALFGH TIKKELT NNIDHEN... AR TUFAT.

azul,
win yettarun s teqbaylit d isegh , ghrigh amagrad i d yuzen mass "smail", "amyaru amazigh ? " anda i d yefkka tidmi ynes f tira s tmazight , d tidest tawaghit negh tekkad seg tira i ulac 20 leqrun aya .
tullizt n mass "smail" telha , dacu ma zemregh adinigh, tiwinas (les phrases) ghezifit bezzaf, zzayit cuya i leqraya (aya d tidmi innu).
sureft iyi f iskkilen i sqedcagh.

A mass buhu, azul fell-ak.

Di tazwara, bγiγ ad ak-iniγ tanemmirt imi teγriḍ amagrad-nni "amyaru amaziγ". Ssarameγ ad yili yewwi-d kra, akken ahat, ad nefhem ansi d tekka tiyita. Acku agnu ma t-nefhem,ayagi d 50% si tifrat-is.
Tin γer-s, tenniḍ belli tafyirt deg yeḍrisen uriγ, γezzifet, ẓẓayet. Ay ameddakel, ayen i d tenniḍ d ttidet. Maca ayagi, d- ttamsalt n uγanib n yal amaru. Bγiγ ad iniγ daγen, aγanib n umaru mačči d kra isebken, yezmer ad imhez. Ihi, tullisin d iteddun, ssarameγ ad ilit d-ttifessasin γef yal ameγri.

Ğğiγ-k di telwit