|
 | | |  |
 |  |  | |
|
|
|
"Liẓ-avuntir n Dda Qiqi""Liẓ-avuntir n Dda Qiqi" A tt-hduγ i wiyi: A wid yenḥafen tayri Ffuden aman-ines di tefsut Ma tebγam ad tḥemmlem yid-iyi Ur qqaret lḥal ifut Γas farṣet tiγmert-ayi Ara d-tettafem di Tafukt. Ixef n wutṭṭun-a d wa: Meγres, d useγres, d win γur-s. Agzul: Aṭlas yeffeγ-d seg wexxam yezreb, iḥar ad yemlil tameddakelt-ines Ḥayat ( „tarwiḥt n terwiḥt-iw“, akka i s-isemma netta) d wukud yesεa ttiεad ass-a. Dda Qiqi di tannumi yezga yessaḥab tabeḥlust-is, itezzi itenneṭ am izirdiw ger yemγaren-nni yettγimin di „ plaṣ d arm“ ; ass-a , atan yecṭatṭṭew, ṭennben cclaγem-is, a s-tiniṭ yesraḥ-d rriḥa n čečču. Di tegnit ideg yiwen yezreb, wayeṭ yestufa. Aṭlas a d-yaf Dda Qiqi, a t-id-yeεreṭ γer tmeγra ara teg tiddukla Numidya ilmend n lεid n tmeṭṭut; Dda Qiqi a sent-id-yebdu seṭṭac, sbeεṭac... Taggara Aṭlas texdeε-it tmeddakelt-is, ur d-tusi ara, tameγra n Numidya tfut-it. Akken qqaren: “ Ur yečči seksu, ur inezzeh iṭebbalen“. A d-yeččar taqerruyt-is s tebyarin, ad iqirr γer wesgen-ines am waruy. Ma d Dda Qiqi a ziγen iruḥ yeḥṭer tameγra n Numidya. Amek i t-id-qublen dinna? d acu i yeẓra? amek i yuγal s axxam-is, γer tmeṭṭut-is Nna Ququ?... D ayen ara nẓer deg wuṭṭun i d-iteddun ( ma bγan at Numidya)... Agzul n weḥric wis-sin: Ay ack uqeṭmir, lemmer di yeεmer. A Rebbi kečč d lqawi Σjel s ddwawi Tarwiḥt bezzaf tṭaε Ma teẓriṭ ulac llwi Mennaγ lmut a yi-tawi Wala kull ass d aseṭmeε … Imeslayen-ayi n Ṣaleḥ Seεdawi a ten-hduγ d rreḥma i weltma-tneγ Fuziya Σeggad i yemmuten ass n 17/08/06. A tt-yerḥem Rebbi, yerḥem bab imeslayen-ayi, yerḥem yakk tarwa n Ḥewwa d Adem. Agzul : Aṭlas yeṣker ilmend n wayen i s-tga Ḥayat. Yemma-s di ccaw terfa nezzeh fell-as; segmi i tt-yessaged s unejli,mačči kan iγaṭ-itt,tefhem i t-yuγen tqeṣṣer yid-s, tekkes-as cwiṭ γef wul-is. Azekka-nni mi yeffeγ seg wexxam yeẓra ayen ur yenwi ad iẓer: Ḥayat d wexṭib-is! Yemlal-d yiwen seg imeddukal-is di Numidya ( Yuyu), aneggaru-ayi yezzem-it-id nezzeh imi yezgel tameγra n tlawin i tga tiddukla-ayi-nsen. Ssyen, yemlal-d ameddakel-is Dda Qiqi ( wayi tessnem-t tura)? Ara s-d-yeḥkun s zzux γef tmaγra I d-nebder yakan. Maca, xuṭi yessen-it yemmal-d timucuha akken i tent-yebγa netta, mačči akken ṭrant. Ayen i s-d-yeḥka i Aṭlas iban-as-d i uneggaru-ayi d axayel kan. Dda Qiqi ffγent-as tirga mxelfa: ukren-as “ apurṭabal, yenu ula d tameṭṭut-is Nna Ququ, tezzi-yas s weεrur,tesserfa-t… Agzul n eḥric wis-kraḍ (3): Sidi Valuntinu di lḥasi. Agzul: Aṭlas ad yennuγni di yir liḥala ideg ttidirent tlawin s umata, timaziγin ladγa; ad igen s unezgum-nsent, ad yargu tusa-d γur-s Werdiya i d-iceyyeε Sidi Valuntinu. Mi ara iruḥ γur-s a s-yini uneggaru-ayi: D kečč, ay d imsellek n talsa, ma ur tḥuddeṭ ara tulawin, a ten-yessenger Dda Qiqi! A ziγ Dda Qiqi yuγal d awaγezniw s ṣṣifa n ssaylala ( beret, neγ ačeγyay), yebγa ad yessenger akk tulawin n ddunit. Aṭlas ad yuγal d aferṭeṭṭu ( taḥacḥact) ameqqran, ad yesserkeb akk tulawin γef weεrur-is, ad yafeg yes-sent di tegnewt… Tamawt: ad snemmreγ nezzeh Dda Ğamal Benεuf γef tullin i yi-d-yefka, γef useγtu i yesseγta iḍrisen-agi, akk d usebγes i ttafeγ γur-s. atlasnatwemsed@yahoo.fr Asabter yellan deffir wa | Asabter n zdat
winna
- Tinin-is...Azul ay Aṭlas
Ttxilek ma ur iyi-d-tenniḍ ma tezga-yas-d tugna-nni i s-rniγ ar yidis n uḍris-inek. Neγ ahat ur gziγ ara anamek iffren n imeslayen-ik. Tettban-iyi-d am akken timetti-nneγ tettḥeṛṛif aḍar i tayri si tal tama neγ ala ?!
Tura neγ ma ulac azn-iyi-d awlaf n Dda Qiqi :-)
Ar tufat
- Tinin-is...Azul fell-awen.
Hṣiγ aṭas ara yefreḥ wefrux-nni-nneγ "Aṭlas" mi ara d-yaf agzulen-agi deg wesmel-agi-nneγ. Ussan-a ahat ur yestufa ara, maca ssya γer sin neγ kraḍ(3) wussan ad yeḥṣu, a d-yaru kra n wawalen γef tezrart-agi.Ass-a mačči d tidmi ( rray)-iw ara n-fkeγ, acku a tt-ğğeγ i kra n wussan... Tamawt kan ara-d-greγ, attan:
Tameslayt yesseqdec wemyaru-nneγ d taqbaylit n Berğ Buεrariğ, d acu kan yesseqdec-itt s tefses, amedya:
Ufayen:" Ḍ" at naf " Ṭ", amedya: aḍar= aṭar, teččiḍ= teččiṭ.. D acu kan neεreḍ amek ara nqader ilugan n tira, amedya: Amqim udmawan di tama-yagi n Berğ, atah wamek t-ssawalen:" a t-teččeḍ-it ( a t-teččeḍ), izeggir yettegray ...
Tamawt-nniḍen, d ta: Seg wakken i d-yura γef temsalin yellan d iεekkuren/ugurun/ ẓẓrubat/ "iṭabuten" deg tmetti-nneγ, yufa-d aṭas n wuguren, tamezwarut deg-sent: Ibeddel isem-is. Acku tigwti seg-neγ mačči d ayen i ttxemmimen i ttarun... Aḥric amezwaru a d-yeffeγ deg weγmis Tafukt", d acu kan s waṭas n wuguren, acku llan wid i t-yugin, ma yeffeγ-d tajmilt tameqqrant ad tuγal i gma-tneγ Hewwari Bessay: Amassay n tira n Tafukt". Aḥric amezwaru yettwafreq i yat Numidya akken a d-fken rray-nsen weqbel ara d-yeffeγ (I tikkelt tamezwarut i d-yeḍra waya);iḥricen-nniḍen wissen ma ad ttuqeblen neγ ala?!
Ayagi merra yemmal-d anda yessaweḍ uxemmem-nneγ s leqbayel.... Aṭlas-agi γur-s aṭas n tissas imi d-yenna annect-a, γur-i nekk ala tidet i d-yenna... Tajmilt-is meqqret imi γ-d-yewwi rrehṭ/ tawsit/ṣṣenf-nniḍen n tira? Imi d tikkelt tamenzut i ẓriγ aya di tira n tmaziγt. Aṭas i wumi ur iεeğğeb ara, aṭas ara d-yemmager d uguren...
Yenna Vultar:" Γas ad mgarradeγ yid-k di takti-k, maca ad mmteγ akken a tt-id-temleḍ"
Asuneγ ( tteṣwira)-nni i s-tgam terna fell-as, tgerrez.
Ar tayeḍ.
- Tinin-is...Alɣu!
Amyaru amaziɣ ameqqran « Aṭlas N at Wemsed “ yettwanɣa ass-a, s ufus n “ Meɣres” arebbit n ccwal. Tamṭelt-is ad tili iḍ-a n 29/10/2006 ɣef wezgen n yiḍ.
Sɣur : Vinus tarebbit n ccbaḥa.
- Tinin-is...Alɣu !
Ass-a n 29/10/2066 Ɣef 5 n tṣebḥit i s-nerra tajmilt i wemyaru Aṭlas N at Wemsed. Ɣas mmden 60 iseggasen ɣef tmettant-ines, kra n imeddukal-is usan-d ɣas s tegdi rran-as tajmilt, a d-nebder gar-asen:
Wejṭuṭi d amɣar, d bab n 60 iseggasen. Newwara d tamɣart, tesɛa 90 iseggasen. Taldayt n wedlis d Ḥamim mmi-s n Ṣaleḥ Ibnu Ṭarif i tt-id-yeɣran fell-as.
Sɣur: Ṣufunizb.
- Tinin-is...Alɣu!
Ass-a n 29/10/ 5006 yeffeɣ-d akk wegdud amziɣ am yiwen wemdan, si tmada n Isiwan, ɣer tegzirin Tikanaryin, si tmurt n yegnawen alamma d atlantik, yerra tajmilt i wemyaru amufrar akk di lewqat “ Aṭlas Nat Wemsed.
Sɣur: Ɛaziz akk d Ɛzuzu.
- Tinin-is...Tedduɣ-d cennuɣ tazlit-nni n Akli “D” : Anef-as i Lɛerbi ṭrankil, nekk rriɣ-tt akken nniḍen amzun d Akli Qabyli neɣ azwawi i tt—id-icennun:
Nniɣ-am a tasibirit
Aggad Rebbi
Anef-as i Aṭlas ṭrankil
Ul-is aṭas fraǧil…
Akken tt-ẓriɣ teqcict-nni ixeddmen di “cyber”, tɣaḍ-iyi meskint udem-is werraɣ deg remḍan-agi, tekfa deg-s taḍsa, yekfa deg-s wecmumeḥ… Kreɣ ad ndiɣ asmel-agi-nneɣ, ufiɣ-d iman-iw uriɣ: amaynut(w) amaynut(w) amaynut”w) i m-yura. Qum
A ziɣ la wejṭuṭi, la Newwara, la wiyaḍ… A ziɣ leqbayel d iɛerḍiyen, d uḥdiqen…Ur qqaren ara timeqqerṣa-yagi.
- Tinin-is...Azul ay Aṭlas,
Yuεeṛ akk-en ad d-yefk yiwen tidmi-ines γef ugzul n tullizt neγ n ungal. Ladγa ticki win yuran agzul d win yuran ungal-nni neγ tullizt-nni. Tεerḍeḍ deg igzulen-a ad d-tefkeḍ kan izerrigen imeqranen n wayen γef d-tewwiḍ deg-s.
Mer d yiwen seg iwazziwen-a n usmel neγ kra n yiwen nniḍen i t-iγran i d-yewwin fell-as ahat ad d-yefk netta ayen deg imgarad wayen turiḍ γef wayen nniḍen ittwarun yakan. Ad yewwet γer uẓar, ad yewwet ad d-issali adif n wayen turiḍ. Keččini ul'amek ad txedmeḍ akk-a neγ ma ulac ad d-bineḍ am akken d zzux kan i tettzuxuḍ s wayen turiḍ. Ihi am yal aqbayli, tenniḍ-d kan s wannuz: "ha-ta-ya wayen uriγ, ur yufrar, ur izgir akk-in...iniwt-ed tura dacu tennim neγ tedmim deg-s."
Tugna-nni neγ asuγen i s-irra Winna daγen ahat tezga-d i tullizt akk-en tella maca deg igzulen-a ur ufiγ ara d akk-en aṣentel n tayri yufrar-ed aṭas.
Aṭlas izgel tameγra n tiddukla n Numidya imi ur d-tusi ara temddakelt-is. Irra-tt i lweεd n tbyarin. Dda Qiqi netta iḥḍer i tmeγra. Israḥ-ed rriḥa n čečču (wissen ma d čečču n tullas neγ d win n seksu kan). Dda Qiqi, netta, s wexxam-is. Maca ahat isuffuγ iḍaren-is seg cwari ? Ma ur tt-iγri ara wemdan, ur yezmir ara ad iẓer anda-tt tidet.
Dda Qiqi ur yefki ara azal i tlawin s "tiγunsa" akk-en am Waṭlas. Dacu kan Dda Qiqi yedda ar tmeγra, seg wayen d yenna, yexdem ayen ad yexdem wuccen gar tyuẓaḍ.
Aṭlas yezzem-it umdakkel-is imi ur idda 'ra γer tmeγra. Ameskar ittban-d ifka-yas azref. Ihi deg wallaγ n Aṭlas am akk-en yeḍra umennuγ gar tayri n yiwet tmeṭṭut akk d tayri n tlawin akk-en ma llant. Tayri n tlawin akk-en ma llant d tiγunsa-ines γef izerfan n tmeṭṭut ????
Wissen ?
- Tinin-is...Agejdur aki n Dda Qiqi yesmekta-iyi-d " Ddaqiqa s taεrabt".
Dγa atan wemdan yekka Daqiqa iruḥ yennejmaε.
Sufunizb akk d Vinus d afeččex! Zemrent a s-εebbint acwari i Waṭlas ur yettaki a mḥaynek.
Rnut-ed tiyaḍ a yizmayen a tisedwa. Tiγimit yid-wen d čikula.
( a Yaṭlas n wemsed, ttaγ-as ččikula i "m-L'jean serre" iqedcen di Lcyber. Atan nniγ-ak, tabbaṭ tis snat neγ kraḍ ak-d-γli deg....rebi)
- Tinin-is...AZUL D IQENṬAREN.
D tidet igzulen-agi i iga " Sṭalin" ( Dda Ğamal) ur wulmen ara dagi, acku wigi lhan kan mi ara ten-id-yeḍfer weḍris, wamag akka ur d-wwin la ixef, wala lqaε. Agejdur i tent-yugaren akk deg yegzulen-agi d wa: Anda yella wawal icebḥen, wawal deg-s leḥwal n teqcict yegzer-it Dda Ğamal, teḥrem remṭan-iw ar yugar Ḥemrawi ¨Habib Cawqi, anda yella cwiṭ n tsudent tamecṭuḥt, ini yegzem-itt s temqestin! Aql-i ,uzneγ-as-tt-in i gma-tneγ " Ssefhem-as Winna" , a s-yeg ayen iwulmen, tanemmirt-is dγa, d argaz yelhan ( sqizzibeγ-as cwiṭ akken a s-iwenneε ccγel)
Yegra-yi-d kan ad ssutreγ seg Newwara " tanewwart"-nneγ, akken a yi-d-tẓer yelli-s n Nna Faṭ,( Tafermajt-nni taleqqaqt) a yi-taγ, u a yi-teg " lazil Tiriṭuryal"; acku ur s-zmireγ ara i dda Remṭan-agi, εyiγ seg-s!
Ar tayeḍ.
- Tinin-is...A yya 100 idinbaren! 100 idinaren kan! A yya, aneggaru ur yettaf ara amkan!...
Wagi d Deḥmuc Ameεmuc i la yeznuzuyen itikiyen unekcum γer tmeγra n ccna ara tessudes Numidya azekka n 09/10/06 γef 21h deg tzeqqa umezgun aẓiyan n Wehran ( T. R. O), tameγra-yagi ad cnun deg-s icennayen-agi: Murad akk d Masinisa i d-yusan si Tubiret. Azal unekcum ad yili s wazal n 100 idinaren.
I kečč ay Aṭlas, ay aqbayli n "sservis"! Azekka ad nemlil di tmeγra n Numidya, a yi-d-tafeḍ ḥreqseγ-ak-d amzun d tağelğet, akken a yi-teẓreḍ a k-d-γlin ileddayen. Ma ur d-usiḍ ara tebra yemma-k ar d- greγ fell-ak leεğeb: (Ad yaγ lḥal tuff-d (tcuf-d) tεebbuṭ-iw si temtunt) a sen-iniγ i lγaci belli aql-i s tadist, d kečč i yi-igan aεebbuḍ! D acu tenniḍ ?!
Qurk ihi ur d-tettaseḍ ara!
- Tinin-is...azul. Ay ack-itt tmeγra-nni i tgam ass n warim 09/10/06 di T.R.O.
Ula d kemm telliḍ tgerzeḍ, ay ack-ikem s tlaba-nni i telsiḍ: Taqendurt n leqbayel, tacemyaṭ afzim... Zriγ-kem imi tceṭṭḥeḍ, tettleγwayeḍ, tetterqiqqiseḍ, aḥeqq aẓru imedyazen ar terḥiḍ-iyi! Aḥeqq aẓru leγrib aḥnin ar qrib seqḍeγ fell-am, aḥeγq azru n aṭur ar tettuḍ-iyi di tinna n " syber", aḥeqq aẓru Uεellul ar qrib i d-ḍeggreγ iman-iw seg "ubalku-nni wis-kraḍ-3- γef ddra-m.
¨Hqa bγiγ ad ẓreγ ma d agrud-nni atituḥ i wumi teqqarem " Deḥmuc Ameεmuc" ?! Tebra ar yewwi-d iman-is , sliγ-as im yettsuγu, yeqqar i lγaci: Di tmeγra i d-iteddun a wen-d-nawi yiwen ucennay si Lalman, isem-is " Akli Qbayli", icennu akken yessefk " afulklur", yernu icennu ula d tawsit-nni i wumi qqaren " Zawiya", acku yettekki deg Zawiya Nat Jirman. Twalaḍ i tlufa i ixeddem Deḥmuc Ameεmuc!...
Kemm meqqar ur yi-tettuḍ ara a Guraya, wamag Newwara-nni-nneγ akken i s-nniγ a yi-d-texḍeb yelli-s n Nna Faṭi, dayen yemmut lḥut, ulac awal, tγunza-yi!
Atan yeffeγ-d wuṭṭun wis-37 n weγmis Tafukt, yedda-d deg-s weḥric amezwaru n Dda Qiqi, yer nu acemma ur yeḍri, ugaden kan wat Numidya, wissen dγa aḥric wis-sin ma a d-yeffeγ neγ a s-nerr tablaṭ i wul!
Tanemmirt-im a Guraya. | |  |  |  | |
|
|