Liẓ-avuntir n Dda Qiqi

Aḥris wis-sin ( I I )

A Rebbi kečč d lqawi

Εjel s ddwawi

Tarwiḥt bezzaf tḍaε

Ma teẓriḍ ulac llwi

Mennaγ lmut a yi-tawi

Wala kull ass d aseḍmeε

…

Imeslayen-agi n Ṣaleḥ Seεdawi a ten-hduγ d rreḥma i weltma-tneγ Fuziya Εeggad i yemmuten ass n 17/08/06. A tt-yerḥem Rebbi, yerḥem bab imeslayen-agi, yerḥem yakk tarwa n Ḥewwa d Adem.

 Azwel n yixef-a: Ay ack uqeḍmir, lemmer di yeεmir.

Agzul :

Aṭlas yeṣker ilmend n wayen i s-tga Ḥayat. Yemma-s di ccaw terfa nezzeh fell-as; segmi i tt-yessaged s unejli, mačči kan  iγaḍ-itt, tefhem i t-yuγen, tqeṣṣer yid-s, tekkes-as cwiṭ γef wul-is. Azekka-nni mi d-yeffeγ seg wexxam yeẓra ayen ur yenwi ad iẓer: Ḥayat d wexḍib-is! Yemlal-d yiwen seg imeddukal-is di Numidya ( Yuyu), aneggaru-agi yezzem-it nezzeh imi yezgel tameγra n tlawin i tga tiddukla-agi-nsen. Ssyen, yemlal-d daγen ameddakel-is Dd Qiqi ( wagi tessnem-t tura) ara s-d-yeḥkun s zzux γef tmaγra i d-nebder yakan. Maca, xuḍi yessen-it: yemmal-d timucuha akken i tent-yebγa netta, mačči akken ḍrant. Ayen i s-d-yeḥka i Aṭlas iban-as-d i uneggaru-agi d axayel kan. Dda Qiqi ffγent-as tirga mxelfa: ukren-as “ apurṭabl, yernu ula d tameṭṭut-is Nna Ququ, tezzi-yas s weεrur, tesserfa-t… 

Ur ẓriγ ansi d-kkiγ?! Ẓriγ kan anda tedduγ. Ufiγ-d iman-iw di Lḥassi, « lwilaya tis-48 » akken i s-qqaren kra; γur wiyaḍ tesεa xirla n yismawen, yal wa amek i s-isemma… Ufiγ-d iman-iw tedduγ ttdelwaḥeγ, ttmaleγ akin d wakka, amzun d aṣekran! Xuḍi d aṣekran, mačči amzun d aṣekran! Lhemm yellan daxel n tqerεet, temdel fell-as tadimt, kkreγ am ddeεwessu, kkseγ-as tadimt-nni, ssurgeγ-t-id γer tqerruyt-iw! Awwah! “ Mačči d ccrab i iṣekkren, d lhedra n medden i iweεren” i s-yenna Akli Yeḥyaten. D yir imeslayen-nni i d-yekkan seg yimi-nni i nwiγ akken ad summeγ yal mi ara ffadeγ aman n wasif n “ Lkawter” ( d asif yellan di lğennet), taggara yuγal d arseḍ! D yir imeslayen-nni i d-yekkan seg yimi n Ḥayat, tinna akken i nwiγ d taḥurit n lğennet, taggara tuγal-iyi d talafsa!... Ṭṭfeγ abrid s lewhi, qudeγ iman-iw, γas ṣekreγ, leεqel-iw s leεqel-is! Mazal deg-i taqbaylit! Mazal deg-i tirrugza! Ccrab d nekk i t-yeswan, mačči d netta i yi-yeswan! Ur ilaq ara ad cciccihen ( si ccah) deg-i medden! Ur ilaq ara a d-ğğeγ awal ara yidiren deffir-i! Wa a s-yeqqar: ” Mmi-s n tağğalt yufa iman-is, ulac wi ara s-igen aḥkim!”  Ala, ma γelḍeγ, d nekk i iγelḍen, mačči d yemma! A wer tawḍem a d-tecbum ula d yiwen wanẓad di tqerryt n yemma, ay ifuḥanen! Wa a s-yeqqar: Atnad imaziγen, εad “imuzzuren” ( imaṣṣuten i sen-neqqar nekkni)-nni i yebγan  ad εellen ddula iman-nsen! Ala, ma γelḍeγ d nekk i iγelḍen, mačči d Imaziγen “ Izwawen”! “Tadsimant” ( leḥkem n yiman s yiman) –nneγ a tt-naweḍ, leḥkem-nneγ a t-nesbedd, yiwwas ad necbu igduden nniḍen, ad njuğğeg am : Ikaṭalunen ( uklalen azul d tnemmirt, imi ad sslemden tamaziγt aseggas-a, deg wakal n Kaṭalunya tadsimant, mačči di Lyaman i γ-d-snulfan d atmaten!). Tamaziγt ad taweḍ taneflit am yessetma-s tutlayin nniḍen, timmuzγa ad tger iẓuran di Tmazγa akal n lejdud n lejdud-nneγ. Ma d kunwi a ken-yeğğ Rebbi d aklan, seddaw uzaglu n ddel d lεar! Kra nniḍen a s-inin: Atnad wat Numidya, widak-nni i yekkaten ḥqaḥqac γef tmaziγt, nutni rwan ccrab d lxalat γef weεrur n tmaziγt! Ala, ma γelḍeγ d nekk i iγelḍen, mačči d Numidya! At Numidya fkan iman-nsen d asfel, qublen ixṣimen n tmaziγt akk d tlelli s ifassen-nsen d ilmawen, qublen at leḥkem ameṣbaṭli akk d wat ičumar irebraben; γef wayla-nneγ xuḍi i ttnaγen, yal ass ttarren-aγ-d azal useggas seg yiseγ d leḥerma i γ-yettwakksen!

Tedduγ zdiγ lqedd-iw, i lemmer a yi-faqen medden ṣekreγ. “Ma d at tmira d nniqab”, akken i sen-isemma Lwennas; wiyi heyyaγ-asen-d ṣṣerf,  d awal-nni i yenna Abu newwas i umeddakel-is, ara sen-iniγ: “ Eğğ leğwameε i imeẓẓulla, yya yes-neγ γer ttberna a d-nsew, yak Rebbi-k ur d-yenni ara: Abbuh ( tawaγit/ “lwil”) i wid itessen. Maca, yenna-d: “Abbuh i wid yettẓallan!” …

“Aṣekran yessen tawwurt n wexxam-is”, i nnan wat zik. Sṭebṭbeγ s leεqel kan di tewwurt. Ttxemmimeγ amek ara qableγ yemma!?...  Ufiγ-tt-id!! Aql-i d amuḍin! Yemma tessen asṭebṭeb-inu, teldi-d bla ma tenna anwa. Kecmeγ s axxam ttemdudduεeγ, yemma meskint tewhem: D acu k-yuγen akk?!

--Aql-i d amuḍin, helkeγ.

--Sslama-inek a mmi, d acu k-iqerḥen?!

--Wissen d acu-t lehlak-agi?! Feqεeγ-d, bγiγ a d-rreγ !

Tefrawes yemma meskint, rniγ-as-d tid-iw, amzun txuṣṣ di lexlayeε!

--A k-d-sewweγ cwiṭ n cciḥ, neγ cwiṭ n tselγa, mi ara tt-tesweḍ a d-yefju wul-ik!

Werεad d-tfukk awal, gglefεeγ-d s iriran, qqleγ amzun d asif n Lḥerrac, sfuḥeγ ddunit. Rriḥa n ccrab tesṭeεṭiε. A tawaγit-ik ay ul! Ssetḥeγ, teḍra-yi am win i wumi yefsi wagus, yeqqim εeryan di tejmeεt!

Yemma tfaq, terfed acerγit: Xxah γef uqerruy-iw! Teswiḍ ccrab?!

Ḥṣiγ, iḍ-a a yi-tessired am ujeεbub ( anda nniḍen qqaren aẓrem). I wakken  a yi-tefk talwit, ilaq a tt-ssigdeγ, ssneγ yemma, ader-as-d kan anejli, a tt-teṭṭef tergagayt, aḥlil! Ala nekk i tesεa, yiwen “uẓemẓum” akka i teqqar meskint! 

--A yi-thenniḍ, neγ ad nnejliγ, ad rreγ γef uqerruy-iw!

Teḍḥa-d meskint tesmiskin: Yyah a mmi ad ternuḍ anejli! Daya i ssuggmeγ seg-k ar ccib n leεmer-iw!!

Tezzuγer-iyi γer wusu, tewwi-yi-d afenğal n lqahwa taberkant, teqqim-d zdat-i rrif n wusu, teslufuy i tqerruyt-iw s leḥnana  am wegrud amecṭuḥ, testeqsay deg-i:

--D acu i k-yeblan a mmi ad tesweḍ ccrab?!

--D zzεaf a yemma.

--Anwa i k-d-izeεfen?!

Kkseγ leḥjab-nni usetḥi, ssdermeγ aγrab-nni yellan gar-i d yemma, iḍ-a ad sdegdgeγ ayen akken i nerra d lεib. I tikkelt tamenzut ara s-ḥkuγ iγeblan-iw i tinna akken i yi-d-yurwen; i tikkelt tamenzut ara kkseγ aẓeṭṭa yedlen ul-iw, iḍ-a a s-d-ssekneγ i yemma iḥulfan akk d tayri i iberken γef wul-iw. Yuγ lḥal aql-i ṣekreγ, d ccrab i d-yettmeslayen,  mačči d nekkini, “am winna akken yeṭṭef inijel, mi d-yufa sebba yewḥel,  yerra-tt i iγimi”  i yenna Lwennas.

--D yiwet teqcict i yekksen fell-i sser!

--Amek, amek! Anta tagi?! Ma yebγa Rebbi ahat d yiwet si tmaziγin-nni-nwen?! ( teqsed-d tiqcicin-nni-nneγ n Numidya)

--Ala, tagi texḍa i Numidya, tekreh ula d tamaziγt.

--D acu i k-yewwin ihi γur-s?!

--Ttḥibbiγ-tt ( ḥemmleγ-tt), zeεma d tameddakelt-iw!

--Εni tessečč-ik?! Tgerrez-ak tarkasin, almi temxelleḍ akka fell-as ?!

--Lemmer γas i yi-tessečč, yili ad fehmeγ belli tebγa-yi.

--A nnger-is, a tuqqiṭ-is! Wama εni teḍreḍ-as-d ( tṣaḥeḍ-as-d)?! D acu-tt akka?! Εni d “Ccemceḍya  Bent Drifa deg  bu sebεa lebḥur akin” !

--Tebγa amerkanti, mačči aẓawali am nekk!

--Yal yiwen  kan ilaq ad yeεnu tamtilt-is a mmi. Εni uqant akk fell-ak teqcicin almi i s-tessuliḍ akka ccan-is?! I teqcicin-nni-nwen, d acu i tent-ixuṣṣen?! Ẓriγ-tent, d ticebḥanin, d timelḥanin, ččurent d sser, yernu d tiqbayliyin i k-yecban.

--Tayri ulac deg-s taqbaylit neγ tayeḍ. Ul d netta i d amnir, anda i s-yehwa i yettwellih bab-is. Ma d tagi n teqbaylit, teḥṣiḍ ur ttakeγ ara deg-s afus. Tegra-d di “ teqcicin-nni-nneγ” akken  i sent-teqqareḍ kemmini, ur cukkeγ ara ttasent-d akken ad jewğent γef ddemma n tmaziγt! Yernu ttqadareγ-tent, ttsetḥiγ deg-sent, ḥesbeγ-tent am yessetma kan, ur zmireγ ara a d-refdeγ allan-iw zdat-sent…

--Mačči d lεib a mmi win yettnadin leḥlal, lεib d win ara yezzuγren wayeḍ γer yir iberdan. Akka ay d yir lweqt ideg d-negra! Teḍḥa-d tmeṭṭut treggem argaz! Ula d Σelğiya-nni-nneγ ay nwiγ d lmalayek, ass-a tbeddel ṣṣifa…

Ur tt-ğğiγ ara ar d-tfak ula d  awal, akken i s-sliγ i yisem n Σelğiya frawseγ, axaṭer ar γur-i isem-agi mačči d menwala, ttεuzzuγ-tt mačči d kra, γas tjeyyeḥ-iyi Ḥayat, Σelğiya teṭṭef amkan meqqren deg wul-iw. Dγa steqsaγ-tt s lḥir meqqren: D acu tt-yuγen!? D acu i m-d-tenna?!

--Tenna-yi-d: “Mmi-m-nni yexṣer, yebda iteffeγ γer yir iberdan!” Akken i s-d-jebdeγ γef jjwağ, tenna-yi-d: “ Nekk ur ttaγeγ ara ahwawi yettferfiren, ma yexḍa umeẓẓallu ur jewwğeγ ara…

Akken i sliγ i imeslayen-agi, zedreγ deg uxemmem, ttmeslayeγ kan deg wul-iw: A ziγ mačči kan d Ḥayat i ibeddlen; attan terna-d  Σelğiya, tinna akken i wumi giγ azal d ccan! Ula d Σelğiya tewhem fell-i, tebra lemmer mačči d tagella d lemleḥ i nečča akken, yili a d-mleγ ula d llun n “tkiluṭ”-nni i tettlusu asmi meẓẓiyet! Ayen i yi-yeswehmen ugar: d tagi umaẓẓallu! Σelğiya tafeḥcuct, tahwawit ad taγ bu učamar! Ad taγ yiwen seg “iqelwacen”, akken i sen-isemma Dda Qiqi. Atan wamek  i yi-t-id-yenna yiwwas:” Lqum-agi cban aqelwac! Wissen Ma tegreḍ tamawt i uqelwac amek iga?!

--D acu d-yewwin aqelwac γer lqum-agi?!

--Aqelwac sufella yeğğa tačamart, yettγummu yes-s udem-is; swedda yessuli taseṭṭa-s, yeğğa tajeḥniṭ-is εeryan! Ula d wiyi akken: sufella ttağğan timira, swedda ttqeffiḍen tiserwula-nsen! Akken i kkreγ ad ḍṣeγ, tesduqqes-iyi-d yemma s westeqsi-agi: I yelli-s umeddakel-nni-inek?

--Anta yelli-s umeddakel-agi-inu?!

--Tinna akken i d-nemlal ass-nni , tella nettat d bab-as akk d yemma-s. Imir-nni tluεaḍ baba-s, tenniḍ-iyi-d: Wagi d ameddakel-iw.

Segmi xemmemγ cwiṭ, ufiγ teεna-d yelli-s n Dda Qiqi, dγa nniγ-as: ferruğa, yelli-s n Dda Qiqi?!...

--D acu tt-yuγen?! Tezyen amzun d taεelğet. Γas rqiqet cwiṭ, meεna akka i tent-tbeqqum tura, xuḍi d “ lamuda”!

Ṭsiγ-d almi d-ttrunt wallen-iw! Ula d yemma tessen “lamuda”! Deg leεmer i qeṣṣreγ nekk d yemma γef lecγal-agi, a ziγ ula d nettat tekkes-d cwiṭ γef wul-is, fkiγ-as tagnit, am wakken i tt-fkiγ i yiman-iw. Maca, welleh ar telha tagi n nnesba d Dda Qiqi ! Ḥṣiγ akken ara s-iniγ: Bγiγ ad aγeγ yell-ik! A yi-d-yini: “Alamma uγeγ qbel yemma-k!” Argaz ttergigint teclaγemtin-is γef tlawin, yezga yeqqar: “ Win yufan lγar ur t-yeγliq ara, a t-yatem Rebbi!”

Weqbel a s-rreγ leğwab γef temsalt n Ferruğa, nniγ-as: Kker γef yiman-im ad tegneḍ a yemma! Lḥal iruḥ, kemm ttekkreḍ zik.

Akken tekker yemma, yekker daγen wallaγ-iw s axemmem, Yeṭṭef talemmast, ger Ḥayat d Σelğiya! Qqaren wat zik: “ Yerfed taγaṭ ireḍ-d, yenna-yas: rnu-d yelli-s!”  Werεad d-ffiγeγ si theddurin n Ḥayat, rnant-d tid n Σelğiya! Abbuh a lmumnin! Yewḥel uwaẓwaẓ-iw!...

Σelğiya d yelli-s n εemmi, akken i d-nekker nekk yid-s, ssneγ-tt am lğib-iw: ḥninet, terẓen teḥdeq, tessen d acu i d “taqbaylit”, mačči d askeεrer am Ḥayat! Werğin i d-xemmemγ kra n wass, a yi-teḍru akka; ad ğğeγ Σelğiya, ad neṭdeγ di tayeḍ! Di tazwara, wwiγ-tt-id d asqecmeε kan, almi d-ufiγ iman-iw ttwakebleγ deg iciwi n Ḥayat. Ahat smenyafeγ Ḥayat imi teffγeγ yid-s, mačči am Σelğiya, ulac din asluttef neγ ayen nniḍen; tella tayri, llan iḥulfan, ayen nniḍen deffir jjwağ! Xemmemγ, xemmemγ, ufiγ bu snat yiwet a s-truḥ, skud ur d-ffiγeγ ara seg uzerdab n Ḥayat, fiḥel  ad kecmeγ win n Σelğiya.

Azekka-nni taṣebḥit, ffγeγ-d seg wexxam war lewhi, ur ẓriγ sani ara ruḥeγ. Tedduγ ttxemmimeγ, i lemmer ad yaweḍ lexbar γer Dda Qiqi amcum, ad yerwu fell-i aεekki, a yi-d-yini yir tiheddurin-nni-ines: Rwu rray-ik a “lbiṭ”! Lemmer i s-tfeccreḍ taremmant-is, lemmer i s-teldiḍ tiḥruzin-is, yili ur k-tḍerru akka! Yili d nettat ara d-yettnadin fell-ak! … Ah ya ddin qessam! Teḍra-yi am umakur,  εad ugar, am win yenγan tamgerṭ, axaṭer d wagi i yettuγalen s amkan, akken ad ibaṣṣi! Ufiγ-d iman-iw zdat “ umarci Micli”, anda akken i nettemlil nekk d Ḥayat, asmi akken seggmen wussan. Werεad i d-rriγ nnefs, attah tejba-d, teḥlallec-d. Tewwet tjenwit di tεebbuṭ-iw, rgagint tgecrar-iw. A ziγen usiγ-d ad zzuγ tasa-w! Di ccaw, kkreγ a tt-mmagreγ; almi tt-ẓriγ temzuγar-d d yiwen umexluq akken… Ulac ahat, iban d wagi i d-tenna d axḍib-is. Wissen ma teẓra-yi-d?! Rriγ iman-iw zeεma ḥerceγ, nniγ ad laεiγ axḍib-is, ahat s waya ara d-jebdeγ lwelha-s, ulaεudd a d-yiḥnin wul-is fell-i;  ma ulac akk, xerṣum ad tuγal d tazeggaγt, ad tessetḥi!

Kkreγ luεaγ amexluq-nni, nniγ-as s taεrabt: Cḥal tkun sseεa derwek?!

Yerra-yi-d s trumit: “Ili: 11h, 20”.

A tawaγit-ik ay ul! A lxir-iw γef taγect-nni rqiqen, amzun d agrud! A rrbeḥ-iw γef ṣṣifa-nni s waydeg i yi-d-yerra, d ayen i d ” tamadamt”! Ruḥeγ am wakken ur umineγ ara ayen ẓrant wallen-iw d wayen slan imeẓẓuγen-iw. Εawdeγ, nniγ-as s taεrabt: Semmeḥ-iyi, ur d ak-d-sliγ ara! Din kan texẓer-iyi-d Ḥayat, lxeẓra-nni ulac deg-s kra n leḥnana, d lxeẓra n wexṣim γer weεdaw-is, tejbed amexluq-nni, tenna-yas : “Xṭina men had leklucar!” Uγaleγ d “aklucar”!... Ṣṣaḥa di Rebbi, meεna uklaleγ ugar… Ṭefreγ-ten s tmuγli imi teddun, ttwaliγ deg-sen amek ttleγwayen, tebra ar d amexluq-nnit i yugaren Ḥayat deg uzeεbel! Wehmeγ d acu i s-iεeğben deg-s, s wacu i  d iyi-yif?! Almi wwḍen γer leεğeb n ṭṭumubil ( takeṛṛust)-nni, wissen d acu-tt “lmerka”-nni?! Almi d imir-nni d wamek fehmeγ belli Ḥayat d ṭṭumubil ideg teεceq, mačči deg winna! Maca, deg wass ad tessers imeṣṣḍen-ines deg ṭṭumubil, i yiḍ anda ara ten-tessers?! Di ddqiqa-nni mmektaγ-d asefru-nni n Si Muḥend U mḥend, i yi-d-yemla Dda Qiqi:

99 d aḥlalas

Wis-100 d rrṣaṣ

Zznad atah γef timmi

Taqcict-agi sserḥet-as ( nekk, nniγ-as: Bru-yas)

Ma ulac ass-agi ad tt-nerwi ( Dda Qiqi, yeqqar-as: Aqewwad a tt-isami)

...

Teqleε ṭṭumubil, teğğa-d ala aḍu deffir-s. Nutni ruḥen, tismin ğğan-tent-iyi-d i nekk. Yezza wul-iw! Tmeḥḥeq teffwaṭ-iw! Wwteγ a d-snulfuγ ṣṣber, ttṣebbireγ iman-iw s tedyanin , qqareγ deg yiman-iw: ahat yif-iyi umexluq-nni i textar?! Fiḥel ad awiγ ddnub-is, yal yiwen yeẓra d acu i t-iwulmen. Ahat d tismin kan i yi-t-yerran d abelεarriw, d lqaε n yergazen! Dγa, ters-d di lbal-iw tedyant n tismin, i yi-d-yemla Dda Qiqi, attan ihi:

« Yiwen wergaz iḥemmel nezzeh tameṭṭut-is, yiwwas yewwi-tt a tt-yesserzef γer imawlan-is i  izedγen deg taddart nniḍen. Deg webrid-nsen, ẓran yiwen uḍebbal iruḥ-d si mebεid yettreqriq am yetri: d acu i d ccbaḥa-nni, d acu i d llebsa-nni… Akken i tres fell-as tmuγli n tmeṭṭut-nni, yekcem ul-is; tettu argaz-nni-ines i tt-iḥemmlen, tečča amexluq-nni s wallen. Seg wakken i t-id-tmuma, ahat deg wul-is tcennu taγect-nni n Fahem:

 Aqcic uḍrif

Zzin yettrefrif

A wi yellan yid-k

Cehrayen n lexrif

…

Argaz-is ifaq, rḥant-t tismini. Maca, d acu ara yexdem ? Ma yessusem yeqber, ma yenṭeq d acu ara d-yini ?! A s-yini ur t-ṭṭallay ara, ur yezmir ara, axaṭer ur yezmir ara a s- yergel allen-is, yernu ur yebγi ara ad yekkes γef yiman-is sser. Dγa , yufa-d tifrat, d tiḥerci kan i d ddwa-s, yekker iluεa taεzizt-is, yenna-yas: A tettwaliḍ deg umexluq-ihin?

-- D acu i t-yuγen umexluq-ihin?! I s-d-tenna tmeṭṭut-is.

--Yecbeḥ, yerbeḥ. Meεna yal wa anda i tt-yuγ…

-- Amarezg n tin i t-yuγen!

-- Tamuγli n sufella tettγurru. Muqel zdaxel d acu i yellan deg-s!

-- ?!!

Ikemmel awal-is, yenna: A yettuγal γef wudem!!

 -- Ay argaz ssefhem iman-ik, nekk ur fhimeγ ara tiyi?!

-- A deg-s ṣṣenεa!

-- Ay argaz xzu cciṭan! Ur d-ggar ara  γef wergaz ayen ur nelli deg-s.

-- Yeshel lḥal, ma ur yi-tumineḍ ara, tura a t-steqsiγ zdat-m, ad tesleḍ s imeẓẓuγen-im.

Akken i d-yewweḍ ar γur-sen, yenna-yasen-d “azul” , rran fell-as, dγa yesteqsa-t wergaz-nni: Ḥqa mazal-ik kan akken di ṣṣenεa-nni-inek taqdimt?

Aḍebbal-nni di nniya-ines kan meskin, yettεudd yesteqsa-t-id « ma mazal-it d aḍebbal ». yerra-yas s ih :

-- Mazal-iyi deg-s, bab n ṣṣenεa ur tt-itettu, aḍebbal ur itettu ahuzzu n tuyat. »

A ziγen tuεer tayri, tettarew-d tismin. Akken i d-dduqqseγ, ufiγ-d iman-iw ṣemmreγ, qqureγ deg wemkan-iw, bateγ deg wayen yeḍran yid-i! Dγa, i wakken ad ssettuγ iman-iw deg tismin-nni i yerḥan taffwaṭ (d asimẓi n weffwad)-iw, mmektaγ-d tullist-nni «  Lemmer a d-yuγal zzman » ( Wissen dγa amek tga lal-is –-tin i tt-yuran-- ?! Wissen ma tejweğ neγ mazal ?! Lemmer mačči d tayuga-agi  -- Ḥayat d Σelğiya— ideg ḥeṣleγ, yili ad awiγ yemma a yi-tt-id-texḍeb : Wissen ma a yi-teqbel, neγ a yi-d-tini : Beεεed akin fell-i a bu leεrur, a bu teqcicin !). Wexxreγ-d seg wemkan-nni amcum ideg tt-ttemliliγ, ideg tt-ẓriγ ass-a, tedda-d d wayeḍ ; ggareγ isurifen ttmeslayeγ d yiman-iw, qqareγ : Lemmer a d-yuγal zzman, yili aql-i ttemdelwaḥeγ nekk d Ḥayat. Lemmer a d-yuγal zzman, yili werεad akk ur tt-ssineγ. Lemmer a d-yuγal zzman, yili aql-i nekk d Σelğiya ( “Ğğuẓi Mari Naṭ”, ar γur-s i tt-cebbheγ nekkini); ad yili werεad i d- igir iman-is Murad bu tčamart i yesluγen tamda gar-i d Σelğiya…

Ufiγ-d iman-iw zdat tewwurt usideg ( axxam) n Tiddukla Numidya. Akken i d-refdeγ aqerruy-iw ufiγ-d ameddakel-nneγ: Yuyu, akka i s-nessawal nekkni, iteddu-d yettezmummug, akken i d-yewweḍ γur-i, yerra iman-is yerfa ḥqaḥqac, yesteqsa-yi-d s ucennef: Amek a yir argaz?! Teğğiḍ armud n tiddukla, truḥeḍ ad teblagiḍ γef yiman-ik!?

Deg wul-iw qqareγ “ccwi kan imi d wagi i d-mlaleγ d amenzu” axaṭer ssneγ-t ḥnin, yernu nennum nettqeṣir nekk  yid-s; wama, lemmer d wayeḍ akka am Ssi Fenyan-nni, yili terwi fell-i, a yi-yessired am ujeεbub ( aẓrem)”. Ula d nekk rriγ iman-iw rfiγ:  Wi k-yennan ruḥeγ ad blagiγ?! Ruḥ ad trebbebḍ γef yiman-ik, d ccγel i yi-yeṭṭfen.

-- Ẓriγ! D ccγel-nni n “ lmadamat” i k-yeṭṭfen, a bu teqcicin!!

-- Aya Qader iman-ik! Εni d  «  lmadamat » kan i yi-ixuṣṣen!…

-- A yezzenz-ik-d umeddakel-ik.

-- Anwa ameddakel-agi-inu, i yi-d-yezzenzen?!

-- Amγar-nni bu cclaγem.

-- Yusa-d Dda Qiqi?!

-- yusa-d, yemmeslay-d γef izerfan n tlawin, yečča “ lgaṭu”, iruḥ.

-- Dda Qiqi yemmeslay-d γef izerfan tlawin?!! Eğğ-aγ akin seg-s. Amek i tεedda tmeγra n “ssittat” ( tulawin s tmaṣrit, bγiγ a t-id-sseḍseγ)?

Yebda-d Yuyu azewweq, yeḍra waya, nexdem aya, nenna aya…

Γef wakken i t-fehmeγ, yebγa a d-yini : Lxalat yebhan, lgaṭu aẓidan, ijeğğigen fsan, imdanen akk zhan, s tuγac yelhan, ala kečč  i ixuṣṣen ay afuḥan…

Akken i imuqel ssaεa yellan deg ufus-is, yenna-yi-d: Nekk d axeddam, ma tebγiḍ ad teẓreḍ ugar n lexbar, εeddi-d tameddit γer Numidya. Yessenser iruḥ.

Netta yeddez iberdan-is, nekk kemmleγ tikli-w γer “ plaṣ d arm”. Rewleγ-d si lḥebs, ufiγ-d iman-iw zdat tewwurt-is! Seg Yuyu, γer Dda Qiqi! Dda Qiqi ufiγ-t  yeqqim γer winna akken yeznuzun cemma, akken i yi-d-yeẓra, yemmuger-iyi-d, yebda-yi-d asgedrurrez s lehdur-is: Anda teddiḍ a “budenεi” ( muqel kan i theddurin-ines!), iḍelli ur d-baneḍ ara?!

-- Dayen, ttwaṭṭfγ. Sεiγ ccγel, Mačči d ayen ara ğğeγ!

-- D lxir kan?!

-- D yemma i d yi-iceyyεen.  Dagi skaddbeγ-as akken kan ad yettu tamsalt-nni n tlawin. Εad ma yesla s tedyant i yi-texdem Ḥayat ad iεekki fell-i alma yerwa. Atan yebda la yi-id-iḥekku, ma d nekk ttxayaleγ-d ayen nniḍen, axaṭer ssneγ-t, kra yella, kra irennu-t-id kan sγur-s:

« Yewweḍ γer Numidya, yufa akken i yebda wermud, yeqqim deg ukersi wis-3 yellan γef yimi n tewwurt. Γer Dda Qiqi Kullec d leḥsabat, yezga-d deg wemkan-nni axaṭer yeffer cwiṭ; yerra-d akk medden zdat-s, netta iẓerr-iten akk, nutni ur t-ẓerren ara. S waya  yiwen ur t-yeḥṣi ma yefka-d idrimen, ma yuγ ajernan, ma yečča xirla n lgaṭu… Winna akken i yeldin armud, yenna-d ahil n wegraw n wass-a. DdA Qiqi yefhem a d-yettunefk wawal i imeεraḍen di taggara unejmuε. Atan yecqarrew, yundi timeẓẓuγin-ines, iεuss am wuccen, yerra lwelha-s anda ara tmal teqrint, ma nenna-d: “Imaziγen d imagdayen, ttqadaren izerfan n tlawin”. Netta daγen a d-yini:” Imaziren d nutni i d imenza di ddunit merra i yesbedden tameṭṭut d tagellidt. Iban a d-yebder Dihya”.  Ma wiyaḍ nnan:” Imaziγen ur qudren ara tulawin, axaṭer ẓran d yir axemmem i  sεant”. Netta daγen a d-yini: Imaziren sεan lḥeqq imi ḥeqren tulawin, axaṭer ḥṣan tulawin d yir sekka ( Ma ur yessetḥa ara yezmer a d-yini: Axaṭer leεqel n tulawin ger imeṣṣḍen-nsent i yella!)”.  Dda Qiqi yemmekta-d areffiε-nni n cemma, a s-tiniḍ d tiggent i t-id- yeqqsen di ṭṭfer-is. Yeḥrurred yeḥrurred, yuγal yeffeγ. Di berra-nni γer yimi n tewwurt, yufa qqimen din  kra n yelmeẓyen, yessetḥa ad icumm zdat-sen. Yerra γer tama-nni n “ frun d mer”, icumm, yeqqim din i ubeḥri, yettu iman-is. Ahat lewhi n ssaεa d wezgen d wamek i d-yemmekta anejmuε-nni. Mi d-yuγal-d, yufa-d d nnuba imeεraḍen, yettunefk-asen wawal a d-inin ayen ttxemmimen. Akken i t-id-yeẓra weqcic-nni i iseddayen armud, iwehha γer γur-s, yenna: Tura d nnuba n wemγar-ihin n lbaraka. Atan wawal γer γur-k a baba amγar!

Dda Qiqi yesneḥneḥ tikkelt neγ snat, yebren cclaγem-is, yebda awal-is s lewhama:

-- Llah wemṣelli fell-ak a nnbi. ( Wa yerra-yas-d s leεyaḍ, wa s leεqel kan, wayeḍ ulac akk, axaṭer ḥṣan mačči di lğameε i llan) A tiyessetmatin, ay atmaten! Aql-aγ akk d arraw n yemma Ḥewwa. Yal win i iḥesben iman-is d belḥaret (izem), ilaq ad yeḥṣu d tasedda i t-id-yurwen. Dagi ihedder yeṭṭallay γer yiwet  tnebgit, ṣebḥan ay d-yexleq uxellaq, amzur awraγ, tiṭeṭṭucin tizerqaqin, terna lqedd d lufa! Akken i mlalent wallen-nsen, terqaqqes teqcict-nni ( temdel allen-is, teldi-tent-id, ur tεemmed ara, mačči d aγmaz i s-d-teγmez), Dda  Qiqi ṣemmrent wallen-is, dayen “ yeddibuṣuli”, yesbeε, qquren iγeṣmaren-is, yeggugem!  Akken i t-teẓra Nna Cabḥa (tinna akken yetturaren amezgun), terfed tiγratin ( teslallew), tenna i lγaci: Wwtet-as afus i wemγar n lbaraka! Bdan lγaci: Ṣerfeq, ṣerfeγ, ṣerfeq…

Dda Qiqi “teldi-yas”, tuγal-as d agraj, yezmer ukamyun “Hinu” ad yekcem war ugur! Yuγal s awal, yewwet-d s leqseḥ di lqanun n twacult amezwaru, ma d ajdid-agi yewwet fell-as nneḥ, yugad!

Imi  i yekfa awal yuγal s amkan-is yeqqim. Attan tewweḍ-d nnuba n lgaṭu d lgazuz. Mačči d tikkelt neγ d snat i yečča, tin ara d-iεeddin ini tini-yas: Ax lgazuz a baba amγar. Ax lgaṭu a baba amγar. Yečča yesnager, almi yeqqeẓṭel, tuf-d tεebbuṭ-is. Tikkelt taneggarut d Nna Cabḥa i s-d-yewwin ( ass-nni ur d-telsi ara lqecc i tettlusu di tannumi, tewwet-itt-id s “lebniqa”, lqecc-nni i ttlusunt tetlemsaniyin!) lmektub-is. Dda Qiqi iluεa yiwen ilemẓi, yella γer tama-s i yeqqim: I tagi tejweğ neγ werεad?

Nna Cabḥa ḥercent tmeẓẓuγin-ines, tesla-yas-d, iḥun-d Rebbi d tanecraḥt, tḥemmel ( tettḥibbi) ad tqeṣṣer, terra-yas: Werεad jwiğeγ . Εni tebγiḍ a yi-txeḍbeḍ i mmi-ik, neγ i yiman-ik a baba amγar?!  

Dda Qiqi  ( winna akken i yeqqaren: Xedmeγ aya d wa di tlawin) yessetḥa, teḍra yid-s am win i d-yerḍen di tejmeεt. Yessenser yeffeγ. Yuli di tsawent-nni n “ Munṭubun” ,  yuγ lḥal teqqezbel tεebbuṭ-is, teččur d nnefs si lgazuz-nni i yeswa; ur yuḥtam yebra-d i wewriḍ amzun d lmedfeε, ma ur tcerreg ara tserwalt-is, ahat tebzeg si sdeffir, dγa yezzi amgerḍ-is γer tama ukessar anda tella Numidya, yenna: D acu i d-ttruḍun akka fell-aγ, wiyi?!! Zuni mačči d netta i d-yerḍen! Akken i yewweḍ γer “uparking”-nni n la ru d Xmisti, yettwali deg lxir-nni n tlawin, d amalah n teqcicin i d-yeffeγen ass-nni! Yernu cebḥent akk, akken i t-yenna netta deg wawal-is: Taggara-agi yettuqqet zzin deg Wihran, mačči am zik d tiberzegzawin akk!” Lḥaṣun Dda Qiqi ffγent-d wallen-is, yemγel meskin, tin ara d-iεeddin ini yesseḍfer-as tamuγli γer deffir. Ta tewwet-itt-id s userwal “ilaṣtik”, ta tcudd-d iman-is di “ jip ( jupe) poṛtfay”, ta tḥezzem-d taqummict-is “di jip kiluṭ”; llant ula d tid  i d-yettcebbiḥen iman-nsent s lḥijab-nni n Surya… Kra  seg-sent bubbent-d sdeffir-sent, ahat ayen i wumi ur tezmir ara ad tbibb rrumurka n weṭraktur!  Dγa d ṣṣenf-agi i iḥemmel, yettḥibbi daγen titeftufin-nni ( ččiččiyat-nni) , tiyi yettḥibbi-tent kan i uqeṣṣer!  Iḍaε umexluq n Rebbi, yemxel, yesderwec-it zzin! Akken almi i iḥuss yers-d fell-as ufus, yewhem, terkeb-it lxelεa, yenwa d argaz n kra n yiwet seg tidak-nni i “yettedragi”!? Imi d-yezzi yufa-d d yiwen ilemẓi, weqbel ara t-ilaεi yezwar-it-id s awal: Εeğbent-ak tlawin!? Yettuqqet zzin a lḥağ!

Dda Qiqi di ccaw yugad, yebγa a s-yini: “A tent-yemsex Rebbi! Γef ddra-nsent i nectaq akka tiqqit n waman ( ad yettu akk  ayen i d-yenna di Numidya). D wa ay d lqum n bni εeryan!”  Yuγal ibeddel awal-is: Yal lğil s lweqt-is a mmi. Ma ur zhint ara tura, melmi ara zhunt?!  Kemmlen abrid-nsen, teddun ttqeṣṣiren almi i wwḍen γer wexjiḍ “ apasaj”-nni ideg llant ssinimat: “Aṭlas akk d Afrik” (winna akken i yessufuγen si ” ru d Xmisti” γer “ru d Labasti”, ibeqqa-t s lxir weqcic-nni, iruḥ. Akken i yedreg weqcic-nni, yeḥlelli-d wayeḍ, yenna-yas-d i Dda Qiqi:”Winna akken i yellan yid-k d amakur, yessenser-ak-d aporṭabl si lğib-ik ur d-tukiḍ d yiman-ik”. A ziγ wagi yella deffir-sen, yeẓra-d  kullec, ma mačči akken i kkaten taḍebbaltd netta d umakur-nni!? Aya yusa-d di ṣṣwab, wama ad yettεudd di Numidya i s-iruḥ upurṭabl-ines; a d-iger fell-aγ ayen ur nelli! ( dagi ilaq a d-ssfehmeγ aya: Arrac-nni i sin llan ttmeslayen-as-d s taεrabt) Dda Qiqi yengef, werraγ wudem-is, tγaḍ-it tlelluct-nni-ines, yernu d “Nukya”.  Di ccaw yebγa a d-yerr llum γef at Numidya, zuni d  nutni i d yir lğerra; yuγal ibeddel axemmem, mačči d at Numidya i t-iγaḍen, ur yebγi ara ad yesluγ i yiman-is tamda, amzun yufa lbenna deg tugniwin ( ttṣawir)-nni n tlawin i ineṭṭden deg wallaγ-is…

Yerkeb aṭruli, yezreb ad yaweḍ s axxam, terkem-d teccuyt-is seg wayen i iwala ass-a.Yeḥren, yettnadi ansa ara d-yessew aγyul-is?! Ala taεwint n Nna Ququ i  s-d-yegran. Yuγ lḥal yeḥṣa belli yell-is ( Ferruğa, tinna akken i s-iεeğben i yemma) ulac-itt deg wexxam, attan γur jida-s. Yesṭebṭeb, akken i s-d-teldi tawwurt Nna Ququ, yufa-tt d tazeggaγt am tḥemret ( meẓẓiyet xirla fell-as, tesεa 40 iseggasen kan di leεmer-is, yerna tusa-d si lḥemmam, teḥḥerqes), yemmeγ fell-as am yifis, yedmummeγ fell-as, tinna tdemmer-it-id, tenna-yas: Buh γef uqerruy-ik! D acu i k-yuγen akka ay argaz?! Nekk usiγ-d si lḥemmam akken ad qḍuγ lewqat-iw n tẓallit, yernu ma yebγa Rebbi seg uzekka ad uẓumeγ 6 wissan-nni i yi-yettalas; kečč aql-ik-id testufaḍ-d i tiyi, tuγal-ik-id temẓi!

Dda Qiqi yejjet ( sellaw) am yifer-nni n yifit ( tanneqlet) di taggara n lexrif, yekreh iman-is, yendem di tlalit-is. Yekcem γer texxamt n yiḍes, yessaγ tilibzyu, yernu ala “ la ẓiru” ( entv)-nni-nsen i yellan deg-s, yufa ttmeslyen-d γef “ ssaqiya lḥemra”, din kan sεeddan-d tuddna n lmeγreb; Dda Qiqi yerma-d am wezger: Xxah, xxah! Si terga zeggaγen γer tẓallit!  Slil imi-k d remḍan! »

Tamawt: Atah yezwel n yixef i d-iteddun: Ass d yir ddunit, iḍ d yir targit.

Agzul: Aṭlas ad yennuγni ilmend n  liḥala ideg  ttidirent tlawin s umata, timaziγin ladγa; ad igen s unezgum-nsent, ad yargu tusa-d γur-s Σelğiya i d-iceyyeε Sidi Valuntinu. Mi ara iruḥ γur-s a s-d-yini uneggaru-agi: D kečc ay d imsellek n talsa, ma ur tḥuddeḍ ara tulawin, a tent-yessenger Dda Qiqi!

A ziγ Dda Qiqi yuγal d awaγezniw s ṣṣifa n ssaylala ( berret, neγ ačeγyay), yebγa ad yessenger akk tulawin n ddunit. Aṭlas ad yuγal d aferṭeṭṭu ( taḥacḥact) ameqqran, ad yesserkeb akk tulawin γef weεrur-is, ad yafeg yes-sent di tegnewt… Amek ara yili umennuγ gar uferṭeṭṭu akk d ssaylala, neγ gar Dda Qiqi akk d Aṭlas? Wissen anwi ara yernun (iγelben) wayeḍ? Wissen ma ad temlil Σelğiya akk d Ḥayat ilmend n tegnit n lḥerṣ? Wissen ma ad yessiweḍ mmi-s n Wemsed akken a d-isellek akk tulawin n ddunit, neγ a d-negri akk d “ li maččist”?!...

Aya a t-naf deg wuṭṭunen i d-iteddun.   

atlasnatwemsed@yahoo.fr

Atan wayen yura:
......
"armi i usmeɣ deg wezger-nni, qqareɣ: lemmer ɣas d nekk i yeṭṭfen amkan-is.Taqemjet d tamellalt terna-yasent-id ccbaḥa i tebbucin-is i iṭennben am tbakurin-nni yessemṭin bla lweqt."
......



A lawliya ! A ziγ d Muḥ "Furnu" i d-yefka ṛebbi deg-s Waṭlas-agi !

Azul,
Deg uḥric amenzu terẓiḍ kra yellan d asalu tzegreḍ akk-in ar yir awal. Imi d-nniγ "yir awal" ur bγiγ ara ad ak-zzmeγ maca llan wawalen akk-en yebγu yili wumdan ad ifriwes ma ad ten-id-yemlil. Am "ur d tcebbum ara tacεirt-is(n yemma-s n Aṭlas)".
Ittbin-d deg uḥric-agi amenzu am akken d amyizwer ar tinin n waṭas n yir awalen.
Dacu kan γas akk-en, tihuski n tenfalyin rrant-ed lmil. "Ixeddem γef tεebbuṭ-is, γef tkebbuṭ-is, γef tbebbuṭ-is.." d yiwen umedya i yi-εeğben aṭas.

Aḥric wis-sin yufrar ugar γef umenzu, akk-en ẓerreγ. Imi deg-s am akk-en Aṭlas yuki-d neγ yebγa ad d-yaki. Ula d ameskar ittağğa tamuγli-s tettezzer s talqi ar wayen γef d-yettawi.

Tihuski n uγanib-inek dayen ibanen, atan yiwen umedya nniḍen:
""Lxalat yebhan, lgaṭu aẓidan, ijeǧǧigen fsan, imdanen akk zhan, s tuɣac yelhan, ala kečč i ixuṣṣen ay afuḥan…" Dagi, d aγanib am win n Si Muḥend neγ n Muḥya deg kra n tceqqufin.

Tella daγen yiwet n tamawt, d tin γef d-yewwi Ğamal Benεuf yakan, d tira n wawalen akk-en ttwanṭaqen deg idurar n Tbabuṛt akk-in. Mači d ugur, maca a wi' yufan, tira n wawalen ad tili yiwet. Ma d asusru, yal yiwen akk-en yennum. Yerna llan imeḍqan anda tesseqdaceḍ talγa n kra n wawalen akk-en am Igawawen. Amedya: "di Numidya, di Wihran..." Maca "iwweṭ, iṭsa-d, iγleṭ..." Lemmer d nek ad aruγ "Deg Numidya, deg Wihran..."..."iwweḍ, iḍsa-d, iγleḍ..."
"deg" deg usamar neṭṭqen-d kan 'g am " 'g Wihran"...deg umalu(igawawen) di am "di Wihran, di lxedma..."

Dacu kan akk-en yebγu yili ad ak-iniγ: Ayyuz, ayyuz, ayyuz !

Tanemmirt aṭas aṭas.

“Susem”-ik yesmekta-yi-id s tezlit-nni n Uleḥlu:
« Susem! Susem!
Ma d tagi i d tterrebga
Ruḥet ad teksem tisita »
Daɣen s wawal-nni n Ṭaher Ǧeɛɛut a t-yerḥem Rebbi:
“ Ma tneṭqeḍ-d temmuteḍ, ma tessusmeḍ temmuḍeḍ, ihi ɣas nṭeq-d temmteḍ”!
Ula d kečč tjaḥeḍ a Susem a mmi! ɛeǧbent-k tedmarin n Ḥayat!... Ha…ha…ha!...
Wissen ma a k-ɛeǧben “wat tmira d nniqab” d wigi kan ara d-temlileḍ deg yixfawen i d-iteddun, a xali! Ɛni tǧeɛleḍ di “ La Swis” i nella! Mačči ala tafsut i yella deg Wehran, a gma! Aql-aɣ gar ẓẓebra d yefḍisen! Ma tegreḍ tamawt i weḍris a t-tafeḍ mačči ala tayri ɣef d-yewwi, yewwi-d daɣen ɣef lmertat i ttidiren leqbayel n “ Lḥasi” lḥuma n “ Yexxamen ukarṭun, i d-yemɣin deg umejriw” ideg ttidiren leqbayel msakit, “ iɣriben di tmurt-nsen”! “Ass-a s lketra n tidi i nettaṭṭaf di tnaṣlit. Kra n wass a sent-id-nuɣal akk i tigi, wama tura ad neǧǧ kan imeɣriyen ad zhun s tedmarin n Ḥayat akk d theddurin n Dda Qiqi…
Ma d Lalla Newwara-nni segmi i s-nniɣ a yi-d-texḍeb yelli-s n Nna Faṭi, ur d-iban lexbar-is, tewhem neɣ tesbek, neɣ tɣull-iyi, ur yi-tebɣi ara ad merrḥeɣ seddaw uceqlal-nni n “ Tturifal”, akk d Sunṭr Pumpidu”!
Aṭlas seg Wehran “ Lbahya”.

Tamawt: Akk iḍrisen i n-ttazneɣ teffɣen-d xerben deg wesmel, ad as-tiniṭ d “ ṣṣabuṭaj” i yi-ttṣabuṭin iwaziwen-agi n yemyura. Qum ( ladɣa Newwara)!
Alih! Bundibara!...

Ar tufat
Aṭlas
Tamawt nniḍen: Azul a Dda Ḥemmu. Ar deqqal a k-n-gerrzeγ tarkasin.

Ayaṭlas bu tlufa.

Timsal id-tewwiḍ ahat d ayen ttidiren yemdanen yal ass. Maca nettseḍḥi ad-nini awalen akken llan. Ula ma m'ara nettmeslay s tefransist neγ s tutlayin nniḍen, timsal ttbannen-t-aγ-d akken nniḍen. Nettseḍḥi s teqbaylit deg wayen icudden γer waya. Neγ ahat d ttrebga nni tamcumt, d lmwalfa ur nwulef ara.
Maca di tidett daγen ayaṭlas, tmergeḍ-tt cwiṭṭ. Ayhuh, ulac akw acu teğğiḍ dγa kečč. Yiwet yiwet kan a gma, m'ulac terwi!

Tanemirt lḥaṣun...

Azul a Dda Ḥemmu. Tanemmirt-ik imi tefkiḍ azal i wayen akka ttaruɣ, ladɣa taɣuri-nni-inek talqayant iseg teggareḍ tamawt ɣer tid yeffren, wamag tid ibanen ẓerren-tent akk yemdanen.
Tegra-d di kra n yir imeslayen-nni i d-tettmagareḍ di tira-w, si tegnit ara tayeḍ, wigi yessefk ad tewwteḍ fell-asen nneḥ, qqen tiṭ-ik fell-asen a Dda Ḥemmu, ur yessefk ara kan a tt-tandiḍ ɣef cceḥ ! Ur yessefk ara ad tettaniḍ am awkken ttanint temɣarin-nni-nneɣ iqerray n warraw-nsen zik-nni ! Ulac akk anwa ara d-iɛerqen s wawal ?! Ahat d aɛraq kan i d-ɛerqeɣ s yir awal, ahat ur ɛemmdeɣ ara, ahat ar ɣur-neɣ nekkni mačči d lɛib, ahat lliɣ ttjefjifeɣ ( ttlejlijeɣ) almi d-nniɣ yir imeslayen-nni, ahat mačči d nekk i ten-id-yennan, ahat d albeɛḍ-nniḍen kan i ten-id-yernan sɣur-s, ahat nniɣ-ten-id kan s lɣecc ( s wurfan) ur wwiɣ ara s lexbar , ahat bɣiɣ kan a ten-issinen (ismawen –agi n yir lehdur : am wakken i sen-tsemmam kunwi, wama nutni d ismawen am wiyaḍ, ma ulac amek i ten-sseqdacen imejjayen akk d imussnawen deg imawalen !) yelmeẓyen am wakken i ten-ssnen s taɛrabt akk d trumit!... I ḥqa ! Amek i teẓriḍ lehdur-agi diri-ten, ur ilaq ara a ten-yesseqdec yiwen ?! I lemmer ur ten-tessineḍ ara s teqbaylit, amek ara teẓreḍ diri-ten ?! « bun ! » kečč mlan-ak-ten-id warrac asmi telliḍ meẓẓiyeḍ, i wid ntura amek ara ten-issinen a Dda Ḥemmu, ccic ini-yi-d amek?! « nurmalmun » a yi-tessnemmrem ɣef theddurin-agi, acku d aselmed i sselmadeɣ ilmeẓyen, imi nekk ur ufiɣ ara anwi ara yi-yesslemden ! Yernu a yi-yekkes Rebbi ma d nekk i ten-id-yennan, ar d Dda Qiqi i ten-id-yennan a Dda Ḥemmu!
Ma ualc aɣili a k-steqsiɣ a Dda Ḥemmu : Ma teɣriḍ « Alef layla wa leyla » , neɣ ungalen n Racid Buǧedra, neɣ ungalen yuran s trumit ?
Ma tenniḍ-iyi-d « ih »
A k-iniɣ qqaren-d ger wayen i d-nniɣ d wayen i d-qqaren wiyaḍ! Neɣ wiyaḍ a d-inin ayen bɣan ( ula d nekkni) s tmeslayin-nniḍen maɛlic, ma s taqbaylit ( tamaziɣt) ala, acku d tutlayt n lmalayekat, neɣ n wat Rebbi!
Ihi a Dda Ḥemmu ilaq ad tesɛuḍ leɛqel d lmeɛqul! Ilaq kullec ad yili s teqbaylit, am wayen yelhan, am wayen ur nelhi, yiwen ur iḥettem ɣef wayeḍ akken ad iɣer timerruksa-yagi! Ma d kečč a dadda Ḥemmu atah wamek ara txedmeḍ: Yal mi ara d-temmagreḍ yir awal qqin yiwet tiṭ, simmal kan ara tennameḍ, ad yuɣal kullec a k-d-yettban “nurmal”...
Qurk ansi i treffuḍ a Dda Ḥemmu, s yixef n Dda Qiqi bu lemraqi, ar k-ttɛuzzuɣ, am wakken i ttɛuzzuɣ arrac-agi-nneɣ n wesmel: imyura. qum, neɣ: imyura. nat ( “ nat”-agi ykka-k si tmaziɣt “lung ufisyal”)
Yernu segmi i ttxalaḍeɣ akka asmel-agi, teḍra yidi am bu cemma, lemmer ur rezzuɣ ara ɣer ɣur-s xerṣum tikkelt i sin wussan a yi-yaɣ kra!
Ḥemmleɣ-ken (t) akk, yernu ccah yehwa-yi, ma ur ken-ɛǧibeɣ ara “ ttumppi” a “ librubru”! Ma d nekk ad ruḥeɣ ɣef yiman-iw ɣer mamma ad ččeɣ lesfenǧ akk d lmeqruḍ ( lemberrǧa i s-neqqar di : B.B.A.
Alih a wer d aken-yeṭṭef buberrak! Ččaw- sis-ku!
Aṭlas ameslub

Azul a Aṭlas a gma


Yessuter-iyi-d gma-tneɣ Ǧamal Benɛuf tamuɣli-w s aḍris-agi-inek i yi-d-yuzen ussan-agi iɛeddan. D tamuɣli n imeɣri ara k-n-azneɣ mačči d tasleḍt neɣ d azɣan imi ur ssawḍeɣ ara i waya. Ɣas ur k-ssineɣ ara, ur yelli uɣilif a Aṭlas a gma, ad ak-n-aruɣ ɣef wayen i ɣriɣ akken i s-ḥulfaɣ. Yura-yi-d Ǧamal kra n wayen yelhan fell-ak maca aḍris-ik ahat a d-yini ugar ɣef iḥulfan-ik, ayen tebɣiḍ d wayen tessarameḍ. Ayen yelhan deg waya d akken di tazwara turiḍ s tmaziɣt, tebɣiḍ ad taẓeḍ ɣer zdat di tira. Tis snat d iswi i tefkiḍ i lebɣi-k n tira s tmaziɣt, d asentel n tayri, temẓi d iḥulfan. Ur yeshil ara ccɣel-nsen di tmetti-nneɣ.


“Liẓ-Aventir n Dda Qiqi” ggtent mačči yiwet. Ayen yellan deg weḍris-agi ahat d yiwet
seg-sent kan, ɣef waya, taqsiḍt s timmad-is, si tazwara ar taggara, ur zmireɣ ara ad mmeslayeɣ fell-as imi yella wayen iɛeddan yakan, nekk ur t-ẓriɣ ara, akken yella wayen i
d-iteddun, nekk ur t-ẓriɣ ara. Maca deg weḍris-agi yugar umeslay ɣef wayen yexdem Aṭlas wala ayen yexdem Dda Qiqi, neɣ ahat deg uṭṭun-agi kan i yegget umeslay ɣef Aṭlas d tedyanin-is !


Si tɣuri tamezwarut, d taɣara n tira i d aɣilif imi deg weḍris-agi tettaruḍ akken ttmeslayen di temnaṭ n Bgayet, ihi kečč d Abǧawi !? Tira-agi ur wulment ara : iḍebbalen d iṭebbalen mačči kifkif. Yiwet n teqbaylit i yellan mačči snat neɣ ugar. Aɣanib-agi neɣ taɣara-agi n tira tezmer ad taf amkan-is di tmezgunt neɣ deg usaru, ma deg weḍris aseklan, ur tlaq ara.


Lemmer yettwaru udiwenni akken iwat lḥal, s tririt s asayes, ad yuɣal weḍris-agi d tamezgunt. D aɣanib n Muḥya (ad yettwarḥem) ladɣa anda llan imeslayen yecban plaṣ darm, čečču, arundivu, lafiray, ddeviz, lamur, pa mwayan, amarci, apurṭabl… yesseqdac-iten Muḥya s waṭas di tmezgunin-is.


Temgarad tayri (amour) d tuzzuft (sexe). “… Yeqqes-iyi wezrem, yeǧǧa-yi ssem-is…”,
“… ahat tfehmem acu yebɣa a d-yini wawal-agi, aneggaru ! “.
I win ur nefhim ara, amek ara teḍru yid-s ? Ma yella d ayen yettwafhamen s tɣuri tamezwarut, acuɣer asteqsi ! Ayen tebɣiḍ ad t-id-tiniḍ yessefk ad yili yettwafham, neɣ ahat ula d kečč tessetḥaḍ ad temmeslayeḍ ɣef “uzrem iteqqsen” akk d “ssem yettaǧǧa” !?


“… Ɛni meẓẓiyeḍ imi d-tessawaleḍ akka tiheddurin am tigi ?!...“
Tuzzuft d tayri mačči n yelmeẓyen kan. Ula d widen meqqren di leɛmer, argaz d tmeṭṭut zemren ad mmiḥmalen akken mmiḥmalen yelmeẓyen.


Deg wegzul yella umsawal (narrateur) : “Aṭlas yeffeɣ-d seg wexxam… “, “… tarwiḥt n terwiḥt-iw, akka i s-isemma netta…”, “… Dda Qiqi di tannumi yezga…”, “Aṭlas a d-yaf Dda Qiqi…”, “… Aṭlas texdeɛ-it tmeddakelt-is”, “… Ma d Dda Qiqi a ziɣen iruḥ yeḥḍer…”.
Deg weḍris ulac-it, d Aṭlas i d amsawal, yemmeslay ula deg umur n Dda Qiqi : “… Attan teqṣiḍt i wumi ara sleɣ : …”
Acuɣer a yekkes awal i Dda Qiqi akken Aṭlas ad yales tadyant deg umur n win ukud teḍra ?
“…Ur t-ǧǧiɣ ara ula a d-ifak tamacahut-ines… ”
Amek ara s-tgezmeḍ awal yili d kečč (Aṭlas) i la d-yettalsen deg umur-is, deg umur n bab n tmacahut ?


“… imeslayen-agi n Dda Qiqi zgan-iyi-d ɣef wul-iw gedged…”, ”… Ur zmireɣ ara a s-fkeɣ lḥeqq i Dda Qiqi i ikerhen tulawin…”
Mgaradent tektiwin (contradiction). Aṭlas am tata, yettbeddil rray si teswiɛt ɣer tayeḍ.
Tikwal yedda d imeslayen n Dda Qiqi, yebɣa-ten, tikwal yugi-ten, ur ten-yeqbil ara.
Ahat akka i yella Aṭlas !?


Yettwakkes wazal i tmeṭṭut : “… ma ilaq a s-tefkeḍ azal i tmeṭṭut…”, “… Ma ur
tt-tessarexseḍ, ar d ak-tessirxes nettat…”.
Ulac anwa ara s-t-d-yerren azal i tmeṭṭut, ur s-tefkiḍ ara awal i waya. Ma yella tadyant-agi gar Aṭlas d tulawin yessefk ad sɛunt ula d nitenti awal akken ad tban tkerrist (intrigue, conflit…), ayen i ten-yeccerken d wayen i ten-yessemgaraden.


“… Ass umenzu n mayyu aql-i a d-aseɣ, a k-m-awiɣ ad tebbuḥruṭ deg Sidi Mḥemmed…”
Ɣur yiman-ik, acu i tezmer a d-terr tmeṭṭut i wencad yecban wagi i d-yekkan sɣur yiwen wergaz ur t-tessin ur tt-yessin ?


Ssarameɣ ad ilint kra n tneqqiḍin-agi deg wemkan-nsent, ssarameɣ daɣen tiririt sɣur-k ma yella wayen twalaḍ ur iwulem ara deg wayen i k-uzneɣ akka.
Lemmer ufiɣ lebɣi-w, ad neqqim ad nemmeslay udem s udem akken ad nini ayen iwulmen akken iwata imi s tebratin ẓẓay cwiṭ lḥal.
Asentel, ma tufiḍ-as abrid ansi ara s-tekkeḍ, izad maḍi. Maca ur ilaq ara ad yuɣal d rregmat mgal tameṭṭut neɣ asenɣes seg wazal-is. Akken yettmeslay wergaz ɣef tmeṭṭut i ilaq ad temmeslay tmeṭṭut ɣef wergaz. D ayen yellan gar-asen, seg wayen i ten-icudden alamma d ayen i izemren ad ten-yefreq, i yessefk a d-iban, s uɣanib-ik n tira imalen aṭas s amezgun. Ẓer Ǧamal temmeslayem ɣef umezgun…
Azul d aḥmayan, afud igerrzen.


Muḥend U Remḍan Abdenbi.

Azul a Muḥend Uremḍan. Tanemmirt imi teγriḍ amagrad-inu, daγen imi terẓiḍ aqerruy-ik γef ddra-w, akken a yi-d-tefkeḍ tamuγli-yagi swayes ara aẓeγ γer γer zdat.

Llant kra n temsal (ahat) xerbent-ak imi d amaskar ( amyaru) i d asaḍ ( win iγef tebna tedyant), acku ur nuγ ara tannumi s waya. Maca, ad εerḍeγ ad ssisehleγ di tamsal ssya d afella. Ayen nniḍen a t-id-ssfehmeγ ass-nniḍen, ladγa deg wayen yerzan amennuγ γef izerfan n tlawin, imi d tamsalt-agi s timmad-is i yi-yeğğan ad rzuγ aya; γas ḥṣu nekk d amaziγ amegday, tamaziγt-iw d tin n tilelli akk d izerfan n wemdan, mačči d tinna akken n tidderγelt. Ihi, γas kkes anezgum a gma aql-i s idis n tlawin i yidra n tagada ( amsawi) ger-asent d yergazen. Ma Dda Qiqi amcum lemmer a s-fkeγ awal ugar a d-yini leεğeb γef tlawin, acku iḥemmel kan ccbaḥa-nsent, wama nutenti yekreh-itent; yernu Aṭlas yella iḥar, yezreb, maca yemla-d ayen i s-d-yemla Dda Qiqi. Tanemmirt-ik a gma.
Tanemmirt tameqqrant i wugar n 200 imeγriyen d tmeγriyin i isekkden aḍris-inu, alammi tessawḍen ad yeṭṭef taqacuct deg wesmel. Ssarameγ kan ad yili yuklal aya. Ussan ad teγrem ixef wis-sin. Tanemmirt i tikkelt-nniḍen
Aṭlas Nat Wemsed.

Aẓul a gma Ǧamal. Ssarameɣ a ken-id-yaf yizen-agi di talwit akk d lehna.

Attan tmuɣli-inu i yi-d-tessutreḍ ɣef weḍris i-yi-d-tefkiḍ ( Aḥric amenzu n “ Liẓ-avuntir n Dda Qiqi”, i wumi yefka azwel:“ Meɣres, d useɣres, d win ɣur-s” :

Izen-nni n wemyaru « Aṭlas Nat Wemsed » ɣriɣ-t akken ilaq, mačči d taɣuri-nni kan n menwala, imi ṣṣenf-agi n yeḍrisen ur ilaq ara ad nwali ɣer teclemt ad neǧǧ ul n temsalt, imi ilaq ad nnadi ger twinas ɣef taktiwin tuffirin i yebɣa wemyaru a ɣ-d-yessiweḍ.

Maca, bɣiɣ kan a k-n-iniɣ, qbel ara d-mmeslayeɣ ɣef yizen n Mass Aṭlas, akken tamsalt-agi n tukksa n “iṭabuten” d tin yesɛan tixxuṭert meqqren, dɣa mačči d yiwen neɣ sin i ixemmmen ɣef waya. Meɛna qbel ara d-nebdu tamsalt am ta ilaq ad nwali qbel d acu-ten iṭabuten? Ttuqqten! Aṭas i yellan, aya d ayen ibanen, ihi , win i yebɣan ad yergel iṭabuten ilaq-as ad iẓer seg wanwa ara yezwir, dɣa imi allaɣen n yemdanen ur ttemsawin ara, akken ula d tigzi-nsen akk d tmuɣli n yal yiwen deg-neɣ i temsal yecban tigi; imi llan kra n yemdanen ttwalin iṭabuten-agi d kra i icudden ɣer leɛwayed neɣ ɣer “ lmuɛtaqadat”-nsen, ur yeshil ara akken ad qeblen tamsalt n tukksa iṭabuten. Amedya d aḍris neɣ amagrad-agi n Mass “ Aṭlas”, ur yezmir ara ad iɛeddi s tin n tin n sshal ɣer yakk medden, imi yezmer walbeɛḍ deg-sen a tt-iwali “ d tukksa n leqder neɣ n leḥya” aya ger tacciwin, imi ur zmiren ara ad fehmen tamsalt-agi n tukksa iṭabuten. Iwakken ur nettaweḍ ara ɣer waya, ilaq di tazwara ad neẓẓu takti-agi n tukksa iṭabuten deg wallaɣen-nsen daɣen ad nextir talɣa i iwulmen akken ad nekkes iṭabuten-agi deg webrid war ma nessemxuxxel tigejda n leɛwayed d “ lmuɛtaqadat” n medden.

Aḍris n Mass “ Aṭlas” mačči d win i yezmer ad gzun akk medden, ( ur d-heddreɣ ara ɣef imeslayen maca ɣef talɣa yakk d taktiwin tuffirin deffir imeslayen) ur t-qebblen ara yakk medden s talɣa-nni i yes-s d-yella, imi yettḥaz kra n temsal i icudden ɣer leqder yakk d leḥya. Nekk ur lliɣ ara mgal tamsalt n tukksa iṭabuten, maca, ilaq ad yili waya s talɣa iwulmen ara gzun yakk medden ama d wid yeɣran ( lmuteqqafun) neɣ wiyaḍ , ama d lǧil n zik neɣ n tura, imi mgarradent lɛeqliyyat yakk d tegzi n yal tama seg wigi, ilaq ad nefren talɣa talemmast ara yessiwḍen tikta i yakk medden.

Aḍris n Mass “ Aṭlas..” d win qessiḥen aṭas yiwet am nekk ur t-qebbleɣ ara akken s talɣa-nni i s-d-yella, ɣas ma yella gziɣ iswi yakk d tikta n wemyaru maca ilaq daɣen ad nqader timsal n ddin yakk d leɛwayed n medden, ilaq ma yella nebɣa ad naru, ad naru i yakk medden, ayen ara gzun u ara qeblen akk s umata, mačči i kra kan, wiyaḍ ala. Wagi ad yeqqim d rray-iw kan ur ẓriɣ ara ma yella di ṣṣwab neɣ ala, maca akka i ttwaliɣ, lemmer aḍris am wa a t-id-nɣer neɣ a t-ɣren waṭas medden, qlilit wid ara t-iqeblen akka s talɣa-s ɣas ma yella ad qeblen asentel ( le sujet)-ines, maca, mačči yakk zemren a t-gzun akken i yebɣa wemyaru, aṭas ara s-yinin wagi « yesleb » neɣ « yestufa », neɣ « yesfuǧǧuɣ » ilmend n waya talɣa s wacu ara nessiweḍ timsal-agi i medden tesɛa azal meqqren.

Nekk mi ɣriɣ aḍris-nni, yusa-yi-d ɣer lbal-iw wawal-nni umedyaz Leḥlu mi s-yenna :

« wigi d isefra

Mačči d timsirin

Neɣ d lewṣayat

Yezmer ahat d tuffɣa n leɛqel

Maca, mačči d tuffɣa i webrid”

Awal-agi yeɛjeb-iyi aṭas, imi amyaru yezmer ad yaru ayen i s-yehwan, d wayen i yettxemmim, maca, ayen ara yaru ad yeqqim d tira kan, yezmer lḥal ad yili d ṣṣwab neɣ d tuccḍa, maca, ayen i ilaqen i wemyaru ad yeṭṭef deg-s d “ abrid” ur iteffeɣ fell-as, ma yella yebɣa ad taweḍ tira-s i yakk medden, imi imeɣriyen zemren ad ɣren ayen yellan, ala ayen i yeffɣen i webrid. ( ur d-qqareɣ ara d akken aḍris n Mass “ Aṭlas” yeffeɣ i i webrid, maca d talɣa-s ur yettwaddamen ara lɛeqliyyat n medden, daya).

Wagi ad yeqqim d rray-iw, ssarameɣ a yi-d-terreḍ fell-as, a yi-d-tiniḍ ma yecceḍ neɣ ala, nekk akka i yi-d-tban temsalt.

Tanaṣlit

Azul ay “ amazan n tayri”*

Ssarameɣ tgerrzem akk , akken ma tellam. Buddeɣ azɣal-nni i d-yersen ɣef kra n temnaḍin, ladɣa tamnaṭ n Leqbayel , yella-yawen d tasmuḍi ( tesmeḍ) akk d talwit, am wakken i s-tuɣal tmess i mass-nneɣ Brahim ( “ Jeddi Yebrahim” akken i s-isemma Muḥ-ya i yiwen seg tugniwin-ines umezgun). Hhah!... Yella kra n tbexsisin, neɣ werɛad d-wwint? Wissen amek tessezrayem ussan-nwen dinna? A wi yufan ad yeṭṭef adeg-nwen xerṣum yiwet ssaɛa kan.

Ayen yerzan ilemẓi-nni (neɣ tilemẓit-nni ahat ?) amray : Aṭlas Nat Wemsed ( ger tamawt i yisem i yefren « Aṭlas »! Aṭlas: d irebbi iseg d-frurxent yakk tmucuha yettwassnen deg umaḍal, ama ɣer Legrig neɣ ɣer wiyaḍ. wissen dɣa ma yuki s wayagi, neɣ d nekk kan i icukken aya ?!) Nat « Wemsed » ! Amsed d allal, neɣ d taɣawsa ( yezmer ad yili d aẓru, neɣ d ayen nniḍen am lmileq…) s waydeg nessemsad akk ttawilat i nesseqdac di tudert-nneɣ n yal ass ( lemqes, lmus, agelzim, amger…). « Amsed » yesɛa daɣen anamek nniḍen : D abeɛɛuc yecban amulab ( ḥṣiɣ ur tessineḍ ara amulab), neɣ yecba tata ( tawekwakt) , netta « gris » iruḥ s llun azegzaw, ikeccem ɣer teɣrasin itett tamment alamma yerwa, ini yeffeɣ-d.

Ad neṭṭixxer i yisem, a d-nuɣal ɣer tira-s. S tidet kan yefren tawsit ( ṣṣenf) ur yuri ula d yiwen s teqbaylit. D acu kan ayagi yeḥwaǧ aṭas n tissas, akk d tuzert n wudem. Nekkni s leqbayel, (am kemm, nekk, d wiyaḍ) d “isettuten” , teḍra-yaɣ am ttewḥiyyat-nni yettbeddilen udem (yettuɣalen ɣef yal ṣṣenf, deg wass cebḥent, deg yiḍ ssufuɣent-d uglan d waccaren). Ger, neɣ ɣer medden d lmalayek, ma deg yimanen-nneɣ nugar ccwaṭen; bɣiɣ a d-iniɣ: Mačči d tid i nxeddem i d-neqqar, mačči d ayen i nettxemmim i nettaru. Anwi seg-neɣ ur nessibnin tiram yecban tigi, xerṣum ula deg uxayel ( asugen) ? neɣ, ḥqa kemm texḍiḍ, tettẓallaḍ, kemm d taḥurit n lǧennet, tɛebbdeḍ kan Rebbi s tteḥqiq, texḍiḍ i tigi n tuzuft ( lǧins)… Ɣurk ad terfuḍ fell-i! Ula d nekk aql-i qqleɣ d amger di tewser-inu; maca, lemmer s wawal (mačči s tira) d awezɣi a m-n-iniɣ akka, wamag ayen i d-yura Aṭlas, a yi-yesgugem d agugem…

Ayen i yi-d-tenniḍ deg tebrat-im ur yi-iqenneɛ ara, ur yi-yekkis fad; am wakken kan ur d-tenniḍ acemma fell-as. Lliɣ ttraǧuɣ seg-m snat tɣawsiwin:

-- Tamezwarut: Kukraɣ a yi-d-tiniḍ: Acimi ara yi-d-tazneḍ aḍris yecban wa?! Ad terreḍ iman-im amzun d tamrabeṭ. Ɣas ḥṣiɣ teɣriḍ iḍrisen yugaren wigi: Ḥalazun lɛanid ( ajeɣlal ( aɛrus) n ččaqlala, “deg-s d ḍḍker, deg-s d nnta”) i yura Racid Buǧedra; akken-nni yakk uɣaleɣ nedmeɣ, maca ifut teffeɣ-d tebrat, lamana tewweḍ bab-is. Uff! Tagi attan teslek.

--Tis-snat: Rǧiɣ a yi-d-tefkeḍ rray-im deg wannect-a, mačči kan iwakken a s-ssiwḍeɣ cwiṭ seg-s i bab n weḍris, maca ḥwaǧeɣ-t ula i yiman-iw; acku ṣṣenf-agi n tira d amaynut ɣer ɣur-neɣ. Taggara n tneggura, ur d-tenniḍ acemma, ur d-tenniḍ la zzant, la rɣant.

Tewwiḍ-tt kan : « Weqbel ara d-mmeslayeɣ s talqayt ɣef waya d waya… » Taggara ur d-tenniḍ kra.

S tidet kan tesswehmeḍ-iyi ! Amek ?! Ayen ( imeslayen-nni) i yellan d ugur ɣer wiyaḍ, kemm banen-am-d mačči d ugur?! Ayen i iɛejben wiyaḍ ( talɣa, ccekl, la manière) , kemm ur d-tenniḍ acemma fell-as!

Wid ikukran, neɣ wid i wumi ur ɛjiben ara imeslayen-nni ( deg wulawen-nsen ahat qqaren : “lemmer ɣas a d-yernu kra yugaren aya.”), qqaren-d : Mačči d nekkni i d ugur, nkukra seg medden a s-inin “wigi ur ttsetḥin ara”. Maca, d acu i d-yenna Aṭlas? Yenna-d kra n wawalen i d-yeddan deg isefra n ” Si Muḥend U Mḥend”, yenna-d kra n wawalen i d-yeddan di tezlatin n At Meslayen.

Atan westeqsi ara d-fkeɣ nekkini ( maca, ɣurk ad tɛuddeḍ d aḥuddu i ttḥaddaɣ Aṭlas-agi, neɣ d ayen nniḍen) : Wissen, (imdanen i ikukran seg imeslayen-agi ) lemmer llin di tegnit ideg yedder Si Muḥend, amek ara s-xedmen ?! Wissen ma a s-gezmen aqerruy?! Tura ttarran-as akk tajmilt, ma d kra seg imeslayen-is, ma yenna-ten-id wayeḍ terwi! Wissen dɣa ma zemren a s-medlen tawwurt i teẓrigt i d-yessufɣen tisfifin n At Meslayen?! Neɣ yettwagdel kan i wiyaḍ a ten-id-inin ( imeslayen)?! Tegra-d deg wayen i d-yenna a s-yexdem

( lemmer yufi ? dagi d axayel kan! ) i Ḥayat ( i lemmer d nettat i t-iḥemmlen, wissen ma a d-txayel a s-texdem akken?! D acu tenniḍ deg waya?!), atan ɛad iḥezzeb, lemmer d wayeḍ yesɛan lkuraj am netta, yili a d-yini leɛǧeb, a tt-yessiweḍ ɣer lmuḥal, a d-yini: xedmeɣ ( mačči xuyleɣ-d) yid-s ugar, deg “ubagus d akessar”!? Ayen i yi-yesswehmen, d ayagi: Yefren iman-is d netta i d asaḍ ( “hiéro” , ccexṣiyya tagejdant), mačči d wis-tlata ( albeɛḍ nniḍen) , ɣas yebdel isem-is, maca ɣur medden d netta “ Aṭlas”! Ayagi wissen ma d tisselbi, neɣ iɛemmed, neɣ d lkuraj i yennernan deg-s?! Acku ma yecceḍ, neɣ yeɣleḍ d netta ara yettwaḥasben ɣer imeɣriyen. Wissen ma yettwelleh, neɣ iɛedda fell-as uzaglal?! D acu tenniḍ deg waya?!



--“Talɣa”, nekk tban-iyi-d telha, acku ma yekkes imeslayen-nni, ma ibeddel –as talɣa i tira-s, ad tuɣal d ulac, ad timsus, yiwen ur yettarra lwelha i wayen i yebɣa a d-yini; ahat ( nniɣ-d ahat?!) ayagi iga-t d tasennart a d-yejbed yes-s imeɣriyen, ɣas a d-banen ugin-t, maca deg yimanen-nsen s ccuq d tujjma s wayes ara t-ɣren . Imdanen teḍra-yasen am teslit-nni iɣummen udem-is, teǧǧa “igecriren-is” ɛeryan!...



-- Tikta, neɣ ayen yebɣa a d-yini ( wissen ma akka, neɣ d nekk kan i wumi d-tban?!) : Yeɛreḍ a d-yawi ɣef wemgirred yellan ger tsutwin, tin n zik ( Dda Qiqi, yezzwer-it dɣa d azwel, akken i t-yezzwer di leɛmer) akk d tsuta n wass-a, netta s yimmad-is ( Aṭlas). Dagi, ger dɣa tamawt: Dda Qiqi iḥemmel nezzeh ayen sɛant tlawin, ɣas yekreh-itent ( tulawin) nutenti s yimmad-nsent. Aṭlas iḥemmel ccbaḥa, iḥemmel zzhu maca, ur yekrih ara tulawin, ɣas yerfa ɣef Hayat am wakken i yezmer ad yerfu ɣef wergaz neɣ ɣef tmeṭṭut nniḍen, yettqaḍar izerfan n tlawin… Daɣen yebɣa a ɣ-d-yessebgen tizzelgi yellan di tmetti yebnan ɣef “ lellu” (lmadda), amek i ttraben( tteɣlayen) deg-s wazalen n talsa: yecban tayri, iḥulfan… Agnu n tmeslayt yefka-yas azal: Yemla-d : mačči kan iḥemmel tamziɣt, maca, yeɣra-tt, ( Mačči seg wid –nni yeqqaren: Ur ttaɣet ara tiyaḍ, nutni ugaren wiyaḍ) Yeɛreḍ amek ara yesdukel snat tɣawsiwin i iḥemmel: tayri-s “Ḥayat” akk d tmaziɣt, maca yemla-d i wid yettnadin ɣef snat, yiwet a s-truḥ. D acu tenniḍ deg waya?! Yemla-d daɣen amek i ttidiren leqbayel n Wehran, am wakken yebɣa a d-yini (ahat tban-iyi-d kan i nekk, wissen?!) : Aql-aɣ di temdint ideg i ɣ-d-zzin wiyaḍ, mačči weḥḥed-neɣ di taddart. Amek ara nadir?! Ad nefsi , ad nuɣal d wiyaḍ?! Ad nemdel ɣef yimanen-nneɣ tiwwura, ad neffer deg yexxamen-nneɣ, neɣ a d-naf kra n ttawil s wayes ara nidir?! Ahat yebɣa a d-yini : Ma nebɣa ad nidir , ilaq ad nbeddel tikli, ilaq ad nqaḍer iman-nneɣ akken a ɣ-qaḍren wiyaḍ, ilaq ad neṭṭef di tmeslayt-nneɣ, di tnaṣlit-nneɣ, ɣas ad nesɛu uguren tura, ssya d afella ad tennefsusi ɣef tarwa-nneɣ. Wamag tin nga d aɛewwiq, ffer neɣ qqim, sqizzeb neɣ qqim, ma ulac a d-neḍḥu d “Zzwawa”—isem-agi n “ Zzwawa” dagi deg Wehran d rregma, mačči am ɣur-neɣ nekkni: Azwaw/Izwawen d yiwet n tewsit ( ṣṣenf) n yizmawen -- kan, (u, ad neqqim d Zzwawa i lebda, alamma tenger ddunit, yewcem deg-nneɣ, dayen!) yernu war tameslayt, am weydi-nni akebbun ( Abaṭar-nni yettmenṭaren) , isem n weydi yenṭeḍ deg-s, ma d netta kksen-as laṣel-is…

-- Asentel, d ayen yellan d amiran, yerza tudert nettidir ass-a; yewwi-d ɣef wayen yerzan akk medden: Tayri, tudert, lmadda, ahat ssya d afella a d-yernu ayen nniḍen; wissen…?! Ur lliɣ ara d agezzan! D acu tenniḍ deg waya?!

Bɣiɣ a yi-d-tefkeḍ rray-im, i wakken ahat, a d-naru nekk yid-m yiwen weḍris ideg ara d-nefk yiwet tmuɣli, acku ḥṣiɣ ad yeḥmu useqqi ( s wawal kan, mačci s tira), mi ara d-yers “Dda Qiqi” di Tafukt. Nekkni ilaq a d-nefk rray-nneɣ, ur ilaq ara ad nessusem, ɣas ad nxalef Aṭlas, maca ilaq a d-neldi abrid i wiyaḍ. Akken i t-yenna Vultar: “Ɣas ad mxallafeɣ yid-k di rray, maca , ad mmteɣ ilmend akken a t-id-tiniḍ”.

Azul i kemm “Ay amazan n tayri”, azul i twacult-inem akk. S tujjma meqqren.

Ǧamal Benɛuf.

* D tabrat i s-uriɣ deg unebdu-nni, asmi tella di tmurt.

__ Amazan n tayri: nnbi n leḥmala.

Ayen yeɛnan aḥric wis-sin n weḍris-nni n “Aṭlas” ( i wumi yefka azwel: “ Ay ack uqeṭmir, lemmer ideg yeɛmir”), ɣri-t daɣen, ufiɣ-t ur yemgerrad ara aṭas ɣef weḥric-nni amezwaru, imi yusa-d d akemmel i tedyant-nni. Ɣas ma yella tikkelt-a yerna-d yemmeslay-d ɣef “ uṭabu”-nniḍen, win akken i yeɛnan assaɣ gar imawlan d dderya-nsen, amek i yella, dɣa amek i d as-yemmeslay i yemma-s ɣef tedyant-is n tayri, amek i yergel ugur-nni usetḥi, yekkes ṣṣur-nni i d-yebna ukukru gar-as akk d yemma-s, yesqerdec yid-s tamsalt-agi n tayri d iḥulfan.

S tidet asentel d ayen yelhan, maca, tidmi-w ɣef talɣa-agi i s-yettaru ur tbeddel. Tura i gziɣ akken ilaq d acu i yebɣa a d-yini s yisem-nni i yefka i yiman-is.

Amdan-agi, yeẓra akken ilaq d acu i yebɣa, dɣa ur ixuṣṣ ara di tegzi. Yeẓra d acu i ixeddem akken qqaren” Win yuẓamen yenwa ɣef ccer”, ur yeḍfir ara abrid-agi n tira almi i yenwa d acu i t-yettrajun.

Tanemmirt .

Tanaṣlit

Kra n tamiwin ɣef weḍris-ik*

** I tikkelt nniḍen tigi d “lizaventir n Aṭlas” mačči d Dda Qiqi. D Aṭlas i d asaḍ, yettmeslay ɣef yiman-is, ɣef wiyaḍ, itekkes-asen ula d awal. D netta amsawal (narrateur), d netta i Dda Qiqi, d netta i d Aṭlas.


** “Aṭlas yeṣker ilmend n wayen i s-tga Ḥayat”, “… ttmaleɣ akin d wakka, amzun d aṣekran…”
Aṭlas yettmal imi “YEṢKER” mačči “AMZUN D AṢEKRAN”. Nezmer a d-nin : “Aṭlas itezzi leɛqel-is, yuɣal ileḥḥu yettmal amzun d aṣekran”. Dagi Aṭlas ur yeṣkir ara maca yettmal amzun d aṣekran. Ttarra lwelha-k s amgarad yecban wagi.

** “Lhemm yellan daxel n tqerɛet, temdel fell-as tadimt, kkreɣ am ddeɛwessu, kkseɣ-as tadimt-nni, ssurgeɣ-t-id ɣer tqerruyt-iw ! ”
Tafyirt-agi tgerrez, tzad maḍi.

** Ur cukkeɣ ara ad tekkseḍ fad s waman n wasif n lkawter yellan di lǧennet ma tsummeḍ neɣ tessudneḍ imi neɣ taqemmuct n teqcict !!! D aman iṣemmaḍen n Ǧerǧer ara k-yekksen fad, d wigi i ken-ixuṣṣen dinna ɣur-wen di Wehran. Eǧǧ lkawter, lǧennet, Adem d Ḥewwa deg yidis, teǧǧeḍ tayri d tuzzuft deg yidis nniḍen. Ur ttemlilin ara, d awezɣi.

** Ur teshil ara tɣuri n udiwenni anda yella deg weḍris. Yessefk ad tnadiḍ ɣef tɣara n tira n udiwenni, ayagi ad yesshel taɣuri d wefham n weḍris.
“Atan yebda la yi-d-iḥekku, ma d nekk ttxayaleɣ-d ayen nniḍen, axaṭer ssneɣ-t, kra yella, kra irennu-t-id kan sɣur-s : “ Yewweḍ ɣer Numidya, yufa akken i yebda wermud, …”
D KEČČ I LA D-IḤEKKUN MAČČI D NETTA. Ur iban d amsawal ur iban d Aṭlas, yal yiwen s tektiwin-s. Yella udiwenni gar Aṭlas d Dda Qiqi, yuɣal Aṭlas ihedder deg umur n Dda Qiqi, acuɣer a tekkseḍ awal i Dda Qiqi imi kečč mačči d amsawal ?

** Ddeqs si “leccɣalat-agi n teqcicin” tezzin ɣef ...!? Tettmeslayeḍ ɣef teqcicin d tulawin s umata alamma tewwḍeḍ a d-tiniḍ : “… Ma ur yessetḥa ara yezmer a d-yini : Axaṭer leɛqel n tulawin ger imeṣṣṭen-nsent i yella…” war ma tefkiḍ-asent awal akken a d-rrent ɣef yiman-nsent. Tesberkeḍ (noircir) tameṭṭut, ur s-tefkiḍ ara azal, ayagi ur ilaq ara.
Ma d leccɣalat n tmetti s umata i k-iceɣben d lḥaǧa, ma d tiqcicin n ... ?! d lḥaǧa nniḍen. Surref-iyi, tagi ur zmireɣ ara ad tt-fehmeɣ imi mačči dinna yid-wen i lliɣ, maca si sin yeḍrisen-agi, iban-d belli ugur n tulawin meqqer aṭas aṭas. Tettadreḍ-d ula d ismawen :
“?!: Amek a yir argaz ?! Teǧǧiḍ armud n tiddukla, truḥeḍ ad teblagiḍ ɣef yiman-ik !?”
“…?!, yili terwi fell-i, a yi-yessired am ujeɛbub”.
“…?!. i s-yewwin…”
Lemmer ufiɣ ad iyi-d-terreḍ ɣef temsalt-agi…

** Eg-as isem akken i k-yehwa : lizanventir, les kronik, tullist… tamazrart, yal yiwet deg-sen tesɛa ilugan n tira, yessefk ad tissineḍ ilugan-agi akken a d-tiniḍ ayen yeččuren ul-ik d wayen iceɣben allaɣ-ik. Di snat tirawin-agi ɣriɣ ḥulfaɣ am akken ugar i yellan deg-sent usummel (dénonciation) n wayen tugiḍ wala ayen nniḍen yeɛnan tasekla.

Muḥend U Remḍan


Tamawt :
*Yeqseḍ-d ixef wis-sin n « Liẓavuntir n Dda Qiqi”.

Azul d tnemmirt i gma-tneɣ Muḥend Uremḍan ɣef tamawin-agi i d-yettak, imi d tid n tezɣent mačči d asqecmeɛ. Riɣ daɣen a n-greɣ yiwet tamawt s wazal-is:
Bedleɣ kra n wawalen deg weḍris-ines ( kkseɣ ismawen i d-yebder d amedya, akken llan deg weḍris-inu “ s talɣa-nni-ines tamenzut”), maca, giɣ s ccwer-ines, almi i yi-d-yefka amettawi-ines d wamek giɣ aya. Acku d tamsalt n tafrit ( kunṣyunṣ), nniɣ-d aya i wakken ad kkseɣ tuzzma ɣef wallaɣ-iw. Nekk mačči seg wid-nni yebbehban, neɣ yekkaten kan s lewhi.
Mmi-s n Wemsed.

Ass d yir ddunit, iḍ d yir targit( aḥric wiss kraḍ n Liẓ-avuntir n dda Qiqi )


Ass d yir ddunit
Yeεteb si nnhati-s wul
Iḍ d yir targit
Nleḥḥu abrid iḍul
A gma ayen i nεac akkit
A ziγ i ccwal i d-nlul !

Yeččur wul-is aḥlil
Mačči d yiwet i d-yettawi
Ur yeslib ur yejhil
Yewhem deg wayen yettwali

Nnan-as medden ijaḥ
Yeεceq zzhu d tullas
Ur ẓrin ma yettwaqraḥ
Neγ ma d imeṭṭi taḍsa-s

D agellid n tisselbi
Tisselbi-s tif leεqel
Akka i nniγ nekki
Wiyaḍ qqaren yejhel !
yal wa d acu n takti
fell-as i d-yessekfel

Acewwiq i d-yeggar wul-is
Ḥulfaγ-as acḥal yeḥzen
S zzhu yessedrag leγben-is
Akken ur yettban i medden
Ma d tawla izedγen daxel-is
Ala netta i tt-yessenen !

Awal-agi mačči d acebbeḥ n lehdur, maca d tidet i d-yessekfel wul-iw mi qqareγ deg weḥric-agi wis-kraḍ n”Liẓ-avuntir n Dda Qiqi” i yeddmen azwel “Ass d yir ddunit, iḍ d yir targit” n wemyaru “Aṭlas” neγ “Agellid n tisselbi” akken i smenyafeγ a s-semmiγ , maca ma yella semmaγ-as akka, ur qsideγ ara a d-iniγ d ameslub i yella, εniγ tisselbi-nni i yifen leεqel-agi s wacu ttzuxxun akk tura, acku yella kra n leεqel tif-it tisselbi-nni tazemnit; yeqqar wanzi:”Awit tazemnit seg yimi n imeslab”A yi-isuref gma-tneγ Aṭlas ma yella ur s-yeεjib ara yisem-agi, maca ssarameγ kan ad yegzu anamek i qesdeγ- yes-s.

Asentel n weḥric-agi wis-kraḍ d win i yellan d amerkanti s waṭas n tketwa i yerzan tametti, i yeεnan akk medden ur yezgil ḥedd deg-neγ merra. Yebda-tt-id si leεwayed-nni n zik i γ-d-ğğan imezwura, imi mačči daymen iṣeḥḥa neγ yelha, γef waya ilaq ad nessexdem allaγ-nneγ akken ad nefren i yiman-nneγ ayen ilaqen d wayen ur nlaq, mačči ad nleḥḥu kan am iderγalen ama negrareb neγ newweḍ “kif-kif”.
Yewwi-d γef temsalt-nni n “ṣṣbuḥ n wewtul akk d ṣṣbuḥ n wuccen’, γef wayen gziγ nekk seg waya, yebγa a d-yini neqqel tura nettamen s wayen i γ-yehwan kan, war axemmem, daγen ur nettak ara i yal taγawsa neγ yal tamsalt azal-is i tuklal s tidet, ayen n dir neckenṭid deg-s, nessiεziz-it, nessibnin-it, ma d ayen yelhan nettarra-t di rrif:
“Lḥeqq s wuzzal yeqqen
Ẓẓur s wureγ nektal-it
Tasga d lekdeb i tt-yeṭṭefen
Tidet teččeḥ di tqernit”

Acku akken i qqaren “yuεer lebni, yeshel uhuddu”. Ameslay yezzuγer-d tamsalt-nni n lεeqliyat-nni n medden i yettemgerraden seg yiwen γer wayeḍ , imdanen-agi yakk i yettemlil deg weṭruli; nezmer a d-nini akken aṭruli-agi yezmer ad yili d amedya γef tmetti s umata, imi ad naf deg-s akk leṣnaf n medden, yal wa deg-sen d wamek i yettxemmim, yal wa deg-sen d wamek i yettwali timsal, yal yiwen deg-sen d tadyant neγ d lbaḍna si lbaḍnat n tudert-agi i ten-yezdin. Imi yal ass yezmer wemdan ad iγer tamsirt tamaynut seg wayen i isell neγ i yettwali ama deg webrid neγ deg weṭruli, neγ anda ma yerra di tudert-is n yal ass. Maca mačči menwale yezmer ad iger tamawt i waya, imi ala amdan i yettḥulfun s unazeε akk d leγben n wiyaḍ i izemren ad iγer timsirin yecban tigi, nezmer a sent-nsemmi ahat: “Timsirin n ddunit”, Aṭlas (Agellid n tisselbi ‘tazemnit’) d yiwen seg wigi i irefden taεekkemt n wid i s-d-yezzin, i yettḥulfun s waṭṭan n wiyaḍ d leγben-nsen.
Iwala titbirt-is yečča-tt wemcic, wissen d acu i d sebba! Acku mačči d laẓ i t-yuman, ahat i wakken kan a d-ibeggen tazmert-is zdat n tetbirt iḍeεfen!
D tamsalt n tḥeqranit i d-yewwi, dγa taḥeqranit n wergaz i tmeṭṭut, imi aṭas n tulawin i yettilin yal ass d asfel n tḥeqranit akk d ddel, ssbubb ttuqtent mačči d yiwet. “Dda Qiqi” i d-yefka d amedya γef wergaz-nni aγersiw i yettwalin γer tmeṭṭut akken d taγawsa n tuzuft kan, i yessumsen ccbaḥa i yellan di ddunit, i yessawalen “nnger “ i talsa d tayri .
“Aferṭeṭṭu n lehna”, ‘Aṭlas’, i d-yekkren di tlemmast n ccwal akk d yegna i s-d-yezzin, yebγa ad ibeddel timsal ad iḥadd talsa d tayri, d kra i yesεan anamek n ccbaḥa di ddunit s umata, s tezdeg n wul-is d ṣṣfa n iḥulfan-is, yessaweḍ akken ad yeg taggara i tḥeqranit, a d-yessukkes talsa si tallest.
D targit yelhan i yeddren di rruḥ n” Aṭlas “, akk d rruḥ n kra n win i yettargun tayri d ccbaḥa, ssarameγ ad tuγal d tilawt ara inewweren tudert-is d tudert-nneγ merra.
Riγ a s-iniγ i gma-tneγ” Aṭlas” tanemmirt meqqren imi d-telliḍ allen-nneγ γef tidet γas ma yella qerriḥet, tanemmirt imi d-tesskefleḍ tilawt si deffir wagu n tkerkas, tanemmirt imi γ-d-tefkiḍ tagnit akken a k-nissin u a k-negzu ugar, acku ar mi d tura i k-ssneγ s tidet, yegra-yi-d kan a k-d-iniγ :

“Γas deg-k ma heddren
Γas yecceḍ yiles
Wid-nni i k-iḥemmlen
Wid-nni i k-ifehmen
Tekkiḍ-d seg-sen
Yiwen ur k-iεeffes”
‘At-Mangellat’.


wehran: ass 11/01/2007.


Tanaṣlit

azul fell-ak a Aṭlas.
yekker dḥis γef wulac. D ttidet, nekni d aγref am akk iγerfan inselmen, nelluẓ tayri. Tterbegga-nneγ tuzligt, tessexreb ula d-tuzuft-nneγ. Aṭas n tγawsiwin i mazal klalent awal... Maca gar-aneγ a Aṭlas, mačči d imeqqarsa-k ad d-yawin kra n ddwa. Mačči d idles-nni n "Rai" i yes-s ad nrebbi tarwa-nneγ, ad sen-nekkes "iṭabuten"-nni. Tin γers, ḥala amejjay i izemren ad yesseḥlu aṭan, mačči d win yuḍnen.
Ad k-welheγ a mass Atlaṣ, i wudem n Rebbi, tasekla mačči mačči d aqesser, mačči menwala d amaru. Ruḥ ad tecnuḍ, ulac din ccek ad yeffeγ fell-ak "Rai".

Ad ak-d-yawi Rebbi ccfa.

Atan wayen i d-tenniḍ ay amuḍin: "D ttidet, nekni d aγref am akk iγerfan inselmen, nelluẓ tayri."
D tidett diγen, wawal-agi. Kečč meqqaṛ teẓriḍ anda i tuḍen icc-is. Deg tneslemt-nni dγa. Iban-ak webrid ar wanwa amejjay ad tafeḍ asafar i waṭan-ik.

Tenniḍ diγen i Aṭlas: Ruḥ ad tecnuḍ, ulac din ccek ad yeffeγ fell-ak "Rai".

Netta ad yecnu Ṛṛay, kečč a s-d-tḍefṛeḍ s "Tala3a albadro 3alayna" neγ ?

Azul a Dadda Ḥemmu. Tanemmirt i gma-tneγ-agi imi yeγra, neγ yessaked iḍrisen i uriγ. Yenna-d: D amejjay. Wissen ma d amejjay neγ d "imejjan" ( imezzuγen iγezfanen)!? Ma d amejjay n tidet, ahat ad yili d "amejjay war lebγi" am winna n Mulyar; neγ d ṭṭbib n lmal am "Si Leḥlu" n Muḥya. Yenna dγa bu tqerruyt-nni n Dda Ğamal Benεuf, di tmezgunt-nni-ines " Aneggaru a d-yerr tawwurt, yeččur wesqif n ṭṭmana":
Ttxilek a Ssi Leḥlu
A ṭṭbib n walu
Argaz wwten-t lejnun
Ddwa s lkilu
Ad yejji, ad yeḥlu
Ad yezhu umeγbun.
Gma-tneγ -agi, atan yettmeslay s yisem n tneslemt, ahat yessen "JJWAJ N LMUTΣA". Yuγ lḥal ssnen amek i ttidiren am tmess seddaw walim, ad xeddmen igejduren di tlawin, ad rennun ad ttẓallan; ahat teγram tasekla-nsen. Aql-i a k-d-uγaleγ ay uḥdiq.

Mass Ḥammu, azul.

Ur cfiγ ara anwa amusnaw-nni i s-yennan: Akk imdanen uḍnen, amgared yella-d, gar cwiṭ d waṭas. Ihi awal, ssarameγ ad yili yeddez yebrez.
Ay ameddakel, ma yella umejjay deg umaḍal-agi i zemren ad idawi ajeğğiḍ n Lislam asertan... awi-t-d. Jemεeγ limin, ad ak-xelṣeγ tabyirt tasemmaḍt, ma yebγa Rebbi.
D ttidet, Rray d Ṭalaεa lbadru, akken i ddukulen. Gar lbar d lğameε, ur nesεa ara talemmast. Akka nella tura, ur nesεi ara initen nniḍen, d aberkan neγ d amellal.
Ma yella d tamsalt n Rebbi, yiwen wass ad uγaleγ γer-s. Maca zemreγ ad iniγ war akukru, Rebbi d amdan i t-id-yesnulfan acku, yeḥwağ-it. Daya.