Wa d-adlis n Goethe d isufeγ i tikkelt tamenzut deg
wseggas n 1774. Yura-t s talγa n tebratin ittaru ilemzi Werter i wemdakkel-is. Azwel ines s talmanit "Die Leiden des jungen Werther"...s tefransist "Les souffrances du jeune Werther".

Seqwleγ-t-id seg talmanit.

Tagi d-tabratt tamenzut yura Werter.
Ass wis ukkuẓ(4) deg Mayu 1771

I feṛḥeγ imi i d ṛuḥeγ ay amdakkel Aneglus ! Amek iga wul n umdan ! Xas mefṛaqeγ yid-k, keč a win ḥemmleγ seg ul, keč akk d wumi zdiγ ula d-abeṛnus, ul innuγna, εad innecṛaḥ. Ẓṛiγ dakken a-yi-tsemḥeḍ, a-yi-tssurfeḍ, a-yi-tfehmeḍ.
Wissen ma mači deg twenza iyura dakken ad-geγ tamusni d wid a-d-isilqiqen tasa-w ? Leonore tameγbunt ! Maca ur dnibeγ ara. Dacu illan deg ufus-iw nek imi illiγ zhiγ akk d yistma-s, nettat terra-yi deg ul-is war ma ukiγ ?

Dγa d-tidett ur dnibeγ ara ?

Mači d nek ismeγṛen tasa-s, iselqeqen tasa-s ?
Mači d nek iğan iman-iw siziḍeγ imeslayen-is akk d-tikli-s ma xas skanen-iyi-d turza itettarez ul-is ar γuṛ-i ?
Mači d nekki…. Awah ! Dacu-t umdan icetkayen γef iman-is ?

A-k-ggaleγ a yamdakel Aneglus, dakken ad-sqewmeγ iman-iw, ur ttuγaleγ ara ad-greγ iffeẓ s texnanasin akk d wezgal s wayes i-y-d-semlalay tesγaṛt n tmeddurt-iw, akken igiγ seg was mi lliγ d-amecṭuḥ. Xseγ ad-siẓdeγ ass-a, ma d-ayen izrin isulef ad-iqqim deffir.
D-tidett a yamdakel tzgiḍ-d imi d teqaṛ-ḍ : "aqraḥ n imdanen ili ur meqeṛ ara mer ur izmir ara a-d-imekti ayen izelgen deg wakud izrin, deg ubdil ad-ixemmem ar wayen ittidir ass-a, ur t-iqeṛḥen ara."

Ttxil-k in-as i yemma aqli lhiγ d-temsalt nni ines, a-s-in-siwḍeγ isalen fell-as ussan-a d iteddun. Meslayeγ akk d xalti, ur tt-ufiγ ara d-waγzen, akken tt-rran deg uxxam nneγ. D-tameṭṭut izemren i iman-is. Ul-is angar tezdeg i-t-izedγen. Nniγ-as γef ayen akken tettru yemma. Yemma teqqaṛ weltma-s tetṭṭef i iman-is kra illan seg wayen sent-d-ǧğan imawlan nsent. Tenna-yi-d timentilin(sebbat) ines akk tewtilin(conditions) i wakken a-s-terr i yemma ayen tewwi, rnu tenna-s a-d-terr ugar n wayen tessutur.

A yamdakel Aneglus, ufiγ deg taluft-a dakken ticki ulac amsefhem gar imdanen ittawi-d tixesaṛin ugar n tecki d-kecment tkeṛṛas akk d tḥeṛci. A-d-rnuγ diγen d akken tiḥeṛci akk d tkeṛṛa ur ṭuqtent ara gar imdanen, d lqella umsefhem iṭṭuqten.


Akken ibγu ili, ufiγ iman-iw da akken ibγa wul-iw. Aεzal i-d-εezleγ iman-iw ar da d-asafar i wul-iw ameεlal deg tallit-a n useggas deg ttnizziren wulawen. Yal asaklu(ṭejṛa), yal imγi, d-tadla ijeğǧigen i wul-iw. Tikkwal ssarameγ ad-uγaleγ d-aferṭeṭṭu akken ad-ferfreγ gar tfendiwin(rwayeḥ) d-ittefγen seg yal ideg, ad-geγ yis-sent tiγṛemt s wayes ad-ddreγ.



Tiγṛemt-a deg illiγ ur tufiḍ dacu iḥuskin deg-s, maca izzi-yas-d yiwen ugama(nature) ittfeggiḍen seg tḥuski(cbaḥa). Ayen iwwin Kkunṭ(conte) Mas n at M. ad-ig tamazirt γef yiwet n tiγilt, anda iẓẓa kra illan d-imγi, kra illan d-ajeğǧig. Ayen s irnan tiḥuski i wgama. Tabḥirt-a d-taweεnit, ur tella ara d-tibḥirin nni tegen imusnawen i wakken ad-zerwen(étudier) imγiyen, maca d-tamazirt n win ibγan ayen iḥuskin i wul-is, ad-isrekden ideddicen ines.

Unfeγ i walen-iw ya ad-ttrunt deg texxamt nni iga dinna umi iqaṛ: "taxxamt n win ulac ». D win i d-amḍiq ismenyif Mas n at M. Nek diγen d win i d-amḍiq ismenyifeγ. Drus akka ad-uγaleγ d-aqeddac deg tmazirt-a, imi hwiγ-as aṭas i Kkunt Mas n at M. Γef aya a-s-iεğeb diγen lḥal ma qeddceγ deg tebḥirt-is.