Tullist yura Fernando Sorrentino ,
tasuqelt Amor Rekis
Imeddukal-iw akk qqaren sεiγ lweswas. Icebba-yi Rebbi sεan lḥeq. Ayen yeḍran yid-i ass lexmis d ttbutt af akken d-nnan.
Tasebḥit-nni, lliγ qqareγ ungal n tugdi, ulamma deg zal qayli, ikecmi-yi ccek d lweswas.
Zgiγ umneγ dakken yella uεeddam yeffren di tkuzint. Aεeddam-agi, yegguni, yettrağu kan deg-i ad kecmeγ ar tkuzint ad ineggez fell-i s ad yessentu ajenwi yeṭṭef deg wfus-is deg uzagur-iw, ad isuffeγ tarwiḥt-iw. Mačči d tiselbi tagi tura ?!
Ihi, ulamma qqimeγ di tlemmast n texxamt, ur yezmir yiwen ad yekcem bla ma walaγ-t, yernu ur telli tewwurt nniḍen yettawin ar tkuzint. Γas akken, ruḥ keččini ekkes-iyi seg uqerru dakken d aεeddam yeffren deffir tewwurt.
Seg akken izedγ-iyi lweswas, qqujraγ, ur zmireγ ad kecmeγ ar tkuzint ad ččaγ talqimt. Lawan imekli, yebda-yi laẓ. Yewwet nnaqus n tewwurt.
Kcem ! i d-nniγ war ma beddeγ, telli !
D akunsyarj i d-ikecmen s snat neγ tlata tebratin deg wfus .
Iqqujer uḍar-iw, i d-nniγ. G laεnaya-k, kcem ar tkuzint, awi-yi-d agdur n waman.
Akunsyarj inna-d : ulac aγilif. Yelli tawwurt n tkuzint ikecmen. Sliγ i usuγu isergagayen d ssut n tfekka-ines yeγlin, yegla s iḍebsiyen neγ ahat d tiqraεtin. Negzeγ seg ukursi-inu uzlaγ ar tkuzint . Akunsyarj meskin, azgen n tfekka-s sufella ṭṭabla, ajenwi annect llaεjeb yenta deg uzagur-is . Yeẓẓel d asemmaḍ .
Tura dayen thednaγ,tersed talwit fell-i. Ukkiγ imiren dakken tidett, ur yelli uεeddam di tkuzint .
D ayen ibanen, d lweswas kan .