Zik nni yella yiwen uderrab, iznuz tirgin, ittawi-d ayen tettett tmeṭut-is akk d mmi-s.Yiwen ubrid gummant a-s-nzent tergin. Ur yufa ra wa ar a-yaγen.Qimen i laẓ. Tekkr-ed tmeṭut-is tenna yas : « eddu ar tlematin ad-susiḍ tuga, a-d-tawiḍ dacu a-nečč ! Aqlaγ inγa-yaγ laẓ. “
Iruḥ, yewwi amger. Armi yewweḍ ar telmatt isla i temqerqurt tettettru. Yuẓa γur-s, yufa-tt deg imi n uzrem. Yenna yas uderrab deg ul-is: “yak qaren-aγ, win d imenεen yiwen seg imi n uzrem, a-t-id-isaḥ ugerruj.” Yewwet azrem nni s umger igzm-as aqerru-is.
Tenṭg temqerqurt nni tuγal d-taqcict. Tenna-yas: “eyya ḍefr-iyi-d !” Iḍefr-itt armi wwḍen ar yiwen umḍiq. Teddem tablaṭ n wuzzal γef udem n lqaεa, tenna-yas: “ eyyaγ kecm-ed yid-i !” Ikcem yid-s. Udren ar ddaw n tmurt. Armi qrib ad-awḍen s axxam, twessa-t, tenna-yas: “ ma a-naweḍ ar wexxam, baba a-k-yini: “awi ureγ naγ lfeta !”. In-as: “fkk-iyi ala tacacit akk d tjewwaqt, ternuḍ-iyi tacekkart !”. Netta a-k-yini: “ur k ten ttakkeγ ara.” Keččini terreḍ iman-ik teffγeḍ, nek ad-ttruγ, a-k-ten-d-ifkk. “
Armi wwḍen s axxam, truḥ ar baba-s d yemma-s, tettru, tenna-yasen: “d wa i-yi-d-iselken seg mmi-s n ugellid aberkan, wama yella a-y-ičč “ Yenna-yas baba-s: “ad-ibarek Rebbi. Ad-yawi ayen yehwa, d ureγ naγ d lfeta. “ Yenna-yas uderrab: “ur ttawiγ ureγ, ur ttawiγ lfeta. “ Efkk-iyi ala tacacit d tjewwaqt akk d tcekkart.” Irfa fell-as: “eddu sya, imi d keččini umi ad-fkkeγ tiγawsiwin agi. “
Iffeγ-d. Tusa-d yelli-s ar yemma-s la tettru. Tenna-yas yemma-s : « eyyaγ a-nruḥ ar baba-m. » Ruḥen, tenna-yas temγart nni i urgaz-is: “Ay argaz, wagi isselk-ed yellit-nneγ, fkk-as tiγawsiwin-a. Nekkni, arra-yaγ ayen yellan, deg-s ar a-nemmet.” Yenna-yas: “laεi-yas-d !”
Truḥ teqcict tluεa-yas-d. Yusa-d. Ifkka-yas umγar nni tiγawsiwin nni. Yenna-yas: “keččini tsellkeḍ yellit-nneγ, nekk a-k-d-iniγ tamacahutt akken tella. Nekki d agellid n ijenniwen izeggaγen. Baba-s n wezrem nni i tenγiḍ d-agellid n ijenniwen iberkanen. Tura nekk yid-s d-icenga(d-iεdawen). Γef akken yeṭef yelli ibγa a-tt-yečč. Tura tiγawsiwin-a i k fkkiγ γur-k ad-fγent seg ufus-ik.Ad qiment γur-k. Imi temmuteḍ ad-qiment ar mmi-k. Ma fγent-awen afus, d nekk ad-idεun akken a-wen-d-uγalent, acku tiγawsiwin-a γlayet fell-i. Mer d abaεaḍ nniḍen yili ur sent tettakkeγ ara. Armi d kečč i lmendad n lxiŗ i txedmeḍ i yelli. »
Aderrab nni yewwi tiγawsiwin nni iruḥ. Imi d iffeγ ar berra iεerq-as ubrid. Iqim sin wussan naγ kraḍ(3) netta yettnadi γef ubrid. Armi d-ass wis kkuz(4) i d yufa abrid ar wexxam-is. Yufa temṭut-is akk d mmi-s yenγa ten llaẓ. Imi t twala tmeṭut-is, tehcar, terfed adγaγ, tewwt-it, tḥuza-t γef ul, tenγa-t. Netta iγli immut, nettat tekker tnuda-t, tufa γur-s tacacit d tjewwaqt akk d tcekkart. Tekks-as-ten-id, tjemε-iten.
Tekker teffeγ ar berra, tettsuγu: “eyyaw ! Aderrab immut.
Usan-d at taddart wwin-t, meḍlen-t .
Teqqim-d tmeṭut d mmi-s. Mmi-s d-aferḍas, maca ihuski(izyen). Tihuski(zzin)-is ur s issaweḍ yiwen. Yemma-s tettruḥu ar tğaritin-is, tqeddec-asen, tettawi-d ayen ad-yečč mmi-s.
Armi d yiwen wass, iffeγ mmi-s nni. Yufa-t yiwen uḥeffaf. Yenna-yas: “eyyaγ, ad-txedmeḍ γur-i.” Iwwi-t ihi ixeddem γur-s. Iselmad-as amahil ines. Ittneccif tahanutt nni diγen. Ttaken-as isurdiyen wid ittseṭilen dinna. Yiwet n tikkelt, yenna-yas uḥeffaf nni ad-iruḥ ar yemma-s a-s-d-xiḍ tacekkart akken ad-irr deg-s isurdiyen nni i-s-d-ttakken wid ittseṭilen.
Iruḥ ar yemma-s inna-yas: “xiḍ-iyi-d abeεaḍ n tcekkarin ad-rreγ isurdiyen-iw deg-s.” Tenna-yas: “tella tcekkart-a d iğğa baba-k.” Yenna-yas uqcic: “awi-tt-id. “ Tefkka-yas-tt-id.
Iffeγ ar berra, irra deg-s yiwen usurdi, tga akka teččuŗ d-isurdiyen. Irra deg-s frank ucaquŗ, tga akka teččuŗ d frankat ucaquŗ. Ayen irra deg tcekkart ad-teččaŗ seg wayen nni. Iwhem. Yenna-yas deg ul-is, s tcekkart a, a-d-awiγ yelli-s n ugellid n tmurt n Tunes.
Iruḥ, ur yuγal ara maḍi ar uheffaf nni naγ ar wexxam. Iruḥ srid ar Tunes.
Iwweḍ ar Tunes, deg iḍ. Iwwi-d ixeddamen, ibna aγrem(acaṭu). Armi d frari tafat, deg tufat, issuli-t. Cix, imi yuli ar tqubett ad-idden, iwala aγrem nni, idhec. I waken ad-yini :”llah ukbar”, isuγ : « llah agejdur ! » Isla-d ugellid n Tunes i cix nni, yerfa, iluεa i iεessasen-is. Yenna-yasen a-s-kksen aqerru i cix n twaγit. Iεessasen wwin-d cix ar ugellid. Yenna-yas cix : « ay agellid, ur d wwiγ ara agezzum uqerru-iw. Ma texseḍ ad-twaliḍ, ali d-asawen ar tqubett ad-twaliḍ.” Yuli selṭan nni iwala acaṭu nni ibna mmi-s uderrab. Idhec. Yudr-ed, yenna-yasen: “wihin d-kra n ugellid.” Eddut kana r γur-s, steqsim-t dacu yebγa ar γur-neγ. Tekkr-ed yelli-s n ugellid n Tunes, tenna-yas: “a baba, γr-asen i kra n yessis n imeqranen n tmurt ad-dduγ yid-sen. Isallen illan a-k-ten-id-awiγ.
Ihi truḥ yelli-s n ugellid n Tunes akk d yessis n imeqranen n tmurt. Imi wwḍent ar dinna. Iskcem-iten ar wexxam. Testeqsa-t yelli-s n ugellid : « dacu umahil-ik ? » Yenna-yas: “ttaγeγ znuzuγ.” Tenna-yas: “s wayes i tessuliḍ axxam-a. Yenna-yas: “awi-d taxatemt nni yellan deg uḍaḍ-im.” Tmudd-as taxatemt nni. Irra-tt deg tcekkart nni ines, dγa teččuŗ tcekkart nni d-ixutam. Ismar-itent-id γef ugnes, yenna-yas i yelli-is ugellid : « aha εqel anta i d-taxatemt inem ! » Teqqim teεweq. Yenna-yas: “ihi tura teẓriḍ s wayes issuliγ axxam a.” Tenna-yas: “ansi i k d tekka tcekkart-a ?” Yenna-yas: “d baba i tt id iğğan, ayen irriγ deg-s, ad-teččaŗ s wayen nni.” Tenna-yas :”ihi tameddit, a-d-taseḍ γur-nneγ ad-teččeḍ imensi yid-neγ.” Yenna-yas: “iwqem.” Nettat truḥ tewwi tixutam nni, tuγal s axxam n baba-s.
Netta ikker isegrareb axxam nni ines, iruḥ ittnadi. Armi d-tameddit ikcem ar uxxam n ugellid n Tunes. Nnan-as: “ansuf yis-k ar uxxam n ugellid.” Sersen-as-d imensi, ičča yid-sen. Fkkan-as-d aman n tzurin iswa. Iskker armi ur isekked tiqit. Kksen-as tacekkart, ḍeggren-t ar ugudi.
Armi d-azekka nni yufa iman-is deg ugudi. Ittru armi yeddeh(yeεya) iruḥ-d, yuγal-d ar tmurt-is. Irra ar uḥffaf nni t isexdamen. Inna-yas winna : “ansi d kkiḍ akka a yaferdas ?” Inna-yas mmi-s uderrab nni: “ur sefay ara deg-is. Nekkini iḍelli kan lliγ ar yelli-s n ugellid n Tunes.”
Iṭf-as aεekkaz, iwt-it, inna-yas: “uγal ar uxeddim-ik, ma d-timmad-ik ittilin d yelli-s n ugellid n Tunes !!” Yuγal ar umahil-is. Yiwen wass iseṭel-as umεellem nni ines. Imi s ifukk, inna-yas: “ruḥ ar yemma-k, in-as, ak-d-tefkk kra n tcacit a-tt-teqneḍ i uqerru-ik, ur ttezzin ara izan fell-ak.”
Iruḥ ar wexxam. Imi yewweḍ inna-yas i yemma-s: “ulac kra n tcacit a-tt-uqmeγ γef uqerru-iw ?” Tenna-yas: “a mmi tella kan yiwet n tcacit d-taqburt iğğa-tt-id baba-k.” Inna-yas: “awi-tt-id.” Iqn-itt. Yemma ur t twala ‘ra, tenna-yas: “anda telliḍ a win ?” Inna-yas: “aqli zdat-m a yemma.” Tenna-yas yemma-s:”maca ur k walaγ ara, yernu mačči d-taderγalt illiγ….ekks tacacit, ahit d-tinna i d-tamentilt.” Ikks-itt mmi-s. Dγa twala-t. Tenn-yas: “eqn-itt kan.” Iqn-itt. Ur t tezra ‘ra. Ikks-itt, tezra-t. Wehmen i sin.
Iffeγ uqcic ar berra, iqn-itt, iwala kra yellan zdat-es. Inna-yas deg ul-is : « s tcacit-a a-d-awiγ yelli-s n ugellid n Tunes. »
Iruḥ uqcic ar Tunes. Iwweḍ ar dinna, issuli aγrem yugar amezwaru nni. Imi t iwala imi d tefrari tafat, deg tufat, ugellid nni. Inna-yas: “wa d agellid nni i d yuγalen.” Tekkr-d yelli-s, tenna-yas: “anef-iyi a baba, ad-ruḥeγ nekk akk d tehdayin yessis n imeqranen n Tunes a-k-d-awiγ isalen-is.”
Ddant ar uxxam nni. Wwḍent kecment, ufant aqcic nni, ur t εqilent ara. Tenna-yas yelli-s n ugelliḍ n Tunes : « dacu i d-amahil-ik armi tessuliḍ acaṭu ya ? » Inna-yas: “D-tacacit i-y-d-iğğa baba, yis issuliγ aγrem-a.” Tenna-yas :” ihi tameddit as-ed ad-teččeḍ imensi yid neγ ar γur-neγ.” Inna-yas: “yewqem “
Netta armi d-tameddit iruh isegrareb axxam nni ines, irra ar uxxam n ugellid n Tunes. Iqqim ičča d ugellid akk d yelli-s. Ččan imensi, ssewn-as aman n tzurin, iskkeŗ. Kksen-as tacacit nni deggren-t ar ugudi.
Armi d-azekka nni yufa-d iman-is deg ugudu war tacacit-is. Ittru armi iddeh, yuγal ar tmurt-is.Imi iwweḍ ar umaεellem nni ines, inna-yas :”anda terriḍ.” Inna-yas mmi-s uderrab: “lliγ ar yelli-s n ugellid n Tunes.” Iṭf-as aεekkaz, iwt-it.
Ihi yuγal ar uxeddim ines ar uḥeffaf nni. Armi d yiwen was, inna-yas win akken t isexdamen: “ruḥ ar yemma-k, a-k-tefkk kra uγanim, ad-tgeḍ taqessabt, a-tt-sedhuyuḍ medden ticki i-sen-ttsetileγ.” Iwweḍ ar yemma-as, inna-yas: “a yemma, inna-yi-d umεellem inu a-d-sekkreγ taqessabt akken ad-sedhuyuγ medden.” Tenna-yas yemma-s:”s ixf-ik ar iğğa-d baba-k yiwet n tjewwaqt.” Inna-yas: “awi-tt-id a yem..” Ihi tefkka-yas-tt-id.
Iffeγ-d ar berra, isuḍ deg tqessabt nni, γlin-d sa(7) iniren(anges). Nnan-as : » »ini-d dacu i tebγiḍ. Ma ihwa-yak, a-nerr amadal(ddunit) d-iγed.» Inna-yasen : « uγalet kan tura, ticki i-kwen-usreγ ad-steqsiγ fell-awen.» Inna-yas deg ul-is: “d-ta s wayes a-d-awiγ yelli-s n ugellid n Tunes.»
Dγa idda ar tmurt n Tunes. Imi iwweḍ s abrid, yufa sin ttennaγen. Inna-yasen: “Dacu γef tettnaγem ?» Rran-as-d : « nettnaγ γef udebbuz d iğğa babat nneγ; ticki tewteḍ s ufus, ad-iγli uxxam γef ayen tebγiḍ; ma tewteḍ s uqerru ad-iγli uxxam nni. Tura aqlaγ nettnaγ fell-as, anwa a-t-yawin.” Inna-yasen : »eddu-t ar udrar ihin ; temzazalem, win izwaren wayeḍ a-t-yawi. » Nnan-as:”ta d-tikti ifulkin.” Ruḥen mzazalen akken i-sen-d-inna. Ğğan adebbuz arm mmi-s uderrab. Nutni ttemzazalen, netta iwwi aqezzul nni iruḥ. Armi d uγalen, ufan-t-id iwwit.
Netta idda armi iwweḍ ar umdiq nni amezwaru deg tmurt n Tunes, issuli axxam γur-s mraw(10) iswiren(niveaux). Irna iga s tezmart n tjewwaqt nni iεeskkriwen ad-iεassen fell-as. Imi d tefrari tafat, yuli ccix ad-idden, iwala aγrem nni bu mraw iswiren. Deg ad-isuγ «llah ukbar », isuγ «ay agejdur !! » Isla-yas-d ugellid nni. Issawel iεeskkriwen-is, inna-yasen: «awit-d ccix, tgezmem-as aqerru ! » Ewwin-t-id, ur teğğan ara a-d-imeslay, kksen-as aqerru. Yuli ccix nniḍen, imi izra aγrem nni isuγ «allah ay agejdur ! » Isla-yas-d ugellid. Iluεa I iεeskkriwen ines, inna-yasen a-t-id-awin a-t-zlun. Ewwin-t-id. Maca imi iwweḍ zdat n ugellid inna-yas : « a Mas inu, ay agellid n Tunes, sel-d dacu a-k-d-iniγ send a-y-tezluḍ. » Agellid iwehha i iεekkriwen ines a-s-anfen a-d-imeslay. Inna-yas ccix: “a Mas agellid, ali d-asawen, ad-tezreḍ dacu izriγ. Ma illa tγileḍ uklaleγ ad-mezleγ, zlu-yi.»
Yuli ugellid d-asawen izra aγrem nni, izzi-yas-d uγrab d-ameqran ur seγlayen-t tkurtin n umedfaε. Izra diγen iεeskkriwen ibedden ar γur-s. Yudr-d ugellid, iqim iman-is ittru. Tufa-t-id yelli-s. Tenna-yas: “ayγeŗ itettruḍ a baba ? » Irra-yas-d : « ali d-asawen ad-tezreḍ dacu i d yusan ar γur-i.» Tenna-yas:”ur tettru a baba; d nekk a-k-d-yawi isallen am ussan imezwura.” Inna-yas: “awi-d ukan a yelli.”
Tedda yelli-s n ugellid n Tunes akk d temdukkal-is ar ucaṭu nni issuli mmi-s uderrab. Wwḍent ar dinna ufant iεekkriwen nni, nnan-asent: «dacu i tebγamt dagi a tiqcicin ?» Tekkr-d yelli-s n ugellid n Tunes, tanna-yasen: “nusa-d ar bab n uxxam-a. Tura gt-aγ abrid a-nezri γur-s.» Inna-yas yiwen uεeskkriw:»ur nezmir ara. » Cceyεen yiwen seg-sen ar Mas nsen, ar mmi-s uderrab. Iwweḍ γur-s, inna-yas:» a Mas inu, usant-id kra n teḥdayin, xsant a-k-zrent. A-tent-neğğ ad-εeddint naγ endah ?» Inna-yas mmi-s uderrab : « aneft-asent a-d-kecment. »
Yuγal win ar iεekkriwen nni i-t-id-icceyεen, inna-yasen: «la wen iqaŗ anfet-asent a-d-aẓent. » Uqmen-asent abrid.
Kecment ar γur-s. Armi wwḍent, tenna-yas yelli-s n ugellid n Tunes : « dacu i d-amahil-ik ? » Inna-yas am tikkelt nni tamenzut: “ttaγeγ, znuzuγ.» Tenna-yas : « s wayes i tessuliḍ akk anect-a ? » Inna-yas: “s uqezzul-a d iğğa baba, ticki t sbeddeγ, ad-yali uxxam, ticki terriγ yef uqerru, ad-iγli uxxam nni. Ma d-iεesskriwen-a, s tjewwaqt-a d iğğa baba, ticki isuḍeγ deg-s, a-d-γlin sa(7) trebbuyaε n iεeskkriwen d sa(7) imeqranen nsent.» Tenna-yas yelli-s ugellid n Tunes: “a winna nekk d yelli-s ugellid, bγiγ a-k-aγeγ, tameddit ass-d ar uxxam nneγ ad-teččeḍ imensi yid-neγ.» Inna-yas mmi-s uderrab:”iwqem !”
Iqqim ifraḥ, ulac anda a-d-irr tumert, imi s tenna :”a-k-aγeγ.»
Tarracin nni uγalent ar uxxam n ugellid. Netta irra aqezzul γef uqerru, dγa iγli uxxam nni isbedd akken. Ma d-iεeskkriwen isuḍ deg tqessabt, fγen-d ineglusen nni, indeh ad-jemεen iεeskkriwen nni. Gan akka iεesskriwen nni ulin s igenni, am akken werğin d llin.
Irra ar teγremt(temdint) n Tunes, ittcali deg zenqan armi d-tameddit ; ikcem ar uxxam n ugellid. Sersen-as-d imensi, ičča armi iddeh, irna ssewn-as aman n tzurin. Iskkeŗ armi ur izra ra anwa i d baba-s. Gan akka, deggren-t ar ugudu.
Azekka nni yufa-d iman-is deg tlemmast ugudu. Ittru armi ittazalen walen-is d-idammen. Iggul inna-yas deg ul-is: “tikkelt-a ur uγaleγ ar tmurt-iw.»