Azlaf n chawinet.com
Qqaṛen yya n zik hella qli n taǧalt γar-es tlata(kraḍ) n drari. Amečuk maẓuẓ i yiɛzizen fell as labas. Aytma-s ḥemzen s yis, xsen ad at weddṛen baca ad thennan s is. Ass deg wussan kkren nnan i yemmat sen belli umat sen maẓuẓ iqedd as ad yaf Lxedmet baca ad hen-ed iɛawen. Σla xaṭer sxuṣṣen labas.


Heqiṛ as yemma-s matta yellan. Yekker yuca ixf nes i lexla bac ad iḥewwes γef lexdmet . Yuyir ma d labas ma d drus ixelḍ-ed γer qli uqewwaṛ, yufa aryaz. Yesseqsa t ma yella ca n wa yessen γer wa ad yaf lxedmet. Yenna as weryaz:
“hella qli n temeṭṭut di ca uqewwaṛ yellan di lγabet balak ad tafeḍ γar es. Labas n drari am cekk ɛeddan s ya ur d wellin ca, waqila ad ilin ufin lxedmet dun. Ila a d-yawi ṛebbi leqsem a memmi”.

Yekker umečuk yeṭṭef abrid n es γer lγabet hameqṛant.
deg wani i yexleḍ lγabet, yufa aḥellaq aya n temeṭṭut yenna as:
“Alda yella ca γar em n lxedemt”. Henna as hemeṭṭut:
“Ayya-d a memmi, rwaḥ ila cek sxedmeγ. Ɣar ek ar adeča, baca at-tuɛiḍ adrar aya yellan zzat ek am wuḍellaq aya n lqaɛ .” Huc as qič n teyelzimt d lbala.

Amečuk aya ameγbun yeqqaz qič annak yeẓra belli d errḥi. Ur izemmer ad yessehwa adrar aya sya γer wadeča. Yeqqim yuḥel deg iman n es ur yeẓrì matta iqedden a h yeyy. Deg wamm in yuγ it yiḍes deg wallaγ n wedrar. Huss-ed γar es hmečukt hemaẓuẓt n tamẓa w ad as tuc axerriḍ. Yuki-d ibedd γef yiman n es aγil as belli t-tamẓa id-ixelḍen. Hessiwel γar es hemečukt henna as:
“” Hezriḍ belli ma ur teyyiḍ ca matta ak tenna yemma ḥesb itt heči cek adeča”.

Yeqqim yesmuskin ur yefqid annak hessuḍ ef wedrar din yehwa-d yerrefer-ed ammek yella. Bihfih annak adrar iwella d lqaɛ.
Adeča idin, hus-ed hamẓa, di hemnad belli yemmukkes wedrar hessiwel γer umečuk henna as:
“ Ur zṛiγ mammek heyyiḍ al degwani hemenɛeḍ i hmettant. Hat aya matta ahat teyyeḍ ddalt id-yusin”.

Lxedmet his sent is tuca hamẓa d ubi en tazarin. Henna as bac ad hent yebbi qaɛ γef tenezzakt, w ad d-γmint w ad d-yyerent imečan γer tmeddit. Hamẓa iliq ad teč si sent deg iḍ. Ma ulac ila ad teč. Huca as qič amma n tqabact bac ad yebbi yis hazarin.

Yekker umeγbun yerya γer sent ebbi ebbi ar deg wani ur yezmir. Yeẓṛa aked ma yebbi hent deg iǧ n wass ur zemmrent a d-γemint bihfih mammek i hexs hamẓa. Yuɛa iman n es γer tili, yewwi it unaddam. Ur yefqid annak yufi s is uṛeffig. Yefli-d hiṭṭawin n es yufi it belli d yelli-s n tamẓa. Henna as belli yemma-s ma ur teči ca imečan iḍ-a γir ad yeḥseb iman n es yettwač. Hekker hessuḍ γef tazarin din ukk annak nnubbint, wellant γmint id yrint id imečan.

Di texleḍ hamẓa heča seg imečan din imiẓiḍen. Hessiwel γer umečuk henna as:
“ Heqqim ak ddalt aya ma huyireḍ ad ay tawwiḍ himellalin en tsedda a cek ǧeγ di hemeddurt.” Huca as qič n tesγunt. Yeṭṭef hasγunt idin yendeh γer weẓṛu di llant hemellalin.

Yebdu yettali aẓṛu mbeṣṣeḥ ani yuli wa d yiḍu. Ur yezmir ad yali ar mani llant hemellalin. Yuta yuta annak, lac, yers-ed yut itt s yiḍes. Yelli-s n tamẓa hus ed ɛad γar-es w ad s tuc aṛeffig. Yuki-d, yufa belli hexḍa d tamẓa. Yebdu ɛad ineddeh di is bac ad tɛawen. Yelli-s n tamẓa henna as:
“Segγed matta aha a k iniγ. Ɣres ay, s yexsan inu eyy ssellum. Ali al(r) tifrit di llant hemellalin n tesedda. Refd ihent-id, hehwiḍ-ed. Dira ah ad terseḍ eyy ixsan inu wa γer wa luqeddin wa a d-kkerγ.”
Yeyya mammek is tenna, yuli yewwi-d himellalin. di id-yersa yettu iγess n tefdent hazewwart di hefrit. Yeṭṭef ixsan yeyyi hen yiǧ sma n yiǧ, hamečukt iwalla-d di is ṛṛuḥ. Mbesseḥ di hexẓer γer iḍarren n es hufa iman n es mebla hafdent hameqṛant.

Yerfed himellalin yendeh ag getwalan hamẓa. Yexleḍ yuf itt hesseḥmay aman, herni hereḥḥa uzlan. di it temnad heḥar mammek ig geyya bac a d-yawi himellalin. Henna as cek izemren ad teyyeḍ matta ak nniγ qaɛ, hekker helaγa-d yessi-s di tlatyyin henna as bac ad ixeyyeṛ yict si sent. Yessi-s mmerwasent ṭul ha γer ta ih ṛaɛid ad-tinid d-ta. Ur yufi mammek ah ad yeyy bac yeɛqel hamečukt i ih imnɛen. Ur yefqid annak yemnad hict si sent hessery-d ḍar n es seddu n tejbibt n es. Yemnad itt belli ulac γar es n tefdent hameqṛant. Yekker ixeyyeṛ ìtt, yewwi tt d tameṭṭut n es. Yeqqim di lγabet aya id n temeṭṭut n es d tensibin n es.

Ass deg wussan yemmekti-d yemma-s d aytma-s yexs ad yerzef γer sen. Yenna i hemeṭṭut n es belli yexs ad as t aγ heyara. Hayyit henna as:
“ Ma hexs ad uyireγ id ek, ɛahda ay belli ur tetsellameḍ ca γef yemma-k dira ahat tt tezreḍ. Ma ulac ay tettud”.

Iɛahd as icabek as, kkern weǧden iman n sen bac ad rewlen. ṭṭfen, wwin jaduṛ anezrabu kkern bihfih ǧin sṛayat n tamẓa.

Qli umacwaṛ, annak hamẓa hefaq belli yelli-s d wensib n es rewlen. Heṭtf itt ca en lehmẓet, hekker t-tizla aγella n sen. Deg wani i hetwarad fell asen hebdu hetlaγa deg wejaduṛ. Yesla as yeqqim ikeṛnef yegguma ad yazzel. Yeggur qič qič yesγad matta as teqqar hamẓa si lebɛit. Yelli-s n tamẓa hugez belli yemma-s heḍefr ihen-d. Hebdu hetmessaḥ γef jaduṛ, hessuḍ fell as. annak wayyit iṛekkeh di iǧi, amečuk d isennanen, nettat d aɛeǧaj.

Di d texleḍ hamẓa, hufa ca en uɛeǧaj d tuqqit ur tezmir at teɛedda. Abrid yečuṛ d isennanen, hiṭṭawin n es ufsent tt yiǧi. Huta huta annak, lac, hekker htwella-d γef ttyara n es. Di hexleḍ beṛk hekker bihfih huyir at-tẓer imḍebbeṛ i wumi henna qaɛ matta heẓṛa. Yenna as yemḍebbeṛ:
“at en nehni id wellan fell am, ur cem ǧin at teɛddid”.

Hesla beṛk hutalyt aya, hekker ɛad t-tizla alda aha hen teṭṭef ca. Nehni, kkern kemmlen abrid n sen t-tizla. Deg wanni hesḥuss belli jaduṛ yebdu yetṛaja, hamečukt hugez belli yemma-s hewella-d γer sen. Hessuḍ γef jaduṛ annak iwella-d aḥellaq aya n teddart di llan iqeddacen d ṭaleb n sen. Di id-texleḍ hamẓa henna as i ṭṭaleb n temeḥdeṛt:
“Alda hemnaded ca qli n temeṭṭut d weryaz di lejwayh aya”. Yenna as ṭṭaleb:
“ Hih γar i iqeddacen i yeqṛan labas, yyiḍ qli uhah. Ma d yeyyid lḥedd n sen bdun”.

Hekker-d hewella-d heḥmeq kteṛ n zik. Ḥɛawed as i yemḍebbeṛ haqṣiṭ n temeḥdeṛt d iqeddacen. Wayyi yenna as:
“ At en nehni wella γer sen ila hen teṭṭfeḍ.”

Amečuk d temeṭṭut n es ṭṭfen abrid swa swa. Hamẓa ur tuyis ca, heḍmmeɛ belli a hen teṭṭef. di sḥussen s tamẓa hetwarad-d fell asen, wellan, d taddart di yella qli en weryaz yeznuzan afeqqus d ddellaɛ. Hexleḍ-d hamẓa γar es henna as:
“Alda yella ca n wa hemnaded iɛedda es ya?”
Yessiwel weryaz yenna as:
“Hih, ssumt n ufeqqus ur telli ca am ta en ddellaɛ. Ssumt n tedellaɛt nniγ en tefeqqust hazewart ur telli am ta en tezdat. dayyi ulac la yaɛebbeṛ n ddellaɛ la wa ufeqqus. Mbeṣṣeḥ haẓi di iziḍen”. Huyess hamẓa, hugez belli menɛen as. Hekker hewella γer yemḍebbeṛ matta aha as yini.

Di hexleḍ heɛawd as-d belli hufa aryaz yeznuza afeqqus d ddellaɛ. Nettat hesseqsay it ma yella ca n wa yeẓṛa iɛedda s ya netta yettutlay as beṛk γef ufeqqus d ddellaɛ. Yekker yenna as yemḍebbeṛ:
“Aryaz d ansib n em, ddellaɛ d ufeqqus d yell im, haddart d jaduṛ n em. Menɛen maɛad ca a hen tezṛeḍ.” Yelli-s n tamẓa d weryaz n es kemmlen abrid n sen ar tadciṛt en umečuk.

Ayt tedciṛt aya, ameqṛan ameẓyan, hameṭṭut aryaz, ryin d laqqan hen ed. Deg wani i yemnad beṛk yemma-s yerregreg yila. Yettu lɛahed yuca i hemeṭṭut n es, iẓenneg γef yemma-s yessuden itt. D tayyi teγawsa as yessettun hammeṭṭut n es.

Yelli-s n tamẓa heqqim hehmel, heǧa lemmwali n es yerni yeǧ itt weryaz. Huɛa hettili weḥd es di hedciṛt. Yerya lexbeṛ n temeṭṭut aya hemibahyt bihfih. Aryaz yeslin s zzin d lqedd n es wa ad yefzeɛ.

Wi id yusin γar es a tt yexḍeb heqqar as ur ak qqaṛeγ hih kkes ma heyyiḍ matta aha ak iniγ. Yiǧ wa as tini qqen hemasext wa ad yeɛya, yiǧ wa as tini ffi ay-d aman wa ad yaf ayeddid yeγṛef am teẓrut.

Ṛuḥen wussan, usin-d yyiḍ, yuyir lexbeṛ aya ar deg wani i yexleḍ imeǧi n weryaz n es. Yus-ed ula n netta yexs ad at yexḍeb. di id-yexleḍ henna as ṛuḥ qqen hemasext. Yuta yuta annak, lac, yuɛa yeqqim deg wallaγ uyeddid yettṛaja. Deg wammin yewwi t yiḍes. Hebedd-ed γef yiman n es wa a s tuc axeṛṛiḍ annak yettγaca. Deg wani id yuki yeqqim yebhet, yemmekti-d belli d tameṭṭut n es. Mmercalen en wallaγ, yyin sebɛa(sa) n wussan d sebɛa n yiḍan d tameγṛa.

Huqqa heqṣiṭ ur uqqin yirden d temẓin

Tanfust akken tt yura Wazlaf n chawinet.com a tt tafem da:
Tanfust n Yelli is n tamẓa