Bṛiṛuc d yiwen uqcic amecṭuḥ γur-s tizimert. Yiwen wass issufγ itt ad tt ikes. Imi yewweḍ ar iciqeṛ, ikkat-ed ugeffur, diγen d-asemmiḍ ittṛuẓu tuγmas. Inna yas Bṛiṛuc i tzimert ines: “a tizimert yyaγ, a nuγal ar wexxam, Bṛiṛuc inγa t usemmiḍ.” Tenna yas tzimert ines:”ur ttuγaleγ ara, werɛad ṛwiγ tayessawt.” Inna yas Bṛiṛuc: “yyaγ naγ a s d γṛeγ i wuccen.” Tenna yas tzimert: “γṛ as-d!”
Inuda γef uccen armi t yufa. Inna yas:”ay uccen, yyaγ ad tečeḍ tizimert, tizimert tegumma ad teddu s axxam, Bṛiṛuc inγa t usemmiḍ.” Inna yas wuccen:” ur tt tetteγ tzimert inek. Dacu i y texdem ?” Inna yas Bṛiṛuc: “yyaγ naγ a s d γṛeγ i wuccay !” Inna yas wuccen: “atan ubrid, ssiwl as-d!”
Inuda Bṛiṛuc γef uccay armi t yufa. Inna yas: “ay uccay, yyaγ ad tečeḍ uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Inna yas uccay:”ur d ttaseγ ara, ur tufiḍ i y ixdem uccen akken a t čeγ.” Inna yas Bṛiṛuc: “yyaγ naγ a s d γṛeγ i wdebbuz !” Inna yas uccay: “atan ubrid zdat k. γṛ as-d.”
Inuda Bṛiṛuc γef udebbuz armi t yufa. Inna yas:” ay adebbuz, yyaγ ad tṣeṛɛeḍ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Inna yas udebbuz: “ur n ttaseγ ara, ur tufiḍ dacu i y ixdem uccay akken a t ṣeṛɛeγ.” Inna yas Bṛiṛuc: “yyaγ naγ a s d γṛeγ i tmest.” Inna yas udebbuz: “γṛ as-d.”
Inuda Bṛiṛuc γef tmest armi tt yufa. Inna yas: “ a timest yyaγ ad tṣeṛγeḍ adebbuz, adebbuz igumma ad iṣeṛɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Timest terra yas-d: “ur n ttaseγ ara ad sseṛγeγ adebbuz, ur tufiḍ dacu i y ixdem.” Inna yas Bṛiṛuc: “yyaγ naγ a s d γṛeγ i tala!” Tenna yas tmest: “γṛ as-d i tala, atan ubrid zdat ek.”
Inuda Bṛiṛuc γef tala ar mi tt yufa. Inna yas: “ a tala, yyaγ ad tsexsiḍ timest, timest tegumma ad tsseṛγ adebbuz, adebbuz igumma ad iṣeṛɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Tenna yas tala: “ur n ttaseγ ara ad ssexsiγ timest. Ur tufiḍ i y texdem.” Inna yas Bṛiṛuc: “yyaγ naγ a s d γṛeγ i tfunast!” Tenna yas tala:” γṛ as-d.”
Inuda Bṛiṛuc γef tfunast, yufa tt. Inna yas :” a tafunast, yyaγ ad tesweḍ tala, tala tegumma ad tssexsi timest, , timest tegumma ad tsseṛγ adebbuz, adebbuz igumma ad iṣeṛɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Tenna yas tfunast: “ur tufiḍ i y texdem tala akken a tt sekfeγ.” Inna yas Bṛiṛuc: “yyaγ anγ a s d γṛeγ i tefrut!” Tenna yas tfunast:”γṛ as-d!”
Inuda Bṛiṛuc γef tefrut yufa tt. Inna yas: “ a tafrut, yyaγ ad tezluḍ tafunast, tafunast tegumma ad tsew tala, tala tegumma ad tessexsi timest, timest tegumma ad tsseṛγ adebbuz, adebbuz igumma ad iṣṛeɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Tafrut tenna yas: “ur tufiḍ i y texdem tfunast akken ad tezluγ.” Inna yas Bṛiṛuc: “yyaγ naγ a s d γṛeγ i wgeccul(lkir uḥeddad)!” Tenna yas tefrut: “atan ubrid, γṛ as-d!”
Bṛiṛuc inuda γef ugeccul, yufa t. Inna yas: “ ay ageccul, yyaγ ad tssefsiḍ tafrut, tafrut tegumma ad tezluḍ tafunast, tafunast tegumma ad tsew tala, , tala tegumma ad tessexsi timest, timest tegumma ad tsseṛγ adebbuz, adebbuz igumma ad iṣṛeɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.”
Ageccul inna yas: “ur n ttaseγ, ulac dacu i yi texdem.” Inna yas Bṛiṛuc: “yyaγ naγ a s d γṛeγ i wγerda.” Inna yas ugeccul: “atan ubrid γṛ as-d.”
Inuda Bṛiṛuc γef uγerda, yufa t. Inna yas: “ay aγerda, yyaγ ad tγeẓẓeḍ ageccul, ageccul igumma ad issefsi tafrut, , tafrut tegumma ad tezluḍ tafunast, tafunast tegumma ad tsew tala, tala tegumma ad tessexsi timest, timest tegumma ad tsseṛγ adebbuz, adebbuz igumma ad iṣṛeɛ uccay, uccay igumma ad ič uccen, uccen igumma ad ič tizimert, tizimert tegumma ad teddu s axxam, Bṛiṛuc inγa t uṣemmiḍ.” Irra yas-d uγerda:” ur n ttaseγ ara. Ulac dacu i y ixdem.” Inna yas Bṛiṛuc: “Yyaγ naγ a s-d γṛeγ i wemcic.” Inna yas uγerda: “atan ubrid. Ɣṛ as-d.”
Inuda Bṛiṛuc γef umcic, yufa t. Issawl as: “ay amcic, yyaγ ad tečeḍ aγerda…” Ur t iǧi ad issali, amcic irra yas-d: “anda t uγerda, seg li-nna ttnadiγ fell as. Iwwi t Bṛiṛuc ar uγerda.
Aγerda akken d-iẓṛa amcic, inna yas: “a Bṛiṛuc, anda t ugeccul ?” Bṛiṛuc iqceɛ amcic nni, iwwi aγerda ar ugeccul. Ageccul, akken d-iẓṛa aγerda, inna yas : “a Bṛiṛuc! Anda tella tefrut ? Bṛiṛuc iqceɛ aγerda, iwwi ageccul ar tefrut. Tafrut, akken d teẓṛa ageccul, tenna yas i Bṛiruc: “a Bṛiṛuc! Anda tella tfunast ?” Bṛiṛuc inna yas i wgeccul :”uγal ansi d tekkiḍ. Ur k usireγ ara tura. Iwwi tafrut ar tfunast. Tafunast, akken d teẓṛa tafrut, tenna yas i Bṛiṛuc: “ a Bṛiṛuc! Anda tella tala ?” Bṛiṛuc iqceɛ tafrut, iwwi tafunast art ala. Tala, akken d-teẓṛa tafunast, tenna yas i Bṛiṛuc: “a Bṛiṛuc ! Anda tella tmesst ? Timesst, akken d teẓṛa tala, tenna yas i Bṛiṛuc: “a Bṛiṛuc! Anda yella udebbuz ?” Adebbuz, akken d yeẓṛa timesst tetteddu-d, inna yas: “ a Bṛiṛuc! Anda yella uccay ? Uccay, akken d-iẓṛa adebbuz iteddu-d, inna yas: “A Bṛiṛuc! Anda yella uccen ? “Uccen, akken d-iẓṛa uccay iteddud-d, inna yas:”Anda tella tzimert inek ?”
Tizimert, akken teẓṛa uccen ittaẓ-ed γuṛ s, tenna yas i Bṛiṛuc:”a Bṛiṛuc! Yyaγ a-nuγal s axxam, ṛwiγ, seg linna ttnadiγ fell ak.”
(W)