Yennayer ibedd iwsawen-ihin deg igenni, yeṭṭalay-d agessar, ar γur-s d ass yifen ussan:

Timeqlin, γlin-asent wafriwen-nsent

Aḍu yettsuḍ-d s tezmert-is, lgerra ugeffur tessebzeg akk ddunit,

Ma d Mas Iṭij, yessules wudem-is, yebγa ad yeṭṭes ugeswaḥ.

 

Yefṛeḥ, dadda yennayer yekmumes deg yiwen usigna d abelbul d azuran, yettheyyi iman-is ad yexxuc nnig yexxamen…dγa i yeṭṭes dadda yennayer, teẓrim amek: ṛṛεud-is ur ttağğan yiwen ad yeṭṭes tanafa, wannag ticki i ijexxeṛ, asxerxer ines, yessagad ula d ilfan, wannag tura, aman…anda yufa.

 

Ihi akka. Yennayer ad yeṭṭes, a d-yernu γur-s mmi-s, Furar, Meγres-nsen a d-iγerres ula d netta ticki d tewweḍ nnuba-s, nutni di kraḍ, ttarran ddunit am akken nnsen kan. Ttessun-tt akken i sen-yehwa, ssiriden-tt ticki isen-yehwa, ssismiḍen-tt akken i sen-yehwa.

 

Zara, yiwen wass, deg tlemmast n waggur n yennayer, telsa tabernust-is, terna tarkasin-is, tesbur taqelmunt, teγra i yemma-s:” a ye... ad ffγeγ ar tmazirt.

 

-Uh a yelli, ur yelli d ass n tuffγa ar tmazirt wagi! Aḍu, asemmiḍ, ageffur, agris…Ddm-ed taεelğett inem ad turareḍ, neγ ax imru ad tesxerbubceḍ γef lkaγeḍ, neγ yyaγ a m-d-iniγ tamacahut.

-Ẓara tenna-yas: aha’ aha’, bγiγ ad ffγeγ ad urareγ deg berra, ad azzleγ, ad iẓifeγ...

-Ulamek a yelli, deg tmazirt d aluḍ, ageffur, atan wwet ma ad tewteḍ….

-Acuγer a yemma akkit annect-a?

-Acku d tagrest a yelli, d yennayer.”

 

Deg berra, d tidet, d tallast talellast, ma tmuqleḍ taleṭṭat-ik ur tt-tettwaliḍ ara. Adebbuz ahat ad t-twaliḍ, acku zur. Alemmas gar-asen γezzif. Ameccaḥ teṛbuyin, alma tuẓaḍ ar γur-s neγ yuẓa-d ar γur-k, wannag meẓẓi meẓẓi meskin ad tγileḍ ulac-it maḍi...meskin. Tafat, ḥala ayen ad twaliḍ ar ṭṭiqan n yexxamen. Deg wexxam n Ẓara daγen, tessaγ yemma-s taftilt. Taftilt tettakk-d tafat. Tafat tuγ akk deg wexxam. Am uεeqqa yired yeccuṛen axxam.

 

Ẓara dayen tellez. Mecṭuḥet maca tellez. Ticki ulac ulac. Ticki ulac amek neγ yella wamek maca a tt-yewwet waḍu, ad taḍen, ihi yif-itt ad tellez. Dγa tellez. Tṛuḥ ad teṭṭes. Kra akka tekkr-ed. Tṛuḥ ar ṭṭaq, teqqim din teṭṭalay ar berra. Tmuql-ed ar deffir, tufa-d yemma-s teṭṭes yakan, neγ terra kan iman-is teṭṭes, teqfel alen-is. Ẓara tettmuqul kan si ṭṭaq ar tmazirt. Ulac dacu i d-tẓerr deg tebḥirt, maca Ẓara teṭṭalay am akken tẓẓer. Wissen ahat Ẓara tẓerr ayen ur nẓerr. Ahat γef ayen i s-qqaren Ẓara. Tettmuqul tettmuqul, dγa tettmeslay am akken iman-is: a dadda yennayer ttxilek, nekk d taṭuṭaḥt, d tacawrart, ḥemmelγ urar deg berra. A dadda yennayer ttxilek, bγiγ ad urareγ, bγiγ ad azzleγ…” Dγa tuγal ar wusu-s, tesres taqerruyt-is γef tsumta iεemmṛen s umeččim, tγumm iman-is s weεdil n taḍuṭ, tḥennc-ed ar tama-s taεelğett-is, teṭṭes.

 

A ziγ dadda yennayer imir-nni ur yeṭṭis ara. Yesla-yas-d i Ẓara dacu i s-d-tenna. Yennuγna γef yiman-is. Yenna: “nekk yesnuγnayen imecṭaḥ, ur lliγ d win yuklalen asgunfu.” Ihi kra yekka yiḍ ur yeṭṭis ara. Ixaq ixaq mači d kra. Yewwet asigna-nni γef yella akken yeṭṭes. Yessefs-it, yerra-t d adfel, adfel yeγli-d d ameččim. Ur yeqniε ara. Yerna asigna nniḍen, yerna wayeḍ, yerna wayeḍ, almi tuγal akk tmurt tγumm ddaw tecḍaṭ n wedfel.

Azekka-nni Mas Iṭij yekkr-ed. Ibat deg wayen yettwali. Anda yella akk usigna-nni amcum? Ihi ulac anda ad yerr lfeṛḥ. Dγa yessuffγ-d akk ccbaḥa-s, yessaγ yes-s kra i d-yersen ddaw tiṭ-is. Dγa s akken, iṭij ur yerγi ara, ma γas tafat-is treqq tettreqriq, adfel ur yefsi ara, yuγal am akken yeẓḍa s uεeqquc iṛeqqen deg d-tteffγen ifṭiwjen i yerran agama am targit.

 

D yemma-s n Ẓara i d-yekkren d tamezwarut. Teldi ṭṭaq, teẓra ayen teẓra, teḍsa ayen teḍsa, teγra i Ẓara s tγawla: “a Ẓara ekker ad teẓreḍ!”

Ẓara tqeεd-d iman-is tekker. Tuẓa-d ar ṭṭaq, teṭṭal ar tmazirt tufa-tt tdell abernus amellal, teḍsa, tuẓẓaf seg lferḥ. Tečča tiremt s cṭṭara, telsa tabernust-is, tarkasin-is, tesbur taqelmunt-is, teffeγ ar tmazirt.

 

Taḥnacaṭṭ, askuru, aglilez deg wedfel, tga-d yiwen wemγar s wedfel, tessels-as tacacit-nni n jeddi-s, tga-yas taẓrudyatt d aγenğur-is, sin iεeqqayen uzemmur d allen-is, tewwi-d taḍuṭ taberkant tga-yas icelγumen, terra-yas taεekkazt deg ufus-is. Imi t-tessuli, tuẓa ar γur-s, tessudn-it γef yenyir, yeččur-d imi-s d adfel, tenna-yas: tanemmirt a dadda yennayer.