M-iγiγden
Assmi tuḍen massa Ufella, tameṭṭut umeṛkanti ameqqran n lεeṛc awaquṛ, akken kan twala iman-is tenteṛ, tetsawam-itt-id tmettant, tessawel i yiwet yelli-s tesεa, tesγam-itt-id γur-s γef yiri n wusu i deg tella teẓẓel, tenna-yas:
A yelli n tasa, ili-kem d taqcict yesεan anamek, ayen n dir akk xḍuy-as! Yakuc ad yili yid-m yal ass, ma d nekk a kem-id-ttwaliγ seg igenni, ad ttεassaγ fell-am.
Akken tessuli ameslay, bernent wallen-is, teẓẓel-as i tmettant deg irebbi-s, taγawsa tewweḍ bab-is.
Taqcict tessefqad aẓekka n yemma-s yal ass, tettru fell-as war cceḥḥa, teqqim daγen d tuḥdiqt tuγ-as awal.
Mi d-tewweḍ tegrest yessa wedfel am tmeḥremt tacebḥant γef uẓekka n yemma-s, akken d-tezzi tefsut, iḍall-d kan yiṭij akka acemma γef tmurt, iderrez-as baba-s tameγra n rcil, yewwi-d tameṭṭut terna tegla-yas-d s snat terbibin.
Tullas-nni d-tewwi yid-s cebḥen wudemawen-nsen-t mačči d kra, maca ulawen-nsent berrikit am tuggi taqbuṛt yuli wabbu si ddγel d wayen icemten.
Ngum akk d-rrsen iḍarren-nsen-t deg axxam, rrzan-d yir ussan imcumen γef teqcict d-teğğa yemma-s d tagujilt.
Tenna yiwet deg-sent i tayeḍ tullas-nni zdat-s:
I uqeṛṛ-agi n teγyult, yid-neγ ar a tedder?
Tennay-as i nettat s udem-is: “ Win yebγan ciccu yezlu beεεu, win yebγan lesfenğ yefk nanna-s”, daγ kemm a tuḥṛict ma yella-yam pappa “ aγrum” deg ul, yessefk a t-id-ssisnen-t tfettusin-im, ihi γas kker γef yiman-iw, cemmeṛ i iγallen-im!
Zeḍment fell-as di snat yid-sent, kksent-as s wesxenzeq akk icettiḍen imelḥanen d tarkasin tatrarin telsa, ḍeggṛent-as deg wemḍiq n lqecc-nni tacekkaṛt i uglim d icifaḍ i idaṛṛen-is
“ Sersent deg-s ayen sersen waεbaben di Tmazγa”.
Nnant-as: Wali, wali ay agejdur akka tettṛeqṛiq zdat-neγ s waṛquqen ahin a tt-yeččen, treffed aεenqiq-is deg igenni am yelli-s n ugellid s uburrez d nnefxa! Aha rfed tiqesṛit-im tura, zwir akka zdat-nneγ γer texxamt n usewwi!
Ttadṣant fell-as, ssenεatent-as anida d wacu yessefk a t-ttḍummu yal ass.
Tudert-is gar-asent tugar tin n yal taklit di tallit talemmast, teεkef seg wefraḍ n leγbaṛ deg udaynin, aḍummu n iḥuccan deg axxam d beṛṛa, aseyyeq, anejruḍ n uṣaγuṛ, asired n iceṭṭiṭen, taruẓi n tregwa di tebḥirin, aḥuccu n weslen d wulmu terna tettagm-ed aman si tala d wahin d tahin...
Ayen akk yugaren adrar-agi n leqdic yuran di twenza-s, d ddemmaṛ n yir lehduṛ d weskeεrer-nni sskeεrirent fell-as terbibin n baba-s.
Yal ma ttreḍqent wallen-nsent fell-as, γas ma s tuddma, ibibbi d εeggu i d-tekcem s axxam, rennunt-as urfan, surugent kra γef tγerγert am irden d wayen nniḍen, ttgallant deg-s ar tefru iḥuccan fell-asen am akken yessifiy uγerbal aclim neγ ma tuder-as teḥdert n weγrum deg imi.
Ula d tameddit mar a tesred, tefser tgeswaḥt yekkren ngum tanekra n wass si rrḍiḥ d nnṭiḥ war asteεfu, ur tt-id-yetṣṣaḥ ara ad tsers iγsan-is deg usu, ala.
Teggan γef tγerγert s iri n lkanun, d iγallen-is i d tasumta.
Rnant-as llaqubat, sawalent-as M-iγiγden imi tt-tuli tebrek seg wabbu yakk d wammus n iγiγden.
Yiwen wass yekker baba-tsent ad yerzu γer walzuz ( agdaz, ssuq ) s uεawdiw, yesteqsa tirbibin-is dacu ssarment ad sent-d-yeglu yes-s,
yiwet tessuter deg-s icettiḍen imaynuten igerrzen, tayeḍ d tiwiztin.
Yuγal yenna-yas i kemm a M-iγiγden, yella kra ad am-d-awiγ ?
M-iγiγden: Teẓriḍ a ba, afurek amezwaru a k-d-iqasmen deg webrid m´ar ad taliḍ γef teεrurt uεawdiw ma d-tuγaleḍ s axxam, qeṛṛem-iy-id aqeclaw-is, glu-yid yes-s ttxil-k!
Argaz yuγ-asent awal, yuγ-ed icettiḍen imaynut igerrzen d twiztin yerna yeṭṭf-ed s lemεamda abrid n teẓgi s axxam akken a s-d-qasmen ifurkan.
Amezwaru d-yemmuger yewwet-it-id s acelqiε, yeγḍel-as ula d lemḍella yelsa i uqeṛṛuy-is, igzem-d seg-s aqeclaw, yewwi-t-id yid-s.
Mi d-yewweḍ s axxam yal ta yeffka-yas ayen tessuter deg-s, maca ḥala M-iγiγden i s-yennan tanemmirt-ik a baba.
Azekka-nni tessefqed s aẓekka n yemma-s am yal ass, tewwi yid-s aqeclaw-nni, teẓẓa-t γef uẓekka, tettru, tettru, tettru almi uγalen imeṭṭawen-is ugaren taεwint, yeswa yis-sen uqeclaw-nni.
Aqclaw-nni yegma yerna yeffγ-ed deg-s yiwen useklu “ ttejṛa “ igerrzen.
M-iγiγden tuγal trezzu kraḍ ( 3 ) n tikkal deg ass γef uẓekka n yemma-s, tettru, tettεenni s ddaw useklu-nni.
Yal tikkelt tettwali yiwen wefṛux d acebḥan yettaded ger ifurkan-is.
Mi tεenna deg-s kra, a s-t-id-ideggeṛ din, din war tuzya d tunḍa neγ yejneε yefneε, ugur ur yelli.
Yewweḍ-d wass ideg agellid n at Mliyikečč ira ad isseḥḍer tameγra ideg a tt-id-uraren iḍebbalen, icennayen, tawsa d w´aẓ akin, ad yenced akk tullas n yal tamnaṭ akken ad yefren mmi-s tin a s-yeččaṛen tiṭ.
Akken d-yewweḍ isalli tirbibin n baba-s n M-iγiγden, uccagent γer lewqam war ma uḥtament.
Ssawḍent-as isalli ula i nettat m´akken d-as-sawlent, nnant-as:
Aha tura eğğ leqdic-nni, iyya-d mmceḍ-aγ iqeṛṛa-nneγ, wenneε-aγ, gerrez-aγ, ssfeḍ-aγ daγen tarkasin alamma ttiṛṛiqent akken yessefk, nennubget s tujjma deg lbeṛj ugellid ilmend n tmeγra ar yesker akken ad yaf mmi-s tin a yessenquqlen ul-is, ad tuγal d tameṭṭut-is.
M-iγiγden teqdec-asent akk ayen uṛğant sseg-s, maca tettru daγen, acku ira wul-is a teddu γer ccḍeḥ ula d nettat.
Tessuter di yambaba-s “ tameṭṭut n baba-s” ad as-tanef ad teddu d yessi-s.
Yambaba-s: Amek a yelli? Kemm a M-iγiγden yugaren sidna Yub ar a yeddun s wammus d tebrek-nni yakk i kem-yulin γer tmeγra ugellid?
Ula d icettiḍen d tarkasin n manwala mačči tesεiḍ-ten am kemm am tezziwin-im, ad aγ-d-ternuḍ tura ccḍeḥ-im? Ah a lalla, ah a lalla!
Seg akken teggumma M-iγiγden a s-tebru i wawal, terreẓ-as aqeṛṛu i yambaba-s s uεenni, tuγal tesseγli-d imeslayen-agi deg imi-s taggara, tenna-yas:
Atan surgeγ-am iγiγden γer teqbuct n tεedsin, ad am-fkeγ snat tmirin (sswayeε), ma tessawḍeḍ tsefḍeḍ akk lğeṛṛa iγiγden, terriḍ yal aεeqqa yettiṛṛiq amzun werğin yumis, ad medleγ allen-iw, ad am-anfeγ ad tedduḍ yid-sent.
Taqcict akken tesla i lehḍuṛ-nni, teffeγ γer beṛṛa, terra γer deffir teḥnact, tessawel s igenni:
Ay aεssas ur neččax, ay at wassa d yimiren.
Azent-iy-id yakk ifrax, ceyyeεt-iy-id itbiren!
Yelwa s tqabubt s txenfuct,
ad yesfed iγiγden seg teqbuct!”
Tekcem γer teḥnact, tessa yiwet n tmeḥremt tazedgant γef tγerγert, tesmar-ed γur-s tiεedsin-nni s iγiγden isebken
fell-asent, teslal kan taqbuct-nni s waman almi s-d-čuṛen
sin itbiren tawwurt, din, din ḍefren-ten-id akk yefṛax yellan s ddaw igenni mecḥen akk iγiγden-nni.
Itbiren rran akk tiεedsin s wenγab d uγiwel γer teqbuct, ur tewwiḍ ara timirt ( ssaεa ) tefra taluft, ssrafgen akk yefṛax, uγalen s imeḍqan-nsen.
Yennecṛah wul n teqcict almi d ayen kan, tγil ad teddu γer tmeγra war uguren, tewwiy-as taqbuct-nni i yambaba-s.
Maca tameṭṭut tenna-yas: Ala a M-iγiγden, ur tesεiḍ ara icettiḍen yerna ur tessineḍ ara ad tcedḥeḍ, ad ṛwun kan deg-m medden tadṣa!
Akken twala tserreḥ daγen teqcict d imeṭṭi, tuγal tenna-yas:
Lemmer ad seffḍeḍ tikkelt-agi iγiγden seg snat teqbucin n tεedsin di yiwet n timirt, ad tzemreḍ ad tedduḍ.“ Tenna-yas i wul-is“. D awezγi ad tefru taluft am ta.
“ Akken d-terwi yambaba-s snat teqbucin n tεedsin deg iγiγden, teffeγ daγen teqcict γer deffir teḥnact, tessawel s igenni:
Ay aεssas ur neččax, ay at wassa d yimiren.
Azent-iy-id yakk ifrax, ceyyeεt-iy-id itbiren!
Yelwa s tqabubt s txenfuct,
ad yesfed iγiγden seg teqbuct!”
Tessa timeḥremt tazedgant γef tγerγert, tesmar γur-s tiεedsin-nni ulin iγiγden, wwḍen-tt-id daγen sin yetbiren d imezwura, drus kan almi d-ddan yefṛax akk di lejfaṛ-nsen am tikkelt tamezwarut, ur yewwiḍ ara wezgen n timirt taluft tefra, Faḍma teεqel argaz-is, ifṛax bernen s anida d-kkan.
Ul n teqcict yennecṛaḥ yules, tγil dayen tewweḍ asirem-is, ad teddu γer tmeγra.
γas akken tessas-ed ayen yellan d awezγi, ayen yugaren daγen tiwin n uyefki n tsedda di tculliṭ n mmi-s, n waman i γef mnaqaṛen idurar neγ tukksa n tmellalin ddaw tsekkurt ur tettfaq, maca tennay-as yambaba-s: Ur yelli dacu ad am-d-yawi yakk wannect-a, ala ur tettedduḍ ara yid-neγ, acku ur tesεiḍ ara icettiḍen yelhan yerna ur tessineḍ ara yakk ad tcedḥeḍ, ur nestufa ara ad ṛwun deg-neγ medden tadṣa di lğal-im.
Tezzi-yas-d i M-iγiγden s weεrur, ulint nettat d yessi-s-nni yessalayen iman-nsent, yettawin iεenqiqen-nsent deg igenni si zzux d lfux γer tcariṭ zzuγṛen iεawdiwen, ğğant-as-d aḍu γer deffir, tḥulfa s yiman-is tmeγduṛt amzun iseffeṛ-as wewtul.
Akken d-tufa tegra-d kan iman-is deg axxam, tekker terza γef uẓekka n yemma-as, tebded s ddaw useklu, tettεenni, tessutur deg-s, teqqaṛ-as:
“ Huzz iman-ik, mmhihed ttxil-k ay aseklu,
akken igenni ideg tella yemma, s wuraγ d lfetta ad id-yeglu!”
Iḍeggeṛ-as-d wefṛux-nni acebḥan tiqnedyaṛ yettwaṛuccen s wuṛaγ d lfeṭṭa yernay-as-d tibacmaqin yettwaksun s leḥrir i idaṛṛen-is.
S uγiwel i telsa M-iγiγden tunṭict-nni n at igenwan, teṭṭef abrid s tazla s axxam n tmeγra, ula d yambaba-s d yessi-s ur tt-εqilent ara, γillent akk d yelli-s n kra ugellid n tmurt nniḍen.
Tugar Nuja Uteryel di ccbaḥa s tqenduṛt d tarkasin-nni d-telsa.
Timcumin-nni ulac akk anta i wumi yenna wul-is deg-sent, ahat d M-iγiγden tagi, ma yella kra n tin i tt-id-yemmektin imiren, tγil attan teẓẓel γef yiri n lkanun ulin-tt ilefḍan neγ tseffeḍ iγiγden i tεedsin.
Akken ḍallent wallen n mmi-s ugellid fell-as, yebded wul-is kra n tegnitt, lemmer i sen-yehwa i izan a s-ččaṛen imi-s, tawwurt teldi, rrgagin icekkaben-is wergaz akken yessefk.
Yessekna aqeṛṛuy-is zdat-s almi d tikli ad yessuden idaṛṛen-is, yeẓẓel afus-is γuṛ-s, yessuter deg-s s tedṣa n wul d leḥdaqa ma yella yehwa-yas ad tecḍeḥ akk yid-s.
Seg imi i d-as-rsen i ccḍeḥ deg sin yid-sen, iḥulfa wergaz s yiman-is amzun yekcem igenni wis sa ( 7 ), ur yezmir ara yak a s-iserreḥ akken ad yecḍeḥ d tayeḍ akken yella ngum a tt-iwali m´akken inṭṭeg am ifeṭṭiwej si ta γer ta.
Ula mar a d-mmeγ kra n yiwet seg sut tinzar yezgan ulint d asawen, a s-teẓẓel afus-is akken ad yecḍeḥ yid-s, yugi, yeqqaṛ-asent:
D tagi, d tagi kan ar a ceḍḥeγ! “ S nnig lewqam d txessaṛt”.
Akken qqaṛsen idaṛṛen-nsen seg uzedwi d uhuzzu n tqesṛit, d tikli ad tekkfu tmeγra, tekker ad tuγal s axxam, ira ad yeddu yid-s a tt-iwanes deg webrid, acku ira daγen ad izeṛ ansi-tt d win tt-ilan.
Tesγaffel-it kan almi yezzi udem-is γer tama nniḍen, tekka tawwurt tessenser iman-is, teṭṭef abrid-is s tazla, terwel.
Yemdekwal-d kan, iger tamawt teffeγ, ulac-itt dinna, yeḍfeṛ-itt si zdeffir.
Akken d tikli a tt-awḍen idaṛṛen-is, tuγ-itt tegnitt tessaweḍ yakan γer zdat wexxam, iwala-tt m´akken tekcem deg iseqqif, tezger-it kan, tekcem tessedreg aqeṛṛuy-is deg yiwet texxamt n yetbiren.
γas ur yessegmeḍ ara s tmuγli, ur iwala ara sani terra, maca icumm-itt γer din i tekcem, yurğa-tt dinna melmi ar a d-ffeγ, almi i d-yejba baba-s n M-iγiγden yufa-d mmi-s n ugellid yettṛağu taqcict, yenna-yas: Ttnadiγ yiwet n teqcict, ad tili tekcem γer texxamt –agi n yetbiren, teffer.
Argaz yekker iγḍel-d igenni γef tmurt, yesgerjej yakk taxxamt-nni, yeγḍel-itt-id, yesteqsa ul-is, yenna-yas: Tezmer ahat ad tili d M-iγiγden? Terreẓ akk texxamt, ulac dacu ufan.
Uγalen kecmen s axxam, ufan tuγ yiwet n teftilt d tamecṭuḥt kan akka, ula d tafat-is tettak anzi γer tin ttwalin wid yezεillimen,
M-iγiγden teẓẓel γef yiri n lkanun am tnamit, udem-is γumment-tt tbuxin.
A ziγ teffeγ si tewwurt n deffir n texxamt-nni, tewweḍ s temzizzelt γer ddaw useklu-nni i γer tettεenni, tekkes icettiḍen yakk d tarkasin-nni telsa, tesres-iten s ufella uẓekka n yemma-s, yeddem-iten wefṛux-nni acebḥan, nettat terra-d ijerbuben-nni iqbuṛen i idisan-is, tuγal s lemḥirat s amḍiq-is n tguni, teḍla tibuxin i wudem-is, teẓẓel am ulaxeṛt γef yiri n lkanun, terratt i lweεd ucexxeṛ.
Azekka-nni akken tendeh daγen tmeγra, lγaci derrzen ttalsen,
baba-s, yambaba-s d yessi-s uγen abrid ula d nutni s axxam ugellid, nettat teεna aseklu-nni n tjujtin, tenna-yas:
“ Huzz iman-ik, mmhihed ttxil-k ay aseklu,
akken igenni ideg tella yemma, s wuraγ d lfetta ad id-yeglu!”
Iḍeggeṛ-as-d wefṛux acebḥan taqenduṛt yifen tin n yiḍelli-nni s waṭas.
Irgazen akk yellan din m´akken tebded γef yimi n tewwurt n wexxam n tmeγra amzun tewwet-iten lmeγla, ffγen-d iseqdiḍen n wulawen-nsen, ḥala agur n tziri i γef terna ad temyuṭṭaf yid-s afus deg ufus.
Mmi-s n ugellid yella yeṭṭef tiγmaṛt, allen-is ceṭṭḥent akka d w´akka ansi ar a d-tejbu.
Din din yenṭeg fell-as, yeẓẓel γur-s afus-is, yedṣa-yas seg ul, yessuter deg-s akken ad teccḍeḥ yid-s.
Seg imiren ḥala yid-s i d-as-yers i zzwitt, rrwitt, ulac akk tayeḍ i ira ad yecḍeḥ.
Tin yecmumḥen yid-s si tidak-nni ur tettawi ara tγerγert si nnefxa, yini-yasent: D tagi kan, d tagi, ḥala yid-s ar a ceḍḥeγ!!!
Akken d tikli ad tekkfu tmeγra, tuγal s axxam, mmi-s ugellid yeṭṭafaṛ-itt s lexmata, ira ad iẓer anida tezdeγ.
Tessemneε idaṛṛen-is γer yiwet n tebḥirt d-yusan deffir wexxam, anida akken yella useklu n tfirsin-nni tiziḍanin am tamment.
Teckunteḍ am jebbirdu γef useklu-nni, teffer aqeṛṛu-is ger ifurkan.
Mmi-s n ugellid ur yeẓri anida tedda, igenni yerfed-itt, tiγerγert tessebleε-itt.
Yurğa almi d-iεedda baba-s n teqcict, yenna-yas: “Taqcict-nni tabeṛṛanit n yiḍelli, ula d ass-a tenser-iyi, ad tili teεluleq γef kra n ufurek n useklu-agi n ifires”.
Argaz yesteqsa iman-is: “ tezmer ad tili d M-iγiγden”?, yewwi-d tagelzimt, ijeggeḥ akk aseklu-nni, yerra-t amzun d iεekkazen-nni i γef yettali ssenğaq, ufan aḍu iceṭṭeḥ, ma d taqcict tsumm-itt tγerγert.
Akken kecmen s axxam, tedṛa-yasen am yiḍelli-nni, anida d wamek tella M-iγiγden i tt-in-ufan.
Nettat tuḥṛict tejgugel γef yiwen ufurefk si tama, tenṭeg am tebkitt γer wayeḍ di tama nniḍen, tneggez γer tγerγert, terwel, teεna daγen Aseklu-nni n tjujtin, terra-yas i wefṛux acebḥan icettiḍen icebḥanen, telsa ijerbuben, tuγal s amḍiq-is n tguni, anida tt-in-ufan teẓẓel.
Ass wis kraḍ n tmeγra, akken uγen abrid-nsen daγen iεeggalen n twacult s axxam n ugellid, teεna ula d nettat aseklu n tjujtin d-yemγin γef uẓekka n yemma-s, tenna-yas:
“ Huzz iman-ik, mmhihed ttxil-k ay aseklu,
akken igenni ideg tella yemma, s wuraγ d lfetta ad id-yeglu!”
Iḍegger-as-d taqenduṛt yifen akk tiqnedyaṛ ssnen yemdanen, werğin tella yiwet am nettat yerna-yas-d tarkasin n wuṛaγ.
Akken tewweḍ s axxam n tmeγra yebded-asen umeslay i lγaci-nni yellan din, wa iεṛeq-as dacu ad yini, wayeḍ γas ur yekcim ara εemṛayen, maca ur yezmir ara ad yessali awal, amzun yeṭṭef-it buberrak, yal wa, yal ta dacu n uεewwiq d-yemlal.
Mmi-s ugellid ḥala yid-s kan i yecḍeḥ daγen ula d ass-nni, yeṭṭef deg awal-is, yeqqar-asent akk i sut tεenqiqin-nni yulin deg igenni:
γas sersemt iman-nkent, nekk d tagi kan, d tagi, ḥala yid-s ar a ceḍḥeγ!!!
Akken d-yewweḍ lawan ideg a teqqel s iγiγden yuran di twenza-s, ira wergaz a tt-yissiweḍ s axxam, a tt-iwanes deg webrid, maca nettat tessenser daγen idaṛṛen-is s uγiwel m´akken yezzi udem-is s anda nniḍen.
Ula d netta daγen d uccen, yendi-yas ticeṛkett war ma tfaq.
Yendeh i sin yemγiden-nsen, yennay-asen: mi tt-twalam kan tusa-d, nneγlet tiquftin n llazuq γef tseddaṛin, ur tettut ara ula d iran!
γas akken tessufeγ-d iman-is si tseddaṛin-nni ideg d-as-teḍra am tin d-izegren asif aεebbas mar ad yeḥmel, maca tessegran deffir-s tarkast-is tazelmaṭ, yeckunteḍ deg-s llazuq, yeqleε-as-tt-id.
Mmi-s n ugellid yufa-d tarkast-nni tessegra deffir-s, yerfed-itt, yufa-tt d tameẓyant, d taleqqaqt yerna d uṛaγ akken ma tella.
Azekka-nni yekkr-ed mmi-s ugellid, yuγ lewhi n webrid-nni tettaṭaf M-iγiγden yal ma s-terwel, yewweḍ γer zadat wezrib yellan deffir n wexxam-nsen, yemlal-ed baba-s d amezwaru, yenna-yas:
Ḥala tin i wumi ad tezg tarkast-agi n wuṛaγ a yuγalen d tameṭṭut-iw. “ Nnecṛaḥen wulawen n terbibin n baba-s n M-iγiγden akken yessefk, acku γur-sent tiqejjiṛin gerrzen-t”.
Tameqqrant deg-sent tewwi tarkast-nni γer texxamt-is, tedda yid-s yemma-s, maca ur s-d-tezgi ara, ur tezmir ara ad tessekcem tifednan-is timeqqṛanin.
Teffka-yas yemma-s ajenwi, tenna-yas: Axx gzem tifednan-im! Mar ad tuγaleḍ d tameṭṭut n mmi-s n ugellid, maεεac ad telḥuḍ γef udaṛ.
Taqcict tuγ awal n yemma-s, tegzem tifednan-is, tessekcem adaṛ-is di tarkast, tessebleε teqṛeḥ, teffγ-ed γer mmi-s n ugellid.
Yessuli-tt s ufella n teεrurt uεawdiw-is, yesγam-itt zdat-s, yewwitt yid-s a tt-yer d tameṭṭut-is.
Yesεada-ten uεessas zdat n uẓekka n yemma-s n M-iγiγden, qqimen sin yetbiren γef tcebbubt n useklu-nni n tjujtin, akken wwḍen γer zdat-nsen, ccnan-asen-d tizlitt-agi:
“ Tarkast teččur d idammen, tamnayt-agi ur tettnehcam.
Ihi tislit iwulmen, d tin n-teğğam deg axxam“.
Mmi-s ugellid iḍal γer tarkast-nni, iwala ttfeggiḍen sseg-s idammen, yebren aεawdiw-is, yerra-tt s axxam, yenna-yasen:
Ala, mačči d tagi i d tislit i d-iwulmen, yessefk ad tqis weltma-s tarkast-agi!
Tekcem γer texxamt, tessekcem tifednan-is war uguren di tarkast, maca agerz-is yegguma ad yekcem.
Tefka-yas yemma-s ajenwi, tenna-yas: Axx ggzem agerz-im! Ma tuγaleḍ d tameṭṭut n mmi-s ugellid, maεεac a telḥuḍ akk γef udaṛ.
Tuγ awal n yemma-s, tessekcem adaṛ-is di tarkast s timdeḥḥest, tessebleε teqṛeḥ am weltma-s, teffeγ-d γer mmi-s ugellid.
Yerfed-itt γef teεrurt n uεawdiw-is, yesγam-itt zdat-s, yewwi-tt a tt-yer d tameṭṭut-is.
Akken wwḍen γer zadt useklu-nni n tjujtin, ccnan-asen-d daγen yetbiren-nni tizlitt-agi:
“ Tarkast teččur d idammen, tamnayt-agi ur tettnehcam.
Ihi tislit iwulmen, d tin n-teğğam deg axxam“.
Yessaked wergaz s idaṛṛen n tmeṭṭut, iwala iqaciṛen icebḥanen d-telsa uγalen akk d izeggaγen seg idammen.
Yebren-as aqeṛṛu i uεawdiw, yerra-tt s axxam, yannay-asen: Ula d tagi mačči d nettat i d tislit iwulmen, yella kra n teqcict nniḍen tesεam deg axxam?
Baba-s n M-iγiγden: Ala, ḥala yiwet yelli-s n tmeṭṭut-iw tamezwarut yemmuten. D tamecṭuḥt, tecmet, terka yerna tečcuṛ akk d iγiγden, d awezγi ad tili d tislit iwulmen.
Mmi-s ugellid: Ssufγet-tt-id kan γer beṛṛa a tt-waliγ!
Yambaba-s: Ala, M-iγiγden tumes aṭas.
Mmi-s ugellid: Nniγ-awen aha ssufγet-tt-id a tt-waliγ!
Teffγ-ed tmeṭṭut tebra I wallen-is, tessedreg akka acemma udem-is s ifassen-is, tekna zdat n mmi-s ugellid, netta yefka-yas tarkast-nni n wuṛaγ.
Teqqim γef yiwen uqejmuṛ yersen deg wefrag zdat iseqqif, tessufeγ-d adaṛ-is seg tqebqabin-nni n wesγaṛ aquṛan telsa,
Tessekcem-itt deg tarkast-nni n wuṛaγ, tusa-d fell-as s lqis.
Akken d-terfed s uqeṛṛu, yessaked-itt mmi-s ugellid s allen-is, yeεqel-itt d nettat i d taqcict-nni i γef niqal yerhen temẓi-s lemmer ur tt-yufi ara.
Isuγ si tmendit, yennay-asen: D tagi, d tagi i d tislit iwulmen!!!
Yambaba-s d yessi-s ur d-tegri ara ula d tiqit idammen deg udmawen-nsent, tekkfa fell-asent ddunnit.
Mmi-s ugellid yewwi-tt di tkeṛṛust, akken wwḍen γer tewwurt tameqqṛant n beṛṛa n lbeṛğ-nsen, ccnan-asen-d yetbiren tizlitt-agi:
Tarkast-a war idammen, tuklalem tizet a tt-teččem.
Tewwid-d tislit iwulmen, ansuf yis-m a tuhdiqt, kcem!
Ass-nni i tendeh tmeγra n rrcil “ Zwağğ”, yeγli-d igenni γef tmurt, iwaquṛen derrzen yid-s tameγra, usan-d ula d lγaci n leεṛac nniḍen d tmura nniḍen, sa ( 7 ) n wussan d sa ( 7 ) n wuḍan yeqqnen di tnelli reddḥen imenduyar, cennun icennayen, iεum walluy d uṣubbu.
Agellid s timmad-is yennecṛaḥ wul-is ahdum imi tuγal d tameṭṭut n mmi-s, ula d yambaba-s d yessi-s yesres deg-sent ayen ur nelli, selkent ayen ur ččint γef ayen ssεeddant fell-as.
M-iγiγden d mmi-s ugellid akken i uγalen d imγaren, ddren s tayri di talwit almi d tagara n tudert-nsen.
Yerra-tt-id seg talmanit Essaid Ait Maamar. S talmanit "Aschenputtel" uran-tt watmaten Grimm.