Tella yiwet n teẓgi n ṭlam s ddaw taddart n at Weεban, win a tt-ikecmen deg uzal qayli, ad teccirew yakk ṣṣura-s, ad iḥulfu s ucebbub-is yuli deg igenni seg rrebrab tessekcam s ulawen.

Dda Mira bu-yesγaren, tameṭṭut-is Miγisa d warraw-nsen Ḥmiṭuc  d Duduc zedγen deg tlemmast-is.

Dda Mira yettarra-tt ḥala i unegzum n yesγaren, maca amzun ulac dacu yettsami deg-sen, seg wakken temcubbak akk teẓgi n ṭlam am akken yal afurek yellan deg-s yesni γer wayeḍ.

Tawacult-agi n Dda Mira bu-yesγaren d taẓawalit almi d ayen, iεeggalen-is ur lḥiqen ara yakk iman-nsen, ula d aγrum aḥefrur ur teṛwin ara.

Yiwen wass ger wussan, akken d-tewweḍ tmeddit , yeẓẓel dda Mira bu-yesγaren deg teγmeṛt , yeṭṭef aqeṛṛuy-is yettnezgum, yuγal yenna-yas i tmeṭṭut-is:

Amek ar a nekkes tura laẓ i warrac-agi? Nukni s timmad-nneγ ata yeṭṭḍ-itt mmi-s, ur d-yegri kra n weεwin i s a nemmager ussan xerṣum a nessebded tigecrar-nneγ”.

Terray-as-d awal tmeṭṭut, tenna-yas: Teẓriḍ amek !  Tgra-d kan a neglu yis-sen azekka s alqaε n teẓgi, a ten-nessiweḍ ḥala ma d anida ur s-ttafen ara yakk ixef-is i tuγalin, yal yiwen deg-sen a s-nekmes tiḥdert n weγrum s afus-is, mi ten-nesseγfel kan akken ur ttfaqen ara, ad sen-neğğ aḍu γer deffir.

Dda Mira bu-yesγaren: Ala a tameṭṭut, wagi d yir ttawil, ur zmireγ ara ad sseγreγ tasa-w fell-asen. Amek akka a n-ğğeγ arraw-iw deg ulqaε n teẓgi, nekk ad d-uγaleγ s axxam?

Miγisa: A ziγ kečč d timint ay axessaṛ-iw! Ihi anef-as akka, ad d-terzu tmettant, ad d-taf meqqar dacu ad teddem, ihi a γ-terfed deg kuẓ ( 4 ) yid-neγ γef yiwet n tikkelt. Yelha wakka? Yeffeγ fell-ak wayagi?

Dda Mira bu-yesγaren yeεfes γef ul-is iwufeq-itt.

Ḥmiṭuc  d Duduc seg akken ur ten-yeğği  ara laẓ ad ṭṭ̣sen, slan-d akk i ugejdur-nni yettṛağun tiqeṛṛay-nsen timeγḍurin.

Duduc iserreḥ yezṛi-s d imeṭṭi seg tugdi, tuγal tenna-yas i gma-s: tura teḍra twaγit.

Ḥmiṭuc  yenna-yas: susem, susem a Duduc, ulac akk dacu ar a tagadeḍ; a d-afeγ ttawil a weltma, γas kkes anezgum i wul-im!

Yeğğa imawlan-is almi ṭṭsen, yesla-yasen kan cexṛen, yekker γef yiman-is s leḥkaṛ, yelsa iceṭṭiḍen-is, yessenser iman-is γer beṛṛa.

Iḍ-nni yettak anzi s ass seg wakken d-tessufeγ tziri tuccar-ines, agur-is i d-yessaknen udem-is akken yessefk yerra iẓra-nni yettiṛṛiqen amzun ssemγin-d allen n tezṛuṛeq.

Ilqeḍ-d aṭas seg-sen iẓra-nni, ibubb-ed almi yugi ad yeddem, yuγal s axxam;

yennay-as i Duduc: γas ur ttḥebbiṛ i kra a weltma, llan iεessasen d at igenwan yid-neγ.

Yemdel allen-is, din din yeṭṭeṣ.

Azekka-nni ngum ğğan yetran igenni m´akken i ten-id-tessker Miγisa seg iḍes,

tenna-yasen: Ass-a yessefk a nessegmeḍ isurrifen-nneγ, a nerzut γef ulqaε n teẓgi akken a d-nezdem isγaren.

Tuγal teddm-ed aḥric n yiwen, yiwet teḥdert n weγṛum, tebḍa-yasen-tt deg sin, tenna-yasen: Axxt-en akin, ṭṭeft tura aγrum-agi, d ayagi kan i yellan, maca mačči tura ar a t-teččem, ar deqqal!

Tuγal tezwar zdat-sen, nutni ḍeffren-tt.

Duduc terra tiḥedrin-nni n weγrum deg snat s aqelmun-is, acku Ḥmiṭuc  ulac akk γur-s kra n wemḍiq anida ar a yeddem amur-is, iεebba i iman-is iẓra-nni d-yelqeḍ deg iḍ almi ur yezmir ad yeddem kra nniḍen.

Lḥan akken ddeqs n isurrifen, Ḥmiṭuc yezga yessegray aḍar γer deffir, yerra iman-is yessakkad s axxam.

Akken iger baba-s tamawt γef ayen, iεeggeḍ fell-as, yenna-yas: Ḥmiṭuc, acuγer akka tessakkadeḍ kra yekka wass γer deffir?

Ḥmiṭuc: Nnaγ a ba, d amcic-iw acebḥan kan i ssakkadeγ, atan yuli γef lqeṛmud, yeqqaṛ-iy-id s tfettusin-is awi yid-k talwit a Ḥmiṭuc.

Miγisa: D nnε-ik d lberdeε-ik, wa-hin mačči d amcic-ik amellal, d iṭij i d-yewten s aḥelyiw almi yuγal yettfeğğiğ akka-hin.

Ḥmiṭuc daγen mačči d amcic i iwala, d iẓra-nni d-yewwi yid-s i yesrus

deg webrid γef tγerγert s lexmata wa deffir wayeḍ.

Akken wwḍen γer yiwen uxenduq deg tlemmast n ulqaε n teẓgi n ṭlam, yenna-yasen dda Mira bu-yesγaren i warraw-is: Ahaw tura ẓewṛet γef yiman-nwen, awit-aγ-d isγaren γer dagi a nessiγ yis-sen times akken ur ken-igezzem ara usemmiḍ-agi yekkaten s aqeṛṛu!

Ḥmiṭuc d Duduc uffgen am lebṛaq, din din ssulin tirect n isγaren n maras

annect n tqubbett, ssaγen times yessekkren ajajiḥ yekkaten ad imasi igenni.

Akken twala Miγisa ajajiḥ-nni, tesla-yas yesseglaf am yeqjan yeṣṣḍen, tenna-yasen i warraw-is: Ay arrac, sseḥmut ihi kunwi γef yiman-nwen, steεfut akka acemma, aṭas i tuzzlem! Nekk d baba-twen a nernu ciṭuḥ uṣubbu d akessar, a d-negzem kra n teqjemyaṛ, mi nesmed ttεebga igerrzen, a d-nuγal a neglu yis-wen s axxam.

Ḥmiṭuc d Duduc uγen-as awal, zzin-as-d i tmes-nni, yuγal yewweḍ-d lawan n imekli ččan tiḥedrin-nni n lḥif yerna imi slan i tyita n tgelzimt war addud, γillen d baba-tsen i yellan kan dinna γer tama-nsen.

Nettat ziγen tiyita-nni mačči d tiγrit n tgelzimt, d amcum-nni n dda Mira bu-yesγaren i sen-tt-yendin akken yessefk.

D yiwen uqejmuṛ aquṛan i iεelleq deg yiwet n tkessart γer yiwen ufurek n useklu, yettawi-t waḍu akka d wakka, iceṭṭeḥ, yekkat deg addag n wexnac,  yessawal sakin am tiγri n tgelzimt.

Akud ur yelli d win yennumen yettṛağu, azizwu iḍfeṛ-d azal, arrac yuker-iten nadam, ur uḥtamen ara d yiman-nsen seg εeggu n tmeṛğa almi xeṛqent yes-sen tirga, tedṛa yid-sen igeswaḥen am wid-ak yezzren deg temda n leγruṛ.

Akken d-ldin allen-nsen, yessaweḍ-iten-id yiḍ s tebrek-is d-yessufγen acciwen-is deg wemḍig i deg i ten-ğğan imawlan akken ad sseḥmun.

Duduc tugad aṭas, tuγal testeqsa Ḥmiṭuc s imeṭṭi d wesxenfeṛ, tenna-yas:

i tura amek ar a naf abrid yettawin s axxam lawan-agi?

Ḥmiṭuc yekkes-as anezgum γef ul s tririt-is, yenna-yas:

Aha kan a weltma ur yelli γef acu a d-tγeḍleḍ igenni, wagi mačči yakk d aγilif, aṛğu kan ciṭuḥ ad twaliḍ! Tura a d-yeffeγ wayur n tziri ad teẓreḍ amek ar a naf abrid war uguren.

Akken d-as-yenna i teffeγ, iḍall-ed kan wayur, tufrar tafat-is γef tγaltin s umata, yeddem weqcic yezzuγer weltma-s seg ufus, ḍefṛen iẓra-nni yella yesrusu-ten wa deffir wayeḍ akken tesrusu tzuxzuxt timellalin-is, wehhan-asen abrid s axxam s ufeğğeğ-nsen akken yessefk, fkan-asen-d yiwet n tafat am tin d-ttakent teftilin yettaγen γef yiri n webrid n ukeṛṛus.

Wwḍen γer tewwurt n wexxam, sstebṭben deg-s, teldi-tt-id kan Miγisa, tufa-ten-id zdat wemnaṛ, tewwet tmeṭṭut agejdur fell-asen, tettsuγu, teqqaṛ-asen:

Kelfeγ-awen aya d waya, tekkfam tasa-w tamcumt, nekk γileγ dayen ur tettuγalem ara yakk a d-tezzim γur-neγ s axxam, dacu i ken-in-yeğğan akka almi d tura…i d yenna waḍu yenna wagu...

Ma yella d dda Mira bu-yesγaren yennecṛaḥ nnig waṭas yerna s tidett, ur t-yeğği ara yakk wul-is ad yemdel tiṭ, tasa-s daγen tella tḥebbek fell-asen.

Kra n tegnitt kan seg imir-en, ata yezzi-d daγen fell-asen laẓ d ameqqran, iḍuṛ-iten almi d ayen kan, Ḥmiṭuc d Duduc llan ttakken tameẓẓuγt, slan-as daγen i tyemmatt-nni mi s-teqqaṛ i wergaz-is deg usu:

Tura atan yegra-yaγ-d kan wezgen n temtunt ay argaz llεali, arrac-inna yessefk a sen-neg leqṛar yerna s uγiwel. Tikkelt-agi a ten-nessuk wakali, a tt-necbek yakk fell-asen ḥala ma nesseεṛeq-asen cced n uyeddid, ad uγalen ur ttafen ara yakk lğeṛṛa n webrid d-yettarran s axxam nneγ m´ulac atan ad tekkfu fell-aneγ ddunnit ula d nukni.

Argaz ageswaḥ yezzi-d fell-as daγen uγilif tikkelt nniḍen, deg ul-is yesmenyaf ad yebḍu yid-sen talqimt taneggarut, maca imi tuγ tegnitt iwufeq-itt tikkelt tamezwarut, yessefk-as ad yeṭṭef deg awal-is i yefka yakan “ argaz d ameslay”.

Ḥmiṭuc d Duduc ulac ameslay zeglen ur d-as-slin ara.

Akken ṭṭsen imawlan, yekker daγen Ḥmiṭuc γef yiman-is, ira ad yeffeγ am tikkelt tamenzut γer beṛṛa akken ad yelqeḍ iẓra-nni icebḥanen yessakanen abrid deg iḍ s axxam.

Maca ur yezmir ara ad yeffeγ, acku d tamcumt-nni n Miγisa i iṣekkren tawwurt m´akken i sen-tt-id-teldi, terra tasarut-nni s iciwi-s, teṭṭes yes-s.

Iẓri n Duduc yugar daγen tala ma tettfeggiḍ, iserreḥ d imeṭṭi.

Ḥmiṭuc iga-yas daγen kra n tebγest, yenna-yas: “ Ur ttru ara a Duduc, iεessasen d at igenwan anida nedda ad ilin yid-neγ, ur d-aγ-ttağğan ara at waman isemmaḍen a newḥel a weltma, ḥala tiwwura ad ldin γur-neγ”.

Akken kan yuli wass, tjebbed deg-sen tmeṭṭut seg usu ngum d-lldin allen-nsen am win neγ tin icellxen deg ifurkan n tneqlin.

Tebḍa-yasen daγen deg sin yid-sen yiwet n teḥdert n weγrum tamecṭuḥt γef tin n yiḍelli-nni.

Ḥmiṭuc issefruri yakk amur-is yerra-t γer tecwarit-nni n tqelmunt-is.

Deg webrid γer wissen sani yessegray am tikkelt tamenzut aḍar-is γer deffir, yezga ibedded, yettḍeggir tamuγli-s s anida d-yekka.

Yuγal iṛemmeq-it-id daγen baba-s, yesteqsa-t s usiwel: Waaa Ḥmiṭuc, dacu tessakkadeḍ akka d wakka? Aha azzel tura, ddu d yiman-ik!

Ḥmiṭuc: A nnaγ a ba, d itbir-iw i yessakkadeγ, atan yuli γef uqeṛmud, yeqqaṛ-iy-id s iferrawen-is, awi yid-k talwit a Ḥmiṭuc.

Miγisa: A lqecc-ik, a twaγit-ik d nnegr-ik! Wa-hin mačči d itbir kan d azerẓur, ur twalaḍ ara d iṭij kan i d-yewten daγen s aḥelyiw am yiḍelli?

Ula d netta mačči d itbir i iwala, d asεeddi kan i ira ad yessεeddi iman-is s imeslayen-is, yella yessalay lewhi i tuγalin s yeftaten-nni n weγrum yessefruri, yesrusu-ten seg tiγilt γer tayeḍ am ttawilat-nni yettwellihen iberdan deg webrid ukeṛṛus ger wemḍiq d wayeḍ neγ ger temdint d tayeḍ.

Tameṭṭut terra yes-sen d akessar, tessaweḍ-iten s amḍiq werğin kecmen iḍaren-nsen neγ walant wallen-nsen, ssekkren times am tnamit, tenna-yasen:

Ssrekdet kan dagi tura iman-nwen ay arrac, ma tberdem seg tikli tzemrem ad tsendem daγen ciṭuh skud tesseḥma tmes akal! Nukni a neεnu anegzum n yesγaren, tameddit mi nessuli nekkfa, a d-nedlu γur-wen, a neglu yis-wen s axxam.

Yewweḍ-d lawan n imekli, tebḍa Duduc tiḥdert-is n weγrum d gma-s, acku netta yezzuzer akk amur-is deg webrid akken ad yaf yes-s lemrira yettarran s axxam n imawlan-is.

Akken kan rrẓen laẓ neγ ssarden imaw-nsen s snat telqimin-nni, medlen allen-nsen, ṭṭṣen s uγiwel.

Almi d-yeγli yiḍ i d-ukin, iga-yas daγen Ḥmiṭuc tabγest i Duduc, yenna-yas:

Aṛğu kan ar d-yeffeγ wagur n tziri, ad aγ-d-yessaken ibruyen-nni n weγrum sseftutiγ, ssmargeγ yakk deg webrid d-nuγ γer dagi akken a t-naf yes-sen a γ-yerr s axxam!

Tiziri tessa-d γef tmurt, nutni kkren γef yiman-nsen, begsen aggusen-nsen, maca iftaten-nni n weγrum neγben-ten akk yefṛax, yiwen deg-sen mačči zeglen-t a tawaγit.

Teddun kra yekka yiḍ, rnan yiwen wass d yiḍ nniḍen war asteεfu, medlent akk tewwura, tezzin tennḍen kan din deg telqaεt n teẓgi, ur d-ufin ara yakk abrid yessufuγen.

Akken i d-asen-tewweḍ tfidi s iγes, laẓ yewwet-iten s amelγiγ, tigecrar-nsen kkawent, iḍaren-nsen hebbjen deg-sen am yeqjan seg teqṛeḥ d εeggu, mmyezmaḍen wa γer wayeḍ s ddaw yiwen ubawal, ṭṭsen daγen.

Azekka-nni akken d-ukin uγen abrid γer zdat, hemmlen kan, teddun ttafen iman-nsen rennun γemqen deg teẓgi.

Ṛwan acali almi i ten-id-ssawḍen kraḍ( 3 ) n wussan d kraḍ ( 3 ) n wuḍan yeqqnen deg tnelli ddren beṛṛa n wexxam yerna lemmer ur ttafen ara s uγiwel γas ulamma d kra n telqimt ad ṛzen yes-s laẓ, ad jafen imeγdaṛ, ad sleqfen am yefṛax.

γef lewhi imekli yessemlal-iten-id uεessas d yiwen n wefṛux amellal am wedfel, seg wakken ḥlaw cna-s d wamek yesčewčiw, ur uḥtamen ara d yiman-nsen almi d-ufan iman-nsen am akken yeddubbez neγ yesbek kra n  umecwaṛ laẓ-nsen, ḥebsen fkan-as tameẓẓuγt.

Akken yessuli ccna n tezlatin-is, yeğğa-d afurek-nni i γef yella yers yesseḍway akka d wakka, yesraffeg zdat-sen, yettferfir kan ddac, ddac, nutni ḍefṛen-t seg zdeffir.

Yessaweḍ-iten γer yiwen wexxam yettwaseqqfen s teγrifin d-yetteεluluqen seg yal tama-s am uqeṛmud-nni n yexxamen n yezwawen iqbuṛen, winna i wumi neqqaṛ yettwali-d ur d-yekcim. Tiγrifin snint  ta deffir tayeḍ d akessar amzun di temṛiwen(tayeni) γef tezdayt yurwen akken yessefk.

Ḥmiṭuc d Duduc tuγ-iten tegnitt ddreγlen seg laẓ aberkan,  jguglen deg-sent, qeṛmen-tent-id war akukru, γlin deg lweεd-nsent.

Werεad ssadren tiγrifin-nni timezwura, slan i taγect tamelḥant n tmeṭṭut imi tcennu, teqqar:

γef webrid, γef webrid ur cfin –

Anwi wigi i igezzren akka tiγrifin?

Ḥmiṭuc d Duduc rran-as tiririt, nnan-as:

Mačči d wid yesḍen, mačči d wid yesḍen,

d at waman isemmaḍen.

Arrac lhan-d d tuffẓa d usebleε, ur nḥerwan, ur cliεen, ur rẓin iqeṛṛay-nsen γef wacu d wacuγeṛ sellen i taγect-nni n tmeṭṭut.

Din din tujjaq tewwurt, lldin lelwaḥ-is, teffγ-ed γur-sen temγart annect n yemma jida “ abbaḥ yella wacu i γef a yeccirew wemdan dagi “.

Tamγart-nni ad tili tugar akk timγarin yeddren lawan-nni, udem-is akk yekmumec, lqedd-is yekna terna tetteddu γef tεekkazt.

Akken treḍqent wallen n warrac fell-as, γlint-asen teγrifin seg ifassen-nsen seg tugdi, teṭṭef-iten ula d tawla seg tirgigit ma d tuγmas-nsen ugarent tassirt ma tezzaḍ.

Tamγart teṭṭef aγesmaṛ-is, thuz aqeṛṛuy-is, tenna-yasen: Ay a  yemma ḥebbi, way, way way! Acuγerr akka tugadem ay arrac ibaḥḥanen? Lemḥadda lemḥarba γef tqeṛṛay-nwen a tarwa.

Iyyaw kan ihi ad teqqimem γur-i ad yi-twansem, ur yelli dacu a ken-ixaṣṣen!

Teṭṭef-iten seg ifassen-nsen, tessekcem-iten s axxam, tessers-asen-d udi d tamment d lqut yesseḥlawen ul n umuḍin mar a t-iwali kan zdat-s.

Ččan, swan almi d tikli ad fellqen iεebbaḍ-nsen, tekker temγart twenneε-asen-d usu s yiwet n tṛakna igerrzen, sennden kan fell-as, tewwi-ten tnafa, ḥulfan s yiman-nsen amzun ẓlen deg tebḥirt n ijeğğigen deg tefsut.

Tamγart-nni mačči d aḥdaq i teḥdeq, a ziγ nettat d teryel.

Aγummu-nni tettγummu ssqef n wexxam-is s teγrifin, d ticeṛkett i t-neddi s wayen i warrac mar a ten-yeṭṭef laẓ deg teẓgi akken neddin yemdanen tiqellaεin i imerga.

Yal mar a s-d-tḍeggeṛ tegnitt yiwen, mi t-tuza, tečč-it.

Tamcumt tacengutt n tneqlin tenna-yas i wul-is, iyyaw ihi yewwi-ken-id uεessas, ass-a γur-i d tameγra.

Nutenti teryulat-agi γur-sent allen d tizeggaγin am isufa, γef ayen ur ssegmaḍent ara s tmuγli, maca ttḥulfunt neγ ttfaqent am yeqjan n tεessast s yemdanen mar ad teddun γer tama-nsent.

M´akken d-teddun γur-s Ḥmiṭuc d Duduc teḍsa s ccah γef lqeṛḥ-nsen yakan, tanna-yas i wul-is: Ḥala ansar ur tnessrem ara, iyyaw kan tura ad a wen-mleγ!

Azekka-nni tekkr-ed zdat lawan n tnekra n iyuzaḍ seg iḍes, m´akken twala arrac-nni ṭṭsen i talwit am tγawsiwin yersen, terna tezweγ tuli leḥnak-nsen, yennecṛaḥ wul-is, tessusef ifasen-is, tesself-asen s weḥnucceḍ γer zdat, γer deffir, tenna daγen i wul-is: tagi d tacriḥt yerna d tidett.

Tejbed-d Ḥmiṭuc s iffasen-is ṛqiqen am tsegnatin, teddem-it, tessekcem-it γer yiwet texxamt n yewtal yellan d tilemt, terra-d fell-as tawwurt.

Yezmer ad yessaked γer beṛṛa, acku taxxamt-nni tesεa acebbak n ugeṭṭum, maca ad isuγ akken ira ulac anwa a s-d-yeslen.

Tuγal γer Duduc tetthuzzu deg-s, tettεeggiḍ fell-as, teqqaṛ-as: Kker s yin a tukrift n ifassen, a ssenğaq n at laxaṛt, agm-ed aman seg lbir, ssewwed i gma-m-ihin yellan deg texxamt n yewtal ayen a t-yerren d azuran akken ad afent deg-s tuγmas-iw dacu a γeẓẓent.

Γas akken tserreḥ Duduc d imeṭṭi n tugdi d weḥdiqeṛ n tasa tageswaḥt, maca tewwi-yas-d tegnitt ad taγ awal n teryel tamcumt , afran ur yelli.

Teryel tettak-as i Duduc icelman kan d wayen d-igerrin seg učči, acku telha-d d Ḥmiṭuc, tesseṛwa-yas lewqam d tziḍanin akken ad iqebbi a t-tečč d amezwaru.

Yal tanekra n wass amaynut tdellu γef Ḥmiṭuc, tessutur deg-s ad yessufeγ taḍadect-is seg texjiḍin n ucebbak-nni ugeṭṭum γer beṛṛa akken ad teṭṭef, ad tẓer ma yewwi-d iman-is deg tuzert d taẓayt.

Ḥmiṭuc iger tamawt, ifaq-as txuṣ deg iẓri yerna yufa dinna yiwen yiγes, yal ma terzu fell-as, d win kan i s-d-yessenεat, yesferfud-as-d yes-s  s ifassen-is, nettat γur-s amzun d taleṭṭaṭ-is i d-teṭṭef, tettγil-it yeqqqim kan am uγanim.

Akken iεedda wayur, wwḍen-as waman i teryel γer temgeṛt neγ yewwḍ-as rrebg γer tagust-is, d ayen ur tezmir ara ad ternu timeṛğa, tennay-as i Duduc:

γas awi-d aman a Duduca! Akken ira yili Ḥmiṭuc, ad yuzur neγ ad yiṛqiq, tura yewweḍ-d wass-is, azekka a t-uqmeγ d timecreṭ, a t-zluγ, a t-azuγ, a d-neffqeγ deg-s war cceḥa, a t-gezreγ s tussda, ad kkseγ yes-s aqbuṛ.

Nnaγ a yemma Guraya tegzem tasa n Duduc tameγduṛt, wali amek tekkfa fell-as ddunit d yeẓri-s yugaren tiregwa isafen mar ad ḥemlen!

Duduc tettmeğğid, teqqaṛ: anda tell-am a ṣṣellaḥ d lawliyyat n tmurt-aggggi? Ssufγet-aγ-d aha ttxil-wat seg imi n yizem! deg leεnaya-k ay aεessas n tala, a baba wedris d wahin d tahin m´ur tekkfim fell-aγ ccedda am tagi!

A nnaγ a ẓẓehr-nneγ, ssmenyafeγ lemmer d-aγ-ččin wuccanen m´akken neṭṭes deg teẓgi, meqqaṛ a nenger deg sin γef yiwet n tikkelt ulac anwa ad yegrin deffir wayeḍ ad yeḥdiqeṛ!

Teryel tesla-yas mi tesḥussuf, tenna-yas: Aha tura d ayen ur ttbireḥ ara, d taruẓi kan i t-ttruẓuḍ deg uqeṛṛuy-im γef ulac, gma-m ččiγ-t, ččiγ-t! Ihi ur yelli dacu i d-yettawi umeğğed-inem.

Lkanun ideg tesseway teryel annect n tesraft yerna yugar lbir deg teγzi, yesεa yiwet n tewwurt n wuzzal mar a tt-temdel ifeṭṭiwej mačči izmer a d-yeffeγ γer beṛṛa.

Teddm-ed snat tsebbalin-nni n waman timecṭaḥ tesεa qqnent s imurar γer yiwet tassara n wesγar aquṛan, tεebba-tent i Duduc γef tayett-is seg zdeffir akken yettbibbi weγyul acwari-s, tuzen-itt a teččar tuggi yess-en.

Duduc tuγ awal-is s tmara, tetteddu tettnezgum, tesseqdac allaγ-is amek a d-taf ttawil n wensar idaṛṛen-is d usemneε n gma-s yerna s uγiwel.

Tenna-yas teryel: Yessefk a nezwir deg usewwi n weγrum, lkanun ssaγeγ-t yakan, arekti daγen yettwaεjen.

Teṭṭef Duduc seg tfettust-is, tettmekkin-itt s anida d-ineddeh ujajiḥ n tmes, teqqaṛ-as: Masi, masi times, ssaked ma yeḥma lkanun akken ad serseγ aγrum ad yeww!

Nettat d Duduc i d-tewwi ger wallen-is, yeffeγ-d useqḍiḍ-is fell-as, ira wul-is a tt-teknef sakin a tt-tečč d tamezwarut, maca Duduc tfaq-as dacu s-tettheggi, tuγal tenna-yas: Ur ẓriγ yakk amek zemreγ ad suḍeγ times, yella kra n ttawil tessneḍ akken ad wεuγ ad smenṭgeγ isγaren deg ṭṭaq-agi?

Teryel tezzuḥtelli, terra taγect-is d tazurant, tenna-yas: “ A taγyult atan littaε annect ila-t, ula d nekk s timmad-iw zemreγ ad εeddiγ deg-s”, tezwar zdat-s, temla-yas amek yessefk ad tesseknu aqeṛṛuy-is seg nnig lkanun d akessar.

Duduc tesseγfel-itt akken iwata, tekka-yas-d seg zdeffir, terfed-as iḍaren-is d asawen, tgerrez-as tibujqella, tezwer-itt s uqeṛṛu, tinna tezzer d akessar,  nettat terra fell-as tawwurt-nni n wuzzal, lebla tečča-tt tγerγert.

Teryel tettmeğğid teqqaṛ ay iḥliẓẓan d ibezḍan, tesgermic deg-s tmes.

Duduc tγawel teldi-d tawwurt i gma-s, tettru seg tmendit, teqqaṛ-as: Nemneε a Ḥmiṭuc, dayen tura nemneε, teryel-nni tamcumt teṛγa, teknef deg tmes.

Ur zmiren ad felsen iman-nsen yeḍra-d wannect-en d tidett, nnecṛaḥen wulawen-nsen almi d ayen kan, mmḥebban, mmsudanen, mmyezmaḍen...

Kecmen s axxam n teryel war tugdi, ufan yal tiγmeṛt teččuṛ d tiwiztin, yenna-yas Ḥmiṭuc i weltma-s: “ Wali kan wali, tigi ifent iẓra-nni yettfeğğiğen deg ccbaḥa”, yeččuṛ taqelmunt-is yes-sent almi tugi a teddem.

Duduc: “ Ula d nekk a n-gluγ yid-i s kra deg-sent s axxam”, txemmel ayen izmer ad yeddem iciw-is.

Ḥmiṭuc: Aha tura, aha, anef-aγ a nessemnaε iḍaren-nneγ s uγiwel seg teẓgi-agi n teryulat!

Lḥan amecwaṛ ameqqṛan almi d-mmugren zdat-sen yiwet n tasift d tameqqrant.

Ḥmiṭuc: tagi d awezγi a tt-nezger s ufus yerna ur walaγ ara yakk kra n tqenṭert dagi.

Duduc: Ula d kra n teflukt ur telli daγen, maca attan dahi yiwet n tebṛikt tacebḥant, lemmer ad ssutreγ deg-s, a γ-tezger.

Ahat ibṛiken imi ur sεin ara imeẓẓuγen s iqubab-nsen i sellen, tessawel-as:

A m-uqemmuc, a m-uqemmuc, dagi d Ḥmiṭuc d Duduc.

Ur telli teflukt, ur telli tqenṭert, win i kem-isbezgen a γ-d-iṛuc.

Tabṛikt tewweḍ-iten-id din, din almi d iri n tasift, Ḥmiṭuc yuli γef teεrurt-is d amezwaru, yuẓ γer tama, ira ad issali weltma-s s idis-is, nettat tenna-yas:

Ala, m´ulac a s-taẓay ttεebga i tkanaṛt, anef kan a γ-tezger wa deffir wayeḍ!

Takanaṛt tuḥdiqt tezger-iten deg sin s nnuba.

Teddun yesmektay-iten-id kra d webrid-nni, ttḥulfun amzun ssnen imeḍqan-nni ideg llan.

Dγa ur