2 seg ṭuber, 2006
Halima AIT ALI TOUDERT
Acu iγ-d-nnan ger yitran
Tukkist seg wedlis
Tamacahutt n Uhuskay Uḥric
Tamacahutt agi sawalen-tt-id at –zik i warraw nnsen i wakken ad issinen tiḥerci n uhuskay agi.
Ihi yella yiwen weqcic d ahuskay, maca iḥrec aṭas, almi d yiwen wass yenta-yas usennan deg ufus-is, yeqqim deg webrid la yettru, almi i t-tɛedda yiwet n temɣart tenna-yas : « acu i k-yuɣen a mmi? », yerra-yas : « d asennan iyi-nntan deg ufus-iw ur zmireɣ ara a t-id-kkseɣ », tenna-yas : « awi-d a twaliɣ », yefka-yas afus-is, tekkes-as-d asennan tḍeggeṛ-it ɣer tegnitt, isked akka d wakka ur iwala ara asennan-nni, sakin yenṭeq yenna-yas : « efk-iyi-f asennan-iw », tnuda temɣart asennan ur tufi ara, tenna-yas : « ur ufiɣ ara, ma yella tebɣiḍ ak-d-kkseɣ wayeḍ si ṭṭejra neɣ madaɣ, yerna dacu i d as-triḍ? », yenna-yas : « ur steqsay ara, nek bɣiɣ asennan-iw, iḍleq i imeṭṭi mebla aḥbas, tamɣart teḥsel deg-s tenna-yas : « imi ik-d-yura rebbi, lḥu-n a tt-edduḍ s axxam-iw ad ak-fkeɣ tamellalt », yessusem weqcic, yedda d temɣart-nni,tefka-yas-d tamellalt yefreḥ.
Izzi, yenneḍ di taddart, tamellalt deg ufus-is, axemmem deg wallaɣ-is, almi i d-yeɣli yiḍ yufa-d yiwet n ccufa tgerrez. Yeɣli-d yiḍ, kecmen medden s ixxamen, yuɣal yesṭebṭeb ɣer yiwen n wexxam, yessawel : « A yat-wexxam, a yat-wexxam! », teffeɣ-ed temɣart : « dacu i tebɣiḍ a mmi? », yenna-yas : »ur tesɛiḍ acu, ma yella kan ulac uɣilif ad ğğeɣ tamellalt agi ɣur-em ar ṣbaḥ? », tenna-yas : « ulac uɣilif ruḥ sers-itt deg uddaynin anda llant tyuẓaḍ », yekcem yerra-d tamellalt-nni ɣer lğib-is, iruḥ azekka-nni akken kan yuli was iruḥ s axxam-nni yessawel : « a yat-wexxam! A yat-wexxam! », tefeɣ-ed temɣart-nni tenna-yas : « dacu i tebɣiḍ a mmi ? », « bɣiɣ kan tamellalt-nni i serseɣ ɣur-em iḍelli tameddit », tenna-yas : « ruḥ awi-tt-id anda i tt-tessarseḍ.», iruḥ inuda (iga am win) ur yufi ara acemma, yebda imeṭṭi, « ulac tamellalt-iw, ulac tamellalt-iw, tečča-tt tyaẓiṭ nnwen », iɣeḍl-ed ddunit s usuɣu, nnan-as ak-nefk tamellat nniḍen yugi, yugi acku yebɣa kan tamellalt-is, seg wakken i ten-iskuffer nnan-as : « dacu i tebɣiḍ ihi? », « bɣiɣ tayaẓiṭ yeččan tamellalt-iw », u netta yerwa imeṭṭi, fkan-as tayaẓiṭ iruḥ.
Yeddem tayaẓiṭ iruḥ, yexdem am tikkelt tamezwarut, yeqqim almi yeɣli yiṭṭij, kecmen medden s ixxamen, yesṭebṭeb ɣer yiwen deg-sen, teffeɣ-ed yiwet tmeṭṭut, testeqsa-t dacu yebɣa, yenna-yas : « ma ulac uɣilif ad iyi-teğğeḍ tayaẓiṭ agi ɣur-em ar d yali wass », terra-yas : « ulac uɣilif a mmi ɛeddi s addaynin, sers-itt », yekcem ɣer dinna iwala yiwen izimer, isers tayaẓiṭ-is yeffeɣ. Akken teẓram meṛṛa, tiwwura n zik ur qeɛdent ara yerna lɣaci di taddart ur cliɛen ara ma yella ğğan tawwurt teldi, ihi, yekcem deg yiḍ mi gnen lɣaci, yezla tayaẓiṭ-nni, yessames-as idammen i izimer, yiwi tayaẓiṭ temmut. Almi yuli wass, ffɣen medden, yessawel s axxam-nni yenna : « a yat-wexxam, efket-iyi-d tayaẓiṭ-iw », teffeɣ-ed tmeṭṭut-nni tenna-yas a d-yekcem, akken yekcem, ur yuf ara tayaẓiṭ, yebda asuɣi, iwala zaɛma izimer yumes d idammen dɣa yenna s imeṭṭi : « annaɣ izimer nnwen yečča tayaẓiṭ-iw, atan yumes d idammen », a yettsuɣu a yettru almi yeqber seg imeṭṭi dɣa nnan-as : « susem, susem a mmi a k-nefk tayaẓiṭ nniḍen », yenna-yasen : « ala, ala, bɣiɣ tayaẓiṭ neɣ izimer i tt-yeččan », wehmen akk wat-wexxam, acku izimer ur yezmir ara ad yečč tayaẓiṭ, seg wakken i sen-yesker čeqlala, ffkan-as izimer iruḥ.
Yefreḥ weqcic-nni, acku yewweḍ ɣer lmerɣub-is, yiwi izimer yezzuɣer-it almi i d-yeɣli yiḍ dɣa yexdem am tikkelt tamezwarut, tis snat, yessawel ɣer yiwen n wexxam teffeɣ-ed temɣart, teğğa-yas isers izimer-nni deg uddaynin, akken yekcem, iwala yiwet n teqcict di beṛṛa-nni tetturar tɛeğeb-as. Yeqqim almi dnen awk medden, yiwi yid-es cwiṭ idammen, yekcem s axxam-nni yuqqem idammen i Ziba (akken taqcict agi isem-is Ziba) yuqem-as idammen ɣef yimi-s, yiwi izimer iruḥ.
Yuli wass kkren medden, iruḥ s axxam-nni yessawel ad as-d-ffken izimer, yekcem ur yufi ara izimer-is, iwala taqcict tumes s idammen, isuɣ « wa ya baba, yelli-twen tečča izimer-iw, yelli-twen tečča izimer-iw », « a mmi, ad ak-nefk izimer nniḍen », yugi acku yebɣa taqcict-nni yeččan izimer, yewwḍ ɣer lmerɣub yiwi taqcict yid-es (Ziba).
Yefreḥ weqcic agi mačči d kra dɣa yiwi Ziba yid-es iruḥ yezzi di taddart meṛṛa s ccna s taɣect umi yeqqar : « seg senni, ɣer melli, si melli ɣer čuču, si čuču ɣer baɛbaɛ, si baɛbaɛ ɣer meṭṭu, kustaḥ, kustaḥ, rres-ed a Ziba a necḍeḥ »
"Acu iɣ-d-nnan ger yitran "
- Allah ulaɛğeb
- Asehḥar lğihennama
- Silu
- Tamacahutt n Uhuskay Uḥric
- Ḥmed bu tkerciwt
- Mesmamda
- Tamacahutt m bu sebɛa tullas
- Tamacahutt n tyamunt n buday
- Tamacahutt n kraḍ natmaten
- Tağğalt
- Taqsiṭ tamsirt
- Bu yedmimen
- Tamacahutt n Jeḥḥa
- Tamacahutt n Mekyusa
Asers usaḍuf: 3308/2004-ISBN :9961-789-21-0
Aseqqamu Unnig n Timuzɣa