Lemmer neẓwer am Geṭṭuc tilaq idles-nneγ amaziγ ur ireq ara yal ass d nekni nrebbex iγallen !

Tamacahut n Geṭṭuc

Amacahu!
Ad telhu!

Yella yiwen wergaz yezdeγ netta d 7 warraw-is berra i taddart.
Yiwen wass deg wussan yekcem γer taddart. Mi yewweḍ γer yixf n taddart, yesla i tteryel ttett at taddart yiwen yiwen. Argaz yebren s tizzli γer warraw-is, yenna-yasen: "A tarwa, attan tteryel ttett at taddart yiwen yiwen. Attan ad tessenger taddart. Ahat tezmer ad tuγal γur-neγ. Ekkert fell-awen a nerwel".

Ihi argaz d warraw-is rewlen. Teddun ur ẓrin anida. Ddan ddan, dγa yeεya yiwen deg-sen. D ameqran deg warraw-is. Dγa yenna-yas i babas: "A baba nekkini εyiγ, ur zmir ara ad kemmleγ tikli".
Dγa babas yebna-yas taxxamt s wedγaγ, yeğğa-t tin. Netta d 6 warraw-is kemmlen tikli.
Ddan ddan daγen, yeεa yiwen-nniḍen, dγa babas yebna-yas taxxamt s wedγaγ, yeğğa-t din. Akken alimi εyan akk. Aneggaru i yeεyan d mmis amezzyan meŗŗa deg-sen. Netta semman-as Geṭṭuc acku d amezyan nezzeh. D amεuc, d abexxuc kan. Ma tiḥirci, yiwen ur s-yezmir.
Geṭṭtuc yenna i babas: "Ula d nekk εyiγ tura a baba."
Babas yenna-yas: "Ihi atan a k-bnu ula d kečč taxxamt s wedγaγ, ad teffreḍ deg-s, akka ma tewweḍ-γur-k tteryel ur tzemmer ara a k-tečč".
Geṭṭuc yenna-yas: "Nekkini a baba, yessefk a y-tebnuḍ taxxamt s wuzzal".
Ihi babas yebna-yas taxxamt s wuzzal, yesbedd-as tabburt n wuzzal.
Geṭṭuc yeqqim deg-s, ma d babas ikemmel abrid-is.
Wissen anida ara ad yaweḍ.

Tteryel mi tfuk at taddart-nni s tuččit, dγa teṭṭef abrid i yeṭṭef wergaz-nni d warraw-is. Deg webrid-nni tufa 6 texxamin bnant s wedγaγ, sεant tibbura n wesγar. Dγa terẓa tibbura-nni, tekcem γer texxamin-nni, tečča merra ayatmas n Geṭṭuc.
Mi tteryel tewweḍ γer texxamt n Geṭṭuc, tufa-tt tebna s wuzzal. Ihi ur tezmir ara ad treẓ tabburt-is.
Ihi tteryel tebγa a s-tzerreg i Geṭṭuc, ad yeffeγ seg texxamt-is iwakken ad tečč-it. Dγa tessawel-as:

"Geṭṭuc, wa Geṭṭuc, effeγ-d ad tedduḍ yid-i, a nruḥ ad nagem".
Geṭṭuc yerr-as: "Nekkini sεiγ aman, ur-d ttagmeγ ara".
Ihi tteryel truí γer tala ad tagem.

Geṭṭuc yeÞÞa-tt tedda kra kan, dγa yuzzel, yeṭṭef abrid-nniḍen yezwar-itt. Mi yewweḍ γer tala, dγa yugem-d, yesluγ aman-is, yuzzel yuγal γer texxamt-ines.
Ihi tteryel tugem-d aman iluγanen. Tewwi-ten s axxam-is, ssin akkin tuγal γer Geṭṭuc.
Tteryel tessawel i Geṭṭuc, tenna-yas:
"Geṭṭuc, atan ugemeγ-d tura, ruḥ ad tagmeḍ iman-ik keččini".
Geṭṭuc yerra-yas: "Amek? Nekkini zwareγ-kem, ugmeγ-d aman d izeddganen, ğğiγ-am am iy-sluγeγ. Ihi kemmini tugemḍ-d aman iluγanen a taεeggunt".
Geṭṭuc yeḍsa fell-as.

Teryel tkerrec iḍuḍan-is g lγuc, yesenser iman-is.

Azekka-nni tuγal γer Geṭṭuc, tenna-yas:
"Geṭṭuc, eyya-d ad tedduḍ yid-i a d nawi tmer. Attan yiwet n tzanet tečču d tmer".
Geṭṭuc yerra-yas: "Ala, nekkini ur tetteγ ara tmer. Ečč kan iman-im".

Tteryel teṭṭef abrid-is γer tzanet-nni. Geṭṭuc yeğğa-tt tedda ka kra, dγa yeddem taculliḍ, yuzzel, yezwar-itt. Yuli γef tzanet-nni, itekkes tmer, yesseγlay ibeεayen neγ iγessan γer lqaεa.

Drus kan atta tejba-d tteryel . Ma d Geṭṭuc netta yeffer seffel n tzanet. Tteryel tleqeḍ ibeεyan i s-d-yesseγli Geṭṭuc, teččur icciwi-is, Geṭṭuc yettwali degs.

Tteryel teṭṭef abrid-is γer wexxam. Drus kan, Geṭṭuc yuzzel, yeṭṭef abrid-nniḍen, yezwar-itt.

Tteryel tewweḍ γer tebburt n texxamt n Geṭṭuc, tessawel-as: "Geṭṭuc, atan wwiγ-d tmer, eldi tabburt, a k-n-fkeγ drus".

Geṭṭuc yeḍsa, yenna-yas: " Ha..ha.., amek d kemmini ara a y-d-yefken tmer? Nekkini zwareγ-kem. D nekk i-m-d yesseγlin ibεyaen n tmer; nekkini lliγ sufel n tzanet, kkseγ-d kra yellan d aεeqqa yelhan, ččureγ-d taculliḍ, a taεeggunt".

Tteryel tkerrec ifassen-is g lγuc, tuzzel axxam-is. Ma Geṭṭuc netta yeṭertḍeq seg taḍsa.

Azekka-nni, tteryel tuγal γer Geṭṭuc, tessawel-as:
"Geṭṭuc, effeγ-d a nruḥ a d nawi 'lxuḍra' (tizzegzewt?) seg tebḥirt".
Geṭṭuc yerra-yas: "Awwah, nekkini ur tedduγ ara, sεiγ kra yellan. Ruḥ kan iman-im".

Ihi tteryel teṭṭef abrid-is γer tebḥirt. Drus kan yuzzel Geṭṭuc, yezwar-itt.
Geṭṭuc ikmasi itekkes-d kra d tizzegzewt (ibawen, tajilbant, taga d wayen-nniḍen). Drus kan yesla i lheffa n tteryel. Geṭṭuc yettergigi, yugad-itt, ur yufi dacu ara ad yexdem. Aswiḥt kan yeẓra yiwet n tbeqlult n texsayt d tameqrant. Geṭṭuc yeγza amdun deg-s, yeffer din. Ma d taculliḍ-ines iḍegger-itt γer yeγẓer.
Tteryel tkmasi ttekkes ula d nettat ayen i s-d yeğğa Geṭṭuc. Drus kan twala tacebbubt n Geṭṭuc teffeγ-d si tbeqlult n texsayt. Dγa truḥ tsellef-as, teqqar-as: "Geṭṭuc ma d Geṭṭuc? Geṭṭuc ma d Geṭṭuc! (xlifa xelq-llah: awal-a fiḥel, neγ dacu ara tiniḍ?)

Geṭṭuc yettergigi, yeṭṭef tanzarin-ines d uqemmuc-is s ifassen-is. Yugad a s-d yeffeγ kra unehhit a s-tsel tteryel.
Tteryel teččur icciwi-s s tzegzerwt, teṭṭef abrid-is γer wexxam. Nettat tteddu tcennu: "A Geṭṭuc awah a k-ṭṭfen ifassen-iw.."
Geṭṭuc iruja drus, ur yesli i kra. Dγa yerra inehhit, yeffeγ-d seg tbeqlulut-nni n texsayt. Yessuli-d taswalt-is seg yeγẓer, yeččur-tt s tzegzerwt, yuzzel γer texxamt-is am ifeṭṭiwej. Yezwar tteryel.

Tteryel tbed γef tebburt n Geṭṭuc, tessawel-as:

"Geṭṭuc, wa Geṭṭuc, atan wwiγ-d aṭas n tezzegzewt, ldi tabburt a k-n-fkeγ kra".

Geṭṭuc yerra-yas: "Amek? Ha..ha.. Nekkini zwareγ-kem, kkseγ-d akk ayen yelhan, ğğiγ-am-d ayen n diri. D nekki ig llan di tbeqlulut-nni n texsayt. D tacebbub-iw imi telliḍ tsselfeḍ. Fell-as itelliḍ tcennuḍ a taεeggunt".

Ihi tteryel irekkem wallaγ-is, tkerrec ifassen-is. Teğğilib, tessenččaw acebbub-is. Tuγal tkerrec iles-is. Fγen-d ikuffiten seg qemmuc-is, dγa temmut. Tenγa-tt lkeyya!

Geṭṭuc iruja, iruja a-s isel, ulac. Dγa yeṭṭal deg ceqqiqen n tebburt, yeẓra-tt teẓẓel zdat n tebburt n texxamt-is. Gettuc yeffeγ γur-s, yufa-tt d tidet temmut.

Geṭṭuc yezdeγ axxam n tteryen. D ameqran, yernu deg-s yella kra yellan iyuḥwaj Geṭṭuc i tmeddurt-is.


Yuznitt-id Akli Azwaw


Tamacahut-a tettwassen di tmurt-nneγ.
Temla-tt-id yemma tikkelt taneggarut
aggur n Furar 2001 di Frankfurt am Main/Lalman







**** Akli KEBAILI amek yers di lekwaγeḍ yura daγen sin yedlisen: Lkuraǧ n tyaziṭ , Imeṭṭi n bab idurar.
Deg wussan id itteddun ad nawi tadiwennit tamecṭuḥt yides .
A.R