Iruḥ ar tnezruft(sseḥra) ittnadi. Armi iwweḍ ar yiwen umdiq yufa taεwint n waman. Ar tama-s illa uγanim, tara n tzurin tuli γef uγanim nni. Aγanim nni d-azura, tara nni deg-s sin naγ kraḍ(3) iguza n tzurin. Iqqim itett tizurin. Azuḥ akka iffud, ikker ad-isew, igumma. Iger izuran deg tmurt, ur izmir ara ad-ikker. Izzel afus-is, imecceḥ aman deg dudan-is. Yal tikkelt ma ad-imceḥ cwit waman, ittensar-d cwiṭ armi issaweḍ ad-igr urawen-is, iččur-iten-d d-aman, dγa inser-d akk. Ikker, inna-yas: “ah, s wa swayes a-d-rreγ ayla-w.»
Netta iγil tara nni tzurin akk d uγanim nni myin-d kan akka imanen nsen. Netta, d-agellid nni azeggaγ i-s-ten-id-isekkren dinna akken a-d-isellek iγawsiwin nni i-s-ifka.
Ikker imir igzem-d aγanim nni, iččur-d krad(3) ijeεbuben d-aman, irra-yasen tidima. Ikks-d tizurin nni yuqm-itent deg tqelmunt is irḥ-d.
Imi iwweḍ ar Tunes, yufa iserdasen nni εussen γef tewwura. Inna-yasen: “agt-iyi abrid ar yelli-s n ugellid, gliγ-as-d s terzeft.”
Nnan-as: “ur nezmir ara armi ncawr-itt-id”. Uznen-as yiwen seg-sen. Imi iwweḍ ar γur-s inna-yas:»ataya yiwen ar tewwurt, inna-yaγ-d iwwi-d tarzeft i illi-s n ugellid. Tura ini-aγ-d ma illa a-t-neğğ a-d-ikcem naγ uhu .» Tenna-yas illi-s n ugellid n Tunes : « anwa wa ? » Inna-yas userdas nni : « netta inna-yaγ-d akka, ur-aγ-d-ifkk ara ism-is.» Tenna yas illi-s n ugellid: “uγal ihi ar γur-s a-k-d-ifkk ism-is.» Yuγal userdas nni ar γur-s innna-yas:»ism-ik ? A la k teqqar fkk-ed ism-ik” Inna-yas mmi-s uderrab: “ d nekk, d Bezza mmi-s n ugellid.” Yuγal userdas nni ar illi-s n ugellid, inna-yas:» A m iqaṛ ism-is Bezza mmi-s ugellid. » Tenna-yas: “ anef-t-as a-d-ikcem !”. Yuγal userdas nni ar imdukal-is, inna-yasen: «a-wen-teqaṛ anfewt-as a-d-ikcem. » Dγa uqmen-as abrid.
Ikcem yufa-tt deg uxxam n tucfa, ssirident-as taklatin-is aqerru-is. Inna-yas:”aqli wwiγ-am-d tarzeft ma texseḍ a-tt-tetfed. » Nettat teqim tettett tizurin nni, netta iruḥ ittnadi. Nettat imi tečča kra n tzurin, kkren-as izuran ntan deg tqaεett. Ffγent-d taklatin ttrun-t, nnan-a i ugellid:» a Mas nneγ illi-ik kkren-as izuran ntan deg tmurt, ur tezmir-ara ad-tekker. “
Iruḥ ar γur-s baba-s. Imi i t d zra tenna-yas: « a baba aqli wehleγ ur zmireγ ara ad-kkreγ.» Indeh i iserdasen-is. Wten wten a-tt-id-snesren, ulac. Iffeγ ugellid indeh i imezdaγ n Tunes akken ma llan a-d-myagren ar ugwni n teγremt n Tunes. Inna yasen: “attan illi tewhel ur tezmir ad-tekker. Win issawḍen a-tt-id-ikkes, a-s-tt-fkkeγ a-tt-yaγ; Yernu a-s-rnuγ akk ayen ibγa d idrimen.»