I

hi  zun akken daγen, tikkelt nniḍen...ass n umulli-ines mazal lexrif ; εeddaγ lliγ-d tasraft nni umi yerra wakud tadimt, yesberber fellas acḥal d aseggas armi tt-yettu zzman acku  lall-is yenneḍ yixf-is, tenneḍ tudert-is, akken yenneḍ ula d abrid ar γers.
                  

Neffeγ si tesraft, nettu din tisura am di tmucuha n Cahrazad neγ n Pinilup nni ifessin trennu ayen i ttzeṭṭ seg uzizwu, teqqim-d tdukkli d wesnulfu.                 Tasraft teccur tfal; yal atiṭuc yergel. Ayen ur giγ degs fellas bniγ d netta i t-yerran din; ayen ufiγ degs zriγ din yella...ur yelli wayen ttuγ, mazal yettillif-d wawal yuran. I lliγ-tt-id si zik? Aaahbuh, imir laẓ tineggaẓ, lhif n tuγmas; ur gint tid n wenyir ad nelli ul neγ tidmi, llan waḍan ur nettawi ara ar tafrara...armi uγaleγ malleγ-tt.  
Assmi bdiγ la ttacareγ yal axjiḍ ur zriγ ara annect nni n ṣṣaba ara tawi armi d ass mi s giγ tadimt. Acu ziγakken ad tt-kecmeγ nnan-ak "ilaq wesfel a tukyist d asfel aberkan mulac sekra yellan din ad t-yerfed waḍu amzun ur yelli d ayla-m. Am daεwessu...."  Ecc akin a Bururu.

         Ttwaliγ iman-iw ssikrireγ am tweṭṭuft, aseḍsu anecraḥ d ubuddu; yal ass s tmegra-s, yal tagnitt s warwa-s. Ufiγ ajeǧǧig nni awraγ n tefsut n weqbayli neγ amek akkenni d-yesmektan tablabalt n yiseggasen  n tmanyin 80 neγ ahat  iγilifen  d icenga nni n  tesεin90, ur yelli wi ten-yuran deg uttafttar, ufiγ dinna tiẓedt tger aḥarab i wussan xas yessenfa rrebrab  ; ufiγ-tt ger yiṣerdan n tira, deg tsekla, yuli-tt uγebbar. Inna -as winna "ruheγ ad tt-zwiγ tenna : "d aγebbar ar wallen" ad s-yeεfu i ubudali .
Acimi,  ayen yebrek fellas ufalku ; Bururu macci d win yessawalen i umxix, d win deg ufiγ yenna : kullec atan da, ddem smenyif kra yellan ur qqar lhemdu, ma yehwa-am ttu!            

Assa ssaγeγ tafat di tesraft kecmeγ-tt macci d tasarutt i tt-yellin,  d aselkim ur nεeyyu yeqqaren susem ad naru..ufiγ degs awal yefsan, am winna n bururu.
 

      Yuli-d ukeffa n lebḥer am uẓarif af udeddic, ger tewriqin timellalin, yesskew kra yellan d awal.     Zun akken ur cfiγ ara, mmmhh,  tidmi tamcumt teggul ur teḥnit, teggul s ccib n wussan

Nacira ABROUS, Aix-en-Provence 2012

Azul,
Aqla-kwem-id a wletma, tkecmeḍ di tiṭ uhicur, ur zmireγ ara kwem-in ḍefṛeγ. Nek zurreγ yerna ẓẓayeγ !
Wamag kwem, tesneḍ a-t-ilqiqeḍ, a-t-itlwiγeḍ, tesneḍ i whicuṛ tikli. Tesneḍ, tebwḍeḍ tasraft-im, teẓriḍ ayen yellan degs, ayen terriḍ degs. Yerna waqil, taεniḍ-d tasraf nneγ akk.
Ihi ḥṣu a taεarḍit (sεiγ aqlal f awal agi d urriḍ ar tazwara, ugar bwin n tukyist), tesεiḍ lḥeq, teqqim-ed kan tdukkli akk t-tmusni, ayen nniḍen, as yaεfu ubudali (akken tenniḍ) : d astewtew nnig lkanun.
Wagi d awal-iw, ZUN AKKEN, fehmeγ-d cwiṭ d ggayen d urriḍ.
Hakim.

azul fell-am a nacera,
aḍris-im yeshel i tγuri, i3ebba ayen din d lem3ani ,nek ur ttqeṭibegh ara taqbaylit akken iwata maca riγ ad fehmeγ yal awal id seddad deg umagrad-agi inem.
tamezwarut n tmezwura icebba-yi Rebbi lemmer id turid : ldiγ axir n lliγ iwakken a nsemgired gar umeyyag n " ldi " akw d " ili ", awal-agi " waḍen an " anamek-is weyyaḍ ???
tin γres ur fhimegh ara anamek n wawalen-agi :
warwa-s, tablabalt,aḥarab,yiṣerdan.
tanemmirt-im i kem akw d win negh d tin ara a yi-d-yesfehmen awalen agi.

Azul a Mass Kamal,
Tanmirt imi tgid azal i wedris uriγ

Awal lli : d wagi kan i d amkan is abeεda imi yella "D" n tnilla, iban kan d alday i d anamek ines.macci d tilin.
warwa-s, Arwa , arwa n yirden deg wannar n warwa akken ad ikkec yeclem.
tablabalt: Abeḥri aẓidan deg unebdu : "la brise" s tefransist
aḥarab : iger aharab=couvrir avec un tissu (le sens = s'approprier quelque chose)
yiṣerdan neγ ijerriden . s tefransist " rayures". acu kan ijerriden zemren ad ilin macci d iserdan, ruḥen deg idis neγ zelgen
Ar tufat a gma

tanemmirt-im s tussda i kem daγen a nacira imi iyi-d terrid γef isteqsiyen-inu,tesfehmed iyi-d awalen-nni akken iwulem tanemmirt-im, maca taluf-nni n umeyyag n " lliγ-d " ur yi-teččur ara tiṭṭ imi γas ma tella tzelγa n tnila tezmer ad tes3u anmek n "i ili " ,amedya : γef lxemsa n sbeḥ lliγ-d dagi.
kem ur teγlid-ed ara imi ameyyag-agi n " lliγ " s unamek n " ldiγ " yella , il est attesté , maca wissen ma yezmer yiwen ad yaru akken ttmeslayen wid yessexdamen " y " deg webdil n " l " : ḥemyeγ timeyyayin tibuybuyin γef tabya ta3yayant ??? .

Azul,

Timenna agi " ger aḥarab" sneγ-t s unamek nniḍen. Neqqaṛ " igger aḥarab" ( défier, braver) i wussan ! igger aḥarab i twaγit ( provoquer)( deg usefru n Lwennas M.) ahat d ayen nniḍen, wellah ma ẓriγ....