Ferhat
19 di yunyu 2004, 19 di yunyu 2006…sin iseggasen i yezrin γef tmettant rẓagen yeglan s Umeẓian Mhenni.
Iḍelli, usan-d yeqbayliyen si yal tama di Fṛansa i wakken as-gen tajmilt deg umekkan i deg yeγli: (100 boulevard Clichy, Paris)…Rzan-d d irgazen, d lxalat wa s imeslayen ijerrḥen tasa, ta s ujeğğig…Akka ahat tawacult n Umeẓyan ur s-teqqar leqbayel ttun tadyant ur nelli d ttin i nezmer a nernu γer tedyanin n yal ass.
I wesmekti, Ameẓyan yettwakkes i yimawlan-is γef kraḍan (30) iseggassen. Yella d win s-yettaken afus i baba-s deg wayen iqeddec γef timanit n tmurt n Iqbayliyen. D netta uγur taɛziz aṭas tezlitt n Bella Ciao*, ass-a d imawlan-is i s-tt-yecnan s teqbaylit.
Aṭas n inaẓuren d wudmawen yettwasnen i d-yusan γer temlilit, garasen: Oulahlou, Ali Ideflawen, Ali Amran, Nora At Brahem, Yasmina, Nadia Matub d waṭas n yemdebṛen n tdukliwin tidelsanin di Fṛansa.
Ger wid d-yemmeslayen, ayen d-yenna Zahir, deg tebratt iwumi ysemma: “Ciao Bello” yeččur d lmaɛna, yesseγli-d imeṭṭawen i yal yiwen deg-neγ. Γer taggara n wawal, Zahir yenna i umddakel-is: “Ssuref-iyi ay Ameẓyan, ur d-nniγ ula d yiwen n wawal γef yemma-k d jida-k, ahat tfehmeḍ-iyi, meslayeγ-d kan γef baba-k i wakken imetti-w ur yettili d aderγal !”
Nora At Brahem, terfed s yiwen n ucewwiq i cerrgen tasa n kra n win s-yeslan. Timlilit teččur d imetti d leḥzen. Maca ulamek ala? Ula d imsebriden d iḥewwasen, ḥebsen i wakken ad walin d acu yellan.
Ma d Ferḥat Mhenni, yeγra-d tabratt i s-yura i wselway n tmurt n Fṛansa Mas Jacques Chirac. Deg-s, yessuter acimi annect-a n tsusmi γef tedyant yecban tagi? Acimi, iγmisen n Fṛansa s tazla i d-ura d akken tamettant n Umeẓyan ur yelli degs wayen icudden γer tsertit? Acimi d-nnan Ameẓyan yettwanγa mi d-yeffeγ seg yiwet n diskutik?!…isalli-agi, Ferḥat yenna-d deg-s : “Ala d tikerkas!”.
Ferḥat yessuter i wakken tadyant n Umeẓyan ur tt-rennun γer tin n André Mecili, abugatu aqbayli yettwanγan deg useggas n 1987 di tmurt n Fṛansa. Ula d netta yella d win yugin aγuṛṛu n udabu azzayri.
Akka ara γellin yergazen u nekni a neqqar: d menwala i ten-yenγan! Wa d ṭṭejra id-yeghlin fella-s, wa deg diskutik i yennuγ s lmus…Ihi ass-a tamurt n iqbayliyen tugi tasusmi, acku ma nessusem nɛemmed i wayen iḍerrun!
I wesmekti, i wid yellan di tmurt n leqbayel, Ass n 22 di yunyu id-iteddun a d-ili tejmilt deg taddart n Maraγna anda yemḍel Umeẓyan γer tama n jeddi-s yγlin ula d netta d asfel γef tmurt nneγ.
*Bella Ciao d tizlitt taγeṛfant cennun yemsebblen n Ṭṭelyan deg ṭṭrad agreγlan wis sin. Tettwasuqel γer waṭas n tutlayin. D ttizlitt iḥemmel Umeẓyan Mhenni. Ngum ad yemmet yessuter deg baba-s a tt-yecnu s Teqbaylit.
Tajmilt i wucbiḥ"Ciao bello – Tiselgin ay ucbiḥ" d asefru deg yerra umedyaz Essaid At Maamar tajmilt igerrzen i Umeẓyan d umennuγ n baba-s akk d win nneγ irkelli. Asefru teḍfer-it s deffir tmuzigt Bella Ciao yura Mauro Zuccante i wuṛkistr akk d terbaɛt icennayen n Istitutioni Harmoniche di Verona.
Selt-as i usefru da: Ciao Bello - Tiselgin ay ucbiḥ
Newara, si Lpari i imyura.com