 | | |  |
 |  |  | |
|
|
|
Ttxil-m a taqbaylit, nṭeq!
Ttxil-m a taqbaylit, nṭeq!
Lεinser γas ma yeqqur
Ar ass-a γur-neγ d lεinser
Lemmer yettmeslay wemqerqur
Γef tala wissen d acu a d-yehder
Yakk a tiniri lbabur
Deg-m ur nzemmer ad t-nenher
Maca, ameslay γas d aqbur
Ma ifaz ad yedder yeḍher
Ufiγ-d afrux yesselqaf
La jebbden deg-s at laxert
Dγa ḍeggreγ-as alqaf
Tekkes tuγmest n ṭṭmeε tmeqbert
Alqaf d asefru ad t-id-naf
Yeffer deg ukufi am tazart
Nadit tura a medden alqaf
A wid t-yeqqnen s temrart
Werεad d-nuki zik-nni
Mi d-tlul-d deg-neγ teftilt
Γas ur nelli d igenni
Nezga-d s yetran di tiγilt
Nmekken tafat i wat yiḍ
Nekkes-asen daγen asemmiḍ
Neslal-asen-d asirem
Ass-a ula d ayen ur t-newwiḍ
Wissen ma ccah neγ nettγiḍ
Ameyyez atan yeffer udem
Ay ameyyez yesleb uḥulfu
Ur neẓri anwa i yettγaḍen
Anwa i s-yennan a d-nesnulfu
Itran iberkanen isemmaḍen
Wid yettrun yeddem-aγ yeγzer
Bubben yes-neγ Ledzayer
Yeqqel bu ṣṣwab d aεeggun
Ttcetkin s teqreḥ n lεesker
Tidet tban γas ma ur tt-nẓer
Nutni d ayen i yettargun
Itran n yiḍelli xsin
Wid n wass-a d war tafat
Ay at umejjay d Lḥusin
Daγen kenwi ay at Ferḥat
Xemmlet i iγalen ay agdud
Γer tmeslayt d-ğğan lejdud
xemmemmet i wid a d-ilalen
Ma yessefk weftak n lqermud
Akken ad nẓer deg igenni dda Lmulud
itran-is a d-uγalen
Tecfam d netta i d aggur
Fell-as i d-zzin merra
S yes-s i yekkes wugur
Fell-as steqsit tira
Tameslayt lemmer a d-tenṭeq
Iẓri d isaffen ad yeṭṭerḍeq
Imeṭṭawen a d-inin, “ah ya”
Ah ya ddin qessam nṭeq
Ul d tikli ad ifelleq
Ttxil-m a tutlayt n Muḥya!!!
Sεid at Mεemmer Asabter yellan deffir wa | Asabter n zdat
S. A. M.
- Tinin-is...urti
- Tinin-is...D ayen id igellun s tumert ed usirem a Sεid...Tanemmirt-ik.
- Tinin-is...D ayen id igellun s tumert ed usirem a Sεid...Tanemmirt-ik.
- Tinin-is...azul, asefru-ya-inek a Sεid, lqayy unamek-is, d afelsafuy,
yessefk tikkelt ar tayeḍ, ad illin isefra isehlen i medden akk, am widak-nni n Awḥid Yussef, (a madame servi latay) am usefru-yagi-inu!
Ledzayer yeḥkem wemcum
s txidas yennum
yettkukru a d-teḍher tidet
lgaz di sseḥra iεum
yefka s yes-s aγrum
ma tilelli, yekkes-asen-tt
s tneslemt inehher-d lqum
γaf lassel a t-iγum
ula d ljennet rrnan kessben-tt
- Tinin-is...Azul fell-ak a dda Muḥ,
ssarameγ tgerrzem kečč yakk d twacult-ik!
Asefru-k s wazal-is, mačči am winna swayes d iyi-d-tesseḍṣeḍ, ma d lgaz d tikli ad ifuk tura :-)
Tanemmirt a dda Muḥ!
Sεid
- Tinin-is...azul a Sεid, ssarameγ tgerrzeḍ ula d kečč akk d twacult-ik?. Atan yebda-d usemmiḍ, yerra-yi-d ar uxxam, ad sseγtiγ cwiṭ tira-inu, s wayen d-tettarum deg wesmel n imyura d tamurt.info,
- Tinin-is...Negerrez a dda Muḥ, tanemmirt a gma εzizen! Tira-k d uraγ, ma d agulen tikkwal, yiwen uεekkaz i d aγ-yewwten.
Asemmiḍ aql-aγ di tmurt-is, maca, ḥman ifadden i tikli, γas akka idammen-nneγ εyan :-)
- Tinin-is...Azul
D asefru igerrzen, akka i tuɣeḍ tannumi tettakeḍ-aɣ-d tunṭicin, tanemmirt. Maca ur ilaq ara yiwen, akka tura ad yeqḍeε layas, llan yitran imecṭaḥ ha-ten deg yiɣerbazen, ttheggin iman-nsen ad d-kecmen s annar..
Yiwen wawal ɣef Dda Lmulud:
Aṭas i yugin i yiṭij
Ad d-yenqer tagut n ṣṣdad
dda Lmulud yezga am yirij
D yid-sen ur yeḥbis ttrad
Yekki (de)g uhudu n lweqt uεwij
S wawal yettnaɣ ur yugad.
Awal ɣef Mohia:
Yekki deg (u)sebded n tefsut
Ur yecliɛ deg warrazen
Izgaren-is kerrzen
D afellaḥ icergen tagut
Tamaziγt deg (yi)ɣerbazen
Mačči d win yelzen
Ibennu , ittheggi takurt
- Tinin-is...Aẓaṛ-nni d-aẓaṛ n tmusni
isga kan i leqṛun n wuḍan
Ticki d temlel i yernan tebrek
tudert-is ad tger imγan
Ixulaf di yal adeg...
ahaw san! :-)
- Tinin-is...azul a Sεid,
Niqal amek ihi! Ih ad neftek aqermud, ad nesmermud. Tanmirt i wawalen agi yettaken tabγest
- Tinin-is...Tanemmirt a nna Nacy! :-)
| |  |  |  | |
|