Taɣdemt (ccreɛ) d yemsulta n Wehran ḥernen ɣef tiddukla Numidya d uselway-ines!

I tikkelt-nniḍen, aselway n tiddukla tadelsant Numidya n Wehran, gma-tneɣ Sseɛd (Daɛi) Ẓamuc ad ibedd zdat n wexxam n teɣdemt n Wehran, ass n Wemhad (lexmis) 3  Nwamber 2011 ɣef 9 n tnezzakt (tṣebḥit).

Sseɛd Ẓamuc ɣer yidis n Lwennas Matub aseggas 1985.

 « Asgergeḍ, asxides d weskerkes (escroquerie,  déclaration mensongère et de faux et usage de faux.) » d tagi i d taluft i s-d-sbubben yemsulta seg 2003 ar ass-a!

Nnan wat zik-nni:

“ D acu i tteffẓeḍ akka, a wagi? - d llazuq n yilindi!”

Taluft s tewzel: Gma-tneɣ Sseɛd (Daɛi) s tɣara (ṣṣifa)-s d aselway n tiddukla Numidya, yesnubget (yeɛreḍ)-d kra n yemdanen ( d Iflamunen) si tmurt n Bilǧik akken ad kkin deg yiwet temlilit i niqal a d-teḍru deg Wehran, segmi ur d asen-d-fkin ara “lvizat” deg wakud iwulmen, timlilit tebṭel. Maca, adabu n tmurt n Dzayer (lanǧiri) yecbeḥ ɣer berra, mačči d winna akken i nessen nekkni!, mi d-yegra yiwen wass i temlilit i d-yettwabedren yakan, fkan “lvizat”i inebgawen, kecmen-d ɣer Dzayer acku Dzayer d yiwet akk, akka i ɣ-d-yeqqar  udabu. Inebgawen segmi slan tebṭel temlilit, rran ɣer tmurt n Leqbayel yellan imiren seddaw waldun (rrṣaṣ) iǧadarmiyen d yemsulta. Inebgawen mlalen d imawlan imeɣrasen (ccuhada) n tefsut taberkant yakk d iɛeggalen n leɛrac. Inebgawen  uɣalen ɣer tmurt-nsen acku adabu amesbaṭli d nekkni kan i wumi yezmer.  Seg yimir-nni ar tura, ar wissen ar melmi ara yekfu fell-aneɣ buberrak n taluft-agi?!

Si tama-nniḍen, deg yal armud (leqdic) ara teg tiddukla Numidya, kra seg iɛeggalen-ines ssezrayen (sɛeddayen) azgen n yiḍ deg wudusen (lkumiṣaryat) ilmend n kra tnazalin (affiches) ma sneṭḍen-tent, ɣas ma akk iɣraben (leḥyuḍ) n Wehran selɣen s tnazalin ikabaren, tiddukliwin, iceṭṭaḥen, icennayen…maca, anagar tinazalin (affiches)-nneɣ i d-yettbanen!

Akken i t-yenna ucennay Si muḥ:

“Ɣas aluḍ yewweḍ-aɣ-d s ammas

Alma iɣumm-aɣ  ara nettru,

Teẓram-aɣ nekseb tissas

 ur nuɣ ara tannumi ad neknu”

G.M: I wugar isalan ɣef taluft-a, atan wuṭṭun umafus n Sseɛd  Ẓamuc (Saad Zamouche): (213) 0770 41 13 63.

Ǧamal Benɛuf, seg Wehran.