I kečč kan


 

Taxatemt yes-k i tt-teqqen
Tmusni asmi tt-id-nexḍeb
Yes-k i nerfed asafu ireqqen
I tmuγli akken ad tt-nesseṛḍeb
Yes-k i jjin wulawen ifellqen
I d as-nenna i wemcic ṣṣeb
D kečč i d amdan ilaqen
Anef ad inin fell-ak nesleb



Nesleb fell-ak tesselbeḍ-aγ
D tiselbi γer tayri i icudden
S ccbaḥa n tẓuri-k tesslemdeḍ-aγ
Wid yebnan d wid ihudden
Γer ugemmaḍ tewwiḍ-aγ
I wallaγen tgiḍ ifadden
Amek ara n-tedden temliḍ-aγ
Slet-d i teqbaylit a medden

Nekk cfiγ γas meẓẓiyeγ
Mi d-tedda tmusni d tislit
Ččiγ tiẓeṭ ḍṣiγ ferḥeγ
S tidet tinna d tallit
Cfiγ ḥareγ ad imγureγ
Ziγ temẓi ad tezri am targit
D acu kan nerbeḥ-d uraγ
Nufa-t mi d-teγli tmeddit






Ass-a mi teğğel tmusni
Terna tugi ad aγ-teqbel
Terhen fell-ak dayenni
Tudert-is d wiyaḍ d aγbel
Yal ass mi d-nekker a s-nini
Ahat ad as-nehwu qabel
Ur gzimeγ asirem nekkini
Xerṣum d islifen ad aγ-t-qbel

Ad aγ-teqbel d islifen
Nessen-itt  γur-k d igerdan
Mi tt-id-tewwiḍ d isaffen
Swayes tecbeḥ tuffγa iberdan
Allaγen deg weclim ssafen
Ussan-nneγ ass-nni i yebdan
Iseggasen ad aγ-d-afen
Aql-aγ nuγal-d s iberdan






Aql-aγ deg webrid tura
Yes-s deg-s tajmilt a k-tt-nerr
Γas fell-aγ werεad tefra
Taqbaylit tḥerzeḍ ur t-negger
Tabbuct n Ḥlima n tala
Deg yimi-s yakan tger
Freḥ nuẓ acemma di tira
Ma gar-aneγ mazal nettemdeggar

Tira-k d tamuγli-k
Tamuγli-k d tayri
Tayri-nni d tafat
Swayes nwala deg iḍ

Γas allen-ik bernent dayenni
Ay azamul n tayri
Kečč d amdan daγen d tafat

Yes-k icceεceε igenni
Ay Itri
Arebbani ur nettmettat


Eṭṭeṣ tura di talwit
Deg wass/iḍ-agi iwalan
s mummu n tiṭ-ik