Ccaw n tegrawla…

Ilibiyen

Yura umezruy s yidammen
N tarwa ɛzizen
Akken lbaṭel ad yeɣli

Yuli-d wass ɣef Yimaziɣen
Bedden-d am yiwen
Ad idiren deg tlelli

Acengu-nni yezɣezɣen
Ur yeswi ziɣen
Ha-t, fell-as tuɣal tili.


Leɛqab n tegrawla…

Taggara

Dayen yemmzel yikerri
Ur d-yewwiḍ lɛid
Tecfam cengen aḥuli
Deg tlemmast n lɛid
Tarwa telluẓ tilelli
Teṭallay-d kan mebɛid
Tura iṭij mi d-yuli
Ad idiren ass ajdid
Yelha uɛiwed n tmuɣli
Ma yettarra-aɣ-d uḥdid.

===============================

Flan

Deggret-t ɣer tesga n umezruy
Dinna kan i d amkan-is
Agdud ur s-d-iṣaḥ ubruy
N tlelli iɣef yečča iri-s
Rran-k d tasarut n uledduy
Yal yiwen yewweḍ ɣer lebɣi-s
A flan ufan-k d ssebba
Yal ass ɣur-sen d tamaɣra
Ččan tamurt summen idammen-is

Flan ibedd ɣef lektubat
Tidet temḍel d yimeɣrasen
Aṭas i d-ufan n ssebbat
D nutni kan i d irgazen
Nteddu ɣer deffir mačči ɣer sdat
Nectaq ad necbu wi ɣ-yifen
Ma d ɣur-sen kullec yelha
Lezzayer tif akk timura
Nettat meskint trekkeḍ deg-sen

A flan neɛya deg-k aṭas
Tugareḍ amɣar awessur
Lḥif yewweḍ-aɣ-d ɣer wammas
Kečč tifuhrit-ik tettuzur
Tɛeddaḍ aṭas i tilas
Acḥal i tewwiḍ d amur
Tawant ɣur-k ur d-testeqsa
Teččiḍ, ttetteḍ ar ass-a
Tibḥirt, terrid-tt d amermur


FLaN mačči d win n tegrawla
Yedduklen mgal acengu
Seg tmurt yessufeɣ Fransa
Yewwet-d lferḥ d abandu
FLaN ḥewṣen-t Wat n Wejda
Sserẓgen-t nnig n qlilu
Yezzeɣzeɣ, yenfa, yenɣa
Yecnef-aɣ akk tawenza
Agdud iɛebba azaglu

Taggara-k d asalay kan
M(a) ur k-yewwi waḍu n tefsut
Ad s-qqaren : « Necfa-d i FLaN,
Win akken yexlan tamurt »
Tudert n ugdud deg laman
Ma d kečč dayen, kullec ifut
Azzayri ad d-yerr nnehta
Ad s-yini : « Dayen tefra ! »
Fell-as ur tettuɣal tewwurt.

Malek HOUD