Eğğemt abrid a tilawin!

Tikkwal qqareγ-as nesreεruε
Ay annect d as-nessen i uzemmer
Nesferfud i tidet abruε
Maca, εeddi ad as-ncemmer
Ahat aḍu d bu ubessuε
A d-yezzuḥtelli s ddemmar
Imiren yal uccen ad ikuεε
Aseglef i irebbi n tγemmar

Dayen ur d-ngerri d iqjan
D imdanen ara nuγal merra
A d-naki ifeddixen jjan
Teqreḥ ad tt-tettu tmeγra
Tamuγli s kra s-d-yefjan
Ad yerr lγemm i wudem tmara
D tafat i d amejjan
A d-teffeγ seg uγerbaz n "TIRA"






Aγerbaz n "TIRA" n tira
Mačči d wagi n "ḌṚEG BECC"
Ad yekfu lawan n tura
Ur d-igerri wesxerbubec
Ad aγ-ttqadarent tmura
S wallaγen ad tent-n-nebbec
Ahaw ihi atan neẓra
Tegzam tura a Leqbellec

Mi ara γreγ ayen ttarun kra
Ay anyir a win k-iγeẓẓan
Qqareγ-as ahat mi t-yura
Imiren ḥeṛṣen-t-id yiẓẓan
Amek ad aγ-qadrent tmura
Fell-aγ mi ara tezzin yizan
Yya-w a d-nakit tura
Tidet ad as-neṭṭef lmizan

Nurğa ad aγ-d-awin aεwin
Nessawal-asen  imedyazen
S ugernin ayen d aγ-d-ttawin
Yerna deg yiles teffẓen
Eğğemt abrid a tilawin
Atan jban-d yergazen
Wigi ssaḍanen ur ttlawin
D at iqerra yelluẓen

Tutlayt mačči d askerfes
Tayri-s d tamsalt ugama
Acimi zelmeḍ yeffes
Acuγer akk annect-a a gma
Tγileḍ win ur tt-neεfes
Aqerru-s s igenni yegma
Qqim tura aha ger-d nnefs
Ad ak-d-ssegzuγ acemma



Aseqdec-is s userwet
Ulac asefsed sennig-s
Win d-yusan s rrkel ad tt-yewwet
Yettγil s aqeεεed i d-yebges
Teqqel amzun mačči yiwet
Mi ara tessakadeḍ deg-s
A wid d as-yessnen rewlet
Ixemmel i iγallen bu usegres

Qadret daγen taẓuri yes-s
Eğğet-as aεeqqa n lemleḥ
Ma ulac tirgit ad texsi ad tens
A d-yeγli yiḍ azekka ṣṣbeḥ
Mačči d taqabact yiles
Γef wulac taγect tebbeḥbeḥ
Ḥulfut am tnekra n tmess
Taffa-s tugar lmeṣbeḥ

Lewnis lemmer ad t-steqsiḍ
Neγ rzu γef isefra-ines
Aql-aγ ur nezzi ur nenniḍ
Leqjer-is nedla γur-s
Ur d iyi-yeqriḥ usemmiḍ
Ḥemmleγ ad waliγ times
Gzu tura ma tebγid
A gma uqem azal i yiles

Sεid At Mεemmer