Aseggas yezrin tlul-d terbaεt "Tajmilt i Muḥya" di facebook, derrzen-as tameγra iwumi semman „Taskelmuḥyet“ ass n 01.11.2010, azemz n tlalit n Muḥya ilmend n wesmekti wis-60 n tlalit unaẓur-agi ameqqran n tmurt n Yeqbayliyen.
Tameγra tella-d zdat wanida yella yesεa taḥanut tikkelt tamezwarut mi yunag γer Lpari.
Usan-d ger 70 alamma d 100 yemdanen, ssawlen-d kra n tukkisin seg wayen d-yesker Muḥya ama seg umezgun neγ seg isefra, llan widak d-yessawlen isefra-nsen swayes d as-rran tajmilt i unaẓur, am wakken cnan daγen s umata tizlit
"Ah ya ddin qessam" yecna Σli Ideflawen s imeslayen yura win iγef d-yella wawal.
Ceεlent tcemmaεin, rsen ijeğğigen, ḍṣan wudamen, ffγen-d imeṭṭawen, ldin wulawen γef Muḥya, s Muḥya d teqbaylit-is.

Tezri teskelmuḥyet akken iwata lḥal seddaw tecḍaṭ d leεnaya imeslayen-agi:
"Muḥya d taqbaylit, taqbaylit d Muḥya."

Tasekelmuḥyet-agi m yisem d-yuγen aẓar si Muḥya yakk d tsekla, mačči kan yiwen yeswi i tesεa tlalit-is. Kra deg-sen d wigi:

- Ass n tdukli ger Yeqbayliyen.
- Ass n tutlayt-nneγ tayemmat(taqbaylit)

Ayagi nenna-d fell-as yakan, lemmer d lebγi seg useggas-a

d afella, mačči kan di Lpari ara d-yili uderrez n teskelmuḥyet, maca, deg umaḍal merra, ladγa di tmurt n Yeqbayliyen.
 
- Anida-ken a  widak la yettnaγen γef izerfan tmurt n Yeqbayliyen yakk d teqbaylit di tekti am tagi?
- Acuγer tewwtem nneḥ fell-as?
- Mačči d tikti-nwen?

D tidet, daγen tagi mačči d tasertit, maca, d taqbaylit yerna d wagi i d iswi-nneγ, d wagi i d asirem n tmurt n Yeqbayliyen.
 
Taskelmuḥyet-agi tlul-d akken ad tili d tajmilt i Muḥya, i wayen d-yesker d wayen yessaram.

Yessefk ad yili d ass swayes ara d-ttlalen isenfar ara irefden tameslayt yakk d tsekla taqbaylit s igenni.

Atah wayen d-uriγ aseggas yezrin ngum(uqbel) aderrez taskelmuḥyet:
 
"Taskelmuḥyet

Taskelmuḥyet d awal d-yuγen aẓar seg tsekla yakk d Muḥya.
Am wakken neẓra yakk, ass n 01.11.2010 d amulli wis-sḍisan(60) n ugellid n tsekla taqbaylit.
 
Ilmend umulli-s-agi, thegga-d terbaεt "Tajmilt i Muḥya" timlilit taseklant neγ tadelsant swayes ara s-tuγal tejmilt ass-nni di Lpari tis-snat.

Timlilt-agi d tinna ideg ara d-γren am netta(à la Muḥya) yerna s leεyaḍ yemdanen ara d-tesddukel tayri n Muḥya d tin n tutlayt-is(taqbaylit) kra n tukkisin seg wayen d-yesker, deg wezniq anida yella yesεa taḥanut yiwet n tallit, asmi yella d amuddur.
 
Mi ara tekfu tγuri, a d-mlilen akk, ad cnun tizlatin yettwazegren s imeslayen yura ufus-is, ad ssiγen ticemmaεin, ad ssersen ijeğğigen d isebtaren ideg d as-d-uran kra i win d as-d-yerran iman(rruḥ) i tgujilt-tameεlalt-tamuḍint(taqbaylit) d-yessaweḍ wakud ideg nella ass-a, akken ad nerfeḍ ssenğaq-is nekni, a d-afen widak ara d-ilalen iles ara d-ssenεaten mi ara teldin imawen-nsen, s werfad uqerru.

Llant kra n tekta, yezmer wemdan ad tent-id-yini war akukru, acku d ayen yelhan kan i d iswi-nsent:

1)- Ma yella wamek, akka d afella, ad yuγal wass n teskelmuḥyet(01.11), d ass n tmeγra n yeqbayliyen.
 
Acuγer ayagi?
 
Acku Muḥya n yeqbayliyen merra, iqbayliyen akk n Muḥya.

S yes-s i nezmer a n-dduklet, s yes-s ara ttwajemεen ibawen yebḍan γef lluḥ, ad ṭṭfen adeg d asen-iwulmen.

S Muḥya ara teεqel Faḍma argaz-is.
 
Muḥya d azamul n tayri, n tẓuri, n teqbaylit, n tegzi d wayen akk-nniḍen yelhan di ddunit.

2)- Ma yella yeffeγ wayagi γef yeqbayliyen, anida ran ilin deg umaḍal, ad yili umeslay-nsen xerṣum gar-asen ass-nni siwa s teqbaylit, ihi taskelmuḥyet-agi, d ass n teqbaylit daγen.
 
3)- Iwakken ur yettγimi ara, d yiwen wass-agi deg useggas kan ideg ara nettmeslay s teqbaylit, acku wagi mačči d iswi n Muḥya, ad ttemserbaḥen Yeqbayliyen ass-nni gar-asen, ad ttemyuttaken tunṭicin.

Tunṭicin-nni d ayen yeqqnen γer tutlayt d tsekla taqbaylit(idlisen, isidiyen...atg.) kan.
Ulayγer ma nniγ-awen-d akk acimi, ẓriγ-neẓra-teẓram-ẓran.

Ulawen n at terbaεt Tajmilt i Muḥya cerhen nezzeh s yal win neγ tin(rradyuwat, ismal, isebtaren n facebook d wayen akk-nniḍen) d-yefkan afus akken zemren s asufeγ isali n temlilt-agi. la d awen-qqaren: TANEMMIRT YEMMDEN!

Atan rsen-d deg usebter "Tajmilt i Muḥya" di facebook isefra n Muḥya, nezmer a d-nessufeγ seg-sen asefru, sin neγ ugar, tukkist ma ulac akk, akken ur nettili ara ass-nni s ifassen d ilmawen di temlilit-agi.

Ssmana-yagi a d-nernu daγen kra n tukkisin si kra n wayen d-yesker deg umezgun.

Nessaram widak d tidak akk ara d-yasen ass-nni, ad derrzen yid-neγ taskelmuḥyet tamezwarut s tegmat, tayri yakkd tegzi.
Ass-nni a d-nessiwel kra seg wayen d-yesker Muḥya neγ ahat ayen d-ssekren wiyaḍ fell-as, d ass n tsekla.

Ur yessefk ara ad tt-rren wiyaḍ am wakken nennum d taḥanut-nsen, ad ttberriḥen amek ssnen Muḥya d wamek t-in-ufan di lqahwa n 3 ème, ayen d asen-d-yenna d wayen d as-nnan.
 
Tigi zemren yemdanen ad tent-myeḥkun gar-asen mi ara ruḥen ad swen lqahwa.

Muḥya ur iḥemmel ara Imuḥenden yettaγen zznuzun.

Imeslayen-agi ad ten-id-rnuγ:

S Muḥya zemren yeqbayliyen ad mlilen, ad myeḥmalen, ad derrzen tameγra n wayen i ten-yesdduklen ama d ineselmen, d imasiḥiyen, d udayen, d wiyaḍ neγ wid ijehlen akka am nekk.
Ma nerna-d ticucay tibaskiyin γef iqerray-nneγ ass-nni, asekkur timellalin.
Ssya s ass-nni nessaram-awen ussan n tseklmuḥyet igerrzen.
Muḥya d taqbaylit, taqbaylit d Muḥya."
 

 

Tamawt: Tanemmirt i watmaten d tyessetmatin n Lpari yakk d widak d tidak ara iderrzen yid-sen taskelmuḥyet useggas-a!