 | | |  |
 |  |  | |
|
|
|
Sgunfu deg talwit a Nour Ould Amaradeg weḍris i d-uriγ dagi ulac isalen amek yemmut, ulac isalen γef ayen yexdem, d aḍris kan n imeṭṭawen, d aḍris n teqreḥ, d aḍris n udeddic...  Ttruγ-k ttruγ-k ttruγ-k akken ur ten-ruγ ara aṭas-aya Kra yellan d tikti taberkant tεedda-d deg uqerru. Deg uqerru, γur-k azref, mači deg "uqeṛṛu". Tesseγtiḍ-iyi-d yerna uγeγ-ak awal seg imir-nni; kečč a yi-d-tiniḍ: "tuγeḍ awal i yilugan n tira." Ttruγ-k acku ur fuṛseγ ara tagnit a k-issineγ ugar, a k-steqsiγ ugar, a d-aruγ fell-ak d wayen txeddmeḍ. Ttruγ acku nniγ-as iwumi-t wesmel n tira ma yella werğin nerra-d awal γef ayen ixeddem wemdan am kečč i tmeslayt-nneγ; γas yal yiwen amek i s-isemma, wa d taqbaylit, wa d tamaziγt, wa d tazwawt, nettat d yiwet. Ttruγ-k acku tefkiḍ-iyi tagnit ad mmeslayeγ yid-k, maca swezleγ ameslay, ur γizeγ ara yid-k awal.
Tenniḍ-d "ih" ad tiliḍ d inebgi di ṛṛaddyu n internet, maca yekks-ak-tt cwiṭ wakud tazwara, ar deqal ur k-d-εawdeγ ara, s akkin neḥbes tadwilt acku nuggad nxuṣṣ allalen d wakud i s-iwatan i usentel n tedwilt. Kečč twejdeḍ skud d ayen yurzen tamaziγt, tameslayt-nneγ, tutlayt-nneγ...ttruγ-k acku nniγ-as ur nuklal ara ahat imdanen am kečč. Ttruγ-k acku aṭas i yellan am Nour Ould Amara, ur sen-nefki ara azal uklalen. Imi k-nniγ: "ahat terfiḍ, ma tγileḍ d aqamer i k-id-qumreγ γef ilugan n tira, tenniḍ-iyi-d: "Ur yelli d acu i yi-yesserfan! Yelha usmekti gar-aneγ n yilugan n tira! S tmendit meqqren I ttmeslayeγ yid-k, rnu mazal lxir !" Awal n tiẓeṭ d-yekkan seg ul yeqqaz deg ul ugar n wawal qerriḥen. Teqreḥ, ma tewqa teqres, ad tessuzreḍ aglim-ik, ad tesγareḍ tasa-k, maca tizeṭ, ad teqqim tegguni deg tesga almi d ass deg a d-taki, a k-tessettru, a k-tessendem, a k-teqreḥ... Imi i sliγ γef tmettant-ik ur umineγ ara. Nekk γileγ mazal lxir, anamek-is, mazal ad mmeslayeγ yid-k, anamek-is ad yili wakud deg a d-lemdeγ ugar sγur-k. Ad yili wakud ad yuklal γas cwiṭ wesmel n imyura.net isem-is asmel n tira, asmel n tsekla, netta a ziγ akud ur yettraju ara. Imi i sliγ γef tmettant-ik, xemmeγ ad kkseγ asmel n imyura.net ma γas mači inu, a t-kkseγ acku zemreγ a t-kkseγ, γas ad rfun wid yellan yid-i deg-s ad εemmdeγ. Ar deqqal ahat xemmeγ γef awal d-tenniḍ: "tamaziγt tamaziγt tamaziγt ay imdukkal" Taγawsa taneggarut ar wacu txemmeḍ d tamaziγt, d iman, d ayen i d-yettγaman ticki iṛuḥ kra yellan. Gziγ azal deg tmeslayt-nneγ i yella, yes-s a nidir, mači s yemdanen, mači s tesnakta, s tmeslayt-nneγ, s tutlayt-nneγ. War nettat, dayen ur nettili ara. Mači kan d tamaziγt ur nettili ara. Nekkni a nḍiε, a nriε, a nili d aḍu, d iclem. Iman n weγref d tutlayt. Iziγer n weγref d tutlayt-is. Ma yekks yiwen iziγer n weγref, iwumi-tt tfekka. Ad tuγal am yeclem ad tt-yettawi waḍu akka d wakka. Yenna-yas uneγmas-nni n tiliẓri n Fransa deg useggas 1980, azekkuya n tedyanin n yebrir "...donc c'est une histoire de langage". Ih a winnat d tutlayt γef i d-nelha, d iman-nneγ γef i d-nelha, d iziγer-nneγ ur nebγi ara a γ-t-kksen. Sgunfu deg talwit a Nour Ould Amara. Asabter yellan deffir wa | Asabter n zdat
Malek HOUD
- Tinin-is...Teččeḥ tmazight
Yeččeḥ Ben Σeknun
Ččhen yinelmaden
Ččḥen yiselmaden
Teččeḥ tfelwit
iɣef rsen isekkilen
imenza n tmaziɣt
Teččeḥ Samiya
Teččeḥ BRtγ
Ččḥent tddukliwin
Yeččeḥ yigenni
Neččeḥ merra
Neččeḥ yiwen yiwen
Imi ɣ-yeǧǧa
NOUR
- Tinin-is...Aḍris-ik s wazal-is a Wansen, yessemḥaḥed tifkert n wul-iw, tanemmirt! Ad rsen yeγsan n gma-tneγ di talwit!
- Tinin-is...Nur, d argaz ixeddmen ɣef tutlayt-is seg ul. Zemreɣ ad d-iniɣ lemmer mačči d netta tili cwiṭ-nni n teqbaylit deg BRTV ur d-tettili ara.
D acu kan, nekni s Yeqbayliyen ur nuklal ara irgazen-nneɣ at yiseɣ d tissas, imi deg tudert-nsen ur sen-nettaǧǧa kra, neɣ ur ten-id-nettmektay ara, mi ara mmten nettarra yakk iman-nneɣ nella nettqadar-iten neɣ ad sen-nettarra tijmilin.
D acu n tejmilt yeḥwaǧ wemdan yemmuten?!!!!
Lḥaṣun ad d-yazen Yillu ssber i twacult-is.
- Tinin-is...Mi ara yewweḍ wemdan yellan d amdan igerrzen di tudert-is sanda ara naweḍ, yelha ma rran-as wiyaḍ tajmit a Yanis, ma ulac am wakken kra yeqdec yurag s iγzer. Amdan iγef ara yili aṭas umeslay icebḥen, γas tafekka-s ad tekcem aẓekka, maca, ur yemmut ara s tidet. D tijmilin-agi yakk d umeslay icebḥen d-ttawin medden fell-as ara t-yeğğen d amuddur i lebda. D ayagi yakk i d anamek n ddunit, i d tiẓeṭ, i d ccbaḥa, i d iseγ iγef yettṛuẓ wemdan aqerru-s di tudert-is, ayen-nniḍen akk d asebter aberkan n iḥulfan-nneγ.
- Tinin-is...Asmi tenniḍ " i ilugan n tira" axater ifuk imensi di BenAknun yal wa sani yerra, as nini i Ǧamal n Bgayet ma yecfa. Ittusemma azekka-nni ad neg akayad almed n wefraz n yeswiren. Netta ur yebγi ara agraw nni nneγ ad ibḍu am yibawen af lluḥ. Taggara newwi-tt d aqlaqal yal tameddit. Win yettun ad d-yemmekti.
Lγerba texdem deg neγ ay tessen, igzem wassaγ. A Samiyya acu ara m-neg d aεwin a tεezizt. D ssber d winna i d aḥbib n tudert. Ibedd i lmeddad akken yufa, s ssut aḥnin d useḍsu yesserwalen bururu. D wigi i yettagad udabu: ulac wi ten-ikerhen! Imeṭṭawen ur i iga ara ad ferzeγ "ilugan n tira" ma wennεen neγ ala
Ar timlilit a lansyan!
Nasi Abrus
- Tinin-is...qazsed
- Tinin-is...Ttxil-wat a yatmaten mur aɣ-ed-tennim anida ara yenṭel akken a n-nruh ar lğanaza-s ad fell-as yaεfu Ṛebbi.
- Tinin-is...s leḥzen d ameqqran i γriγ amagrad-agi id-immeslayen γef tmettant n NOUR OULD AMARA, d amdan ixedmen γef tmaziγt aṭas aṭas akken daγen yexdem γef tddukliwin, yesdukkel iγallen ad refden tamaziγt. Amkan-ik deg rraḥma, sgunfu di talwit.
- Tinin-is...Tanṭelt a d-tili deg taddart n Kuku deg tama n Micli...akka i yi-d-yenna yiwen zgelli.
- Tinin-is...Atan yewwed-d isali nniḍen id-yeqqaren yemmut Smaεil OULEBSIR yiwen seg yiselmaden n tmaziγt id-yeffγen deg terbaεt 97 di tesnawit n Hassiba BENBOUALI γer tama n BTK , Allawa Belkhider, Bellil yahya, AZERRAĞ Yidir, BELKACEMI Mustafa, BAHMED Brahim , Mezhoud Karima d wiyad., Tamḍelt-is ad d-tili azekka 23/09/2011 deg taddart-is At Lḥağ taγiwant n TEZMALT - BGAYET - ad asen-id-yazen Rebbi ssber i yimawlan nsen (NOUR akked Smaεil)
- Tinin-is...Azul,
"Ur nemyugar ara aγilif". Lemmer d-yettarra ucebbeḥ imeslayen akk d imeṭṭawen yili a t-neğğ d amuddur!.. Amerzg-ines γas iba (iγab) si ddunit-a, isem-ines ad yeqqim yedder i lebda. Nur mlaleγ-t am wakken i yi-tessemlal tegnit daγen d Smεil, ilmend n waya yakk, a d-iniγ kan: i yelhan d aziḍer (ṣṣber).
Sgunfut di talwit a Nur akk d Smaεil. Ad nelkem (ad neḍfer) abrid i tewwim alamma yewwi-yaγ webrid i ken-yewwin.
Ğ.B
- Tinin-is...Tamettant n Nur, d ayen iqerḥen aṭas, d ayen ur umineɣ ara. Nur, d argaz i ssneɣ deg tiddukla Axxam-Amaziɣ n Saint-Denis, d yiwen umdan i yesεan tamaziɣt (taqbaylit) deg wul, i ixedmen ayen umi yezmer i tutlayt nneɣ. D ayen neẓra akk deg Brtv, deg tedwilt ines "Timsirin n tmaziɣt"...
Sgunfu deg talwit.
- Tinin-is...Azul fell-awen,
Amagrad-a igerrez nezzeh acku imeslayen n bab-is kkan-as-d seg wul, imi d ayen yettḥazan iḥulfan n wemdan akken yessefk. Nur i wumi nessaram ad yesgunfu di talwit d liser, yettγaḍ imi i yunag meẓẓiy wamag tamettant d yiwen ulugen n ugama i wumi ur nezmir ad nqerreε. Ma yettwassen Nur acku iga ayen yellan fell-as, lemmer d lebγi-k ay ul yal yiwen ad yeg awwar (lwağeb)-ines di taγult ideg yezmer ad yeg kra. Geddac i yellan am Nur neγ εad ugar, maca, ẓwan (ruḥen) di ttellis, d tadla yečča yilef. Nur tessulef-as tegnit akken a d-imel ayen yessen, ladγa di Brtv, awi-d ukan. Nessaram ad nelmed di tegnatin am tigi mi ara γ-yeğğ wemdan akken a s-nerr tajmilt i netta akk d wid yeddren akken ur d asen-tḍerru akken teḍra d wid i wumi nezgel neγ i wumi ur nessin azal-nsen.
Yelha nezzeh mi ara nerr tajmilt i win yemmuten, maca, ad yelhu ugar ma nefka-yas i wemdan azal di tudert-is.
"Ur nemyugar ara aγilif" akka i ttεezzin Yeqbayliyen zik-nni; llan daγen wid yeqqaren : la nettazen ttwab.
A d-yettwazen ṣṣber i tmeṭṭut-is d twacult-ines s umata.
S yisem-iw d yisem n tiddukla Numidya n Wehran.
Tamawt: Tannant uselmed n tmaziγt (taqbaylit) ara d-yilin ass n sem 30 di Cṭamber deg usideg (axxam) n tiddukla Numidya n Wehran a s-tt-nbudd d tajmilt i umeddakel-nneγ Nur akk d Smaεil ulebṣir.
Bu ccfaya-nni (Wehran)
- Tinin-is...ad fellek yaεfu rabbi a y-izem , a ta-fat , roh di laman
- Tinin-is...Aḍris-ik isseγli-d imeṭṭawen d iqerrḥanen...
- Tinin-is...Nexcawet s ttbut mi id yussa, targgaggi tasa,bab nnaɣ yewwi Nur
Meẓẓi d azǧǧig yefsa, yeǧayaɣ ass-a, dunit-agi d mleɣrur.
Yella-d i tmaziɣit d l'ɛassa, ileqmas talsa, stmusni yebna-y-as-d Ṣur,
Yella-y-as-d d l'bwansa, s uselmed yessa, yefres asuki d l'buṛ,
Gemna-k iselmaden ass-a, assafu-k ur yensa, yal seggas aẓekka-k a t-id-nzur.
-------------
Nur a bab n tmusni, ileqmen yesni, d uggadar n imezwura,
ayen d-ǧǧiḍ ad yennarni, ad yeṭef tirni, askil ad yazel s tira,
a t-anɣar ad a t-nani, a t-n-aru, ad a t-nini,
S tusna naɣ d isefra.
- Tinin-is...Nexcawet s ttbut mi id yussa, targgaggi tasa,bab nnaɣ yewwi Nur
Meẓẓi d azǧǧig yefsa, yeǧayaɣ ass-a, dunit-agi d mleɣrur.
Yella-d i tmaziɣit d l'ɛassa, ileqqm-as talsa, stmusni yebna-y-as-d Ṣur,
Yella-y-as-d d l'bwansa, s uselmed yessa, yefres asuki d l'buṛ,
Gemna-k iselmaden ass-a, assafu-k ur yensa, yal seggas aẓekka-k a t-id-nzur.
-------------
Nur a bab n tmusni, ileqmen yesni, d uggadar n imezwura,
ayen d-ǧǧiḍ ad yennarni, ad yeṭef tirni, askil ad yazel s tira,
a t-anɣar ad a t-nani, a t-n-aru, ad a t-nini,
S tusna naɣ d isefra.
| |  |  |  | |
|