Yiwen umastan neɣ amḥaddi n tmaziɣt, d anaẓur, d ameɣnas n teɣdemt tamettit, yellan zik deg ukabar n « PAGS », yewweḍ  sanda ara naweḍ akk, ass n 31/06/2011. 

                

Tarbaɛt « Imnayen n Numidya », aseggas 1983, deg wennar n tesdawit n Wehran Es-Sanya (Es Senia).

Wid ibedden seg uzelmaḍ ɣer uyeffus : Sseɛd Ẓmauc, Farid Waras, Yeḥya Ɛeyyad, Bubekker Twati, Ɛumar, Ǧamal Benɛuf, Musa Ǧennawi.

Wid yeqqimen : Muḥemmed Walha, Ɛebderreẓẓaq Ɛeblawi, Ḥusin Ǧennawi, Musa Benɛuf, Nureddin Benɛeddur, Ɛisa Benɛuf

Ameddakel-nneɣ Farid Waras yella d yiwen seg terbaɛt n « Imnayen n Numidya si tezwara iseggasen n 1980, yella daɣen d yiwen umaslaḍ neɣ aɛeggal n terbaɛt n ccna taqbaylit « Tilelli » di tlemmast iseggasen n 80. Farid Waras ilul deg Wehran aseggas 1966, ma d imawlan-is kkan-d seg Genzat (At Ɛebbas) aẓi n Yiɣil-Ɛli. D ajenyur n lebni, d ababat n twacult n snat teqcicin.

Farid Waras d amareksi-alinini, yerna ɣer ukabar n PAGS di tuffra seg 1985 alammi d 1990.

Farid Waras nessen-it d uḥdiq, ansa yekka yettecmumuḥ, ula d tegnatin n ẓẓmek yezga yettaḍsa.

Farid Waras d wis-sin seg terbaɛt « Tilelli » i yemmuten, imi yezwar-it yakan umeddakel-nneɣ-nniḍen « Ḥakim At Ɛli Yeḥya » i yemmuten deg yiwet txeṣṣart yeḍran deg usensu « Hôtel Opéra » di Lpari.

Tarbaɛt « Tilelli » d tarbaɛt n ccna amugzan (engagé) d uẓawan atrar. Tecna yakk di tzeqqiwin n Wehran.

 Seg uzelmaḍ ɣer uyeffus: Farid Waras , Ɛli Belqasmi (d aɛeggal n terbaɛt « Tilelli ») d Ḥusin Ǧennawi. Deg weɣlad (rue) Schneider, Wehran. Aseggas 1986.

Tarbaɛt-agi, tessuli aṭas n tezlatin sɣur-s, am wakken daɣen i d-rran kra n tezlatin seg tutlayin-nniḍen ɣer teqbaylit.

Seg uzelmaḍ : Ǧamal Benɛuf, Ḥakim At Ɛli Yeḥya, Farid At Ɛli Yeḥya, Ɛebderrezaq Ɛeblawi. Deg Weɣlad (rue) du Vivier, Wehran. Aseggas 1985.

Atta yiwet si tezlatin (dagi d asefru kan) n terbaɛt-a iɣef cfiɣ :

ČČARET-IYI IMI-W  D IJDI (rrmel)

Ččaret-iyi imi-w d ijdi

Ma tebɣam ad ssusmeɣ

Ɣas ma kksent-d wallen-iw

S wallen n gma ad muqleɣ

************************

Asmi lliɣ d amecṭuḥ

Tessḥefḍem-iyi tiyita ɣef tilelli

Mi meqqreɣ tura udreɣ-tt-id

Ɣer lḥebs tḍeggrem-iyi

********************

Netta iɛac (yedder) di leqṣer

Ma d nekk asemmiḍ yenɣa-yi

Kkreɣ nudaɣ acuɣer

Amerkanti yif-iyi

******************

Lgirra wi tt-irebḥen

Deg idurar n Lviṭnam

Imulal (ilelliyen) s idammen

Di ssinima d Marikan

*****************

 

Yiwet tezlit-nniḍen azwel-ines « Tifirellest n Lehna »

A  tifirellest n lehna

aha wwet deg iferrawen

Afeg ɛelli di tegna

A m-d-awiɣ ifennanen

Ara m-yarun isefra

S ugaṭar ad am-leɛben (uraren)

Lehna icennun di leɣna

Tifirellest n Lehna

 Guevara Salvador Allende

Imɣiden n ddunit yarkelli

Fell-awen ur ṣebbren ara

D acu d lmeɛna mi ten-tenɣam

Nekkini ur s-fhimeɣ ara

D acu i ten-yettcuddun gar-asen

Amek i s-ssawalen i tayri-nsen

Ssawalen-as « Tilelli »

 

D waṭas n tezlatin-nniḍen i cnan, am wakken i cnan daɣen tizlatin-nniḍen n wiyaḍ am tid n Ferḥat Imaziɣen Imula, Ideflawen, Inaṣliyen, Tagrawla d Yidir…

Ihi akka a Farid Waras neɣ a « Farid Wissen » akken i k-nessawal.

Ar yiwwas, dinna !

Ameddakel-inek : Ssi Reẓqi (di tuffra), tura d Awlawal kan.

Seg Wehran