Sliγ i wagu mi d-yenṭeq
S yiles n tfawtin usigna
"Ssalit-as taqubet i lḥeqq
S sskeṛ di lebḥer", i γ-yenna
"Igenni mi ara d-yebreq
Di tmuγli i iselman yerna
Ma d rrεud mi ara d-yeṭṭeṛḍeq
Tugdi ad terwel ssyinna"

Argaz-nneγ yeffeγ leεqel
Ifaq yuγal d wayeḍ
S iman-is ur d-iteqqel
D ayen yettnadi ur yettaweḍ
Yeεreq weskad i wesmuqel
Tuzzya deg webran tenneḍ
Lemmer azger am iḥiqel
Ad yecbeḥ war asenteḍ

Zdat wallen-iw ayen icemten
Anef ad yecbeḥ γer medden
Ẓriγ wid akk ad yemmten
Ur ttuγalen ad bedden
Yuγal-d wayen ifaten
Γef ssenğaq usirem i t-cudden
S uγebbar s allen i d aγ-wwten
Am ccix mi ara itedden

Tifrat d tidet ur tt-sεiγ
Yal wa attan ger ifassen-is
Nniγ-d kan ayen ttwaliγ
Tamuγli-w leqḍeγ-d tafat-is
Seg wul i d awen-tt-fkiγ
Ma yegra-d yiwen ur yeṭṭiṣ
Neγ ma ibeddel idis ad t-lawiγ
Ahat ad as-teldi allen-is

Arğut daγen tella tagi
Ur zmireγ ara ad tt-gzuγ
D acu d uyennat-agi
Yeqqaren ssneγ ad aruγ
Neγ anef-asen akk ass-agi
Iγaḍ-iyi wemru ad t-sruγ
Ad rreγ izerman γer tuggi
Akka kan ara tt-fruγ

Tira ssnen-tt ula d arrac
Ifen-aγ d acu qeddcen yes-s
Ayγer temγer ibeεεac
I txeddem teγzi n yiles
Iles n tfawtin usigna di nnεac
Ur t-ugaden a d-yeḥliles
Tugdi si rrεud-nni maεεac
Ur d-tettuγal ur d-tettales

Tuklaleḍ amaynut neγ ajdid
Telhiḍ i tebḥirt d lexyal
Dder ay aserdun am ugellid
Aql-ak di tmurt n yeγyal
Mmektiγ-d Cεedli Ben Ğdid
Zdat-i iεedda-d lmal
Nḥemmed nettsemmi nettcehhid
Nugad lkaf ad imal

Wa icerreq wayeḍ iγerreb
Cetkan-d ilefḍan γef ṣṣeṛ
Init-as i izem a d-iqerreb
Dεud di Rebbi ad t-yeṣṣeṛ
Mi γ-teğğa tmusni twureb
Newwi-d tislit si Maṣer
Anfet ad yiccig wegrireb
Neγ ṭṭfet afus i uxessar

Sεid At Mεemmer