Nesla ussan-agi izrin s kra n tcarnanin isrewten isardasen n Llezzayer di tmurt n Iqbayliyen. Sdurin iman nsen ddaw umennuγ mgal irebraben sakin fkan-tt i jjiḥ di tmurt u ksen lxiq deg uẓawali aqbayli. Ewwten, regmen, susfen, ukren imezdaγ n tmurt. Myal mi tt-id sâan ad inin macci s lemâemda. Myal tikkelt, nnan-aγ-d tawaγit ur aγ-nahwi. Maca ssawḍen tineggura yagi almi d yiwet n twaγit ur asen-nehwi, imi neqqar nekwni: imenγi. D imenγi ih. Nγan Mustafa Dial ur yuksan. Ur illi d arebrab ur illi d yir aqcic. Ur ixdim ur igdim.

Myal mi-d ewwiγ awal γef anect-a d medden ssel-aγ-asen qqaren: ayen? ayen wid ilaq ad ḥerben fell-aneγ neqqen deg naγ? Nek mi sliγ i tigi ini rwiγ taḍsa. Ccuren d nnya imaziγen nneγ, s lehna nsen. Mazal γilen isardasen n Llezzayer uznen-ten-id ar tmurt akken ad ḥerben γef medden. Maca ahat am arezg nsen acku win iccuren d nnya, ad yili ithenna wul-is. Xarttum d aya!

Wanag tidett, isardasen n tmurt n Llezzayer, ttbargizen di tmurt nneγ akken ad d-smektin medden anwiten. Yak γur-sen azref ad d-asen akken isen ihwa ar tmurt nneγ imi rnan-aneγ neγ ugaren-aγ ama di ṭṭrad n 63 ama deg wiyaḍ. Si zik newwi-ten γef iqerray nneγ, seg ass-mi iseknan Kahina d Uksil, mmi-s. Timti ur aγ urzen ara s ddin d Ṛṛebbi, mgagin-d s ddraâ d ufus. Akka dγa i teḍra di 63. Wallan d akken teffeγ asen afus tmurt nneγ u ddin d tdukli taγelnawt frurint zdat lebγi n Uqbayli ad d-isukkes iman-is ddaw udar uṛumi d tugin ines ad ikcem ddaw win waârab.

Ass-a ihi ismekta-id d ṭṭrad n 63 mi sliγ s texnanasin isardasen n Llezzayer deg Iâezzugen ussan-a. Wanag ayen d-inna Brahim Karmus ur iban ara ar ass-a ma d tidett neγ d at iccumar i t-id isbedden ad izenz taga d tγeddiwt nsen. Yak win ibexsen yagi macci d win ittamenen medden s tefses.

Isardasen, s dduzan nsen aẓẓayan, ttin γef tγaltin n tmurt u nnan “ara nettnadi γef irebraben!”. Igenni tamurt ttfeggiḍen d ijemmuâa n imqarqar, akken isen iqqar umedyaz aṛumi Georges Brassens. Ṭṭfen-aγ tasga.

Âussen ihi ibardan d tuddar neγ âussen γef ibardan d tuddar? Wisen. Acku nutni nnan-d akka nekwni newalla-tt akken nniḍen maca win iwten d win ittewten walan amek tella. Akka diγen i wallan wid ittewten d wid iwten di ṭṭrad n 63. Mgagin-d ar tmurt nneγ, nγan, sfesden, âegben medden d wid ur t-inγi Fransa. Cemten tilawin u ksen sser γef tudrin.

Temgarad tegwnitt deg yiwet n taluft kan gar 63 d wass-a. Di 63, imiren usan-d akken ad sqermḍen akabar iγallen inemlayen, ass-a usan-d akken ad sqermḍen “irebraben”. Maca tirezzaf nsen γur neγ ur tent-ntettu ara. Myal tikkelt, addud iγ d-ttawin yiwen-is.

Tameddit, ayen i γef d-rzan glan-yis. Ayen i γef d-usan ewwin-t imi imezdaγ n tmurt ass-a neḥcamen, ugaden, ccḥen, nuγnan, sersen iqerray nsen. Ukin d yiman nsen ttwarekḍen. Maca wis ma ad akwin d akken ma d-iṛṛez usardas tawwurt n uxxam-ik ur as senday ara aârur-ik, ur as ttaṭaf ara afus u tin i tent yugaren akw: ur ttγili ara γur-ek id-irzef. Fell-ak id-irzef.

M.A.U