 | | |  |
 |  |  | |
|
|
|
Mas At Cebbib d amedya Di tmeslayt taqbaylit awal: taqbaylit γur-es aṭas inumak. Tella ihi teqbaylit d abrid n ṣṣwab, dagi qqaren i win icḍen “tagi macci d taqbaylit!”. Tella diγen teqbaylit gar sin imdanen mi ara myegdalen. Dagi qqaren: “gar-i yid-ek d taqbaylit!”. Tella diγen teqbaylit d tamusni imi qqaren γef imγaren “ssnen taqbaylit”.
Tella diγen teqbaylit d tafenṭazit. Tameslayt n tissas. Awal n isaγ. D tidett. D taγdemt. Neqqar: “d taqbaylit!” amzun ikfa wawal, ulac tuγalin ar deffir, akka ara teḍru.
Xarttum inumak n wawal taqbaylit illan di teqbaylit skanen-d tamuγli n uqbayli d wayen ittxemmim γef tudart. Qarren-d daγen amek isemlal uqbayli tameslayt-is neγ tanekkit-is d ubrid n tudart-is.
Tineggura yagi mi is sliγ i mas At Cebbib ittmeslay nniγ deg ul-iw, war ma ukiγ d yiman-iw: issen taqbaylit! Issen awal aziḍan. Issen-as tikli i tutlayt. Am imγaren nni n zik, mi a refden awal di tejmaεt akken ad frun tilufa, akken ad ssusin talwit gar medden, akken ad ssiγen tafat n teγdemt deg ulawen n medden. Awal, win is-isnen aktili, izmer i tlufa timeqranin.
Akka ihi mas At Cebbib izmer-asent. Iẓwer macci d kra. Iteddu ad yerr i teqbaylit ayen is-nekkes s ifassen nneγ, ayen is-nugi s timad-nneγ: amkan tuklal deg imawen nneγ, aḥric tuklal deg imyura nneγ. Mas At Cebbib, imi ifka azal i teqbaylit, ifka azal i wid i wumi ittmeslay. Iqudar iman-is iqudar-iten nutni.
Sliγ-as macci d tikkelt irfed awal γef aṭas isentilen am tsertit, timanit neγ amezruy u myal tikkelt s teqbaylit. Ziγen illa wamek ara nemmeslay γef umezruy s teqbaylit. Yerna taqbaylit-is ur teccur ara d tifawtin n trumit am akken nennum nsel i wawal ar wiyaḍ. Ala, taqbaylit-is netta d taqurant, d talqayant. Teccur d sser. D taqbaylit!
M.A.U Asabter yellan deffir wa | Asabter n zdat
yidir
- Tinin-is...anwa i d mass atcebib agikanna?
- Tinin-is...Ad dduγ deg gwawal: t-tidet ur neḥṣ'ara anwat wagi itmeslayen taqbaylit akken illaq !
- Tinin-is...Mas Buεziz At Cebbib d amaray aγelnaw n umussu n timanit i tmurt n Iqbayliyen (MAK). Sliγ as ittmeslay macci d tikkelt u cfuk-id issen-as i wawal aqbayli tikli. Atan tezmer-em ad as teslem da:
http://www.youtube.com/watch?v=L_XgOm2qs60
- Tinin-is...@M. A. U., Buεziz d mmi-s n taddart-iw, at Meslayen d taddart s-yettaken azal i umeslay. D anecreḥ kan ah, riγ kan ad zuxeγ acemma, wamma yiwet twaγit-nneγ akk, yal taddart tesεa wigi, tesεa wiyaḍ.
Tanemmirt ilmend n weḍris,
Sεid
- Tinin-is...D tidett At Mislayen d at wawal. A wi yufan aṭas Ibuâzizen i illan gar aneγ akken ad a nerr i teqbaylit leqder d sser tuklal. Wanag akka tella tura tegwnitt, fkan imawlan afus!
Ussan id-iteddun ad d-nawi awal γef Iqbayliyen nniḍen ittmeslayen tameslayt taẓidant.
- Tinin-is...Aru, aru a M. A. U., a gma, ayen akk tettaruḍ s wazal-is!
Tanemmirt!
Sεid
Tamawt: Mel-iyi s yixef-ik anta i d taddart-ik? Tenna-yi Nunu, kečč ssyinna γur-neγ, :-)maca, anta taddart?
Tella twacult n at Udiε deg at Sεada, d ayagi i yeẓriγ.
- Tinin-is...Aru, aru a M. A. U., a gma, ayen akk tettaruḍ s wazal-is!
Tanemmirt!
Sεid
Tamawt: Mel-iyi s yixef-ik anta i d taddart-ik? Tenna-yi Nunu, kečč ssyinna γur-neγ, :-)maca, anta taddart?
Tella twacult n at Udiε deg at Sεada, d ayagi i yeẓriγ.
- Tinin-is...azul a Sεid,
D tidett tawacult At Udiâ tella di myal tamnaḍt n tmurt. Nek n At Yellilten. Tiγilt-nni nniḍen n Micli...
ar tayeḍ.
- Tinin-is...Ssneγ at Yellilten, yiwet wabbu-nneγ neγ yiwet terbut-nneγ, a lxir-iw ihi! Tanemmirt!
S.
- Tinin-is...Azul,
xas ma yelha win "isṭerḍiqen" taqbylit( d ayen neḥwağ, aladγa tinnegurra yagi) d acu awal ad yeqqim d awal kan, tameslayt at qqim t-tameslayt kan. Ur illaq ara annettut azal bwawal s imad -is ! ur illaq at qqim teqbaylit am akken d as yenna winna : d asqewqew ar nnig lkanun.
Hakim.
- Tinin-is...Ssegzu-yaγ-d akken iwulem(akkern yessefk) neγ ugar tamsirt-agi n ddunit triḍ ad aγ-tefkeḍ a Monsieur Ḥakim ttxilek! Γef wacu la tettmeslayeḍ? Sani terriḍ nnican(anwa i d-telhiḍ)?
Sεid
- Tinin-is...Azul,
Ala a gma ! aheq win d wa ma lhiγ- d yiwen ! Bγiγ kan ad inniγ : Ma yella win isnen aγ-d imeslay s taqbaylit taqurant yelha, d acu win γ -id yawin kra " imaεnen" s teqbaylit nni ad igerez ugar.
Tamuγli-w bwiγ-it-id s tehrew, ur d aεnni yiwen. Ma d mass Cebbib ur tessineγ ara. Sendeγ, s wul zeddigen, f tidet bwayen d nnan imedukal agi nneγ fellas.
Hakim.
- Tinin-is...Akken wallaγ asenfar i wumi ikker mass At Cebbib (d imeddukal-is n Umussu n Timanit) d asenfar amuqran. D ayen "imaânen" nezzeh. Maca ama nedda yid-s neγ nebded mgal-is, ayen qqedcen at timanit, qedcen-t s teqbaylit. Kra n wayen d-nnan neγ d-qqaren, kra n wayen uran neγ ttarun taqbaylit fkan-as takwatt tuklal.
Ma d mass At Cebbib s timad-is, issen taqurant-nni n at zik. | |  |  |  | |
|