Am arezg i win i wumi tefka tegwnitt ad isers lsas, ad ifek taqeddimt tamenzut. Am arezg i win irẓan asalu deg unnar n tmaziγt. Am arezg i win is-innan: awah! nezmer a neg timsal akken nniḍen, akken ilaq, akken i wulem.  Am arezg i win d-ijjan isem-is imi d-illa d amezwaru, d amenzu di kra n wayen iqnen ar wayen iceγben imeγnasen nneγ.

Wigi akw ihi d tarbaεt n tseddawit n Bgayet izwaren. D wid innan: yiwen. Ad d-qqimen d wid igan lmajister n tamziγt s tmaziγt. Akka i t-id inna Umuqran Cixi n DDK  deg umagrad:  Tasalelt n  lmajistir n tmaziγt s tmaziγt.

Inni-t ihi i wid iγilen d tafransist kan i d tifrat d akken taqbaylit macci d tusnakt neγ d takrura iḥwajjen tameslayt akken ad tt-id gelment. Innit asen diγen taqbaylit macci d asentel akken ad ttarun fell-as d tmeslayin nniḍen. Innit asen, win iqudren iman-is d tmeslayt-is, ama d amusnaw ama d anelmad neγ d aselmad, ilaq-as ad iγer neγ ad isseγer taqbaylit s teqbaylit. Tira d unadi γef teqbaylit s teqbaylit d asennerni deg-s s sin ibardan.