Tazgart si tmezgunt « Ccix-lkanun »
Jeǧǧiga Benhlal deg uwadem « Tilelli »
Asayes wis-3:
A d-tekker tmeṭṭut, a d-tmel tadyant-is:
- Nekk, seg wedrum « Takesna-ri », yettwassnen s leqder d wazal akk d tlelli i tesɛa tmeṭṭut di tlemmast n tmetti-nneγ. Baba, d Ayrad n At Tissas; ma d yemma, d Tamguṭ n At Yiseγ. Seg wakken myejwaǧen s tayri, γas ɛeṭṭlen ur sɛin ara dderya, maca, ṣebren, ddren akken d lwaḥid acḥal. Simmal yettɛedday lweqt, simmal yettimγur lḥerṣ γef baba d yemma, sγur wat wedrum-nneγ. Adrum “Takesna-ri” yakk mwatan γef yiwen rray-agi: Yessefk ad temsebrum, yal yiwen deg-wen ad iɛiwed jjwaǧ, axaṭer ma tkemmel akka ad yenger wedrum-nneγ! Baba d yemma, ugin ad knun zdat n lḥerṣ i d-yeγlin fell-asen. Kkren unagen, rewlen γer wedrum “Ḥudd-tayri”. Aseggas deffir waya, tlul-d γur-sen teqcict. Semman-as “Tilelli”. Taqcict-agi, d nekkini. Imawlan-iw uγalen-d s lferḥ meqqren γer wedrum-nsen, i ǧǧan s war lebγi. Nedder akken di talwit d liser alammi qqleγ d tilemẓit. Yuγ lḥal nemyeḥmal aṭas, nekk d yiwen ilemẓi n wedrum-nneγ. Ilemẓi-yagi, isem-is “Masin n At Wallaγ”. Maca, akken i ifaq yes-neγ“Mezleg n At ddγel”, tekker tmes deg wul-is, iceyyeɛ-d baba-s akken a yi-yexḍeb. Baba-s n Mezleg, d ccix n wedrum-nneγ, ulac wi s-yettagin kra. Maca, nekk ugiγ-t, axaṭer ul-iw yezdeγ-it yakan Masin n At Wallaγ. Kra n wussan kan, nemyejwaǧ nekk d win ḥemmleγ; ma d tawacult n Mezleg ččḥen fell-aγ, ur ḥḍiren ara ula d tameγra-nneγ. Nekk d wergaz-iw Masin n At Wallaγ, nedder akken di tayri akk d talwit; ma d Mezleg n At ddγel, yennejla γer wedrum “At tuḥsift”. Ɛecra iseggasen mmden, aṭas n temsal i ibeddlen deg wedrum-nneγ: Nekk d wergaz-iw Masin, ilul-d γur-neγ weqcic, nsemma-yas “Asirem”, imawlan-iw mmuten; ula d ccix n wedrum-nneγ yemmut… Yuγal-d deg wemkan-is mmi-s yellan d imnejli. “Mezleg” yuγal-d s yisem ajdid i s-yettunefken “Afru n At tuḥsift. “Mezleg n At ddγel” neγ Afru n At tuḥsift, yebda yettleqqim yir tikta i d-yewwi seg wedrum i wuγur yennejla; alammi ibeddel leɛwayed yellan deg wedrum-nneγ. Afru n At tuḥsift, yeḥṣa ur izemmer ara i wergaz-iw, la s tin n tmusni, la s tin n yiγil. Yekker yesγam-as-d tarbaɛt irebraben yettwassnen s yisem “Tiyita n deffir”, yellan s lmendad n “Weẓru uffir”. Usan-as-d s lexdeɛ, zzin-as, rẓan-t deg wejgu n weɛrur s treggγin. Γas argaz-iw yegra-d d aceqquf di teγmert, maca, neṭṭef di tayri-nneγ, ur nekni ara zdat lbaṭel! Argaz-iw iqubel axxam, yeḥrez mmi-tneγ “Asirem”; nekk qubleγ lexla, axeddim n tferkiwin-nneγ. Nedder s yiseγ, ur neḥwaǧ kra. Maca, zdat n lḥerṣ akk d tugdi n “Wefru n At tuḥsift” akk imezdaγ n wedrum ḍḥan-d mgal-nneγ. Mačči kan γunzan-aγ, mmγen-d fell-aneγ, kksen-aγ kra nesɛa. Simmal tkerres fell-aγ, alammi nuγal ur nteffeγ ara seg wexxam, neqqim i lḥif d laẓ! Γas nekkni nezmer i lhemm, neqbel ad nemmet d asfel i tayri-nneγ. Maca, d mmi-tneγ iγef nḥezzeb, iγaḍ-aγ ad yemmet akken d aleqqaq. Dγa, iluɛa-yi-d wergaz-iw, u yenna-yi-d: “Ma tḥemmleḍ-iyi, γas ssemneɛ mmi-tneγ, imi d netta i d azamul n tayri-nneγ”. Argaz-iw yessawel i Wefru n At tuḥsif, dγa yewwet-it s usafu n tmes γer wudem, yessderγel-it; netta daγen yenγa iman-is. Ma d nekk rewleγ-d s mmi, aql-i dagi gar-awen.