Tanekra n Waεraben di tagrawliwin nsen, d-iḍran kra n waguren ayagi deg ugafa n tefriqt d usammer alemmas slulent-ed asirem deg ulawen n waṭas iɣerfan umaḍal. Acku fkant anamek amaynut, ur sinnen Waεraben zik, i tnekit taɣelnawt. Anamek-agi iṛessa ɣef tekti n tɣermi d wayen i tt-iḍtafaren d izerfan d teɣdemt.

Maca ssmanat agi tineggura, beṭṭu inɣa asirem: ddin di Maseṛ, tabaɣizri di Tunes, ṣṣef di Sirya d Baḥrin, iderma di Libya zemren ad seɣlin tanekra d tegrawla id-yejjan asirem i tifrat d tifin iberdan ara yefrun tiyersa id-iqqimen ṛzagit deg umaḍal aεrab si tallit imeḥras.

Si tezniqin n Imbaba, d-izgan deg jufaṛ n Lqahira anda inselmen d imasiḥiyen msefken-tent deg berdan, ar tmurt n Ccam neɣ Sirya, anda isen erra udabu nsen tanekra d tegrawla d tameṛzugt, tlul-ed tugdi n usbeddi n tedrumt, tamsalt n tnekkit ad sbin ma digel tafsut taεrabt tettfejjij neɣ ala.

Imedyaten i nezmer ad d-nebder ad ilin d iqburen cwitṭ yerna d wid ur nessufeɣ Aεraben ar lisser ar ass-a: zzaεim di Maseṛ, di Sirya, di Libya, d Yaman, abeddi ɣef yiwen uḍ ar n talwit di Lubnan d Lɛiraq imi magaraden ddinat d iẓuran n yegduden; deg illel afarsi (afjuṛ afarsi) iduba hesben igduden d arrac imectah u ṣṣemken-asen war-aḥeri myal mi d-yuli nnefs deg-sen. Kra d-isekcam lpitrul ccan-t neɣ bḍant d wid iddan yid-sen. Cwiṭ d arraz cwiṭ d tiɣin n tsusmi d talwit.

Sadiq Al-Azim, aggag asuri ittidirin di Beyrut inna: “tigrawliwin-agi ara ttaran-t taqejjirt ar deffir s yiwen ubrid neɣ s wayeḍ. ahat ad nsent cwiṭ cwiṭ”.

“Ad asen d-stqam semmumet acku izmer ad teffeɣ ar uɣilif d ttrad aciγili yerna ad terwi tegnitt irkelli” id-irna mas Al-Azim. “Yerna yak anect-a iban-d am yiṭṭij di Iεiraq, ara t-nettwali ass-a”

Γef yisem ihi n usseggem d useqεed n tegwnitt akw d laman isketfen zzuεama n tmura taεrabin igduden nsen. Imenɣi, astuti d usmerki gar uɣerman d gmas. Maca, ayen d-sban tnekra yagi d tufɣa d-fɣen ar iberdan d izenqan Waεraben d akken wallan zemren ad ilin ibardan d ttawilat nniḍen i tiɣermi. Si zik nɣil-iten d ungifen kan ifkan tasa d wul i ddin. Nɣil ɣef yisem n ddin kan i zemren i kra, maca tagara yagi nufa-ten zemren i wayen nniḍen. Tamuɣli yagi wisen ma tḥuza Aεraben n Llezzayer acku, si zik, ttafgen ur ttrusun. S wawal zgan kkaten deg udabu nsen maca mi ara d-aweḍ tizi n leḥris ad netḍen ar taɣma-s.

Maca, ama di Llezzayer ama anda nniden, ula d imeɣnasen d-yuragen ar izenqan bran-d i wawal ur asen-nehwi, bran-d i tidett imi ulac di tmura n Waεraben kra umedya n tugdut i zemren ad t-ḍefren. Ulac kra umedya  i zemren ad ssirmen ad ssiwḍen tamurt nsen am netta. D aya i ɣef d-nnan ar tagara "aql-aɣ neqqim kan nettuεelleq".

Tunes

Di Tunes, xas akken llan kra Imaziɣen maca drus, tamurt tettwacettel kan ar ugdud aεrab. Ṭaqa deg Itunsiyen ɣran, maca di tegrawla ar da iban aṭas umgired di tmuɣli gar wid izedɣen n rrif n yillel neɣ ibaḥriyen ar wid izedɣen daɣel tmurt uɣur ddin izwar tasertit.

Dɣa din iten-tuɣ, imi aneɣlaf amenzu, mass F. Rajhi, iεeggen-d d akken ad yagwi ad yanef Ennahda, akabar ineslemiẓri, ad tezri di tefranin id-iteddun. Ennahda ṭaqa deg imesladen ines d imezdaɣ n daxel n tmurt, neɣ imesdurar!

“Tunes tella-d gar ifassen imezdaɣ n icudad n yillel si zik n zik-nni” id-inna mass Rajhi. Dagi ara d-iqqar at-tmura d inslemeniẓriyen ur illi dacu ara ten-id-igren ar tɣarɣart. “Ma illa tezzi neɣ tetti tegwnitt tura, yiwen ur ten-id-issukus si leḥkem azekka”. Iεeggen-d d akken ma terbeḥ Ennhda tafranin n yulyu id-iteddun, imsulta illan zik deg udabu n Ben Ali ad sseɣlin awanek neɣ ad gen coup d’état. “Ma tuli Ennhda, d aserdas ara isseddun tamurt.”

Tasuta terra-yas-d awal stufɣa ar ibardan. 4 ussan d nutni leḥḥun, ttsuɣun ad telli tegrawla nniḍen tamaynutt. Iɣalen n laman ɣlin sakin fell-asen s iεewzan d lgaz. Hebsen ugar n 200 yerna zerben-d i temdint am lḥuḍ ifelfel di tebḥirt.

Tamsal-ta tetteddu ar tin iḍran di Llezzayer di tefranin n 1992 ass-mi yugi userdas abrid udabu ineslemiẓri. Tikkelt-a illa umedya gar iffasen n Itunsiyen. Amek ara as-ddun i teswiεt ? Atan sεeddan i tefranin ar ḥertadem akken ad heggin kra n ubrid nniḍen.

Maseṛ

Di Lqahira, anamek n tnekkit taɣelnawt i nɣil yufrar-d s tidett imi d wa id-zzewren igrawliwen n Maseṛ ass-mi d-nneɣlent kra n ṭezzina n luluf d ixef ar uskwar  Taḥrir. Imiren awal llsan am ufzim d : "rfed aqerruy-ik, d Amesṛi i telliḍ" ijja amḍiq i ufzim nniḍen: ddin. Mwaten Yenselmen d Imasiḥiyen Ikuptiyen. Anect-a isken-d d akken aṭas i ɣef i yeqqim Mubarak. Tura mi akka ufan medden abrid, uɣalen wa ikkat deg wa. Ahat akka diɣen i d almad n tugdut anda ur tesεi ara iẓuran.

Atan ihi mssukkasen-d mbugarasen. Deg uskwar Taḥrir ssawlen kra iɣermiyen ar tdukli maca Ikuptiyen qqimen deg ixxamen nsen. Ur ffiɣen ara am aguren izrin ad ilin gar Imesṛiyen s usbeddi uεenqiq.

"Nekwni d Inselmen, ccixat nneɣ zgan qqaren-aɣ ilaq a nelḥu a nmyuṭṭaf afus d Imasiḥiyen maca ur umineɣ akka isen-qqaren i nutni" id-inna unelmad Ibrahim Sakr. Issegwra-yas-d diɣen awalen nni iɣ-d-ismektayen d Waεraben n Llzzayer mi ara ttawin awal ɣef Imaziɣen s umata. " Ikuptiyen ahat llan 10% n imezdaɣ n Maseṛ maca rran iman-nsen d nutni i d ineṣliyen i d iẓuran imi llan di tmurt send tineslemt".

Libya

Imsulṭa nnan-d d akken iderma d-izgan di tama tataramt n Libya fkan macci drus iserdasen i wid mazal yumnen s Lqeddafi. Yerna ad agwin tagrawla d-yusan si tama tassamert n tmurt ayen bɣun igrawliwiyen nnan-t-id ɣef tiɣermi di Libya tugdut s tmaneɣt-is Tarabulus d-izgan deg utaram.

Imeɣnasen nnan-d tagrawla ad d-ssefrari tanekkit tamaynutt.

"Lqeddafi ittwali Libya d iderma d-izgan di tamiwin n tmurt: ataram d ussamer d ugafa d unaẓul"  id-inna i CNN Jadella Shalween aɣerman n Tubruk. Mass Jadella Shalwee iḥujj-ed ar usekwar Taḥrir ddurt izrin. "Maca tagrawla nneɣ tesfeḍ akw tamuɣli yagi iderma d tamiwin. Ass-a anebdu s wada." Issegwra-d diɣen "ala imawlan d wid akw is-ittilin i iddan yid-s ass-a’". Tegzam d Lqeddafi id-iqsed.

Ahat tirzin-agi ar usekwar Taḥrir d anadi umedya d ubrid izemren ad dd-men azekka di Libya. Maca ayen d-ufan macci d ayen inwan ad t-id afen.

Ssirya

"Tugdi" i d tikti is-id-issefhem Gamal Abdel Gawad, anemhal n useqqamu n tsertit di Lqahira, amek teddun medden ar yid-s n isnarafen acku "medden ttamyagwaden gar-asen!"

Tikti yagi n tugdi d tikti usaged ccant aɣrum nsent di Maseṛ maca di Sirya ccant ssagwrent! Ugar n 40 issegwassen d tmurt n Sirya Issedda-tt yiwen uxxam: at Asad. Kra din ibed ɣef usemmerki d ccaqlal illan gar inselmen issuniyen d imasiḥiyen d inselmen iyallawiyen. Deg unnar asertan am wagi, andi kan ad teṭfeḍ!

Muḥsin, yiwen ilemẓi ayalawi, ibder-d yiwen wawal cnan Isiryanen deg bardan ass-mi d-fɣen: "Imasiḥiyen ar Beyrut Iyalawiyen ar uẓekka!"

"Kra n wass izrin" id-icetka di tilifun si Dimacq, tamanɣet n Surya, i yiwen uneɣmas n NYT "isnerni agruri ar tedrumt".

Amedya n Lεriq izga ɣef yimawen am akken d-illa ttrad aciγili di Lubnan. Assufeγ n Udayen si Sirya cfan-as-d medden. Maca iskan-ed d akken ur fessuset ara tudart i win imgaraden γef ṭaqa. Nekwni s Iqbayliyen neẓra nessen dacutt tagi. Xas akken adabu n Ssirya isenned γef udrum ayalawi izga ittεeggen di medden d akken ma iɣli ad teftuti tmurt, ad tt-tecc tcengett n gar iderma imgaraden di ddin d tmuɣli. Maca awal-a n deffir nekwi d tawaɣit yuγal asen d awal n leslak. Akka ihi ara qqaren "ma macci d nukwni ad terwi acku nekwni neṭṭef tamurt imi nreṣṣa-tt γef tidett d yiwet tɣermi i medden d tirni ".

"Imeddukal-iw alawiyen rran ad beddeγ ar tama udabu, u γillen ma yeγli adrum nneγ ad inger" id-inna Muḥsen, yiwen ilemzi alawit di Dimacq. Imeddukal-iw issuniyen rran ad beddeγ mgal adabu. Aql-i ḥeslaɣ. Nerra tilleli iɣ-yugi udabu n wass-a, maca nerra tilleli di laman d talwit u anect-a ur neẓri ma izmer aɣ-t-id iffek udabu uzekka" id-irna Muḥsen i NYT.

Akka ihi i ḥeslen Waεraben gar tjejjigin n tfeswin nsen. Xas bγan ad tbeddel ugaden azekka imi ẓran agdud ibḍa. Iduba ur asen-d-fkin kra n wudem ara yawin iberdan n tudart imgaraden γef wid uεekkwaz d tyita. Ihi ugin ass-a, maca kukran azekka.

Ayen nebγu nenni-t-id, akken nebγu netti tabgwnitt, tilawt d-llan ass-a di tmura taεrabin ikkren mgal yir uduba nsent zzrent di temda n beṭṭu. Kra d-illan d asirem iqdeε-it-id uqmad d uzeyyer di medden. Tanekkit, anda imgarad ugdud deg ẓuran, ur tettwabennu ara di kra n smanat.

Ma nger tamawt γer tgrawliwin tiqburin, am tagrawla tafransist, ad naf d akken qqiment di issweggawsen macci d kra akken ssawḍent ur uṣṣeggem d useqεed deg iswiyen nsent imenza. Kra, am tagrawla n Llezzayer mgal amaḥras afransis, ar ass-a n wussan, ara tettnadi abrid amek ara tṣeggem iman-is, maca wid tt-id-isεan aten-id gar at llaxart neγ teffeγ asen afus. D aya i γef ur tettṣeggim ur tettnerni. D aya i γef timanit d abrid n talwit, d abrid n tidett, d abrid issufuγen ar tatrara d win ara irren akk-in nger d ccwal γef uγref aqbayli.

M.A.U