Aṭas n Iqbaliyen ittawin awal-nni amcum n “dacu ara necc” deg imi, ssensren-t-id myal mi slan i wawal n timanit. Macci d tikkelt id-wwiɣ ameslay d imeddukal-iw ɣef tamsalt-agi u myal tikkelt zgiɣ sfutuyaɣ seg-sen. Am nek am imeddukal-iw neqqim nbat. Xas akken awal irekkem gar-aneɣ akken a negzu taluft, tugi ad tekcem s aqerruy-nneɣ tririt-a. Maca inna-yi-d yiwen seg imeddakal-agi inu, inni yasen: “am ass-a, azekka ad teccem kan ayen ara d-tessisem!”
Maca tineggura ya, smuzgtaɣ aṭas i izarugiẓriyen n Kibek (wid ittnaɣen akken ad d-ḥellin azarug i Kibek) u ufiɣ tamsalt-a tella daɣen ɣur-sen. Zik llan bɣan azarug akken ad seddun tamurt nsen aken isen ihwa u ad ḥerben ɣef udlis afransis di tgafa n Marikan, akken ur ittili ara nnig-sen udabu afidirali n Kanada. Tagara yagi, zgan ttawin awal ɣef tdamsa: “a nawi azarug akken ur nettxellis ara aṭas n lmesk neɣ n tebzart i udabu afidirali, ad d-nḥelli tamurt akken a nesnerni tabaɣurt n tmurt nneɣ”. Ihi akka awal ɣef uzarug n Kibek ibeddel udem d ubrid. Ibda-d ɣef ubrid iẓuran, yuɣal iṭṭef abrid n tdamsa. Atan ihi dacu iɣ-d-issawḍen ar “dacu ara necc” nni. D tadamsa. D tadamsa d ukukru. Ikibikiten bɣan azarug akken ad snarnin di tbaɣurt n tmurt nsen, nekwni nkukra timanit acku nugad a nellaẓ.
D tadamsa ihi i ɣur teqqen temsalt. Umengellat inna-yas di tezlitt-is Tamurt nneɣ : “azelmaḍ diri-t nugi-t, ayeffus nugad-it”. Ar uzelmaḍ neɣ ar uyeffus, atmaten nneɣ kukran, ugaden azekka. Ass-a ḥsan d akken macci d adabu n Llzzayer isen ittaken ayen tetten, maca ṭaqa n medden ttuqimen sya-u-sya u sεeddayen tagwnitt. Ass-a ara asen neqqar ilaq a nawi timanit akken a nesseddu tamurt nneɣ s yiman nneɣ, akken iɣ-ihwa, s teqbaylit, s wansayen d leεwayed nneɣ. Nenna yasen ad nidir di tugdut, di teɣdemt. Nenna yasen ad nessu tagmatt d tayri ɣef tmurt nneɣ. Maca ayen bɣan as-slen, ayen irjjan asen-ten-nesseqcer d tamsalt n “wacu ara necc”. Deg imi nsen, dacu ara necc, iqqar-ed amek ara neddir ? Dacu ara nuqem azekka akken ad d-nessis aɣrum i tarwa d twacult? Amek ara yelli wudem n tdamsa di tmurt nneɣ? Ad yelli umahil i medden d tirni ? Dacu ilaq ad tuqmen medden akken ad snulfun, ad ssalin imahilen i yiman nsen?
D tidett llan-d kra n wawalen sya-u-sya, ɣef taεkwemt n tebzart tettxellis tmurt n Yeqbayliyen i udabu azzayri d kra n wawlan diɣen ɣef isenfaren ara d-yawin tabaɣurt ar tmurt nneɣ uzekka. Maca drus. Iqbayliyen aɣ-d-qqaren mmelt-anaɣ-d ugar. Innit-aɣ-d amek ara tebdu d wamek ara tekfu acku macci d tikkelt i t-ɛedda fell-asen. Macci d tikkelt isen-tettwakellex.
Issefk ihi ad yelli uskasi ɣef tdamsa n tmurt nneɣ seld timanit. Issefk ad ilint temliliyin ama di tmurt ama di berra akken ad xemmen medden ɣef temsalt-a u ad tt-sqardcen akken ad afen ibardan n tafat i tdamsa uzekka.
Zriɣ tamsalt macci kan di tdamsa i tella. Maca, am aken d-nniɣ iwessawen, tilufa nniḍen am taqbaylit d tameslayt nneɣ tunṣibt, taɣdemt, tilleli d tugdut imlal ṛṛay d tmuɣli nneɣ fell-asent. Yiwen seg-nneɣ ur tent-yugi, ur tent-ikukra, ur tent-iɣunfa. Banent-ed am yiṭij. Ihi ilaq ad nelhu ass-a d tlufa i tesbundel tugdi d ukukru. Ilaq a nenni i Iqbayliyen dacu ara ccen azekka, xas akken ar tagara am aken iyi-d-inna umeddakul-iw: ad ccen kan ayen ara d-ssisen! maca ilaq asen nenni dacu ara uqmen akken ad d-ssisen aɣrum. Ilaq asen-nesselmed amek ara d-snulfun imahilen i yiman nsen d watmaten nsen. Asen nenni amek, di tilawt, tabaɣurt n tdamsa teqqen ar umdan d wayen ittuqim d isenfaren macci kan dayen ittwareblen ddaw tmurt am lpitrul d lgaz.
Issefk daɣen ad d-nesmekti atmaten nneɣ belli ma nugi a nidir am ass-a, am afrux iseccay baba-s, ilaq a ncemmer iɣalen. Macci d isenfaren d tiktiwin neɣ d tigatin ara yilin drus azekka, d udem swayes ara ten-nmager ara ibedlen imal nneɣ d yimal n tmurt nneɣ. S ubgas d uḥezzem ara d-nesnulfu tamurt nuklal. Tamurt n Yeqbayliyen. Tina akken ifkan anzi ar ukanar ass-a di tfekka. Tinna akken ulac-itt tella!
M.A.U