Win isersen amdan deg temγer d ccbaḥa akkd tuffra n umaḍal, ulac akukru d akken ireṣṣa umaḍal-a send n wemdan; imi xas d tilawt amdan d yiwen ger waklan n wesnulfu n ddunit-a, maca yemmug-as wazal yifen wiyaḍ.
Aγiz di tudert d wayen akk nettwali nessen-it, ad aγ-d-yessuffeγ tikti i yessen umeqran d umeẓyan, agellid d wakli...atg; tikti i yefka wemdan d areṣṣi deg wallaγ.
Ma nniγ-d amdan, ḥuzaγ-d aberkan d ucebḥan, atrar d uneggaru, imi tikti d tilawt n wayen i s-yezzin i wemdan.
Tilawt mači kan i wecrak n tudert, maca amdan ur yettili war ayen i s-yezzin; limer ulac amdan, ad tkemmel tilawt n iγersiwen d yimγan d ...atg
Limer ulac ayen i yellan mači d amdan, ad d-yili umaḍal war amdan akken ar ad d-tili tudert s wudem nniḍen.
Ma newwi-d amedya γef tmurt, ilaq-as yiṭij maca iṭij ur yettwaḥṛes ara akken ad yili γef yidra n tmurt.
Ernu amedya i d-kkseγ si tussna ileḥḥun di tmuγli s taẓayt akken ad nessen tazzla, amedya-w d maṛs amaḍal anda ulac bnadem dinna; maca skud yella maṛs, ad yili deg-s umuddur.
Imi tussna teqqar-d maṛs ur yesεi ara uksijin(o²), amdan yerra tamuγli s tugett i yisufar ar ad t-yeǧǧen ad yizmir i maṛs.
Lmektub
dacu i d-yegran akka akken ad tfakk ddunit ?
At ṛebbi qqaren-d d lmektub, win n wakud qqarend-d taggara ur tbeddu ma d wid yettektilin, γur-sen kra ur iban kra ur yettbin.
S teqbaylit, lmektub iseεεu amkan deg iles mi ar ad ḍrunt mi ar ad teddez ad tebrez; xas akken tikwal nsell s lmektub send tuffγa n tγawsa, maca wellah ar ẓẓay ccγel-ayi n lmektub, ilaq ad yili meskin di yal lferḥ ladγa lqerḥ susem kan!
Ihi, gar wid yeqqaren akkd tifrat, d tilawt.
Tilawt war lmektub ad ibeddel wudem-is, ma uγalen medden ttidiren s umawal ur yuri deg-s wawal n lmektub, cukkeγ ad yettuqet fell-asen llum u ad ten-tekcem tmeεlelt; imi ad tuγal ssebba deg wemkan n lmektub dγa mi ar ad ḍrunt, ad yaf d iman-is neγ d iman nniḍen. Ladγa ma ur t-yufi ara, d annect-nni i t-yifen din; ad yamen s lqedṛa yettcixin deg tudert-is wamma ma yerra-tt γer " akka kan " ass-nni ad ḥsuγ belli ddunit bxir i tella mazal deg-s tifin.
Lmulud It Yeεla.