Isefra γef tayriwin
Sγur: Dda Σebdella Ḥaman
          (Wehran)
        

Nerfed leqlam i isefra
Newwi-d lhedra
Γef tayri d lesrar-is
D llsas n yal ttejra
I d-yettaken ttemra
Tessway-itt s leḥsan-is
Ma ulac-itt di yal kra
Ur txeddmeḍ ara
Irab ur d-yegri llsas-is

Ccbaḥa n ddunit d tayri
Mačči d ayen n diri
Rebbi yeẓẓa-tt yessemγi-tt
Deg wul n txelqit yarkelli
Yes-s i nettḥelli
Lxir, tettwellih bab-is
Yettwaḥrem win ur neẓri
Nnur n Rebbi
D nettat i d tafat-is

Leṣnaf n tayri
Tayri tefreq d leṣnaf
Aṭas i nettaf
N wudmawen i tt-yerzan
Yiwen d ucbiḥ n lewṣaf
Wayeḍ d aseṭṭaf
Yecba taffeḥt izerman
Yemmuten ger ixulaf
Niγ ddaw wesraf
D aqbar seg-s i d-yegran

Lxetyar n tayri
Xtir seg-s udem yelhan
Zeddigen yeṣfan
Rruḥ ad yifrir s igenni
Yettuqim akti yeḍwan
Tawelha i t-id-yusan
D nnur n lqedra n Rebbi
S tayri d tafat iberdan
Win i s-iḥulfan
S lǧehd-is i yettali

Tayri n tussna
Wi iran tussna γur-s lḥeqq
Ayen yebγa a t-yelḥeq
Meqqer ccan-is ger medden
Deg wegraw mi ara d-yenṭeq
D llwiz i d-iḍelleq
Seg yimi-s i d-yetturugen
Ger lumma d iṭij yecreq
S wesnulfu iwufeq
Timeṭlal yettwalmaden

Tayri n wedrim
Yennecrah wi iran adrim
Ulac lxiq d ineẓẓim
Rebbi fell-as yettferriǧ
Ma d amusnaw yettxemmim
Yextar wid i d-yettγim
Ma d tudert-is ur teεwiǧ
Ma ur yessin leḥbab yettuqim
Yettfuxx yettṛeggim
Teqqel-as tament d amureǧ

Tayri n lḥeqq
Lebγi n lḥeqq d lmizan
D lǧid win t-iran
D netta i d udem n Rebbi
Wi yenḥafen ayla-s a t-yesban
Ayla n wemγid seg win yerwan
Azref a s-t-id-iḥelli
Lexyal n Rebbi d ameqqran
Di rray n win yebγan
Dima lḥeqq ad iεelli

Tayri n tgelda
Wi iran ad yili meqqer
Ger medden ad yecher
Aγref zdat-s ad yeknu
Di tudert ad iḥekker
S udabu ad iẓeyyer
Lumma, akken yebγa ad telḥu
Ma yella f lḥeqq, ad yejber
Wi yelluẓen yenṭerr
Ma ulac, f tmes ad yeddu

Tayri n wesnaref
I win iqeḍεen nnehta
Ur yugad tasuta
Yiwen wass ad treẓ lqid
Tettneqlab ddunit-a
Tessegray-d lmerta
I win ur nelli d lǧid
Yuqem imdanen d tisita
Iγil iwata
Lbaṭel mi la t-yettzeggid

Tayri n talsa
Tayri n talsa d rreḥma
D leqder d lḥerma
D tirrugza yennekmalen
Wi yefkan i tudert lqima
Yessebdad dima
Taxelqit yenneεdamen
S twakksa uγendef i lumma
D lebni n yal tama
N lexṣaṣ i tt-yesraben

Tayri n wesγan
Wi yextaren tayri n wesγan
D lǧennet win tt-yebγan
Yelḥa d webrid uxellaq
D lewqam yelha win t-igan
D tẓilla di lawan
D wul aḥnin ma yessebraq
Yexḍa abrid n cciṭan
Yettall imeγban
S tiẓeṭ, mačči d aḥemmaq

Tayri uxeddim
Ma d win iran ixeddim
Yezga yettṛeggim
S yiγil-is am ugellid
Di ddunit werǧin yendim
Di lḥif ur yettγim
Fell-as lewqam yettzeggid
Ur iẓerr tagut n lγim
Yiwen ur t-yettḥettim
Yexḍa lexṣaṣ d ttmermid

Tayri n watmaten
I win iran atmaten
D tiddukla yekkaten
Yettarran aldun d uffal
Ma gan ṣṣef ad wwten
Ma ggullen ur ḥennten
S lewfeq yettruẓun uzzal
Aεeddis ma yefreq-iten
Nnḥas yekcem-iten
Tagmat ur d-tettuγal

Tayri n tyessetmatin
I win iran yessetma-s
D iseγ d lḥerma-s
I yerfed akken ad yali
Tin i yenxeṣṣen yejmeε-itt
Yeṣṣer-itt yesserwa-tt
Akka i d lǧid anaṣli
Aẓar-is yebded fell-as
Si ddaw leεnaya-s
Yuzaf ttellis yeflali

Tayri n tyemmat
Tasa fell-as traq-d
Am nettat ulaḥedd
Wi yecban tayri n tyemmat
Awal n Rebbi yebder-d
S tidet iεeggen-d
Lǧennet ddaw leεnaya-s
S ṣṣut aḥnin tenṭeq-d
Ṣṣura tenhedd
Yefsi wul s leḥmala-s

Tayri ubabat
Lliγ-d allen-iw γer ddunit
Deg irebbi-s talwit
I ufiγ ters-d fell-i
Yecrew tidiwin merriγit
A d-yessis talqimt
Yakk d tuṣṣra i nekkini
D netta i yi-d-yewwin γer ddunit
Ul-iw iḥemmel-it
Menneγ ad yefreḥ yes-i

Tayri n yeḥbiben
Aḥbib d llazuq yejbed
Seg yiwen γer wayeḍ
S leḥmala n way gar-asen
Yal yiwen d ayen yeqsed
S tmuγli yesked
S ayen i bγan yesdukel-iten
Wi yenxeṣṣen wayeḍ a t-yessefqed
Ma yeγli a t-yerfed
S talsa ttemsefhamen

Tayri n tarwa
Tayri n tarwa ay axir
Yes-s ul yettferfir
Yes-s i tecbeḥ ddunit
D nutni i wumi nettidir
Iban ur yeffir
Fell-asen i neswa lḥentit
Tasa-nneγ tetteḥdiqir
Nessaram-asen lxir
Γur Rebbi la t-nesfillit

Tayri n weγlan
S leḥmala-inek ay aγlan
Tifeḍ kra yellan
Di ddunit ḥedd ur k-yewwiḍ
Udem n Rebbi deg igenwan
D lǧennet yelhan
Γur-sen i tettemcabiḍ
La iḥebbek wul i k-yebγan
A k-gerrzen wussan
A k-ḥuddeγ s wayen tebγiḍ

Tayri n weγref
D amaway wi iran aγref
Fell-as ad yendef
Ur yefki i yiman-is azal
Yettnadi lḥeqq a t-yeṭṭef
Ad as-yeg azref
Lumma-s yerfed-itt simmal
Γef webrid-is ur yettanef
Alamma yesselqef
Mi ara t-id-yaweḍ lmijal

Tayri n tmeṭṭut-ik
Ddunit akken i tt-nesdukel
Wa γef wayeḍ yettkel
Necrek tasa d dderya
Yiwen s wayeḍ yennekmel
S rruḥ d leεqel
Llsas nebna-t s nniya
Nettat d nekk i tḥemmel
Γur-i mi tmuqel
Deg wudem-iw i twala ṭṭya

Tayri n lkas
Rewlet si tayri n lkas
Yetthuddun llsas
Tettaǧǧa bab-is εeryan
Abrid n lḥeqq yexḍa-yas
Leεqel yettwakkes-as
Yeγli, d lǧib i s-yexlan
Ileḥḥu netta d iγerwas
Ur yesεi tissas
Yettwabxeṣ ger imawlan

Tayri n leqmar
Tayri n leqmar d yir abrid
D ẓẓmik yettzeggid
Yerreẓ bab-is war ajbar
D nnif yumsen ur yettirid
Yezga di ttmermid
Tawwurt ihudd-as amnar
Mi yenxeṣṣ yiwen ur t-yeskid
Ula deg wass n lεid
Lkanun yexsi ulac deg-s asγar

Tayri n tmeṭṭut i k-yexḍan
Tayri n tmeṭṭut i k-yexḍan
Yesεan imawlan
Seg-s ay amdan xḍu
Am win yeḍfin di qeḍran
Lmut-is tban
Anda d as-yehwa yeddu
D tamda yeččan ṣṣelṭan
Yezzer ur d-iban
Deg-s i tenṣel ddeεwessu