Ilmend umulli wis-14 γef tmettant n Muḥemmed (Masin) Harun.
Ilul ass n 13 Yebrir 1949, yemmut ass n 22 Mayyu 1996.
Mmi-s n Tmazγa Harun*
Sγur dda Σebdella Ḥaman
-Wehran.
Nekkini mi ddmeγ imru, yuccag akken ad yessefru, hatayen wayen i d-nniγ di tmettant n Muḥemmed Harun.
Γas tennul-aγ nneksa
Nettwaqes di tasa
F mmi-s n Tmazγa Harun
Abrid-is s lwerd yessa
D asirem yefsa
I tsuta la d-iteddun
Ifureq-aγ wuḥdiq ass-a
Yeǧǧa-d tilisa
Tidak la d aγ-yettḥuddun
**********************
Isefra-w fell-as la ttrun
D anezgum rennun
Yeγli imeṭṭi di Tmazγa
Iruḥ yeǧǧa-yaγ Harun
Γer lǧennet yettdummun
Tasa d wul fell-as yerγa
Imeγnasen ur tettun
Tasuta ad cfun
Γef wekti d wezref yebγa
************************
Deg wul yedder γas yemmut
Tayri tettnunnut
Γur watma-s Imaziγen
Yessew iẓuran n tmurt
S usigna d tagut
D tregwa imeṭṭawen
S rray yefka-yaγ lqut
La irennun di ttbut
D uwelleh i yelmeẓyen
********************
Lmut d tudert i Harun
Imaruten ad arun
Akti Umaziγ d amezgu
Imedyazen ad ssefrun
Si lferḥ i la ttrun
Yesban-d ayen i nettargu
Yid-neγ ayen la iḍerrun
Ula wi ikukrun
Yufrar usigna d wagu
*******************
Yessers tutlayt γef ṣṣeḥ
Yes-s ul yennecraḥ
Lebγi n weγref yeḍra
S lmut n Harun nejreḥ
Tasa teqlaleḥ
Tiyita teǧǧa-d tiderra
Yeflali-d wudem n ṣṣbeḥ
Tamaziγt terbeḥ
Ukin warraw-is merra
******************
Asif n tsekla yeḥmel
Aṭas i d-yesdukel
Si tikta imeγnasen
F lǧehd n leryuy nettkel
Tiṭ i s i nmuqel
N tussna d wukyisen
******************
Deg weγnes ara nkemmel
D unadi s uḥemmel
Ad as-nzuff aḍuten
Tamazγa atta tenbawel
Tarwa-s tessuγel
S aγlan ara ten-yesduklen
**********************
Yewwet lebraq deg yixef-iw
La iḥebbek wul-iw
Mi sliγ s umeγnas yemmut
Ma yella ddreγ ussan-iw
Mačči i yiman-iw
Tuddra i wudem n tmurt
La ssawaleγ i watmaten-iw
Ad bedden s idis-iw
I Tmazγa la d-tettnunnut
**********************
S yiseγ Umaziγ i ggulleγ
S yes-s kan i umneγ
D ucabak nefka i lejdud
Ad sebbleγ kra ḥemmleγ
D wayen ssarameγ
Akken ad yidir wegdud
S abrid n tudkla zwareγ
Tugna a tt-ssemlileγ
S tegmat mačči s lbarud
********************
Lajel ma yella yewwi
Argaz am wagi
Deffir-s yeǧǧa-d irgazen
Akti-s ijuǧǧeg yennerni
Inuda tirni
N Tmazγa d imulalen
Tafrikt ugafa yuli
Yetri-s deg igenni
Ad idiren Imaziγen
******************
Imaziγen imseɛraben
Yid-neγ ad ddukllen
Nutni d tiγmert n Lezzayer
S tegmat d wul zeddigen
Γer tugna ad kecmen
Tamurt akken ad taf liser
Ad fakent leḥmali idammen
Ad nesfeḍ imeṭṭawen
Tasuta n lxir a d-tekker
*******************
Mi yedder yiles ad nidir
Yes-s ara nifrir
Ad nettwabder deg umezruy
Tidet tban ur teffir
Ur tettuγal γer deffir
Yessen-itt umatu d umeẓluy
Ad yefreḥ weγref s lxir
Γer zdat ad yettḥekkir
S tugna-s ad yaf alluy
* Asefru-ya yura-t bab-is semmus (5) neγ sḍis (6) wussan γef tmettant n Muḥemmed (Masin) Harun. Azwel d nekk i t-id-ifernen, wissen dγa ma iwulem-it neγ?
Ǧ. B