Akken i-nnuγ tannumi,yal ass n 20 yebrir di yal aseggas yettili-d usmekti n tedyanin n tefsut n 80 neγ tafsut n yimaziγen. Asmekti-agi d leqdic meqqren s wahil amarkanti γef tutlayt tamaziγt ama d isaragen, timesbaniyin,timzikniyin neγ tikliwin,annect-a teγzi n wussan n ddurt imi d awal γef tefsut n yimaziγen neγ tafsut n 80 ad nuγal γer tedyanin-nni, ayen nexdem drus acku amezruy n tedyant n 80 lqay u γezzif.

Amek i d-tella tefsut n 80?

Ass n 10 di meγres 1980, mass Ḥend saεdi yellan d aselmad di tsedawit n Tizi-Wezzu,yeεreḍ-d amyaru Mulud Mεemri akken ad yefk asarag γef wedlis-is i d-yessuffeγ "isefra iqburen n leqbayel" ihi deg webrid-is γer tesdawit n Tizi-Wezzu, amyaru Mulud Mεemri ḥebsen-t iγallen n laman di Draε ben xedda, syen wwin-t γer Lawali γef usarag-ines d akken ad as-d-yawi ccwal.Asegdel n usarag Mulud Mεemri yeğğa-d d cḥani d lγiḍ d ameqqran γur inelmaden, aya yegla-d s tmesbanit n talwit tamezwarut di Tizi-Wezzu.Taluft ur terkid-ara kkan di Tizi-Wezzu,telḥa almi telḥeq yer Lezzayer tamanaγt imi ass n 7 di yebrir tella-d yiwet n tikli γef tmentilt n weḍris i yura Kamal Belqasem deg weγmis El Moudjahid di 20 maγres, anda i d-yewwet γef Mulud Mεemri, imesbaniyen begnen-d lγiḍ-nsen γas aken drus yid-sen zdat iγallen n laman i ten-yewwin γer temsulta n Lezzayer,kra ssuffγen-ten-id tameddit-nni, ma d 70 nniḍen serrḥen-asen-d ass n 8 yebrir mi d-yeffeγ yiwen weḍris deg weγmis Le Monde γef tmesbanit-nni anda isḥasfen aṭas annect-a d-ayen iccemten udem n tmurt n Lezzayer γer tmura l barrani. Di Tizi-Wezzu yella-d weḥbas γef leqraya mi slan s useḥbes n watmaten-nsen di Lezzayer tamaneγt.

Ass n 16 yebrir d ass n weḥbas γef lxedma, imi d amuli n tmettant n Jean-Lmuhub Σemruc, aneγlaf n leqraya taεlayant iceyyeε γer tmurt leqbayel i tuγalin γer lxedma, lamaεna imezdaγ, gar-asen inelmaden, rran-as tabrat swayen ssututen γef izarfan-nsen, di 19 yebrir amaray amatu n l'UGTA yessawel ula d netta i tuγalin γer lxedma.Ass n 20 yebrir kecmen iγallen n laman γer tesdawit xedmen ayen xedmen,amennuγ d cwal yegla-d s 454 imejraḥ d 2000 nniḍen twaṭṭfen mi d-yeffeγ lexber imezdaγ n Tizi-Wezzu ffγen-d s-ibardan,lγiḍ nsen yegla-d s lexṣara meqqren.Akka, ulac ticraḍ mebla idamen, i tefsut mi ğeğğigen yewet uγurar.Seg tallit-nni 20 yebrir 1980 ira a d-yeqqim deg umezruy d asmekti itsuta id-iteddun.