A tabrat yeγlin deg wedfel

Yessa fell-as wegris

D tamellalt tγumm-itt temlel

Amek ara s-d-afeγ later-is

Iṭij ara t-id-yefsin ibeddel

Igenni berrik ubernus-is

A tabrat a kem-aruγ s tebrek

Amru d nekk ay d ameddakel-is

Leqlam-iw ṣṣifa-s ad tbeddel

Ad tcebbeh γ ṣṣifa n weεdaw-is

S yiles aẓidan a d-iban

D ameddakel i wakken ad yezdi lqedd-is

Ma d tagut s tikli a d-taγawel

Deffir-s a d-yegri lxeṭṭ-is

Ma d win yugin a tt-yeqbel

Ili-ken ay irgazen γ idis-is

 

A tabrat yeγlin deg wedfel

Yessa fell-as wegris

Teǧǧa leqlam-iw yeggujel

Ayetma cedhan isekkilen-is

Nerǧa ayyur ad yesthell

Γef tebrat a d-yawi lexbar-is

Yecreḍ-aγ-d ayen ur nqebbel

I wakken ur d-nettaf lewhi-s

Tawwurt n yeẓri-w teqfel

Mi ara d-mmektiγ teldi s imeṭṭawen-is

Uli-w γef tebrat iεellel

Iγumm-itt zzman s ideflawen-is

 

A tabrat yeγlin deg wedfel

Yessa fell-as wegris

Ṣebreγ lexbar-im iεeṭṭel

Ṣṣber-iw a s-geγ lḥedd-is

Lewṣaya n Ǧerǧer tekmel

Aqbayli ur yettaǧǧa nnif-is

Ma γezzif leεmer a kem-id-yaf

Weqbayli iḍuεen leεqel-is

S lexbar-im a d-yefk lemtel

Tamaziγt ad tqeεεed iferrawen-iw

Imeṭṭi n lferḥ a d-yenγel

Yal yiwen ad yaweḍ lebγi-s

 

A tabrat yeγlin deg wedfel

Yessa fell-as wegris

D tamellalt tγumm-itt temlel

Amek a s-d-afeγ later-is

Teεjel neγ tεeṭṭel

 Mazal yettraju deg-s bab-is

A Ǧerǧer iεebban adfel

Tabrat-iw cfu f later-is

Deffir-s i d-nettabaε s lemkaḥel

Lbarud a d-yenṭeq s yisem-is

Zzman γas ma ibeddel

Yal lweqt yesεa irgazen-is

Mi ara d ḥeǧǧren idammen g rrmel

Yal yiwen ad yeεqel axṣim-is

Γef tebrat yeγlin deg wedfel

Labudd a d-iban wudem-is

 

Ayen yeḍran deg-neγ nettu-t

Nettsetḥi a t-id-nfekker

A s-neqqar lḥal ifut

Ur nesεi f wacu ad nehder

Sebbaḍ deg idurar nettu-t

Nedda i leḥfa neṣber

Ma d lewhi tγumm-it tagut

Lǧerra deg-neγ txeẓẓer

Nemmut nettagad lmud

Iẓekwan fell-asen i nhedder

Neddem lwerd d leεlam

Neqqar-as ad tidir Ledzayer

Lebḥer d tamurt n lḥut

Yetthenna ur yesεi aḥebber

I nekkni seg wanita tamurt ?

Ur neẓri f wacu i neṣber !

Tidet tuli γ idurar

Teǧǧa-d lekdeb a γ-yesγer

Yekkat-aγ s wesγar iεewjen

Nessusem ur nezmir a d-nehder

Ayen yeḍran deg-neγ nettu-t

Nettsetḥi a t-id-nfekker

Ugadeγ a γ-yettu lweqt

Zzman s lhemm-is a γ-yeγder

Kkret ay irgazen ad neddut

A d-naγ lhiba d leqder

Ayen urgaγ ugadeγ a yi-ifut

Uli-iw yennuγ-it ṣṣber

 

* Yettwanγa deg taddart-is « At Zayed n wadda » Tefreg-Lberǧ-Buεrariǧ, ass n 19 Yebrir 1991. Asefru-ya yefka-yi-t-id kra n tallit kan ngum a s-d-yessiwel lajel-is. 

Ǧ.B