|
|
|
A yemma ḥenna a nekk i tegreḍ di temda (asefru n at zik)A win yellan d uḥdiq sl-iyi
A yemma ḥenna
A nekk yuγen yir gurmi
Udm-is d lmeγreb
Mi d-yeḥḍer lewhi imensi
A yemma ḥenna
Nekk yuγen adxaxni
Mi d-yekcem di tewwurt
Yiwi-d tacekkart usebsi
Mi t-tḥuza lgerra ugeffur
Ar yettraḥ am izirdi
A yemma ḥenna
A nekk yuγen bururu
D udem uyaziḍ
Mi ara yali s akentu
A sidi Ṛebbi
Σezzi-yi-d deg-s d umatu
A yemma ḥenna
A nekk yuγen butellis
Iḍarren uyaziḍ
Mi ara yali s amkan-is
A sidi Ṛebbi
Σezzi-yi-d deg imawlan-is
A yemma ḥenna
I igan lemrad i yefker
Da yuqan medden fell-am
Tefkiḍ-iyi i yemsisker
Anta ay d lhejna fell-i
S usu mi ara d-yekkerker
A yemma ḥenna
A nekk yuγen Rabeḥ
Deg wass yettarra aqelmun
Deg iḍ yesnusu lmeṣbeḥ
Aseggas-a d a t-nernu
Qabel d nnuba n ṛṛwaḥ
A yemma ḥenna
Fkan-iyi ur εlimeγ
Qqaren lfatiḥa
Nekk ttmuquleγ
D aγbub ay uγeγ
Azekka ad rewleγ
A yemma ḥenna
Fkan-iyi i uεejmi amanun
Iḍarren n wemcic
Taguni nnig lkanun
Nekk ad ṛuḥeγ
Ad aγeγ aqcic bu-leεyun
A yemma a ḥenna
A nekk i zewğen γur at Σisi
Fkan-iyi i uεejmi amaḍlus
Anyir-is werğin yefsi
Llaẓ γur-s ay steεfa
Leεmeṛ i d-newqem imensi
A yemma ḥenna
A nekk yuγen ameγbun
Ikurdan akk d tilkin
Fell-as ar teddun
Uglan kksen
Ur iferreẓ γer lkanun
A yemma ḥenna
A nekk yuγen bu-ferḍas
Mi ara nqerreb s imensi
Σeryan i d-yeğğa tama-s
Ad ḥelleγ Ṛebbi
Ad tewwet agejdur yemma-s
A yemma ḥenna
A nekk tegreḍ di temda
Wer ẓiḍ yils-is
Wer yesεi ṣṣifa
Mi kecmeγ axxam
Xas aγyul deg ttrika
Asabter yellan deffir wa | Asabter n zdat
Ḥemmu
-
Tinin-is...Cukkeγ teqqar-as daγen:
A yemma ḥenna
A nekk yuγen amrabeḍ
Taεbbuṭ-iw tezga terγa
Netta yezga semmeḍ
Yettağğa tibbucin beddent
Netta yelha d lekkwaγeḍ
-
Tinin-is...Ma d amṛabeḍ nni netta, yenna:
Ah!! A mas inu,deg azal d aberwiḍ, deg iḍ d aqunniḍ.
Yiwet n twaγit i yewten amdan aqbayli, am tmeṭṭut am argaz. Ma d tayri ataf bab-is ur tettmuqul ara γer ṣṣifa neγ γer ilibuḍen.
tayri neγ zwağğ n bessif ula uwumi-t