Aru γef uferṭeṭṭu
I d-yesmektayen tafsut
Ma d ayen-nniḍen ttu-t
Yid-s ilaq-ak beṭṭu
Allen-ik, ldi-tent, argu
Ad d-tafeḍ amacki-tt tmurt
Rnu bren-as agaru
A muγu ah ya muγu
Ha-t-an teεreq-ak teggurt
A muγu ah ya muγu
Anida akka i tetteddu?

Aru γef merra itran
I d-yesmektayen targit
Asirem-ik s anu degger-it
Ad yeγreq akken ur d-ittban
Wissen ma d-taweḍ tmeddit
Ad k-id-taf s tiẓeṭṭ n zzit
Ur teẓriḍ anwa i tt-yeksan
A Caεban, ah ya Caεban
And(a) i k-rran taqbaylit ?
A Caεban, ah ya Caεban
Taqbaylit anda k-tt-rran?

Ẓwer taruḍ γef tayri
Ad yeqqim ul-ik fessus
Ayen akk-nniḍen messus
Yettawi ar wayen n diri
Γas ma iḍarren-ik deg (u)malus
Γas ma deg-k tefkiḍ afus
Ma d kečč am win ur neẓri
A tiziri, ah ya tayri
Terramt amdan d amurḍus
A tiziri ah ya tayri
Ayen i d-as-txedmemt drus

D aferṭeṭṭu neγ d itran
D tayri neγ d tiziri
Ur ssuffuγen ara s iswi
Ur ttḥuddun ara imawlan
Ur γ-ttarran γer yizri
Ur γ-ttseggimen tikli
Ur γ-d-qqaren wi γ-ilan
Ay amdan, ah ay amdan
Ur γeffel ara aki
Ay amdan uh ay amdan
Barka ur ttakk ara lwi.

Tikellax

Imal idel-it uγilif
Igli yergel γef wallen
Yestufa-d γur-neγ lḥif
Tudert amzun d lmendif
Teṭṭef-aγ, qebren wulawen
I d-nettmmagar d ilmawen
D asawen i γ-yewwi wasif
Deg yiγes ifukk wadif
Lebγi, rekḍen-t yilfawen
(de)G teγmert yettru yettiẓẓif.

Ur tufiḍ anda ara nerr
Teḍyeq ddunit
Asirem, tedri-t
Nettraju, neεya (de)g ssber.

Yiwen ubrid i d-yeggran
Ur nuksan abrid wis sin
Win yerran γer tẓidanin
I γ-d-iṣaḥen d arẓagan
Neẓẓṭel ussan d wuḍan
Acḥal nsegerger n teqreεtin
Deg-neγ ttnezzihen-d yimawlan
Yeγlin, yerẓa-ten zzman
Amzun deg ddunit ur kkin.

Nerfed rray d amehbul
Nuγal d lḥerraga
Neẓra-tt d lfinga
Neεmed-as, neεfes γef wul.

Necba lṭufan mi yeγfel
D ddabax i d alelluc
Lhemm, nettbibbi-t εirquc
S lekteb nefreḥ, nedderγel
Tsus tudert s ccluc
Werǧin tennul aqacuc
Γef tmurt meskint tenṣel
Wa yemmut wayeḍ yehbel
Wayeḍ yeznuzu aεeqquc.

Berkat tikellax nfaq
Nerẓa alellux
Semmḍit d aẓebluc
Mi neḥṣa nesεa lḥeqq.

Malek Ḥud

Azul,

Tanemmirt-ik tameqwrant a Dda Malek f isefra-agi anda d-tebbwiḍ awal f tkellax aγ-iga (aγ-ixdem) uzem (zzman) s umata. Ur nttettu diγen ayen nga i yman-nnγ n dirit s ifassen-nneγ. Ay-agi innan-t yiwen umedyaz ur ssineγ isem-is deg temnaṭ n Igwelmimen deg iseggwasen n 2900/1950:
Gan-aγ medden ka i geγ ka i yγef-inew
Aqγ-nn ayenna wer nedmi
A tiṭ-inew εmiy-kem s ufus-inew a Da
Hay hawi!

Tanemmirt ɣef isefra-ayi ay anaẓur-nneɣ. Dayen izaden deg sser d thuskayt n wawal yuzzlen am waman id yeffɣen deg tqacuct n wedrar aqbayli. Nekk d yiwen iḥemmlen aṭas tamedyazt ladɣa tamedyazt-ik a Malek.
Afud igerrzen deg senfaren-ik.
Tanemmirt.