Tezzem tsekkurt tafsut.
Turarem war areccam, deg seksu teččam,
γas d aleğğam d asemmaḍ.
Ternam tezzim-d i wexxam, terram-tt i ttexmam,
d acu a d-iḍegger ugemmaḍ?
Rεud asmi d as-teslam akken ma tellam
din i teqqurem am weblaḍ.
Ay iẓra d acu twalam? Aql-i ttekleγ fell-am,
ddem-d a tidet ajelkaḍ!
Leqḍen-d azemmur yerkan, d-teğğa Marikan,
ẓḍen-t yeẓmi-d imeṭṭi.
S asisen γer yeẓri i yettaken, rkel d as-nefkan
yerra-ten-id almi d xaṭi.
Adeg d wemḍiq rran d amkan zzmen, εeggḍen, cetkan,
segmi ten-jegḥen s uweṭṭi.
Ttṣṣar mi d-yenna"aha kan!", yekfa "wawi-d ukan!",
tabexsist ur tessenṭi.
Amezwi iceṭṭḥen d sxeḍ, wissen ma yeγleḍ
mi d-yessekcem tawaγit?
Yenna-yas"Jgugel, teṭṭfeḍ, sanda newweḍ newweḍ,
ad necḍeḥ tabulunit!".
Ay aḍu acu iwumi tḥebbreḍ mi akken i d-tṣuḍeḍ?
Tekkseḍ-as lqecc i tmeddit.
Lemmer a d-mlileγ aydi ur yeṣṣeḍ, ad as-iniγ “tselbeḍ?
Iwumi tafenṭaẓit?“.
Fek-iyi taxenfuct ay azrem, fedra la tderrem,
aswided aqbur iṣeddeḍ!
Di temgarṭ icuff-d weẓṛem, tareṭṭalt ad tt-neγrem
γas ad tt-nerwi ad tt-nessexelleḍ.
Mi d as-tmal ttεebga i usirem, di claγem ad nbeṛṛem,
nini i uγilas “tugadeḍ”.
Yal ameṣmaṛ a d-yeqrem, sanda ad aγ-terrem
ay ibernyas ideg nenneḍ?
Ad awen-d-iqasem wemnar, si tewwurt ara ken-id-yerr,
γer tḥanut ur tkeččmem.
Σeğğret, kerzet deg wennar, γas akken meqqar,
sanda i wen-yehwa ad terrem!
Ma ur trim yiwen a ken-iẓer, Ṣubbet γer yeγẓar,
yak tqegglem, tqegglem!
Steqsaγ yiwen wemγar, mi d-yeffeγ si lγar,
yeẓra s agrireb i tuzzlem.
Tukiḍ-d nerra-yak lγemm, eṭṭes ay axemmem!
Aqerru-k γef tiṭ nḥuder-it.
Asmi ulac d acu ad nexdem, si lbir-ik nqas a lhemm
metwal tibḥirt n targit.
Γur-s nenjer targa uweccem, teqreḥ nerna-yas ssemm,
nessummel asirem n talwit.
Yuγal ṭṭbel yessusem, si cḍeḥ nettawel nrekkem
d amezwi, sxeḍ d twaγit!
Stenyaγ leεqed d ccwal, dγa kkreγ γer nnwal,
acku ur bγiγ ad ttruγ.
Argaz-iw mi ara d-yuγal, tarbut a d-ters war awal,
ad yečč tiγrifin umennuγ.
Ma ur d asent-ttgerrizeγ leḥwal, ḥṣiγ lebγi ad imal,
imiren s tγawla ara bruγ.
Melmi ad iyi-teččeḍ ay akal a bu wul amellal,
mel-iyi melmi ara t-ttuγ?
Wissen widak d iyi-isellen, ma ad iyi-meḍlen
γef yidis ugelzim-nni?
Agelzim mi d as-γzen widak yemmuten,
yewwet ugeffur ass-nni.
Ass-a qqleγ seg wid yemmlen, medlet-iyi allen,
la d awen-qqareγ"Dayenni!".
Aman-iw ma ur ttawlen, ur ččiγ ifassen,
ad wwteγ aqerru s yini!
Σni tγunza-yi lmut? Ula d nettat tfut,
tameddurt diγ teğğa-yi.
Amekti iceffun nettut, icuff am teylut,
yenna i tatut " mel-iyi!.
Amek ara tegrireb tmurt? Rbeḥ a nnger ifut,
leεqed yid-k ad tnestenyi.
Yiwen wass a d-tḍil tefsut, ad as-tini tsekkurt:
Ffγeγ-d deg-m nγan-iyi!
Sεid At Maamar