Zizi Belεid
Zizi Belεid d amrabeḍ. Abernus amellal, aqendur amellal, agennur amellal d iselsa-s n yal ass. Mmalen-d i win t-iwalan d akken mačči d win terza lxedma. Deg wakken γezzif yerna rqiqet tiddi-s, ssawalen akk medden “Acacfal yeṭallayen”. Awal “Acacfal” twalam γef wacu i t-iεebba kra tekka u kra ara tekk tudert-is, yerza talγa n tfekka-s, ma d awal wis sin n temεayert-is, da bγiγ ad d-iniγ “yeṭallayen” d ayen iγef ara d-nawi awal.
Tuyat n Zizi Belεid ttbanent-d knant cwiṭ, mačči d amahil i tent-yerran akka, ahat d kra n lεib i d-yegla mi d-ilul. Ur mellul ur berrik wudem-is, d aras. Allen-is tiwiγanin d timecṭuḥin, ḥercent am tid n uzrem yeffuden. Agman n tfekka-s i yessexdam ugar n wiyiḍ d iẓri-s. Tebrek n ucekkuḥ-is tugar temlel, d alemmas n yirgazen. Ifassen-is d imeqqraren, ayeffus-is yesseγzef-it s tεekkazt n usγar n uẓebbuj i yesεukkuz. Awal γur-s yegget, iteddu am wasif, rnu-as yir tikli-ines, yis-sen i izerri akud n wass akka yal ass.
Yir tikli-s terza aḥric wis sin n yisem-is, win i s-fkan wat taddart. Amur amezwaru n temεayert-is “Acacfal” d yiwen n wallal i nesseqdac deg tukksa n tkermusin mi ara wwent, d aγezzfan u d areqqaq. “Acacfal yeṭallayen” d isem i d-yezgan akken iwata i Zizi belεid acku taṭṭucin-is, ur yezmir ara ad tent-iṣubb mi ara d-εeddint tullas i d-yettuγalen seg tala, teddunt s ixxamen-nsent refdent-d isugam.
Deg tudrin n Leqbayel yegdel maḍi wayen i ixeddem. Tameṭṭut ma tεedda-d deg ubrid-ik, ig Rebbi tsellem-d fell-ak, allen-ik d wallen-is ilaq ad ntunt deg tmurt, yiwen ur tent-id-ireffed. “Acacfal yeṭallayen” ur yezmir ara ad tent-iwwet γer lqaεa, mačči deg ufus-is, ur yuksan ara. Yettḥulfu amzun d yiwen wafud udrig i t-yettseggiren ad iṭill tameṭṭut. Yerna ittak lḥeqq i yiman-is, s waya i d-ittaf tawwurt amek ara yesεeddi iman-is, yessemẓay tucḍa yecceḍ, ur yettlummu ara iman-is. Yeqqar deg wul-is akken yuγ tanumi: “I wacu i γ-d-yefka Rebbi allen?” Tiririt γef usteqsi-s thegga: “Akken ad nṭill, ad nwali yis-sent.Dγa ma zgant-d deg wayen ifazen am tlawin, ad kksent lxiq u ad afent iman-nsent. Tikwal awal-is d anemgal n wayen akk i d-yeqqar akka.
Mačči d yiwen iberri i d-yettawi i mmi-s Muḥend. Nnan-t-id wat zik: “Ala ṭṭikkuk i d-icebbun deg baba-s. Muḥend ur yelli d ṭṭikkuk, yemgarad netta d baba-s akken yemgarad yiḍ d wass. Wissen ayγer akka? At taddart merra ttqadaren-t aṭas. D tikli-s yelhan iwimi ur d-issukkes yiwen i t-yerran d amḥaddi γef baba-s uzlig yeffγen abrid n tmetti taqbaylit.
Zizi Belεid, zik i yercel am tizziwin-is n taddart. Deg tmurt n Leqbayel, aqcic ma bdan-t-id kan kra n wanẓaden n claγem d tamart, yeεni yessaweḍ xemseṭṭac neγ seṭṭac n yiseggasen deg tudert-is yezmer ad yekcem agraw n taddart akken ad yekki deg llufeq-is. Dγa imawlan-is yewweḍ-d lawan akken ad s-gen axxam. Zizi Belεid akka i d-yewwi asurif n tudert-is.
Tameṭṭut-is Ğuhra, yugar-itt cwiṭ deg laεmer, mazal tahuski-s n temẓi tezdeγ ariḍa tafekka-s yezdin am uγanim, d wudem-is yettiqqin seg sser. Allen-is tizegzawin am yigenni yesfan deg unebdu, slalayent-d tismin n kra tlawin ur nezmir ara ad nnamrent axeẓẓur n Ğuhra. Ttawint dima tama wadda s usrusu n wallen-nsent.
Muḥend yewwi-d allen d sser n yemma-s mi d-yusa γer ddunit. Terna-as ttrebga tuḍrift, tin ur nefki anzi γer tin n baba-s i ttawin medden d awal deg taddart.
Abrid n tala, win i ttaγent lxalat n taddart mi ara d-agment neγ ad d-ssirdent iceṭṭiḍen-nsent yekra-t “Ucacfal yeṭallayen”. Wissen acḥal d abrid i t-ittaγ deg wass. Wissen diγen acḥal yuγ n tyitiwin s usγar n uẓebbuj sγur yirgazen n taddart ittasmen. Aqerruy-is yerwa ifeddixen γas ma timrubeḍt tettḥuddu-t cwiṭ wamag, akken yeqqar wanzi: “Amrabeḍ ma tewwteḍ-t ḥawel-as acku ddnub tebniḍ fell-as”, aṭas aya i iεedda γer wanda ur d-nettuγal. Ma yessefqed γer tferkiwn-is ad yekk syin, ma yuγal-d tameddit s axxam-is ad d-yekk syin. Ilaq ad iwali tiqendyar n ujeğğig azeggaγ neγ awraγ akked tid yellan daxel-nsent ma ulac ur yettili bxir.D tidet yuḍen, yuḍen aṭan n tmuγli. Isem “Acacfal yeṭallayen” yezga-as-d swaswa. Deg tallit-nni deg tudrin ulac imsujiyen n tnefsit. Tikwal mi ara yesmuzgut i wul-nni i t-ittwellihen γer ubrid yelhan yettuγal-d d amdan amagnu. Dγa ineqq iman-is s tuzzmiwin, aṭas i ihedder i wul-is akken ad ibeddel tikli, tin i yettawi akka ur telhi. Maca ur ittaγ ara i wul-nni i t-inehhun, win i s-yettmalen abrid yessufuγen γer liser, γer tafat. Awal, yettaγ-it s uwehhi n timi i wul-nni i t-yesfalen γef zrubat, win i t-yessufuγen seg ubrid umεin γer win yessan akk d isennan n yidmim.
Tal tikkelt ara yeg ayen ur nlaq, yettaf-d timental yettarran acernan yexdem fessus, akka i d netta, laεmer yettu tidak-ines.
Ula d aqesser-is deg tejmaεt mi ara d-yeqqim d yimeddukal-is yef yideknan, itezzi ala γef wayen yesserwat. Wigi yettγimi yid-s ttwanasen-t ssurufen-as tucḍiwin-is acku ahat akken qqaren: “Mel-iyi d wanwa i tettedduḍ ad k-d-iniγ anwa-k”. Am Mḥend am tasaεdit. Kif-kif-iten, yiwen uεekkaz i ten-iwwten. Ayen d-qqaren i xeddmen, yiwen kan yeffeγ yismi-s yuγal myussan am Zizi Belεid wayeḍ yedreg.
Mi ara heddren awal yettawi-d gma-s, yenṭeq “Ucacfal” yenna-asen: “Yiwet tikkelt, llan sin yimγaren, ddan ddaqqes deg laεmer, qqimen deg Tzerrajt, tamdint iqerben taddart Ufella, sdat n yiwet tewwurt n tḥanut n ssebbaḍ ttmeslayen gar-asen. Rnan kan ciṭ n wakud, ha-tent-id snat teqcicin bḥal tisekkrin, ččurent akken iwata iselsa-nsent, tahuski i sent-yessureg Rebbi melba cceḥa, tfaz.Crurdent-d γer tḥanut-nni anda i qqimen sin n yimγaren-nni, ttsawament tissebbaḍin n uglim. Ttbanent-d meẓẓiyit, ahat urεad qfilent εecrin n yiseggasen deg tudert-nsent. Imγaren-nni yestufan ttmuqulen γer tfelwit-a s yiwet n tmuγli taseqqaḍt.Yenṭeq yiwen deg-sen, win i wimi qqaren Dda Muḥ yenna: “Waεli! Mmm…!
-D acu akka i k-iceγben a Muḥ? I s-yerra Waεli.
-Mmm… Neqqim Almi i d-yeqwa usekkur,
Ṣṣyada tuγal s ufus,
Yekker yemmut-aγ uṭarus”
Nekkni neggra-d d azeqqur.
Waεli yeṭṭerḍeq deg teḍsa almi i t-id-tuli yiwet n tgeḥguḥt qrib i s-tessufeγ tarwiḥt. Dda Muḥ s tama yeqqar:“Ḥafiḍ! Ḥafiḍ a Waεli! ”, s tama-nniḍen allen-is qqiment lesqent γer teḥdayin-nni yettaγen tissebbaḍin.
Tidyanin iga neγ yexdem Zizi Belεid mačči d yiwet. Ulac yiwen deg taddart ur t-nessin, meqqer neγ meẓẓi, d argaz neγ d tameṭṭut. Akken tettidir tmurt n Leqbayel, timeγriwin deg unebdu ggtent deg tudrin. Yiwen ma iga tameγra, taddart merra d tinebgiwt-is. Deg wass ad tt-issečč, deg yiḍ ad s-terr lxir s uskar n wurar. Ladγa tilawin ttwawtent γef wurar, kra itekk yiḍ nutenti d ccḍeḥ d ccna s tyita n yifassen d theddurin ur nettfakka. Msakit yečča-tent lxiq deg yixxamen-nsent, ur teffγent ara am yirgazen ala γer tala. Tameγra ihi d tagnit akken ad d-mlilent ad d-kksent γef wul yeččuren. Mi ara izeggen yiḍ neγ iεedda cwiṭ, irgazen i d-yettwanecden γer tmeγra, ttadden sdat tewwurt n bab n tmeγra, ttceyyiεen alebεaḍ ad d-issiwel i twacult-nsen akken ad nnejmaεen s axxam.Tikkelt-a d Zizi Belεid neγ “Acacfal yeṭallayen” i yuznen yiwen uqcic γer twacult-is ad d-teffeγ. Sdat tewwurt yeqqim ddaqqes ibewweṣ din, tameṭṭut-is εni mazal terwi urar, ur d-tecγil ara akk s tuffγa. Skudmal izerri wakud skudmal irekkem seg zεaf, yettgalla ur iεawed ad yenzeh tameγra. Ihedder iman-is am uderwic ur yuki yenna: “Lufan i iyi-tettunefk tegnit ad greγ merra tilawin n taddart-nneγ daxel n yiwen uγerrabu, ad tent-ssiwḍeγ γer tlemmast n yilel ad tent-smireγ din ad tent-ččen yiselman yelluẓen”. Kra n wayen akk i d-yenna ur yensir i umeẓẓuγ n Nna Ṭawes, yiwet n temγart i yettaken lebγi i yiles-is. Mussnawet deg taddart, ttagaden-tt i d-teqqar acku lehdur-is ttḍurrun, ttağğan-d ccwami, ḍlan-d s tidet. Tenṭeq γer “Ucacfal yeṭallayen” tewwet-it-id s wawal tenna-as: “Anehhar n lbabur iγef ad tessiwḍeḍ tulles-nneγ γer tlemmast n lebḥer, ahat d kečč?” Zizi Belεid, awal ur t-id-yerni, yebra i wallen-is γer tmurt γas ma yennum d asali i tent-issalay. Deg yimiren yuẓam awal am ugugam.
Tawacult n Zizi Belεid meqqert deg taddart γef waya i ttḥezziben yiεeggalen-is ur s-ttaken ara tamcumt-is. At zik qqaren-d: “Wwet aydi teṭilleḍ γer yimawlan-is”.
Acacfal γur-s yiwen n mmi-s εemmi-s yunag γer tmurt n Fransa ad yexdem γef uγrum n mmi-s d win tmeṭṭut-is. Malḥa, akka i d isem-is teqqim-d ddaw laεnaya n twacult tameqqrant. Zzin i s-yefka Rebbi ttawint-t sat taddart d lmetel. Tin yekkren kan ad s-tini: “Wellah ar teqmumseḍ am Malḥa n At Uciban”. Tesddukel ccbaḥa d ḍrafa, tettqadar medden, medden ttqadaren-tt. Argaz-is Σacur yettidiren d iminig deg Fransa yettḥar ad ifakk useggas n lxedma akken ad d-yas γer tmurt ad isεeddi ayyur n yimuras d tmeṭṭut-is i yeccedha aṭas almi i tt-yettargu yal iḍ. Iḥar diγen ad yeṭṭef mmi-s Yidir, i iḥemmel nezzeh, sufell irebbi-s. Yeğğa-t yesmed krad n yiseggasen deg tudert-is. Ad t-id-yaf yerna aseggas-nniḍen. Yidir yettaken anzi γer yemma-s ulac win ur t-neḥmmil ara deg uxxam. Ur yettrus ara akk γef tmurt, win i t-issersen wayeḍ ad t-yerfed. Γur-s kra n taṭṭucin tizerqaqin jebbdent am ddkir kra n win i t-iwalan.
Anect-a ur yeffir ara γef taṭṭucin n uzrem n Zizi Belεid. Yennum yettγimi sdat tewwurt-is γef udekkan mi ara d-iwwet ubeḥri n tmeddit deg tsemhuyt n unebdu. U yerna d tagnit ad ifek lwi i wallen-is ad sṭucment. Syin akk i d-ttεeddayen wat taddart, d abrid alemmas. Malḥa ma yefka-tt-id lḥal ad tsellem γef Zizi-s Belεid, akka i qqaren yimrabḍen.Netta ad s-yerr sslam ad s-yini: “Awi-d tura Yidir-nneγ ad t-ṭṭfeγ cwiṭ deg yirebbi-w”. Ad s-telḥeq mmi-s, ad traju din tbedd simira ad s-t-id yerr ad tkemmel abrid-is. Zizi Belεid ad yetturar s uqcic, ad s-yeskuṭṭef tiḥnakin-is tizeggaγin ad yeqqar: “Llah ibarek! Llah ibarek! Aqcic-a d lmalayek, ama deg ṣṣifa ama deg sshala, γur-s kra n wallen ssehbalent, laεmer walaγ tizegzewt n tiṭ am ta”. Netta kra din ad ifek yiwet n tmuγli i Yidir, snat neγ tlata i yemma-s. Deg tazwara Malḥa ur tfaq ara d acu i s-d-ittheggi zizi-s, ur tufiḍ d acu i d-iεeddan deg uqerruy-is. Akka tal tikkelt mi ara tt-id-ifek ubrid tettaf-d Zizi Belεid amzun yettraju-ten nettat d mmi-s. Ibeddu ikeččem-itt ccek γas ma tugi ad tamen s wayen tettcukku imi teqqar deg wul-is: “D ayen ur iqebbel laεqel, nekk mačči d taberranit, nekk n twacult-is, mačči d netta ara d-yezwiren γer tukksa n sser”.
Yiwen wass am leεwayed, tufa-t-id yeqqim γef tdekkant, tefka-as mmi-s ad t-yeṭṭef deg yirebbi-s. Mi tekna ad s-t-telḥeq, Zizi Belεid ur iḥezzeb, s ufus-is ayeffus yeṭṭef-d aqcic ma d afus-is azelmaḍ iweddeε-it ad yeslef i tfelluct tamellalt n Malḥa. Tuγal d tazeggaγt am tmiṭuct seg zεaf, teḥwes-d afus-is din din, maca teqqim temlek iman-is. Winna am wakken kra ur yeḍri yettkemmil yetturar d uqcic yeqqar: “Aqcic-agi amacki-t, tizerqeqt n wallen-is iman-is…” Malḥa mi i tt-iεedda ukuffir-nni i d-yeγlin fell-as mi i tt-id-imusa win ur nettsetḥi, win ur neslif i wudem-is, tenṭeq γur-s tenna-as s leεqel: “Σni iεğeb-ak uqcic-agi inu a Zizi?
-Ih! Iεğeb-iyi aṭas. I s-yerra Zizi belεid.
-Waqila d taṭṭucin-is tizegzawin i k-ijegḥen.
-Wellah amzun tettkacafeḍ, allen-is neqqent.
Tqerreb cwiṭ γer umeẓẓuγ-is amzun ad s-tmel yiwet n lbaḍna.
-Ihi imi i k-yeεğeb mmi, ladγa timemmucin-is tizegzawin, ayγer ur d-tettawiḍ ara tameṭṭut-ik i Σacur-iw ad k-d-tesεu yiwen uqcic am yidir-iw?”
Tekkes-as-d aqcic yeddem, netta yezzeḥweḍ s axxam-is melba ma iruja tineggura acku lehdur i s-d-tdegger Malḥa ur yebni ara fell-asen, smerğeğğin-t, amzun yečča tiyita s ufḍis. Yeqqim ayyur ur t-id-yefki umnar n tewwurt γer berra.
Tadyant-is taneggarut teqqim-d deg umezruy. Urğin d-teḍri yiwet am ta deg tmurt n Leqbayel.
Muḥend, mmi-s awḥid n Zizi Belεid yewweḍ-d γer tissulya, yemmed tura, izmer-as i uxxam. Yemma-s telsa tissebbaḍin n lexḍubegga, tekker ad d-tnadi tin ara iwansen mmi-s deg tudert-is. Wellhen-as-d yiwet teqcict, cekkren-as-tt-id akk wid i tt-yessnen. Tezdeγ d lemmal-is deg taddart Wadda ur nggug ara aṭas γef taddart Ufella, taddart n Zizi Belεid.
Taqcit amzun d lxir-is, lqedd, ssifa, amzur almi d ammas, leḥdaqa, rnu teẓẓwer i leqdic, ama wid n uxxam ama wid n lexla. Sekkura akka i d isem-is, d tikkelt tamezwarut i d-rzan γur-s yinexḍaben. Imawlan-is ur εeṭlen ara s tririt n wawal i twacult n Zizi Belεid, qeblen nnesba-nsen. Qqimen ddurt i wakken ad sen-d-rren awal. Awal-a d:“Ih”. Kra n wussan send ad d-qeblen nnesba ceyyεen-d yiwet n tmeṭṭut d taγallit γer taddart Ufella ad sen-d-tawi isalan yerzan tawacult n Zizi Belεid d mmi-s Muḥend, ma ur t-yuγ kra ama deg tezmert-is ama deg leεqel-is. Ula d baba-s n Sekkura isewweq lexmis γer Tzerrajt, din isteqsa γef Muḥend d twacult-is. Ala ayen yelhan i s-d-nnan γef Muḥend, yerna d tidet d argaz lεali, yiwen ur issefreγ. Ula d ayen yerzan tikli n baba-s ffren fell-as acku ḥemmlen Muḥend seg wul, yuklal nnig n wanect-a i s-qqaren akk.
Ur terni ara aṭas n wussan, tawacult n Zizi belεid d wid i s-yefka lḥal, d irgazen neγ d tilawin ruḥen d lejmaε γer taddart Wadda akken ad ččen taḥbult u ad d-iγer lfatiḥa ccix n lğamaε i wwin yid-sen. Sdat yinebgawen d wat uxxam, ccix n lğamaε send ad d-iγer lfatiḥa yenna i wid yellan din: “Aql-iken d inagan, ass-a, Muḥend n At Yiger, mmi-s n Zizi Belεid n taddart Ufella yercel d Sekkura n At Waman, Yelli-s n Dda Ḥemmu n taddart Wadda. Mi ifukk awal-is ccix-nni, idulan ijdiden msudanen inyiren d yiqerray-nsen, ssufγen lbarud akken lεama n Rebbi ad tsell flan d flanta myezwağen. Wagi i d arra n tissulya n yimiren. Ččan-d taḥbult s tament, swan-d lqahwa, εeynen-d taqcict ara yuγalen d tislit-nsen, d tameṭṭut n Muḥend. Tameddit n wass, tawacult n Zizi Belεid d yinebgawen-is wwin-d abrid n tuγalin γer taddart Ufella.
Am leεwayed, win yesεan tislit mazal ur tt-id-yeqqin ara, urεad d-teddi s axxam-is, ilaq yal mi ara d-zzint leεwacar, ama d lεid tamemẓẓyant ama d lεid tameqqrant ttruḥun yimawlan n yisli s axxam n teslit-nsen ad tt-id-γafren. Lemγafra i ttawin yid-sen d taqendurt n ccbuḥ, taγruḍt n yizimer i zlan ass n lεid tameqqrant d wayen-nniḍen am tẓidanin.
Ifukk wayyur n rremṭan d lεid tamecṭuḥt. D Zizi Belεid i weddεen ad iruḥ γer taddart Wadda ad d-iγafer tislit-is.Yewwi yid-s kra n lqeḍyan deg uḍellaε d yiwet n tqendurt i d-yennulfan ussan-nni kan. Mi yewweḍ s axxam n yiḍulan mmugren-t-id akken i ilaq, yečča imekli yeswa lqahwa i s-d-tessers teslit-is Sekkura. Segmi i s-d-tqeddec d netta itett-itt s wallen-is seg tqacuct n uqerruy γer temceḍt n yiḍarren amzun ass-a i d-yusa ad tt-yexḍeb. Yiwen wul yeqqar-as: “Ay amγar slef i wudem-ik d tameṭṭut n mmi-k”. Ul wis sin yesεuẓẓeg, inecced bab-is ad iseddrem iγerban n yiseγ d lḥerma i tebna tmetti taqbaylit seg zik n zik. Zizi n twaγit bu wudem azuran, yeqqim almi ffγen yimawlan n teqcict, ikker iẓaẓ γur-s, yeṭṭef-itt-id deg yiffasen-is, nettat amzun yewwet-itt bukerraε, tbedd din teẓẓa am lmernuna n unnar, ikmes-as taziba n ddheb. Tameγbunt meskint teεweq d acu ara texdem, tekker teṭṭef-itt-id. Send ad d-tebren yemma-s n teqcict γer uxxam n lwacul anda i ten-teğğa, ijbed-d iman-is am umakur γef Sekkura. Irfed-d aḍellaε-is, ibeqqa-asen sslam yeffeγ. Yeğğa taqcict meskint tekcem-itt tergagit, imiren kan terkeb-itt tawla laεmer tessin, maca kra yeḍran yid-s ur t-id-tessebgen γef wudem-is. Tugad mačči d kra, teffer γef yimawlan-is ayen tedder ass n lεid tamecṭuḥt. Ma d netta amzun kra ur yeḍri, iteddu yettseffir, yettγenni am yilemẓi yezhan. Imγaren n tura ttimγuren ttḍellilen. Ass-agi kan i d lεid tameẓẓyant, mazal ur ifukk ara wass, netta yettxemmim γer lεid tameqqrant akken ad yuγal ad d-iγafer Sekkura. Ihar…
Sin wayyuren ur εeddan almi rran taqerruyt n Zizi Belεid d tamellalt am udfel. Timerjiwt n wass n lεid tameqqrant tceyyeb yir amγar. Muḥend d yemma-s Malḥa, imeγban n Rebbi, weklen uccen γef yiγiden. I Zizi iwimi fkan diγen lemγafrat n lεid tameqqrant ad tt-yawi i teslit-nsen Sekkura. Deg uḍellaε gren-as snat tqendyar, tayuga n tṣṣebbaḍin d teγruḍt n yizimer yemmden. Netta yerna-as, sγur-s tayuga n tmengucin n wureγ i yefka i Sekkura sdat n yimawlan-is. Ireggem-as d netta i s-tent-id-yuγen akken ad s-d-rnunt deg ccbaḥa assen ara d-teddu d tislit s axxam-is. Itekka nezzeh γef wawalen “axxam-is” akken ad s-d-slen yiḍulan-is.
Iḍulan-is ur gzin tren. Nnan kan deg wulawen-nsen ahat at taddart ufella gan akk am Zizi-tsen Belεid.
Wwḍen-d Ṣṣmayem, ihubb-d ubeḥri n tmeγriwin. Tin yekfan tayeḍ ad tebdu, yal ass tettili-d yiwet n tmeγra deg taddart Ufella, seksu d uksum ugaren.
Ass-a d ass n lḥedd, d ass ara d-srekben yiqeffafen tislit Sekkura i yisli Muḥend. Muḥend yexdem akken akk xeddmen yislan. Yelsa iselsa imaynuten, iwenneε aseṭṭel n ucebbub-is, yerra aman n rriḥa, yeqqim d yimeddukal-is wunsen-t. Zizi Belεid gren-as tamawt wat taddart ula d netta icebbeḥ-d am yisli, ula d claγem-is yerra-ten-id d iberkanen am rric n tgerfa s ssbeγa. Ttqessiren fell-as yimeεraḍen-is s uεekki: “Wellah ad s-tiniḍ d kečč i d isli.
-Ur teḥnitem ara mi tegullem, akka i yella lḥal. I sen-yerra baba-s n yisli.
Nutni tekcem-iten teḍsa, ur fkin ara akk azal i yimeslayen i sen-d-yenna.
Taddart merra tettwaεreḍ ad tečč seksu d uksum. Irgazen ssufuγen lbarud, tilawin kkatent urar, sliliwent s ṭṭelq n yigrejyam-nsent. Iḍ iεedda akin i uzgen. Muḥend i d-suεfen kra n yimeddukal-is γer sdat tewwurt n texxamt-is anda i t-traju teslit Sekkura i d-icebbḥen am wayyur, ad isεeddi yid-s iḍ amenzu n tissulya-nsen, yufa baba-s yezwar-it γer umnar n texxamt n teslit. Deg tazwara nwan akk teεreq-as i Zizi Belεid tewwurt n texxamt-is. Maca ččan akk tamsalt mi d-yenṭeq yenna-asen: “Sekkura d tameṭṭut-iw! I nekk iwimi tt-id-uγeγ mačči i Muḥend!”
Urar yeḥbes din, dγa teγli-d yiwet n tsusmi izi ma iεedda-d syin ad s-tesleḍ yekkat deg wafriwen-is. Imeεrad qqimen ddehcen, awal ur ten-id-yuli. D acu-t akka tura ssuq-agi? Muḥend mi i d-yuγal γer leεqel-is, iwala baba-s akken i ilaq ad t-ittwali yal ass, d yir lεebd, immeγ γef tmegḥelt n yiwen umeεraḍ, yekkes-as-tt-id s waḥwaṣ, yerra tixnefyac-is metwal Zizi-s, yejbed deg znad mebla ma ixemmem γef kra, ffγen sin lewjuhat wa deffir wayeḍ, lamana tewweḍ γer bab-is.“Acacfal yeṭllayen” yeγli tinnegnit am uzeqqur γef tmurt yemmut deg lmeṭeq.
Deg Tazmalt (Bgayet) ass n 01/07/2009.