Yella yiwen wemγar d tmeṭṭut-is, deg tallit tamezwarut, lan yiwet teqcict. Nettat tezwej. Tella ar wergaz-is. Ar deqqal, tṛuḥ yemma-s γur-s. Teqqim sin wussan neγ kraḍ, ar deqqal tuγal-d armi d axxam-is. Teqqim.
Yekkr-d wemγar-nni yenna-yas : « ula d nekk ad ṛuḥeγ ar yelli.» Iṛuḥ γur-s, yeqqim γur-s azal n mraw d semmus (15) wussan. Tusa-d tmeṭṭut-is tceyyε-as, tenna-yas: « a d-taseḍ.” Yenna-yas-d netta: “ur n-ttaseγ ara.» Yenna-yas : « amek ! Armi d-lliγ deg wexxam-iw, tetteγ taga. Tura, ur n-ttṛuḥuγ ara. » Yenna-yas i temγart: «Am din, am da, tura nekkini ufiγ-d anda tetten sekksu d weksum d wudi. Tura, qim, kemmini, dinna.”
Dγa imir-nni tekker temγart-nni, tṛuḥ ula d nettat. Tṛuḥ γer yelli-s. Qqimen dinna i sin. Qqimen ugar n snat tmerwin n wussan.
Yekkr-ed uḍeggal-nsen, yessers allen-is deg-sen. Tamγart-nni tuki s uḍeggal-nsen yessetḥa deg-sen, ur yebγi ara ad sen-yini: «ekkret ad tṛuḥem s-ya.” Tenna-yas temγart-nni i wegaz-is: « Ekker a nṛuḥ. »
Ṛuḥen-d. Armi d-wwḍen s axxam-nsen, qqimen acu qqimen. Tekker-d temγart-nni, tenna-yas: «nekkini ad uγaleγ ar yelli.» Tuγal ar yelli-s, teqqim γur-s. Amγar-nni yeqqim deg wexxam-is iman-is. Yelli-s nni, yeggul deg-s wergaz-is, yenna-yas : “s Ṛebbi! Mer ad tuγaleḍ ad tezziḍ akk d imawlan-im, ar d gezmeγ d aqerru-im!” Tekker-d nettat teεweq, tmeγbunt, amek ara texdem ad tebru deg imawlan-is neγ ad tebru i wergaz-is. Tekker-d ar yemma-s, tenna-yas: “ A yemma, ekker ad tṛuḥeḍ. Argaz-iw ur yebγi ara imi teqqimeḍ da. »
Tekker-d temγart-nni, tṛuḥ-d. Armi d-tzeggen abrid, temugger yiwen wergaz. Yenna-yas wergaz-nni : « A tamγart, ur tezzewğeḍ ara ? » Tenna-yas : « Nekkini s wergaz-iw ; a yi-teqqareḍ : ad tzewjeḍ ! » Yenna-yas : « Yerza-kem wergaz-im ! Iyya ad tzewjeḍ yid-i, a yi-taγeḍ. » Tṛuḥ temγart-nni, tedda akk d wergaz-nni.
Argaz-is ar yettqellib fell-as, yuys-itt umeγbun ṛṛebbi. Yenna-yas: “Ad ṛuḥeγ ṭra ar wexxam n yelli. Ahat a tt-afeγ dinna. » Yewweḍ, ur tt-yufi ara ; isseqsa yelli-s, yenna-yas: “A yelli, yemma-m m ur-d-tewwiḍ ara γer da?” Tenna-yas yelli-s: “A baba, tella dagi. Armi deqqal, tṛuḥ-en. Ag ella ur n-tewwiḍ ara s axxam?” Yenna-yas: “A yelli, ur d-tewwiḍ ara.” Teṭṭerḍeq teqcict-nni s imeṭṭawen. Yenna-yas: “ A yelli, ur tettru ara. Ad ṛuḥeγ, ad qellbeγ fell-as alamma ufiγ-tt.»
Iṛuḥ, ar yetthummu di tmura armi yewweḍ γer yiwet taddart. Yesseqsa. Yenna-yas yiwen weqcic : « A baba amγar, yella yiwen dagi yella ur yesεi ara tameṭṭut; tura ẓriγ γur-s tameṭṭut. Ahat d tinna.” Yenna-yas: “Ihi, a mmi, ad tedduḍ yid-i, ad iyi-tessekneḍ axxam-is. Ad ẓreγ s wallen-iw. Ahat, ihi, d tinna.» Yedda yid-s weqcic-nni. Armi t-yessaweḍ yessekn-as axxam n winna. Uγalen-d.
Armi d tameddit, yeğğa winna armi yeffeγ ar twuri-s. Yekcem s axxam, yufa tameṭṭut-is. Tenna-yas: “Acu i k-id-yewwin γer da, ay amγar-agi?” Yenna-yas: “Akka ay telliḍ a ddunit! Telliḍ d tameṭṭut-iw; tura tenkerḍ-iyi!” Tenna-yas: ur k-ssineγ. Ur iyi-tessineḍ. » Iṛuḥ-d wemγar-nni. Iṛuḥ yeccetka s winna i s-yewwin tameṭṭut-is ar unezzarfu. Yenna-yas: “ Ay anezzarfu, argaz-agi yewwi-yi tameṭṭut-iw.” Iceyyε-as unezzarfu i wergaz-nni. Yusa-d wergaz-nni. Yenna-yas unezzarfu: “Acu n taluft i k-yellan akk d wergaz-agi?” Yenna-yas: “A mass inu, ur t-ssineγ ara.» Yekker-d wemγar-nni, yenna-yas: « A mass anezzarfu, argaz-agi yewwi-yi-d tameṭṭut-iw.” Yenna-yas unezzarfu i wergaz-nni: “Acu la yettmeslay wergaz-agi? Yak, la tesseleḍ. La k-yeqqar wergaz-agi: Tameṭṭut-iw ay yewwi. Tura, ma d tidett neγ uhu ? » Yenna-yas wergaz-nni : « Nekkini, a mas anezzarfu, ur as-wwiγ ara.» Yenna-yasen unezzarfu : « Ihi, kenwi akk imeslayen-nwen ur asen-smuzguteγ ara. Ssiwlet i tmeṭṭut a d-tas. D tin akk ara yessiwlen tidett, akken a d-iban wezref wi t-ilan. » Ssawlen-as. Tusa-d, tenna-yas : »Acu tebγiḍ, ay ameqqran inezzurfa ? » Yenna-yas : « Anwa ay d argaz-im seg wi ? » Tenna-yas : « A mass inu, nekkini, d wagi akk d id-usiγ, ay d argaz-iw. » Yekker-d unezzarfu, yenna-yas i wemγar-nni: «Ula i k-giγ. Ur zmireγ ara ad as-tt-kkseγ imi nettat tebγa, la yi-teqqar: D wagi ay d argaz-iw.»
Yekker-d wemγar-nni, iṛuḥ, umeγbun, ar yetthummu deg imudaγ. Armi d-yewweḍ ar yiwen yideg, yufa tamda teḥbes, ur tettazzal ara. Yenna-yas: “Nekkini, tura, anida ara ṛuḥeγ? Ad uγaleγ ar yelli? Ad iy-yezlu wergaz-is. Ad uγaleγ s axxam-iw? Ad qqimeγ iman-iw ? Ur zmireγ ara ad qqimeγ am userdun. Tura sεiγ anida ara ṛuḥeγ. Ad bruγ iman-iw deg temda-yagi; ad sgunfuγ i inezgumen n tudert!” Yebra iman-is deg temda-nni.
Tuγal tmeṭṭut-is, inekkr-itt wergaz-nni. Tenna-yas: “Nekkini γileγ ad iyi-tesselkeḍ. Armi tugiḍ, tura nekkini ad ṛuḥeγ. Ṛebbi inu yella, ur iyi ttağğa ara.” Yenna-yas: “Nekkini ur bγiγ ara win ar y-yessiwḍen γer unezzarfu. Tura, ṛuḥ γef yiman-im!»
Tṛuḥ, ar tetteddu deg webrid iman-is. Tenna-yas: “Amek ara geγ i ṛṛay-iw, imi skelliγ argaz-iw? Tura, ad ṛuḥeγ γer yelli? Ad tendeh i wergaz-is fell-i ; ad iy-yezlu. » Tṛuḥ ar zdat. Armi tewweḍ γer temda-nni deg yeγli wergaz-is amezwaru, tenna-yas: «Tamda-yagi ad iy-tečč, yif-itt akka wala ma ẓran medden γef tin i y-iga yexf-iw.» Tebra iman-is, ula d nettat, γer temda-nni deg yeγli wergaz-is. Γlin dinna deg sin. Tamda-nni ar ass-a qqaren-as: TAMDA N ṬMEΣ.